2
1 तुमांअ खातुर आने लावोदीकेया सेहेरामेर्याअ ख्रीस्ती लोकाहांअ खातुर आने बीहरा बादा ख्रीस्ती लोक का जीयाहां मांन नांह देख्यो तीयाहांअ खातुर मांयुं कोतीअ तोकलीत वेठीन मेहनोत केअयीह तों तुमां जांय ला एंहडी मांअ मोर्जी हाय। 2 मांयुं एंहडी मेहनोत ईयाअ खातुर केअयीह का, ते लोक आने तुमां एक-बीहराअरी जोळाअला रा, आने एक-बीहरापेअ माया राखा, आने ईयाकींअ तुमां बादें आत्मीक जीवोनाम मोजबुत बोंणा, आने भेदुवाली गोठ पुरी रीते आने बोराबोर होमजा, मोंजे का, पोरमेहेराअ बाबोताअ भेदुवाली गोठ तुमां हाची रीते जांय ला, मोंजे का, हाची रीते तुमां ख्रीस्तुल ओअखा। 3 ख्रीस्तज तुमनेंह बादाहांन पोरमेहेराअ ते भेदुवाली गोठ बोराबोर होमजावनारो हाय। ते होमजांअ जेंहडी खास गोठ हाय।
4 हाची गोठीअ होच लागनारी झुटी गोठीहींकींअ केडों बी तुमनेंह खाराब वाटे नांय दोरी जाय तीयाअ खातुर आंय ए बादया गोठ्या तुमनेंह लेखुंह। 5 काहाका, सोरीलाअ रीते ता आंय तुमांअ से सेटे हाय तेबी, तुमांअ बाबोताम मांन चींता लागीह। पेन तुमां एक-बीहराअरी होप कीईन रेतेंह आने ख्रीस्तुपेअ तुमां राखला वीसवासाम मोजबुत रेतेंह तों जांयन ता आंय खुस हाय।
ख्रीस्तुअ आर्याअ आपुअ जोळाणुअ लीदे आपनेंह मीलनारी खामी वोगुराअ जीनगी
6 “ख्रीस्त ईसु आमांअ मालीख हाय” एंहकींअ तुमां मानी लेदोंह तीयाअ लीदे, तीयाअरी जोळाअला लोकाहांन सोबे तेंहकींअ जीवजा। 7 आने तीयाअरी बोराबोर जोळाअलें रेजा, आने तुमांअ आत्मीक जीवोनाहांम वादतें जाजा। आने ख्रीस्तुपेअ तुमां राखला वीसवासाम आत्मीक गोठ्या हीकया पोरमाणे वादारे ने वादारे मोजबुत वेअतें जाजा। आने ख्रीस्तुअ खुब आभार मानतें रेजा। 8 नोक्कामा आने झुटा धारमीक गीयानुकींअ केडों बी तुमनेंह तीयाअ मोर्जी पोरमाणे नांय चालवी सेके तीयाअ खातुर चेतीन रेजा। तों झुटों गीयान मांहांहां बोंणावला बोदाहांअ पोरमाणे आने पुतळाहांअ बाबोताम दुन्याअ मांहांहां बोंणावला बोदाहांअ पोरमाणे हाय। पेन पोवीतोर आत्माअ मारफोते ख्रीस्त जे हाचाय हीकवेह, तीयाअ पोरमाणे नांह। 9 काहाका, नोक्की जांअजा का ख्रीस्तुअ सोरीलाम ुज पोरमेहेराअ बादा गुण रेताह। 10 ख्रीस्तुअ आर्याअ तुमांअ जोळाणुअ लीदेज पोरमेहेरांय तुमनेंह खामी वोगुराअ जीनगी देदीह। आने ख्रीस्तज राज केअनारा बादा आत्माहांअ उपरी हाय।
11 ख्रीस्तुअ आर्याअ तुमांअ जोळाणुकींअ तुमांअ सुन्नोत वीयीह। ए सुन्नोत ता लोकाहीं नांह केअयी, पेन ख्रीस्तुंह केअयीह। ईयु सुन्नोतुकींअ तीयांय तुमांअ पापी सोबावुल तुमांअ जीनगींहमनेअ काडी टाक्योह। 12 तुमां बापतीस्मा केराव्यों तांहांअ तुमां बी आत्मीक रीते मोयन ख्रीस्तुअरी डाटाअलें। आने जीया पोरमेहेरांय सोताअ ताकोताकींअ ख्रीस्तुल मोअलामेनेअ जीवतो उठव्योह, तीयांयज तीयापेअ तुमां राखला वीसवासाअ आदारे तुमनेंह बी बापतीस्माअ वोखत आत्मीक रीते ख्रीस्तुअरी जीवतें उठव्येंह। 13 ख्रीस्तुल तुमां मान्यो तीयाअ पेअलांअ तुमां पाप केअला, आने तुमां येहुदी जातीअ नांह तेंहडें आथें, आने मोसेअ मारफोते पोरमेहेरांय देदला नीयोम तुमाहांपेअ नांय आथा, आने तुमां तुमांअ पापी सोबावाअ काबाम आथें। तीयाअ लीदे, तीयु वोखत तुमां आत्मीक रीते मोअलें आथें। पेन आमी पोरमेहेरांय तुमनेंह ख्रीस्तुअरी आत्मीक रीते जीवतें केअयेंह। तीयांय आपुअ बादा पाप माफ केअयाह। 