3
सेल्ला दीहाहांम आवनारो आकरो वोखत
1 आमी ईं जांय लेजे का, सेल्ला दीहाहांम, मोंजे का, ख्रीस्त फाचो आवे तीयाअ पेअलांअ, खाराब लोक वीसवास्यांहपेअ खुब आकरो वोखत लावीअ। 2 काहाका, तांहांअ ते खाराब लोक मोतलोबी आने माल-मीलकोतुपेअ लालोच राखनारा वीअ। ते मोडया-मोडया गोठ्या केअनारा, आने ओभीमान केअनारा, बीहराहांअ नीयाय केअनारा, याहकी-बाहकाअ आखलों नांय माननारा, सोताअ भोलों केअनारांअ आभार नांय माननारा, आने केडाल बी मान नांय देनारा वीअ। 3 आने ते सोताअ कोर्यांहपेअ बी माया नांय राखनारा, आने केडाअ बी होमजांअ नांय मागनारा वीअ। ते बीहराहांअ नांव-बोदनाम केअनारा, सोताअ मोर्जींहन काबाम नांय राखनारा, जाहाल्या, आने भोलायुल नोफरोत केअनारा वीअ। 4 आने ते सोताअ दोस्दाराहांन दोगो देनारा, वीचार्या वोगुर काय बी कीअ टाकनारा, आने खुब ओभीमानी वीअ। आने ते पोरमेहेरापेअ माया राखांअ बोदले मोज-सोकुपेअज माया राखनारा वीअ। 5 ते पोरमेहेराअ भोकती केअता वीअ एंहडो ढोंग कीअ तेबी, ते सोताअ जीवोनाहांम पोरमेहेराअ आत्माल ताकोत वापरीन काम केरांअ नांय दीअ। एंहडा लोकाहांअरी तुं केल्लो बी वेहवार मां राखतो। 6 एंहडा खुब लोक, जे रोंडेअ बाया नोबला मोनाहांअ हाय, आने जीयुंअ मोनाहांम पापाहांअ लीदे सांती नांह, आने जे जाती-जातीअ लालोचुंअ गुलाम हाय, तीयुहुंन एंहकींअ आखताह का, “आमनेंह तुमांअ पोंगाहांम आवांअ दा!” आने हातींअ ते तीयु बायाहांन सोताअ आथाम पाळी लेताह। 7 एंहड्या बाया नोवा-नोवा बोद कायोमुज उनाअया केअत्याह तेबी, ते हाचो बोद केल्लो हाय तों होमजी नांह सेकत्या। 8 ते खोटा बोद देनारा लोक यान्नेअ आने यांबरेअ होच हाय। तीयाहां मोसेअ वीरुद उठीन तीयाअ वीरुद केअलो तेंहकींअ, ते लोक बी ख्रीस्तुअ बाबोताअ हाची गोठीअ वीरुद केअताह। तीया लोकाहांअ मोने बेरजाय गीयेंह। तीयाहांअ वीसवास एकदोम नोकली हाय। 9 पेन तीयाहांअ तों बादों वादारे नांह चालनारों। काहाका, जेंहकींअ यान्ने आने यांबरे मुरोख आथा तीयाअ लोकाहांन खोबुर पोळी गेहली, तेंहकींअ ए लोक बी मुरोख हाय तों बादें मांहेंअ जांय जाय।
तीमोथील पावुलाअ सेल्ली हीकामोण
10 पेन ओ तीमोथी, तुं सोते ता मांयुं जों हीकव्योंह तों बोराबोर जांयन तीयाअ पोरमाणे चालतो आलोह। मांअ वोरतोन, आने मांअ ईरादो बी जांयन तुं तीयाअ पोरमाणे चालतो आलोह। मांअ होचुज, तुंयुं बी ख्रीस्तुपेअ वीसवास राख्योह। मांअ होचुज, तुंयुं बी धीरोज राखीह, लोकाहांपेअ माया राखीह, आने दुखें बी वेठयेंह। 11 लोकाहीं मांअ सोतावोणी केअली तांहांअ ते मांयुं केंहकींअ वेठली तों तुं जांअहो। तीयाहां आंतीयोख, ईकोनीया आने लुसतीरा सेहेराहांम मांन दुखें पाळलें। तीयाहां मांअ सोतावोणी केअली तेबी, मांयुं ते वेठी लेदली। जीयु बी वोखत तीयाहां मांअ सोतावोणी केअली, तीयु वोखत मालीखांय मांन तींहमेंनेअ वाचावलो। 12 खोरेखोर, ख्रीस्त ईसुअ आर्याअ आपुअ जोळाणुअ लीदे भोकतीभावुअ रीते जीवांअ मागनारा आपुअ बादाहांअ सोतावोणी केअनारा लोक ता रीईज। 13 बीहरा लोकाहांन धुतनारा खाराब लोक वादारे ने वादारे खाराब बोंणीअ आने वादारे ने वादारे खोट्या गोठ्या हीकवीअ। खास कीईन, ते धुतनारा बीहरा लोकाहांन ठोगीअ आने तीयाहांअ गोठ्या उनाअनारें बीहराहांन ठोगीअ। 14 पेन तुं ता, तुंयुं जे गोठ्या हीकयाह, आने जीयुंअ तुल खातरी वीयीह, तीयुहुंपेअ वीसवास राखांअ चालुज राखजे। ते बादया गोठ्या जीयाहां तुल हीकव्याह तीयाहांन तुं नोक्कीज ओअखोह। 15 तुं हानोअ आथो तेहेअनेअज, तुं पोवीतोर लेखाणाहांन जांअतो आलोह। आमी तुं जांअहो का, तीया लेखाणहुं तुल गीयानुवालो बोंणाव्योह। तीयाअ पोरीणामे, पोरमेहेरांय तुल, ख्रीस्त ईसुपेअ तुंयुं राखला वीसवासाअ आदारे, तोअ पापाहांअ सीक्सामेनेअ वाचाव्योह। 16 पोवीतोर लेखाणाहांमेरीअ दोरेक गोठ, लोकाहीं पोरमेहेराअ दोरवोणीकींअज लेखीह। आने ते गोठ, जोंबी खेरों हाय तों आपनेंह हीकवांअ खातुर, आने आपुअ जीवोनाहांम जों खोटों हाय तीयाअ आपनेंह भान केरावांअ खातुर कामुअ हाय। ते आपनेंह हुदारेह आने जों खेरों हाय तों केरांअ आपनेंह हीकवेह। 17 आपुंह पोरमेहेराअ लोक गोंणायांअ लायोक बोंणजी तीयाअ खातुर, ते गोठ आपनेंह मोदोत कीअ, आने बादी जातीअ हारें कामें केरांअ आपनेंह ते तीयार कीअ।