5
मालीख फाचो आवीअ तांहांअ तीयाल मीलांअ तीयार वेरा!
1 पावु-बोंअयुहुं, मालीख ईसु केल्ला दीह आने केल्ली घेळी फाचो आवीअ तीया बाबोताम तुमनेंह मांअ काय बी लेखांअ जोरुल नांह। 2 काहाका, तुमां सोतेज हारकींअ जांअतेंह का, जेंहकींअ केडांय बी वाट जोवी नांय वीअ तेंहडी वोखत रातीं बांड आवेह, तेंहकींअ केडांय बी वाट जोवी नांय वीअ तेंहडी वोखत मालीख फाचो आवीअ। 3 “आपुंह बादें सांतीम हाय, आने आपुअ केल्ली बी बाबोताअ बीख राखांअ जोरुल नांह” एंहकींअ मांहेंअ आखीअ तांहांअ ओचींतीज तीयाहांपेअ खुब आफोत आवी पोळीअ। जेंहकींअ पोयराल जोन्मो देतीअ वोखत बायुपेअ ओचींतोंज दुख आवी पोळेह, तेंहकींअ मांहांहांपेअ ओचींतीज ते आफोत आवी पोळीअ। आने तें तीयु आफोतुमनेअ वाचायज नांय सेके।
4 पेन पावु-बोंअयुहुं, तुमां ता आंदाराम नांह रेतें। तीयाअ लीदे, ओचींतोज बांडाल आललो देखीन चोमकी जानारा मांहांअ होच, मालीखाअ फाचा आवांअ दीहुल ओचींतो आवता देखीन चोमकी नांय जांअ जोजे। 5 तुमां बादा उजवोळाअ ने दीहाअ लोक हाय। आपुंह रातींअ का आंदाराअ लोक नांह। 6 तीयाअ लीदे, ख्रीस्तुपेअ वीसवास नांय केअनारांअ होच आपुंह ईयु बाबोतीहींअ वीचार केअया वोगुर नांय रेजी, पेन तीयुहुंअ वीचार केअतें रेजी आने आपनेंह सोताल काबाम राखतें रेजी। 7 रातींअज मांहेंअ हुवतेंह आने रातींअज मांहेंअ साकतेंह। 8 पेन आपुअ ता दीहाअ हाय; तीयाअ लीदे, आपुंह आपनेंह सोताअ काबाम राखतें रेजी आने वीसवासु रुपी बोकतोरुकींअ आपुअ आत्माहांन हाचवुअतें रेजी, आने बीहराहांपेअ माया राखतें रेजी! आने पोरमेहेर आपनेंह नोक्कीज आपुअ पापाहांअ सीक्सामेनेअ वाचावीअ एंहडी पाकी आस्या राखतें रेजी! ईं ता सोताअ मुंनकाल हाचवांअ खातुर सोयनीक टोपो पोवेह तेंहकींअ वीअ। 9-10 काहाका, पोरमेहेरांय आपनेंह सीक्सा मीलवांअ खातुर नांह नीम्यें, पेन आपुअ मालीख ईसु ख्रीस्त फाचो आवीअ तांहांअ आपुंह जीवतें रेजी का मोय जाजी तेबी आपुंह तीयाअरी रेजी तीयाअ खातुर तीयांय आपुअ बोदले जो मोअयो तीया आपुअ मालीख ईसु ख्रीस्तुअ मारफोते आपनेंह आपुअ पापाहांअ सीक्सामेनेअ वाचायांअ खातुर नीम्येंह। 11 आने तीयाअ लीदे, जेंहकींअ तुमां आमी केअतेंह तेंहकींअ, एक-बीहराल उफ दा आने आत्मीक जीवोनाम वादांअ एक-बीहराअ मोदोत केरा।
सेल्या हीकामोण्या आने सालाम्या
12 पावु-बोंअयुहुं, आमां तुमनेंह कालावाला केअताह का, तुमांअ आत्मीक लाबुअ खातुर तुमांअ मोंडोळाम खुब सेवा केअनाराहांन तुमां पुरतों मान देजा। तेज मालीखाअ तोरफयाअ तुमांअ मोंडोळाअ वोळील हाय आने तुमनेंह हीकामोण देनारा बी हाय। 13 तीयाहांअ ईया कामुअ लीदे तीयाहांपेअ खुब माया राखजा आने तीयाहांन खुब मान देजा। आने तुमां एक-बीहराअरी सांतीम रेजा।
14 पावु-बोंअयुहुं, आमां तुमनेंह कालावाला केअताह का, तुमांअ मोंडोळाम जें आल्येंह हाय तीयाहांन बोराबोर मेहनोत कीईन जीवांअ कोळोक रीते आखजा। आने जें बीखर्यें हाय तीयाहांन हींमोत राखांअ उफ देजा। आने जें आत्मीक रीते नोबलें हाय तीयाहांन मोदोत केअजा। आने दोरेक मांहांअरी धीरोज राखीन वोरतुअजा। 15 तुमाहांमेनेअ केडों बी खोटायुअ बोदलो खोटायुकींअ नांय वाले तीयाअ कालजी राखजा। पेन कायोम एक-बीहराअ आने बीहरा बादाहांअ भोलों केरांअ तुमांअ ईरादो राखजा।
16 तुमां कायोमुज खुसालीम रेजा। 17 आने बादा सोमोयुंहम पोरमेहेराल ओरुज केअजा। 18 आने बादा सोंजोगाहांम पोरमेहेराअ आभार मानजा। काहाका, ख्रीस्ताअरी जोळाअला लोकाहांअ तोरीके एज तुमांअ खातुर पोरमेहेराअ मोर्जी हाय।
19 पोवीतोर आत्माल तुमांअ जीवोनाहांम सोताअ काम केअता ओटकावाह मा। 20 आने तीयाअ दोरवोणी पोरमाणे पोरमेहेराअ लोक जे गोठ्या तुमनेंह आखताह, तीयुहुंन ओलकया मां गोंअहा! 21 ते गोठ्या खोरेखोर पोवीतोर आत्माअ दोरवोणी पोरमाणेज आखाअयाह का नांह, तों पारखुअजा, आने तीयुहुंम जे गोठ्या तीयाअ दोरवोणी पोरमाणेज आखाअया वीअ, तीयुहुंअ पोरमाणे चालजा। 22 आने बादी जातीअ खोटायुमनेअ सेटे रेजा।
23 आपनेंह सांती देनारो पोरमेहेर सोते तुमनेंह पुरी रीते पोवीतोर बोंणावे, आने तुमांअ आत्मा, जीव, आने सोरीलुंहन हाचवी राखे, ईयाअ खातुर का, आपुअ मालीख ईसु ख्रीस्त फाचो आवीअ तांहांअ तुमां एकदोम दोसु वोगुराअ रा। 24 तुमनेंह हादनारो पोरमेहेर तेंहकींअ केरांअ ईमानदार हाय।
25 पावु-बोंअयुहुं, आमांअ खातुर बी पोरमेहेराल ओरुज केअजा।
26 बादा ख्रीस्ती पावु-बोंअयुंहन मायालु सोबावे सालाम आखजा। 27 ईं कागलों मोंडोळाअ बादा पावु-बोंअयुंहन वाची उनावांअ आंय तुमांअ मोंडोळाअ आगेवानाहांन मालीखाअ नांवें हुकोम कीअहुं।
28 आपुअ मालीख ईसु ख्रीस्त तुमांअ बादाहां पेअ मेरबानी केअतो रे!