7
1 मांअ मेराला दोसदारुहुं, पोरमेहेरांय आपनेंह एंहडें वोचोनें देदेंह तीयाअ लीदे, आपुअ सोरीलुंहन आने आत्माहांन खाराब बोंणावनारा बादा पापुंहन सोळी दीईन आपुंह सोताल डागु वोगुराअ बोंणावजी। आने आपुंह पोरमेहेराल खुब मान देतेंह तीयाअ लीदे, a आपुंह वादारे चोख्खों जीवोन जीवजी!
पावुलुल मीललो दीलासो
2 आमाहांपेअ माया राखा। तुमांअमेर्याअ केडाअ बी आमां खोटों नांह केअयों, आने केडाअ बी आत्मीक का पोयसा-टोकाअ नुकसान नांह केअयों, आने केडापेनेअ बी पोयसा नांह पाळ्या। 3 तुमांअ भुल काडांअ खातुर आंय एंहकींअ नांह लेखतो। मांयुं पेअलांअ लेख्योंह तेंहकींअ आमां तुमांअरी रेजी का मोय जाजी, पेन आमां तुमाहांपेअ खुब माया राखताज रीहुं। 4 तुमाहांपेअ मांन पुरी खातरी हाय, आने तुमांअ बाबोताम मांन खुब ओभीमान हाय, आने तुमां मांन खुब उफ देदोह। तीयाअ लीदे, आमाहांपेअ खुब मुसीबोत्या पोळत्याह तेबी, आमी आंय ओहतोज रीहुं।
5 तुरोवानेअ माकेदोनीया आला हातींअ, तींहीं आमांअ सोरीलुंहन आराम नांय मील्यो। पेन उलटों, तींहीं आमाहांपेअ बादी जातीअ मुसीबोत्या पोळल्या। मांहेंअ आमनेंह मुसीबोत्या पाळत्लें आने उपेअनेअ मांन तुमांअ बाबोताअ चींता बी रेहली। 6 पेन नीरास वेअला सोताअ लोकाहांन उफ देनारा पोरमेहेरांय तीतुल फाचो आमांअहीं मोकलीन आमनेंह उफ देदोह। 7 तीतुल देखीन आमनेंह उफ ता मील्योज, पेन तुमां तीयाल केंहडो उफ देदलो तों उनायन आमनेंह वादारे उफ मील्योह। तीयांय आमनेंह आख्यों, तुमां मांन मीलांअ केंहडें फांअपाय जेअ रीयेंह। तीयांय ईं बी आख्यों, तुमां मांन दुखी केअलो तीयाअ लीदे तुमां केंहडें दुखी वीयेंह आने मांअ बाबोताम तुमां कोतीअ चींता राखतेंह। तीतुंह ए बादया गोठ्या मांन आख्या तांहांअ आंय खुब खुस वेअलो। 8 मांअ कोळोक कागलों वाचीन तुमां दुखी वेअलें तेबी, मांयुं जों लेखलों तीयाअ मांन दुख नांह लागतों। मांयुं जों लेखलों तीयाअ थोळीक वांय लोगुंअ मांन दुख लागलों ता खेरोंज, पेन आमी मांन तीयाअ दुख नांह लागतों। काहाका तीतुंह मांन आख्यों, तों वाचीन थोळीक वांय लोगुंअ तुमां दुखी वेअलें। 9 पेन आमी मांन खुसी हाय। तुमां दुखी वीयें तीयाअ लीदे खुसी नांह वीयो, पेन तीया दुखुकींअ तुमां पास्तावो केअयो आने पोरमेहेरापेअ माफी मागी लेदी तीयाअ लीदे आमी आंय खुस वीयोह। पोरमेहेरांय तुमनेंह पास्तावो केराव्योह मोंजे, तुमनेंह दुखी केअयेंह तीयाकींअ मांयुं तुमांअ काय खोटों नांह केअयों। 