2
थेस्सालोनीके सेहेराम पावुलुंह केअली सेवा
1 आमांअ पावु-बोंअयुहुं, तुमां सोतेज जांअतेंह का, आमां लेदली तुमांअ मुलाकात नोक्कामी नांह गीयी। 2 तुमांअहीं आमां आलला तीयाअ पेअलांअ फीलीप्पी सेहेराम सारकारी ओमोलदारहुं आमांअ केंहडी नींदा केअली आने आमनेंह केंहडें दुखें पाळलें, तों तुमां जांअतेंह। तांहांअ हारी गोठ जाहेर केअता आमनेंह खुब लोक ओटकावांअ कोसीस केअत्ला तेबी, पोरमेहेरांय आमनेंह जाणावली ते हारी गोठ तुमनेंह जाहेर केरांअ तीयांय आमनेंह हींमोत देदी। 3 हारी गोठ मानांअ आमां तुमनेंह जे कालावाला केअला, तीयाअ आदार खोटा बोदा पेअ का मोलवाअला ईरादापेअ नांय आथो। आने आमां तुमनेंह ठोग्यें बी नांह। 4 पेन, पोरमेहेरांय आमनेंह पारख्याह आने तीयांय जांय लेदोंह का, आमां हारी गोठ जाहेर केरांअ काम ईमानदारीकींअ कीअहुं। तीयाअ लीदे, तीयांय तों काम आमनेंह होप्योंह। आने आमां बी तेंहडा ईमानदार लोकाहांअ तोरीके ते गोठ आखताह। आने आमां मांहांहांन नांय, पेन आमांअ मोनाहांअ ईरादो जांअनारा पोरमेहेराल राजी राखांअ कोसीस केअताह। 5 तुमां जांअतेंह का, जांहांअ बी आमां तुमांअहीं आलला तांहांअ जों काय बी आमां तुमनेंह आखलों, तींहमें आमां सोताअ लाबुअ खातुर तुमांअ गुणगान नांह केअया। आने पोरमेहेर बी आमांअ साक्सी हाय का, तुमांहपनेअ पोयसाहांअ लोब राखीन आमां तुमनेंह हारी गोठ नांह आखी। 6-7 ख्रीस्ताअ खास चेलाहां तोरीके तुमांहपनेअ थोळों-घोणो मान मीलवांअ आमनेंह खोरेखोर होक आथो तेबी, तुमां का बीहरें मांहेंअ आमांअ गुणगान केअ तेंहडी मोर्जी राखीन आमां केल्लों बी काम नांह केअयों। पेन, मीठा सोबावुकींअ सोताअ पोयराहांअ कालजी राखनारी याहकीअ होच आमां तुमांअरी मीठा सोबावुकींअ वोरतुअला। 8 आने आमां तुमाहांपेअ ओतीअ बादी माया राखी का, आमां तुमनेंह पोरमेहेराअ बाबोताअ हारी गोठ जाहेर केरांअ ओतोंअज नांय, पेन तुमांअ भोलायाअ खातुर आमांअ जीवोन खोरची टाकांअ बी तीयार आथा। काहाका, तुमां आमांअ खुब मेरालें बोंणी गेहलें।
9 आमांअ पावु-बोंअयुहुं, तुमांअहीं आथा तांहांअ आमां सोखोत मेहनोत केअली तों तुमनेंह नोक्कीज ईत वीअ। पोरमेहेराअ बाबोताअ हारी गोठ तुमनेंह जाहेर केअत्ला तांहांअ तुमाहांमेनेअ केडापेअ बी वोजो नांय पाळजी आने आमांअ जोरुल्या आमां सोतेज मीलवुअजी तीयाअ खातुर आमां रात-दीह काम केअलों। 10 वीसवास केअनारा तुमांअरी आमां पोवीतोर रीते आने नीतीअ रीते आने काय बी दोसु वोगुर वोरतुअला, तीयाअ तुमां सोते आने पोरमेहेर बी साक्सी हाय। 11 पेन तुमां जांअतेंह का, बाहको सोताअ पोयराहांअरी जेंहडो वेहवार राखेह, तेंहडो वेहवार आमां तुमांअरी राखत्ला। 12 मोंजे का, आमां तुमनेंह उफ आने दीलासो देहला आने सोताअ राज्याम आने मोडायुम भाग मीलवांअ तुमनेंह हादनारा पोरमेहेराल गोंवें एंहडों जीवोन जीवांअ तुमनेंह पोरी-पोरी होमजावत्ला।
