4
1 सेटुहुं, तुमनेंह खोबुर हाय का, तुमांअ बी एक मालीख होरगाम हाय, आने तीयाल तुमांअ कामाहांअ हीसाब दांअ पोळीअ। तीयाअ लीदे, तुमांअ चाकोराहांअरी नीयायी रीते आने हारकींअ वोरतुअजा।
बीज्या सालाह
2 पोरमेहेराअ आभार मानता आने बोराबोर धीयान राखता कायोम तीयाल ओरुज केअया केअजा। 3 जांहांअ बी तुमां पोरमेहेराल ओरुज केरा, तांहांअ मांअ खातुर बी तीयाल ओरुज केअजा का, ख्रीस्तुअ बाबोताअ भेदुअ गोठ लोकाहांन जाहेर केरांअ पोरमेहेर मांन मोको दे। ते गोठ मांयुं जाहेर केअयीह तीयाअ लीदेज आंय जेलाम कोंडाअयोह। 4 तीयाअ लीदे, पोरमेहेराल ओरुज केअजा का, जेंहकींअ कीईन ते गोठ जाहेर केरांअ जोजे, तेंहकींअ कीईन आंय लोकाहांन ते चोख्खी रीते जाहेर क्युंव।
5 आने जीयाहां ईसुपेअ आजी वीसवास नांह केअयो, तीयाहांअरी गीयानुवाला लोकाहांन सोबे तेंहकींअ वोरतुअजा, आने ख्रीस्तुअ बाबोताअ हारी गोठ तीयाहांन आखांअ दोरेक मोकाअ लाब लेजा। 6 आने तुमां जों काय गोगा, तों उनाअनाराहांन गोंवें आने तीयाकींअ तीयाहांन फायदो वेअ तेंहडों कायोम गोगजा। आने तुमां एंहकींअ कीअहा ता, ख्रीस्तुअ बाबोताम फुचनारा दोरेक मांहांअल केंहकींअ खेरो जोवाब दांअ जोजे तों तुमां जांय लीहा।
सेल्या गोठ्या
7 तुखीकु तुमनेंह मांअ हालोताअ बादी खोबुर दीअ। तो मांअ मेरालो ख्रीस्ती पावुह आने मांअ खातरीवालो मोदोत केअनारो हाय आने मालीखाअ सेवाम आमांअ आर्योअ सेवोक हाय।
8 तुमांअ बादाहांअ हालोत जांयन तो तुमनेंह उफ दे तीयाअ खातुर आंय तीयाल तुमांअहीं मोकलुंह। 9 आने तीयाअरी मांयुं तुमांअ सेहेराअ ओनेसीमुल बी मोकल्योह। तो मांअ मेरालो आने खातरीवालो ख्रीस्ती पावुह हाय। ते बेनुं ईंहींर्याअ बादया गोठ्या तुमनेंह जाणावीअ।
10 मांअरी जेलाम कोंडाअलो आरीस्तारकु तुमनेंह सालाम देहे। तेंहकींअज कीईन बारनाबाअ कोर्योअ मार्क बी तुमनेंह सालाम देहे। (मांयुं तुमनेंह पेअलांअ लेखलों तेंहकींअ, मार्क तुमांअहीं आवे ता, तीयाल आवकार देजा।) 11 आने योसुवा, जो युसतु बी आखाअहे तोबी तुमनेंह सालाम देहे। लोक सोताअ जीवोनाहांम पोरमेहेराअ राज्याअ ओनुभोव केअ तीयाअ खातुर मांअरी सेवा केअनारा येहुदी ख्रीस्ती ए तीनुंज हाय। आने ते मांन खुब दीलासो देया केअताह।
12 आने तुमांअ सेहेराअ बीहरो एक जांअ एपाफीरा, जो ख्रीस्तुअ सेवोक हाय तोबी तुमनेंह सालाम देहे। तो खुब लागणी राखीन तुमांअ खातुर पोरमेहेराल कायोम ओरुज केअया केअहे का, तुमां वीसवासाम पाकें वेरा आने पोरमेहेराअ पुरी मोर्जी बोराबोर जांय ला ने ते पुरी केरा। 13 तो तुमांअ खातुर ने लावोदीकेया ने हीयेरापोली मोंडोळुंअ लोकाहांअ खातुर खुब मेहनोत केअहे तीयाअ आंय सोतेज साक्सी पुरुंह। 14 मांअ मेरालो डाकटोर लुक आने देमा बी तुमनेंह सालाम देताह।
15 लावोदीकेयामेर्याअ वीसवासी पावाहांन, आने नीमफाल, ने तीयुअ कोअमें चालनारा मोंडोळाअ लोकाहांन आमांअ सालाम देजा। 16 ईं कागलों तुमांअ मोंडोळाम वाचावीन हातींअ लावोदीकेया मोंडोळाम बी वाचावजा। आने तेंहकींअज लावोदीकेयामेर्याअ वीसवासी पावुह मांअ जों कागलों तुमनेंह मोकलीअ, तों तुमांअ मोंडोळाम बी वाचावजा। 17 आने आरखीप्पुल आखजा का, मालीखाअ सेवाम तीयाल होपाअली जोवाबदारी तो हारकींअ पुरी केअ।
18 आंय पावुल सोतेज मांअ आथाकींअ तुमनेंह मांअ सालाम लेखुंह। आंय जेलाम कोंडाअयोह तीयाअ लीदे मांअ जोरुल्या पुर्या पाळांअ ईत राखजा।
पोरमेहेर तुमाहांपेअ मेरबानी केअ!