थेस्सालोनीका सेहेराअ मोंडोळाल पावुलाअ बीहरों कागलों
1
सालामाअ गोठ
1 थेस्सालोनीका सेहेराअ मोंडोळाअ लोकाहांन, मोंजे का, तुमनेंह ईं कागलों मोकलुअनारा पावुल, सीला, आने तीमोथीअ सालाम। तुमां आपुअ पोरमेहेर बाहकाअ आने मालीख ईसु ख्रीस्तुअ लोक हाय। 2 आपुअ पोरमेहेर बाहको आने मालीख ईसु ख्रीस्त तुमाहांपेअ मेरबानी केअ आने तुमनेंह सुख-सांती दे।
ख्रीस्त फाचो आवीअ तांहांअ पोरमेहेर लोकाहांअ नीयाय कीअ
3 पावु-बोंअयुहुं, तुमांअ खातुर आमांअ कायोम पोरमेहेराअ आभार मानांअ जोजे। तेंहडों केरांअ बोराबोरुज हाय। काहाका, तुमां ईसुपेअ वादारे ने वादारे वीसवास राखतेंह आने तुमां बादें एक-बीहरापेअ वादारे ने वादारे माया राखतेंह। 4 आने तीयाअ लीदे, आमां बीहरा मोंडोळाअ लोकाहांअ आगलांअ तुमांअ बाबोताम ओभीमान राखीन आखताह का, ख्रीस्तुपेअ तुमां राखला वीसवासाअ लीदे बीहरें मांहेंअ तुमनेंह जें दुखें पाळतेंह, तें बादें दुखें तुमां धीरोज राखीन वेठतेंह आने ख्रीस्तुपेर्योअ तुमांअ वीसवास जालवी राखतेंह।
5 ईं बादों एंहडी साबीती देहे का, पोरमेहेर हाची रीते लोकाहांअ नीयाय कीअ। ईयाअ पोरीणामे, तो तुमनेंह तीयाअ राज्याम जांअ लायोक गोंईंअ। तीया राज्याअ नीती-नीयोम तुमां ईमानदारी रीते पालतेंह तीयाअ लीदेज तुमां दुखें वेठतेंह। 6 पोरमेहेर हाचो हाय। तो तुमनेंह दुखें पाळनारांहन तीयाअ बोदलाम दुखें पाळीअ, 7 आने आमी दुखें वेठनारा तुमनेंह तीया दुखाहांमेनेअ आराम दीअ, आने आमनेंह बी आराम दीअ। मालीख ईसु होरगामेनेअ सोताअ ताकोतावाला दुताहांअरी झालीवाली आगीम पोरगोट वीअ तांहांअ, पोरमेहेर एंहकींअ कीअ। 8 आने तांहांअ ईसु खेरा पोरमेहेराल नांय माननाराहांन आने आपुअ मालीख ईसुअ बाबोताअ हारी गोठ नांय माननाराहांन सीक्सा कीअ। 9 एंहडा मांहांहांन आपुअ मालीख ईसु हाची रीते सीक्सा कीअ। मोंजे का, तीयाहांन तो सोताअ मोडायुवाली आने ताकोतावाली हाजरीमनेअ कायोमाअ खातुर जुदें पाळीअ। 10 सोताअ लोकाहांअ खातुर, मोंजे का, तीयापेअ वीसवास राखनारांअ बादाहांअ खातुर तीयांय केअला कामुअ लीदे मोडाय आने मान मीलवांअ तो आवीअ तीदीह, ईं बादों बोंणीअ। तीया लोकाहांम तुमां बी वीअहा। काहाका, तीया बाबोताम आमां देदली साक्सीपेअ तुमां वीसवास राख्योह।
11 तीयाअ लीदे, आमां तुमांअ खातुर कायोम पोरमेहेराल ओरुज केअताह। आमां आपुअ पोरमेहेराल एंहडी ओरुज केअताह का, जे आसीरवाद मीलवांअ तीयांय तुमनेंह हादयेंह, ते आसीरवाद मीलवांअ तो तुमनेंह लायोक गोंएं, आने जों हारों केरांअ तुमां दोरेक रीते मोर्जी राखतेंह, तों केरांअ आने तुमांअ वीसवासाअ लीदे जें हारें कामें केअतेंह, तें कामें केरांअ तो सोताअ ताकोताकींअ तुमनेंह मोदोत केअ। 12 आमां पोरमेहेराल एंहकींअ ईयाअ खातुर ओरुज केअताह का, तुमांअ लीदे आपुअ मालीख ईसुल मान मीले, आने तीयाअरी तुमनेंह बी मान मीले। ईं बादों आपुअ पोरमेहेर आने मालीख ईसु ख्रीस्तुअ मेरबानीकींअ बोंणेह।