13 आमां पोरमेहेर बाहकाअ कायोम ईयाअ खातुर आभार मानताह का, आमां तुमनेंह पोरमेहेराअ बाबोताअ गोठ आखली तांहांअ तुमां ते मांहांहां आखली गोठी तोरीके नांय पेन पोरमेहेरांय आखली गोठी तोरीके उनाअलें आने तीयुल तुमांअ मोनाहांम उतावी लेदली। आने खोरेखोर ते पोरमेहेरांयज आखली गोठ आथी। तीयु गोठीपेअ तुमां वीसवास केअलो आने तीयाकींअ तुमांअ जीवोन बोदलाय गेहलों।
14 पावु-बोंअयुहुं, येहुदीया वीस्तारामेर्याअ पोरमेहेराअ मोंडोळाअ लोकाहीं ख्रीस्त ईसुपेअ तीयाहां राखला वीसवासाअ लीदे जेंहकींअ दुखें वेठलें, तेंहकींअज तुमां बी दुखें वेठयेंह। जेंहकींअ तीयाहांअ सोताअ जातीअ येहुदी लोकाहीं तीयाहांन दुखें पाळलें, तेंहकींअ तुमांअ सोताअ जातीअ लोकाहीं तुमनेंह दुखें पाळलें। 15-16 तीयुज येहुदी जातीअ थोळाक लोकाहीं पोरमेहेराअ गोठ जाहेर केअनाराहांन माय टाकला, आने फाचलांअ नेअ बीहरा थोळाकाहीं मालीख ईसुल माय टाकावलो। आने आमी बीहरा थोळाक आमनेंह दुखें पाळताह। ए येहुदी लोक, येहुदी नांह तेंहडा लोक जीयु गोठीपेअ वीसवास कीईन सोताअ पापाहांअ सीक्सामेनेअ वाचाय जाय, ते गोठ तीयाहांन जाहेर केअता आमनेंह ओटकावांअ कोसीस केअताह। एंहकींअ आमनेंह ओटकावांअ कोसीस कीईन ते पोरमेहेराल दुखी केअताह आने बीहरा बादा लोकाहांअ वीरुद केअताह। एंहकींअ कीईन तीयाहांअ पापाहांअ डोंड तीयाहांन मील्यो, आने तीयाहांअ तीया कामुअ लीदे आमी पोरमेहेराल खुब रोग चोळीह, आने तो तीयाहांन सीक्सा केरांअ तीयारीमुज हाय।
थेस्सालोनीके मोंडोळाअ लोकाहांअ फाची मुलाकात लांअ पावुलाअ मोर्जी
17 पावु-बोंअयुहुं, आमां तुमांअ से थोळाक वोखताअ खातुर मोनाअ रीते नांय पेन सोरीलाअ रीते जुदा पोळला तांहांअ आमनेंह खुब दुख लागलों आने तुमनेंह फाचा मीलांअ आमां खुब मोर्जी राखत्ला। 18 आमां तुमांअहीं फाचा आवांअ केअत्ला। खास कीईन, मांयुं पावुलुंह ता तुमांअहीं आवांअ फीरी-फीरीन कोसीस केअली, पेन सेतानांय ते कोसीस पार नांह पोळांअ देदी। 19 आमां फाची तुमांअ मुलाकात लांअ कोसीस केअली। काहाका, आपुअ मालीख ईसु फाचो आवीअ तांहांअ तीयाअ हाजरीम तुमांअ लीदेज खातरी राखीन आने खुस वीईन उबी रीहुं, आने तुमांअ लीदेज आमनेंह आमांअ सेवाअ ईनाम मीलीअ। 20 खोरेखोर, तुमांअ लीदेज आमनेंह ओभीमान हाय आने आमां खुस बी वीयाह।