थेस्सालोनीका सेहेराअ मोंडोळाल पावुलाअ पेअलोंअ कागलों
1
थेस्सालोनीका लोकाहांअ वीसवास आने ख्रीस्ती जीवोन
1 थेस्सालोनीका सेहेराअ ख्रीस्ती मोंडोळाअ लोकाहांन तुमनेंह जे पोरमेहेर बाहकाअ आने मालीख ईसु ख्रीस्तुअ लोक हाय तीयाहांन आमां पावुल, सीला, ने तीमोथी सालाम देताह।
पोरमेहेर तुमाहांपेअ मेरबानी केअतो रे ने तुमनेंह सुख-सांती देतो रे!
2 आमां तुमांअ बादाहांअ खातुर कायोम पोरमेहेराअ आभार मानताह आने तीयाल ओरुज केअताह। 3 तुमांअ खातुर आमां आपुअ पोरमेहेर आने बाहकाल ओरुज केअताह तांहांअ आमां ख्रीस्तुपेअ तुमां राखलो वीसवास जो तुमां सोताअ कामाहांकींअ देखावतेंह तो आने तीयापेअ तुमां राखली मायाअ लीदे तुमां जे खुब सेवा केअतेंह ते, आने आपुअ मालीख ईसु ख्रीस्तुअ फाचो आवांअ दीहाअ आस्याअ लीदे सोताअ वीसवासाम मोजबुत हाय तों, ईत केअताह।
4 पावु-बोंअयुहुं, आमां जांअताह का, पोरमेहेर तुमाहांपेअ माया राखेह आने तीयांय तुमनेंह सोताअज लोक वेरांअ पोसोंद केअयेंह। 5 काहाका, आमां तुमांअहीं ख्रीस्तुअ बाबोताअ हारी गोठ जाहेर केरांअ आलला तांहांअ एखला सोब्दांहकींअज नांय पेन पोवीतोर आत्मांय सोताअ ताकोताकींअ केअला कामाहांकींअ बी आमां ते गोठ जाहेर केअली। आने हारी गोठीअ हाचायुपेअ आमनेंह पुरो वीसवास हाय तो बी आमां तांहांअ देखावलो। आने आमां तुमांअरी आथा तांहांअ आमांअ चाल-चोलगोतींहकींअ आमां हारी गोठीअ हाचायुअ साबीती देदली तों बी तुमां जांअतेंह। आने तों तुमांअ आत्मीक लाबुअ खातुर आथों। 6 आने आमां सोते जेंहडों जीवोन जीवत्ला ने मालीख जेंहडों जीवोन जीवत्लो, तेंहडोंज जीवोन तुमां बी जीवांअ टेक्येंह। आने हारी गोठीअ लीदे तुमां खुब दुखें वेठलें तेबी तुमां ते गोठ पोवीतोर आत्माअ मारफोते राजी-खुसी मानी लेदली। 7 आने एंहकींअ कीईन तुमां माकेदोनीया आने आखाया वीस्तारुंअ वीसवासी लोकाहांअ आगलांअ नोमुनो बोंण्येंह। 8 काहाका, तुमांअ तेंहडा जीवोनाहांअ लीदे माकेदोनीया आने आखाया वीस्तारुंअ खुब लोकाहांम मालीख ईसु ख्रीस्तुअ गोठ फेलाय गीयी, आने खुब जागे रेनारा लोकाहांन, पोरमेहेरापेअ तुमां राखला वीसवासाअ बाबोताम आमांअ काय बी आखांअ जोरुल नांह पोळती। 9-10 तुमांअ सेहेराम आमां आलला तांहांअ तुमां आमनेंह कोतोअ हारो आवकार देदलो, आने खेरा ने जीवता पोरमेहेराअ भोकती केरांअ खातुर तुमां मुरतींअ भोकती केरांअ केंहकींअ सोळलों, आने पोरमेहेराअ पोयरो ईसु होरगामेनेअ फाचो आवांअ हाय तीयाअ तुमां केंहकींअ वाट जोवतेंह, तीया बाबोताम ते लोक आखताह। तीयाज ईसुल पोरमेहेरांय मोअलामेनेअ फाचो जीवतो केअयो, आने तोज आपुअ पापाहांअ लीदे रोगवायन पोरमेहेर आपनेंह जे सीक्सा केरांअ हाय, तींहमेंनेअ आपनेंह सोळवुअनारो बी हाय।