4
पोरमेहेराल गोंवें एंहडें जीवोनें
1 सेल्ले पावु-बोंअयुहुं, पोरमेहेराल राजी राखांअ खातुर तुमांअ केंहकींअ वोरतुलोंअ तों तुमां पेअलांअज आमांहपनेअ हीकयेंह आने तीयाअ पोरमाणे तुमां वोरतुअतें बी आलेंह। तेबी, आमां मालीख ईसुअ नांवें आजी तुमनेंह खुब कालावाला केअताह का, तुमां आजी वादारे ने वादारे हारकींअ वोरतुअजा। 2 काहाका, ईयु बाबोताम मालीख ईसुअ नांवें आमां तुमनेंह केल्ला-केल्ला हुकोम देदला ते तुमां जांअतेंहज। 3 पोरमेहेर ता एंहडी मोर्जी राखेह का, तुमां पोवीतोर बोंणा, मोंजे का, सीनालों मां केअतें। 4-5 आने तुमांअमेर्योअ दोरेक आदमी खेरा पोरमेहेराल नांय माननारा आदमींअ होच सोताअ कोअवालील सोताअ सोरीलाअ मोर्जी पुरी केरांअ सादोनु तोरीके होमजीन तीयुअरी नांय वोरते, पेन पोवीतोर आने मानावाली रीते तीयुअरी वोरतुअता हीके। 6 आदमीअ आने बायाअ सोबोंदुअ ईयु बाबोताम तुमांअमेर्योअ केडो बी सोताअ ख्रीस्ती पावुअ ईजजोतुपेअ आथ नांय टाकांअ जोजे, का तीयाल ठोगाअ नांय जोजे। जेंहकींअ आमां तुमनेंह पेअलांअज आखलों आने कोळोक रीते चेतवोंणी देदली, तेंहकींअ एंहडा पाप केअनाराहांन मालीख सीक्सा कीअ। 7 पोरमेहेरांय आपनेंह मोलवाअलों जीवोन जीवांअ नांय, पेन चोख्खों जीवोन जीवांअ हादयेंह। 8 तीयाअ लीदे, जोंबी ईया बोदा ल नोफरोत केअहे, तों एखला मांहांअलुज नांय, पेन तुमनेंह पोवीतोर आत्मा देनारा पोरमेहेराल बी नोफरोत केअहे एंहकींअ मानुलोंअ।
9 तुमांअ आर्याअ ख्रीस्ती पावु-बोंअयुंहपेअ माया राखांअ बाबोताम तुमनेंह लेखांअ मांन काय जोरुल नांह जाणाअती। काहाका, एक-बीहरापेअ माया राखांअ ते बाबोत पोरमेहेरांय सोतेज तुमनेंह हीकवीह। 10 आने खोरेखोर तुमां माकेदोनीया वीस्ताराअ बादा ख्रीस्ती पावु-बोंअयुंहपेअ माया राखतेंह। तेबी पावु-बोंअयुहुं, आमां तुमनेंह कालावाला केअताह का, तुमां तीयाहांपेअ आजी वादारे ने वादारे माया राखतें रा। 11 जेंहकींअ आमां पेअलांअज तुमनेंह आखलों, तेंहकींअ सांतीवालों जीवोन जीवांअ, आने तुमांअ सोताअज कामुपेअ धीयान राखांअ, आने सोताअ आथे मेहनोत कीईन जीवांअ ईरादो राखजा। 12 एंहकींअ कीअहा ता, ख्रीस्तुपेअ वीसवास नांय राखनारें तुमनेंह मान दीअ, आने तुमांअ सोताअ जोरुलीहींअ खातुर तुमनेंह बीहराहांपेअ आदार राखांअ नांय पोळे।
मालीखाअ फाचा आवांअ बाबोताम
13 आमांअ पावु-बोंअयुहुं, आमांअ एंहडी मोर्जी हाय का, जें मोय गीयेंह तीयाहांअ काय वीअ तीया बाबोताम तुमां जांय ला, ईयाअ खातुर का, मोअलामेनेअ जीवतें उठांअ जीयाहांन आस्या नांह तीयाहांअ होच तुमां तुमांअ मोय गेहला वीसवासी मेरालांअ खातुर दुखी नांय वेरा। 14 आपुंह वीसवास केअतेंह का, ईसु मोय गीयो आने फाचो जीवतो उठ्यो। तीयाअ लीदे, आपनेंह वीसवास हाय का, ईसु फाचो आवीअ तांहांअ, पोरमेहेर मोय गेहला वीसवास्यांहन ईसुअरी फाचें जीवतें लावीअ।
15 ईयु बाबोताम मालीखांय सोते जों आखलों, तों आमां तुमनेंह आखताह। तों ईं हाय का, मालीख फाचो आवीअ तांहांअ आपुंह जें आजी जीवतें हाय, मोय गेहला वीसवास्यांअ आगलेंअ तीयाअहीं नांय जाजी। 16 पोरमेहेर जोरपेअ हुकोम कीअ, आने मोडांम-मोडो दुत गोगीअ, आने पोरमेहेराअ पीपाराअ आवाज वीअ, ने मांहेंअ तों बादों उनाय। आने मालीख सोते होरगामेनेअ जुगाम उतीअ, आने ख्रीस्तुपेअ वीसवास राखनारें जें मोय गीयेंह तें पेअलांअ जीवतें उठीअ। 17 आने तांहांअज, तोताअपेअ जीवता रेनारा आपनेंह, मालीखाल जुगाम मीलांअ खातुर पोरमेहेर तीयाहांअरी वादलाहांम टोलवीअ। आने एंहकींअ कीईन, आपुंह कायोम मालीखाअरी रीहुं। 18 तीयाअ लीदे, ईयु गोठीहींकींअ एक-बीहराल दीलासो ने उफ दा।