8
येरुसालेमाअ गोरीब ख्रीस्तींहन दान दांअ बाबोताम
1 मांअ मेराला पावु-बोंअयुहुं, माकेदोनीया मोंडोळाअ लोकाहांपेअ पोरमेहेरांय केअली मेरबानीअ लीदे जों हारों पोरीणाम आलोंह, तीया बाबोताम आमी आंय तुमनेंह आखांअ मागुंह। 2 तीयाहांअ चारु वेल रेनारा ख्रीस्ती नांह तेंहडा लोकाहीं तीयाहांन खुब मुसीबोत्या पाळल्या आने तें सोते खुब गोरीब बी हाय तेबी, तीयाहां खुब खुस वीईन आने सुटा आथे बीहरा वीसवास्यांहन मोदोत केअयीह। 3 आंय जांअहुं का, ते होकीकोतुज हाय। काहाका, मांयुं सोतेज देख्योंह का, तीयाहांन बोंण्या तोताअज पोयसा तीयाहां नांह देदा, पेन सोताअ कामुअ आथा ते पोयसा बी तीयाहां दीअ देदाह। तीयाहांन एंहकींअ कीईन पोयसा दांअ केडांय बी नांह आख्यों तेबी, तीयाहां सोताअ मेतेज राजी खुसी ते पोयसा देदाह। 4 आने येहुदीया वीस्ताराअ पोरमेहेराअ लोकाहांन पोयसा मोकलांअ कामाम तीयाहांअ बी भाग रे तीयाअ खातुर ते सोते आमनेंह कालावाला केअया केअत्ला। 5 मांअ धार्या केअता बी वादारे पोयसा तीयाहां देदाह। पेअलांअ तीयाहां मालीख ईसुल आख्यों, “आमां तुल गोंवें तेंहडों काम केरांअ मागतेंह।” हातींअ तीयाहां मांन आख्यों, “तुल गोंवें तेंहडों काम आमनेंह आख! मोंजे, आमां तों कीअहुं।” एंहकींअ कीईन आमांअ मारफोते पोरमेहेर तीयाहांन जेंहकींअ होमुज पाळे तेंहकींअ केरांअ तें तीयार वीयेंह। 6 ईं हारों काम तीतुंहज तुमांअहीं चालु केअयोंह तीयाअ लीदे मांयुं तीयाल कालावाला केअयाह का, तो तुमनेंह ईं मेरबानीवालों काम पुरों केरांअ मोदोत केअ। 7 वीसवासाम , आने पोरमेहेराअ गोठ बीहराहांन आखांअ बाबोताम, आने सादारोण रीते बीहरें जांय नांय सेके एंहडया गोठ्या आखांअ बाबोताम, आने बीहराहांअ मोदोत केरांअ खातुर तुमांअ जे उंह हाय तींहमें, आने आमाहांपेअ तुमां जे माया राखतेंह तींहमें तुमां आगलांअ पोळतें हाय। तीयाअ लीदे, आंय तुमनेंह कालावाला कीअहुं का, पोयसा दांअ ईया मेरबानीवाला कामाम बी तुमां आगलांअ पोळतें बोंणजा!
8 एंहकींअ केरांअ आंय तुमनेंह हुकोम नांह केअतो, पेन बीहरी जागनेअ वीसवासी सोताअ आर्याअ वीसवास्यांअ मोदोत केरांअ केंहडें उहालें हाय तों तुमनेंह देखावीन, तुमां बी बीहराहांपेअ तेंहडीज हाची माया राखतेंह का नांह तीयाअ पारखों केरांअज आंय एंहकींअ आखुंह। 9 आपुअ मालीख ईसु ख्रीस्तुंह तुमाहांपेअ कोतीअ बादी मेरबानी केअयीह तों तुमां जांअतेंह। जुग ने तोरतीपेर्योंअ बादों तीयाअज आथों तेबी तीयांय तों बादों सोळी देदों, आने गोरीब मांहुंअ बोंणीन तो ईयु दुन्याम आलो, ईयाअ खातुर का सोताअ गोरीबायुकींअ तो तुमनेंह आत्मीक रीते मालदार aबोंणावी सेके।
10 तीयाअ लीदे, मालीखाअ नोमुनो देखावीन, ईया दानुअ पोयसाहांअ बाबोताम तुमांअ काय केरांअ जोजे तीयाअ आंय तुमनेंह सालाह दीहुं। येहुदीया वीस्ताराम पोरमेहेराअ जे लोक हाय तीयाहांअ मोदोत केरांअ खातुर गीया वोरसे तुमां मोर्जी राखली आने तीयाअ खातुर पोयसा टोलवांअ चालु बी केअलों। 11 तीयाअ लीदे, दानुअ पोयसा दांअ नोक्की कीईन ते टोलवांअ तुमां चालु केअलों तांहांअ तुमांअ जे मोर्जी आने उंह आथी, तेंहडीज मोर्जी ने उंह आमी बी राखीन तुमनेंह जों देवाय तों दीईन तों काम पुरों केअजा! 12 ईत राखजा का, तुमांअमेर्याअ केडाल बी बीहराहांअ मोदोत केरांअ उंह वेअ ता, तो तीयाल बोंणे तोतीअ मोदोत केअ। तोंज पोरमेहेराल गोंवेंह। तीयाल जोतोंअ दीअ सेकाय तीयाअ केअता वादारे तो दे एंहडी पोरमेहेर केडापेअ बी आस्या नांह राखतो। 