3
1 जेंहकींअ पोरमेहेरांय ख्रीस्तुल मोअलामेनेअ जीवतो केअयो, तेंहकींअ तीयांय तुमनेंह बी ख्रीस्तुअरी आत्मीक रीते जीवतें केअयेंह। तीयाअ लीदे, पोरमेहेरांय तुमांअ खातुर होरगाम थोवी राखला आसीरवाद मीलवांअ मोर्जी राखा। तींहींज ख्रीस्त पोरमेहेराअ हुदा आथाअ वेल, मोंजे, खुब मानुवाला जागे, बोठलो हाय। 2-3 पेअलांअ तुमां जेंहकींअ वोरतुअत्लें तेंहकींअ वोरतांअ तुमां मोअला मांहांअ होच सोळी देदोंह। आने आमी तुमां पोरमेहेराअ हाजरीम हाय तीया ख्रीस्तुअरी आत्मीक रीते जीवतेंह। तुमांअ एंहडों जीवोन बीहरा लोकाहांन नांह देखाअतों। तीयाअ लीदे, तोरतीपेरीअ वोस्ताहांपेअ नांय पेन होरगामेन्याअ आसीरवादुंहपेअ मोन राखा। 4 तुमनेंह आत्मीक रीते जीवावनारो ख्रीस्त जाहेर रीते देखाय तांहांअ, तुमां बी खुब मान मीलवीन तीयाअरी देखाअहा।
जुनों ने नोवों जीवोन
5 तीयाअ लीदे, सीनालों, आने बीहरें खोटें कामें केरांअ खाराब मोरज्या, आने लोब जीयाल तुमांअ देवुअ होच बोंणावी देतेंह तो, आने एंहडा खाराब सोबाव आने कामें तुमांअ जीवोनाहांम रांअ मां देतें। 6 एंहडा खाराब कामाहांअ लीदे, पोरमेहेर तीयाअ आखलों नांय माननारा लोकाहांन सीक्सा कीअ। 7 पेअलांअ तुमां तीया खाराब सोबावुंअ काबाम आथें। तांहांअ तुमां बी एंहडें खाराब कामें केअया केअत्लें।
8 पेन आमी तुमां रोगवायांअ सोळी दा। आने एक-बीहराअ खोटों केरांअ मोर्जी मां राखतें। आने एक-बीहराअ बाबोताम झुटया गोठ्या मां उडवुअतें। आने एक-बीहराअ नींदा बी मां केअतें। 9 आने एक-बीहराअरी झुटों मां गोगतें। एंहडें खाराब कामें फाचें मां केअतें। काहाका, तुमां तुमांअ जुनो पापी सोबाव आने तीयाअ सोबावाअ लीदे वेअनारें खाराब कामें केरांअ सोळी देदोंह। 10 आने तुमां नोवो सोबाव मीलवी लेदोह। आने तुमांहम एंहडो नोवो सोबाव पेदा केअनारा पोरमेहेराल तुमां पुरी रीते ओअखा तीयाअ खातुर तो तुमांअ सोबावुल सोताअ सोबावाअ होच वादारे ने वादारे नोवो बोंणावतो रेहे। 11 तीयाअ लीदे, पोरमेहेरांय बोंणावलो ओ नोवो सोबाव मीलवुअला मांहांहांअ सोमाजुम, तीयाअ नोजराम येहुदींहम आने येहुदी जातीअ नांह तेंहडा लोकाहांम काय बी फेर नांह। ने बीहरा देसाअ लोक का जोंगली लोक, का गुलाम, का जे गुलाम नांह तीया बादा लोकाहांम काय फेर नांह। पेन ख्रीस्त बादाहांअ केअता मोडो हाय आने तो तुमांअ बादाहांअ मोनाहांम हाय।