10 जांहांअ पोरमेहेर आपनेंह आपुंअ पापाहांअ लीदे खोरेखोर दुखी केअहे आने आपुंह बी सोताअ पाप सोळी देतेंह तांहांअ, तो आपनेंह नासुमनेअ वाचावेह। आने एंहडा दुखाअ लीदे केडाल बी मोन दुख नांह वेअतों। पेन खेरा पोरमेहेराल नांय ओअखुअनारें मांहेंअ सोताअ पापाहांअ खातुर दुखी वेअ पेन ते पाप नांय सोळे ता, तें पोरमेहेराअ से कायोमाअ खातुर ओलोग वीअ जातेंह। 11 मांअ कागलों तुमां वाचलों तांहांअ पोरमेहेरांय तुमनेंह खोरेखोर दुखी केअयेंह। जों खेरों हाय तो केरांअ तुमांअ मोनाहांम खुब मोर्जी पेदा वीयीह। मोंडोळाम जों बोंणलों तीयाअ खातुर तुमनेंह रोग बी चोळली, आने तेंहडोंज चाले ता पोरमेहेर तुमनेंह सीक्सा कीअ एंहडी तुमनेंह बीख बी आथी। आंय तुमांअ मुलाकात ल्युंव एंहडी मोर्जी बी तुमांहम पेदा वीयीह। आने मांन तुमांअ खातुर मालीखाअ खास चेला तोरीके मानतेंह तों आने मांयुं तुमनेंह आखल्या पोरमाणे तीया खोटों केअनारा लोकाहांन तुमां सीक्सा केअयीह तों, मांन जाणावांअ बी तुमां मोर्जी राखीह। ईं बादों कीईन तुमां देखाव्योंह का, ईयु बाबोताम जोंबी खेरों हाय तोंज तुमां केअयोंह। 12 आमी तों कोळोक कागलों लेखांअ मांअ ओतोअज ईरादो नांय आथो का, जीयाअ लीदे ए बादी भानगुळ पेदा वीयीह तीया मांहांअल तुमां सीक्सा केरा। आने ओ ईरादो बी नांय आथो का खोटों केअनाराल फायदो वेअ। पेन उलटों, मांयुं तों कागलों ईयाअ लीदे लेखलों का, तुमां तों वाचा तांहांअ पोरमेहेर तुमनेंह भान केरावे का, मालीखाअ खास चेला तोरीके मांअ जो आदीकार हाय तीयाल तुमां कोतोअ बादो मान देतेंह। 13 तीयाअ लीदे, आमनेंह खुब उफ मील्योह। आमनेंह उफ ओतोअज नांह मील्यो, पेन तीतु ईंहीं आलो तांहांअ तो कोतोअ खुस आथो तों देखीन आमां बी खुब खुस वेअला। आमी तीतुअ बाबोताअ बादी चींता मीटी गीयीह। काहाका, तुमां मांअ बाबोताम हारों वोलोण राखतेंह तों तीयांय देख्योंह। 14 तीतुल मांयुं आखलों, तुमांअ जीवोनाहांअ बाबोताम मांन ओभीमान हाय, आने ईयु बाबोताम तुमां मांन नाजवाव्यो नांह। मांयुं तुमनेंह जोंबी हीकव्योंह तों खेरोंज आथों। तेंहकींअज मांयुं तुमांअ बाबोताम तीतुल जोंबी आख्यों तों बी खेरोंज पोळ्योंह। 15 तीयाअ आखल्या पोरमाणेज तुमां केअलों आने खुब मान आने खुब लागणी देखावीन तीयाअ आवकार केअलो तों ईत केअता, तीतुअ जीव पांय-पांय वीअ जाहे। ईयाअ लीदे तो मांन आखेह का, तो तुमांअरी आथो तांहांअ तुमाहांपेअ जे माया राखत्लो तीयाअ केअता वादारे माया आमी राखेह। 16 आमी आंय खुब खुस हाय। काहाका, आंय तुमाहांपेअ पुरो भोरुचो राखी सेकुंह।