14 मोंजे का, जों लेखाण आपुअ गुनांअ सीक्सा आपनेंह मीलांअ जोजे एंहकींअ जाहेर केअत्लों, तों लेखाण पोरमेहेरांय नुसी टाकीन रोद केअयों, मोंजे का, तीयांय आपुअ बादा पाप माफ कीअ देदा। ख्रीस्तुल मांहांहां खीला ठोकीन कुरुसापेअ जोळलो तांहांअ पोरमेहेरांय तेंहकींअ माफ केअया। 15 आने कुरुसापेअ ख्रीस्त मोअयो तीयाकींअ पोरमेहेरांय, राज केअनारा पुतळाहांन ताकोतु वोगुराअ बोंणावी देदा। आने एंहकींअ कीईन तीयांय तीयाहांन हारव्या, आने जेंहकींअ एक राजा तीयाअ दुसमोनाहांन हारवीन तीयाहांन लोकाहांअ आगलांअ केदी तोरीके सोताअ देसाम लीअ आवे, तेंहकींअ पोरमेहेरांय तीया पुतळाहांन केदी तोरीके लीअ आवीन तीयाहांपेअ तीयांय मीलवुअली जीत जाहेर रीते देखावी।
16 तीयाअ लीदे, तुमां ओमुक मांडो खातेंह ने ओमुक पीणो पीतेंह तीयाअ लीदे, का वोरसाम का आमासुअ दीह का आठवाळ्याअ आरामाअ दीहाहांम बीहरें मांहेंअ जे तेहवार वालतेंह ते तुमां नांह वालतें तीयाअ लीदे, तुमनेंह गुनालें आखनारा केल्ला बी मांहांअ पारवाअ मां केअतें। 17 जेंहकींअ सांय नोवती देखीन एगोंह आवेह एंहकींअ आपुंह जांय जातेंह, तेंहकींअ ईया बादाहांअ बाबोताअ नीयोम ता ख्रीस्तुंह आपनेंह जे आत्मीक आसीरवाद देदाह तीया बाबोताम, ख्रीस्तुअ पेअलांअ आथें तीया मांहांहांन जाणावांअ खातुरुज आथा। 18 जों मांहुंअ सोते जेंहकींअ पोरमेहेराअ भोकती केरांअ तुमनेंह फोरोज पाळेह तेंहकींअ तुमां भोकती नांह केअतें, मोंजे का, जेंहकींअ तो सोते केअहे तेंहकींअ तुमां झुटो गोरीबळो सोबाव नांह राखतें आने होरगाअ दुताहांअ भोकती नांह केअतें तीयाअ लीदे तुमनेंह गुनालें आखनारा केल्ला बी मांहांअ पारवाअ मां केअतें। तों मांहुंअ सोताल दोरसोनें वेअलें एंहकींअ आखीन, तीयाअ आदारे बीहराहांअ केअता सोताल मोडों गोंअहे, आने काय बी कारोणा वोगुर सोताअ पापी सोबावाअ वीचाराहांकींअ ओभीमान राखेह। 19 पेन तों मांहुंअ ता, सोरीलु रुपी मोंडोळाअ उपरी ख्रीस्तुअरी जोळाअलों नांह रेतों। ईया ख्रीस्तुअ आदीनुम रीईनुंज आखा मोंडोळाल आत्मीक मांडो मीलेह। जेंहकींअ सोरीलाअ बादा भाग हांदांहकींअ एक-बीहराअरी जोळाअला रेताह आने एंहकींअ कीईन आखों सोरील वादेह, तेंहकींअ मोंडोळाअ बादें मांहेंअ एक-बीहराअरी आत्मीक रीते जोळाअलें रीईन पोरमेहेरापेनेअ आत्मीक मांडो मीलवुअतेंह आने आत्मीक रीते वादतेंह।
ख्रीस्तुअरी आत्मीक रीते मोरुलोंअ आने जीवुलोंअ
20 जो मोअलो तीया ख्रीस्तुअरी तुमां जोळाअलें हाय, आने जेंहकींअ मोअलों मांहुंअ दुन्याअ फोरोजुंहमनेअ सुटों वीअ जाहे, तेंहकींअ पोरमेहेरांय तुमनेंह पुतळाहांअ बाबोताम मांहांहां बोंणावला बोदाहांअ काबामनेअ सोळव्येंह। ए गोठ हाची हाय तेबी आजी तुमां ईयु खाराब दुन्याअ लोक वीअ तेंहडा ए बादा नीयोम काहा पालतेंह? 21 “ए वोस्तु आथाम नांय लेवुलोंअ, एपली वोस्तु नांय खावुलोंअ, फोलाणी वोस्ताल नांय आथलुलोंअ” एंहडा नीयोम तुमां काहा पालतेंह? 22 ए बादा नीयोम ता, जे वोस्तु वापरीन हातींअ पुर्या वीअ जात्याह, तीयुहुंअ बाबोतामुज हाय। आने ते नीयोम मांहांहां बोंणावला हाय। 23 ए नीयोम लोकाहांन गीयानुवाला वीअ तेंहडा लागताह। काहाका, ते नीच मांहांहां नोक्की केअया पोरमाणे पोरमेहेराअ भोकती केरांअ, आने झुटी रीते गोरीबळो सोबाव राखांअ, आने सोताअ सोरीलुंहन दुखें पाळांअ हीकवुअताह, आने तीया लोकाहांन सोताअ सोरीलाहांअ खाराब मोर्जींहन काबाम राखांअ मोदोत नांह केअता।