12 तुमां पोरमेहेराअ लोक हाय। तीयांय तुमाहांपेअ माया राखीह आने तुमनेंह सोताअ लोक वेरांअ पोसोंद केअयाह। तीयाअ लीदे, तुमां एक-बीहरापेअ लागणी ने दाया राखा, आने एक-बीहराअ आगलांअ गोरीबळो सोबाव राखा, आने बीहराहांअ केअता सोताल वादारे हारें मां गोंअतें, आने एक-बीहराअरी धीरोज राखीन वोरता। 13 आने एक-बीहराअ भुल वेठी ला, आने एक-बीहराअरी भानगुळ वेअ ता एक-बीहराल माफ केरा। जेंहकींअ मालीखांय तुमनेंह माफ केअयाह, तेंहकींअज तुमांअ बी एक-बीहराल माफ केरांअ जोजे। 14 आने ईं बादों कीईन तुमां एक-बीहरापेअ माया राखा। ते बादा केअता वादारे खास गोठ हाय। काहाका, एंहकींअ कीईन माया राखा ता, तुमां बादें आरी मीलीन एक-बीहराअरी पुरी रीते जोळाअलें रीहा। 15 ख्रीस्त तुमांअ मोनाहांम देहे तीयु सांतीकींअ तुमां एक-बीहराअरी रा। काहाका, तुमांअ मोंडोळाम तेंहकींअ कीईन एक-बीहराअरी रांअ खातुरुज पोरमेहेरांय तुमनेंह पोसोंद केअयेंह। आने कायोम पोरमेहेराअ आभार मानतें रा।
16 आने खुब गीयानुकींअ तुमां एक-बीहराल बोद दा आने चेतवा, आने पोवीतोर लेखाणाहांअ आदारे लेखाअलें गीतें, आने मालीख ईसुअ बाबोताअ गीतें, आने पोवीतोर आत्मा मोदोताकींअ लेखाअलें बीहरें गीतें आखा। आने गीतें आखता-आखता तुमांअ मोनाहांम पोरमेहेराअ आभार माना। आने एंहकींअ कीईन ख्रीस्तुअ बाबोताअ गोठ बोराबोर जांय ला। 17 आने जोंबी आखा ने केरा, तों बादों मालीख ईसुअ काबाम रेनारांहन सोबे तेंहकींअ केरा आने तीयाअ मारफोते पोरमेहेर बाहकाअ आभार माना।
ख्रीस्ती तोरीके एक-बीहराअरी वेहवार
18 बायुहुं, तुमांअ कोअवालाहांअ आखलों माना। काहाका, ख्रीस्ती तोरीके तुमांअ तेंहकींअज केरांअ जोजे।
19 आदमीहीं, तुमांअ कोअवालींहपेअ माया राखा आने तीयुहुंअरी कोळोक रीते मां वोरतुअता।
20 पोयराहां, कायोम तुमांअ याहकी-बाहकाअ आखलों माना। काहाका, मालीख ईसुअरी जोळाअलें तुमां तेंहकींअ केरा तों पोरमेहेराल गोंवेंह।
21 याहकी-बाहकाहां, तुमांअ पोयराहांन रोग मां चोळवुअतें। जो तुमां तीयाहांन रोग चोळवाह ता, तीयाहांअ जीव पोळी जाय।
22 चाकोराहां, दुन्याअ रीते तुमांअ सेट हाय तीयाहांअ आखलों बादी बाबोताम माना। तीयाहांन खुस राखांअ खातुर तीयाहांअ देखता ओतोंअज नांय, पेन ते हाजोर नांय वेअ तांहांअ बी, मालीख ईसुपेअ तुमांअ जों मान हाय तीयाअ लीदे खेरा मोनाकींअ तीयाहांअ आखलों माना। 23 आने तुमां जोंबी काम केरा तों, मांहांहां आख्योंह तीयाअ लीदे ओतोंअज नांय पेन मालीख ईसुंय आख्योंह तीयाअ लीदे बी केअतेंह एंहकींअ वीचारीन, तुमांअ पुरा मोनाकींअ तों केरा। 24 काहाका, खोरेखोर ता, तुमां ख्रीस्त मालीखाअज सेवा-चाकरी केअतेंह। तुमनेंह खोबुर हाय का, मालीख ईसुंय सोताअ लोकाहांअ खातुर जो आसीरवाद थोवी राख्योह, तो तीयाअ बोदलाम तुमनेंह तो दीअ। 25 आने जोंबी मांहुंअ खाराब कामें केअहे, तीयाल पोरमेहेर तीया खाराब कामाहांअ लीदे सीक्सा कीअ। ईत राखजा का, पोरमेहेर बादाहांअ हारकोज नीयाय केअहे।