2
ख्रीस्त फाचो आवांअ हाय तीयाअ नीसाण्या
1 पावु-बोंअयुहुं, आपुअ मालीख ईसु ख्रीस्तुअ फाचा आवांअ बाबोताम आने पोरमेहेर आपनेंह ख्रीस्तुअहीं टोलवांअ बाबोताम आंय तुमनेंह कालावाला कीअहुं का, 2 मालीख लोकाहांअ नीयाय केरांअ हाय तो दीह आवीज गीयोह एंहकींअ तुमनेंह केडों बी आखे ता, तुमां तुमांअ मोनाहांम एकदोमुज गुचवाय मां जातें, का कीदराय बी मां जातें। एंहकींअ आखनारें मांहेंअ एंहडो दावो कीअ का, तीयाहांन दोरसोनें वीयें, का पोवीतोर आत्मांय ए गोठ तीयाहांन जाहेर केअयीह, का आमां कागलाम तीयाहांन ए गोठ लेखीह। पेन तीया मांहांहांअ गोठ तुमां मानतेंज मां। 3 हेअजा का, केडों बी तुमनेंह केल्ली बी रीते ठोगे नांय। काहाका, जांव लोगुंअ खुब मांहेंअ पोरमेहेराअ वीरुद होजराय नांय केअ, आने पोरमेहेराअ बादा नीयोमाहांन धीक्कारनारों मांहुंअ पोरगोट नांय वेअ, तांव लोगुंअ तो दीह आवनारोज नांह। 4 तों मांहुंअ पोरमेहेराअ वीरुद कीअ, आने जीयाल बी मांहेंअ देव मानीन भोकती केअतेंह, तीयाअ केअता तो सोताल मोडो आखावीअ। आने तो पोरमेहेराअ मोंदीराम बी बोहीअ, आने सोताल पोरमेहेर आखावीअ।
5 आंय तुमांअरी आथो तेंहडामुज मांयुं तुमनेंह ए बादया गोठ्या आखल्या, तों तुमनेंह नोक्कीज ईत हाय। 6 आने तुमां ईं बी जांअतेंह का, पोरमेहेरांय नोक्की केअला सोमोयाअ पेअलांअ, तीया मांहांअल पोरगोट वेअता एगोंह कावींह ओटकावी रीयोंह। 7 मोंजे का, सेतान पेअलांअनेअज सुपी रीते मांहांहांन पोरमेहेराअ नीयोमाहांअ नोफरोत केरांअ दोरवोणी देतो आलोह तेबी, आमी तीया मांहांअल पोरगोट वेअता ओटकावनाराल पोरमेहेर जांव लोगुंअ दुर नांय केअ, तांव लोगुंअ तीया मांहांअल पोरगोट वेअता तों ओटकावतोंज रीअ। 8 तांहांअज पोरमेहेराअ नीयोमाहांन नोफरोत केअनारा तीया मांहांअल पोरमेहेर पोरगोट कीअ। सेल्ले, मालीख ईसु सोताअ सोब्दाकींअज तीया मांहांअ नास कीअ। तों सोताअ हाजरीकींअज तीयाल ताकोतु वोगुराअ बोंणावी दीअ।
9 पेन तों मांहुंअ आजी हाजोर हाय तांहांअ, सेतान तीयाल ताकोतावालो ं बोंणावीअ। आने तों मांहुंअ तीयु ताकोताकींअ मोडें-मोडें चोमोत्कारुअ कामें आने नोवाय लागे एंहडें कामें कीअ। तें कामें हेअनारांहन एंहडों लागीअ का, पोरमेहेरुज तीयाअ मारफोते तें कामें केअहे।
10 आने जीयाहांअ आत्मीक नास वेअनारो हाय, तीयाहांन तो एंहडी जाती-जातीअ चालाकींहकींअ भोरमावीअ। तीया मांहांहांअ नास वीअ। काहाका, पोरमेहेर तीयाहांन वाचावे तेंहकींअ तीयाहां हाची गोठील खेरा मोनाकींअ नांय मानी। 11 ईया कारोणाअ लीदे, पोरमेहेर तीयाहांन भोरमावांअ दीअ। तीयाअ पोरीणामे, तें जे हाची गोठ नांह ते मानीअ, 12 ईयाअ खातुर का, हाची गोठीपेअ वीसवास नांय कीईन, जों खाराब हाय तों राजी खुसी पोसोंद केअनारा दोरेक मांहांअल पोरमेहेर नीयायी रीते सीक्सा केअ।
13 मालीख मेर केअहे एंहडा पावु-बोंअयुहुं, तुमांअ खातुर आमांअ कायोम पोरमेहेराअ आभार मानांअ जोजे। काहाका, पोवीतोर आत्मांय तुमनेंह पोरमेहेराअ खातुर ओलोग केअयेंह तीयाकींअ, आने हाची गोठीपेअ तुमां वीसवास केअयोह तीयाकींअ, पोरमेहेरांय पेअलांअनेअज तुमनेंह पोसोंद केअयेंह, ईयाअ खातुर का तो तुमनेंह वाचावे। 14 आने तीयाअ खातुरुज पोरमेहेरांय आमां तुमनेंह आखली हारी गोठीकींअ तुमनेंह हादयेंह। आपुअ मालीख ईसु ख्रीस्तुल जेंहकींअ मोडाय मीलीह तेंहकींअ तुमनेंह बी मोडाय मीले तीयाअ खातुर, तीयांय तुमनेंह हादयेंह। 15 तीयाअ लीदे पावु-बोंअयुहुं, जे बोद आमां तुमनेंह आमांअ गोठीहींअ मारफोते आने मांअ कागलाअ मारफोते देदाह, ते तुमां बोराबोर तीअ रेजा आने तींहमें मोजबुत रेजा!
16-17 आपुअ मालीख ईसु ख्रीस्त सोते आने आपुअ पोरमेहेर बाहको तुमनेंह उफ दे आने बादी जातीअ हारें कामें केरांअ आने जों काय हारों हाय तों गोगांअ मोदोत केअ! तीयांय आपुंहपेअ माया राखीह, आपनेंह कायोम उफ देदोह, आने आपनेंह जे हार्या वोस्तु दांअ तीयांय वोचोन देदोंह, ते वोस्तु आपनेंह मीलीअ एंहडी आस्या राखांअ आपनेंह मेरबानी कीईन मोदोत केअयीह।