13 आंय एंहकींअ नांह आखांअ मागतो का, बीहराहांअ जोरुल्या पुर्या पाळांअ खातुर तुमां सोते हाकळी वेठा। पेन उलटों, आंय एंहकींअ आखुंह, तुमाहांपेअ ने बीहराहांपेअ जोरुलीअ पुरतों हारकोंज वेरांअ जोजे। 14 आमी तुमाहांपेअ तुमांअ जोरुलीहींअ केअता वादारे हाय आने येहुदीया वीस्ताराअ वीसवास्यांहपेअ तीयाहांअ जीवांअ पुरतों बी नांह तांहांअ तुमांअ दानुकींअ तीयाहांअ जोरुल्या पुर्या पाळांअ जोजे। एगुह वोखत तुमाहांपेअ पुरतों नांय वेअ आने तीयाहांपेअ तीयाहांअ जोरुलीहींअ केअता वादारे वेअ ता, तीदीह तें तुमनेंह मोदोत कीअ सेकीअ। एंहकींअ कीईन, बादाहां पेअ पुरतों वीअ रीअ। 15 ईयु बाबोताम पोवीतोर लेखाणाहांम एंहडों लेखलों हाय:
“जीयांय पुसकोळ मांडो टोलवुअलो, तीयापेअ वादी नांय गीयो। आने जीयांय ओसो मांडो टोलवुअलो तीयाअ बी पुरतो वीअ रीयो।”
तीतु आने तीयाअ आर्याअ सेवोक
16 आंय पोरमेहेराअ आभार मानुंह। काहाका, तुमांअ खातुर मांन जेंहडी उंह हाय, तेंहडीज उंह तीयांय तीतुल बी देदीह। 17 तीतुल तींहीं तुमांअहीं आवांअ आमां कालावाला केअया तीयाअ लीदे ओतोंअज नांय, पेन तुमनेंह फाचो मीलांअ तीयाअ सोताअ बी उंह आथी तीयाअ लीदे, तो तुमांअहीं आवांअ तीयार वीयोह। 18 तीतुअरी एक ख्रीस्ती पावुहल बी आमां तुमांअहीं मोकलुअताह। तीयाल तुमां ओअखुअतेंहज। तीया पावुंह ख्रीस्तुअ बाबोताअ हारी गोठ फेलावांअ काम केअयोंह। तीयाअ पोरीणामे, तीयांय बादा मोंडोळुंहम हारों नांव काडयोंह। 19 ओतोंअज नांय, आमां दानुअ पोयसा लीईन येरुसालेम जाजी तांहांअ आमांअ हेंगात्या तोरीके बी तीयाल बीहरा वीस्तारुंअ मोंडोळुंअ लोकाहीं नीम्योह। दानुअ पोयसा लीअ जांअ ए सेवा आमां मालीखाल मोडाय दांअ खातुर आने येरुसालेमाअ गोरीब ख्रीस्तींहपेअ आमनेंह बी लागणी हाय तों देखावांअ खातुर केअताह। 20 पोरमेहेराअ लोक सुटा आथे देताह ईया दानुअ वोहीवोटुअ बाबोताम केडों बी आमांअ भुल नांय काडे तीयाअ कालजी राखांअ खातुर आमां बादा आरीज येरुसालेम जाताह। 21 एखला मालीखाअ नोजराम ओतोंअज नांय पेन बीहरा लोकाहीं अ नोजराम बी जों खेरों हाय तों केरांअज आमांअ ईरादो हाय। 22 आने तीयाहांअ आरी-आरी बीहरा एक ख्रीस्ती पावुहल बी आमां तुमांअहीं मोकलुअताह। आमां तीयाल खुब वोखत आने खुब रीते पारखी हेअयोह। मोंजे, आमी आमनेंह खोबुर हाय का, तो मालीखाअ सेवा केरांअ उंहालो हाय। आमी बीहरा मोंडोळुंअ लोकाहांअ होच तुमां बी ईं दान दांअ मोर्जी राखतेंह तीयाअ तीयाल पाकी खातरी हाय। तीयाअ लीदे तो, तीतु ने बीहरा पावुअरी आवांअ पेअलांअ केअता आमी वादारे उंहालो हाय। 23 तीतुअ बाबोताम आखुं ता, मांयुं तीयाल पोसोंद केअयोह काहाका, तो मांअ हेंगात्यो हाय आने तुमनेंह मोदोत केरांअ खातुर तो मांअ आर्योअ सेवोक बी हाय। तीयाअरी जे बेन जांअ आवताह तीयाहांअ बाबोताम आखुं ता, मांयुं तीयाहांन ईयाअ खातुर पोसोंद केअयाह का, ईया वीस्तारुंअ मोंडोळुंअ लोकाहीं तीयाहांन सोताअ चेला तोरीके मोकल्याह। ते बेनुं ख्रीस्तुअ मोडाय वेअ तेंहकींअ मेहनोत केअनारा हाय। 24 तीयाअ लीदे, बादा मोंडोळुंअ लोक जांय सेके तेंहकींअ ईया तीनुं मांहांहांपेअ तुमांअ माया देखावजा! आने तुमांअ बाबोताम बीहरा मोंडोळुंहम आमां जों हारों आखलों तों खेरोंज हाय तों बी तुमां एंहकींअ कीईन देखावजा!