3
पावुल तीमोथील थेस्सालोनीके मोकलेह
1 फाची तुमांअ मुलाकात लेया वोगुर आमनेंह रेवाअयों नांय तीयाअ लीदे, सेल्ले आमां एंहडों नोक्की केअलों का, आंय पावुल एखलोज एथेनुम र्युंव। 2 हातींअ मांयुं आने सीलांह, आपुअ ख्रीस्ती पावुह आने ख्रीस्तुअ बाबोताअ हारी गोठ जाहेर केरांअ कामाम पोरमेहेराअ आमांअ आर्योअ कामदार तीमोथील तुमांअहीं मोकल्यो, ईयाअ खातुर का, तो तुमनेंह वीसवासाम मोजबुत बोंणावे, 3 आने तुमनेंह उफ दे, आने एंहकींअ कीईन, तुमाहांपेअ पोळला ईया दुखाहांअ लीदे तुमाहांमेनेअ केडों बी वीसवासाम नोबलें नांय बोंणे। तुमां सोतेज जांअतेंह का, पोरमेहेराअ मोर्जी पोरमाणेज ईं दुखें आपुंहपेअ पोळलें। 4 काहाका, आमां तुमांअरी आथा तांहांअ पेअलांअनेअ आमां तुमनेंह चेतवोंणी देदली का, तुमाहांपेअ माहरीज दुखें पोळीअ, आने तुमां जांअतेंह का तेंहकींअ दुखें पोळलें बी। 5 तीयाअज लीदे, मांयुं तीमोथील तुमांअहीं मोकल्यो। तुमांअ बाबोताअ खोबुर लेया वोगुर मांन रेवाअयों नांय मोंजे मांयुं तीयाल तुमांअहीं मोकलुअलो, ईयाअ खातुर का, तुमां वीसवासाम केंहकींअ टीकी रेतेंह तीया बाबोताम आंय जांय सेकुं। मांन खुब चींता आथी का, सेतानांय तुमनेंह पारखी हेअयें वीअ, ईयाअ खातुर का, तुमां वीसवासामनेअ पोळी जा आने आमां तुमांअहीं केअली मेहनोत नोक्कामी बोंणी जाय। 6 पेन आमी तीमोथी तुमांअहींनेअ फाचो ईंहीं आलोह आने तो हारी खोबुर लालोह का तुमां आजी बी पोरमेहेरापेअ वीसवास राखतेंह आने एक-बीहरापेअ माया राखतेंह। आने तीयांय आमनेंह एंहकींअ बी आख्योंह, जांहांअ बी तुमां आमनेंह ईत केअतेंह, तांहांअ तुमनेंह खुब हारों लागेह आने जेंहकींअ आमां तुमनेंह मीलांअ खुब मोर्जी राखीह, तेंहकींअ तुमां बी आमनेंह मीलांअ खुब मोर्जी राखीह। 7 तीयाअ लीदे, मेराला दोस्दारुहुं, तुमांअ वीसवासाअ लीदे आमनेंह, आमांअ ईया खुब दुखाहांअ वोखत बी उफ मील्योह। 8 आने तुमां मालीखाअ आर्याअ तुमांअ जीवोनाम एकदोम मोजबुत रीयेंह तों जांयन आमनेंह आत्मीक ताजगी मीलीह।
9 आपुअ पोरमेहेराअ हाजरीम तुमांअ लीदे आमनेंह ओतीअ बादी खुसी हाय का, तीयाअ बोदलाम पोरमेहेराअ आभार मानांअ आमाहांपेअ पुरता सोब्दा नांह। 10 आमां आमांअ पुरा मोनाकींअ रात-दीह पोरमेहेराल ओरुज केअताह का, तुमनेंह उरु-बुरु मीलांअ आने वीसवासाम पाकें वेरांअ तुमनेंह आजी जों काय जोरुल हाय तों पुरों पाळांअ तो आमनेंह मोदोत केअ।
11 आपुअ पोरमेहेर बाहको सोते आने आपुअ मालीख ईसु तुमांअहीं आवांअ खातुर आमनेंह मोदोत केअ! 12 आने जेंहकींअ तुमाहांपेअ आमांअ माया होद वोगुराअ हाय, तेंहकींअज तुमांअ माया बी एक-बीहरापेअ आने बादा मांहांहांपेअ खुब वादे आने होद वोगुराअ वेअ एंहडों मालीख वेरांअ दे! 13 तीयाअ पोरीणामे, ख्रीस्त तुमनेंह वीसवासाम पाकें बोंणावीअ, आने आपुअ मालीख ईसु तीयाअ बादा सोंत लोकाहांअरी फाचो आवीअ तांहांअ, पोरमेहेर जो आपुअ बाहको हाय तीयाअ आगलांअ तुमां दोसु वोगुराअ आने पोवीतोर रीअ सेका एंहडों कीअ।