19
पावुल एफेसु सेहेराम आवेह
1 आपोल्लो कोरींथ सेहेराम आथो तांहांअ, पावुल उंडाणुअ सेहेराहांम फीरतो-फीरतो एफेसु सेहेराम आलो। तींहीं ईसुपेअ वीसवास केअनारा थोळाक लोक तीयाल मील्या। 2 तांहांअ पावुलुंह तीया वीसवास्यांहन फुच्यों, “तुमां ईसुपेअ वीसवास केअयो तांहांअ तुमनेंह पोवीतोर आत्मा मील्यो का?” तांहांअ तीया वीसवास्याहां आख्यों, “नांह, पोवीतोर आत्मा हाय एंहडों आमां उनाअया बी नांह।” 3 तांहांअ पावुलुंह फुच्यों, “तुमां केल्ला बोदाअ आदारे बापतीस्मा लेदों?” तांहांअ तीयाहां आख्यों का, “योहानांय देदलो बोद आमां मान्यो, आने तीया बोदाअ आदारे आमां बापतीस्मा लेदों।” 4 तांहांअ पावुलुंह आख्यों, “लोक सोताअ पापी जीवोन सोळी दांअ तीयार हाय तीयाअ नीसाणी तोरीके बापतीस्मा लांअ योहानांय तीयाहांन आखलों। आने तीयांय फाचलांअ नेअ आवनारा ख्रीस्त ईसुपेअ वीसवास राखांअ बी आखलों।” 5 आने फाचलांअ नेअ आवनारो ता ख्रीस्त ईसु हाय तों ते उनाअया तांहांअ, तीयाहां मालीख ईसुअ नांवें बापतीस्मा लेदों। 6 हातींअ पावुलुंह तीयाहांपेअ आथ थोव्या आने ते लोक पोवीतोर आत्माअ पुरा काबाम आला आने ते बादा जुदया-जुदया बोल्या गोगांअ टेक्या आने पोवीतोर आत्मांय देदल्या गोठ्या बी ते आखांअ टेक्या। 7 तीया टोलाम लोगभोग बार आदमी आथा।
8 हातींअ पावुल तीन मोयना लोगुंअ तींहींर्याअ भोकती मोंडोळाअ कोअमें दोरेक आरामाअ दीह जाय-जायन खुब हींमोतुकींअ लोकाहांन बोद देहलो, आने पोरमेहेराअ राज्याअ बाबोताअ गोठ तीयाहांअ गोले उते तीयाअ खातुर तीयाहांअरी वाद-वीवाद केअत्लो। 9 पेन तीयाहांमेर्याअ थोळाक येहुदी लोकाहीं पावुलाअ गोठीअ नाकार केअयो, आने पोरमेहेरांय देखावला मारोगुअ तीयाहां जाहेराम नींदा केअयी। तांहांअ पावुलुंह तीयाहांन सोळी देदा आने वीसवासी लोकाहांन तीयाहांअ से जुदा पाळ्या। हातींअ तो, तुरान्नु नांवांअ मांहांअ एक मोडो होल आथो तींहीं वीसवास्यांहन रोददीह बोद दांअ टेकयो। 10 एंहकींअ कीईन पावुलुंह बेन वोरसें लोगुंअ तीया होलाम बोद देदो। आने तीयाअ पोरीणामे, आसीया वीस्तारामेर्याअ खुब येहुदीहींन आने गीरीक मांहांहांन मालीखाअ बाबोताअ गोठ उनायांअ मोको मील्यो।
स्केवा नांवांअ पुंजाराअ पोयरो
11 पोरमेहेरांय पावुलाअ आथे खुब मोडा-मोडा चोमोत्कार केराव्या। 12 आजार्याहांन हारें केरांअ खातुर खुब मांहेंअ पावुलुंह वापरुअल्या आथ रुबाल्या ने पोवीन काडी थोवलें पोतळें बी लीअ जायन आजार्याहांपेअ थोवत्लें। आने तें दुखी हारें वीअ जाहलें आने पुतळें लागला मांहांहांमेनेअ पुतळें बी नींगी जाहलें। 13 तीया वीस्ताराम ईंहीं-तींहीं फीरीन पुतळाहांन काडी वोलनारा थोळाक येहुदी भुवा आथा। एक दीह तीयाहां ईसुअ नांव लीईन पुतळों काडांअ ओजमावी हेअयों। तीयाहां पुतळों लागला मांहांअहीं जायन आख्यों, “ओ पुतळा, आंय तुल हुकोम कीअहुं का, ईया मांहांअमेनेअ नींगी जो!” 14 एंहडो हुकोम कीईन पुतळों काडनारांहम स्केवा नांवांअ मोडा पुंजाराअ सांत पोयरा बी आथा। 15 एक वोखत ते स्केवाअ पोयरा एक मांहांअमेनेअ तेंहकींअज कीईन पुतळें काडांअ काम केअत्ला तांहांअ, तों पुतळों तीयाहांन आखांअ टेक्यो का, “आंय ईसुल ओअखुंह आने पावुल बी मांअ ओअखातुज हाय। पेन आमनेंह काडांअ तुमाहांपेअ केल्ली जातीअ आदीकार हाय?” 16 एंहकींअ आखीन तों पुतळों लागलों मांहुंअ तीयाहांन ठोकांअ कुदी पोळ्यों आने तीयाहांन गाठवी पाळीन खुब ठोकया आने तीयाहांअ पोतळें बी फाळी टाकीन वोगुर पोतळाहांअ आने रोगताअलाज ओळी पाळ्या। 17 आने एफेसु सेहेराम रेनारा येहुदीहींन आने गीरीक लोकाहांन ते गोठ खोबुर पोळी गीयी। तांहांअ तींहींर्याअ बादाहांन बीख लागी गीयी आने तें बादें मालीख ईसु खुब ताकोतावालो हाय एंहकींअ कोबुल केअतें वीअ गीयें। 18 आने ईसुपेअ वीसवास केअनाराहांमेर्याअ जीयाहां-जीयाहां पापी कामें केअलें, तें तीयाहां मोंडोळाम आवीन बादाहांअ आगलांअ कोबुल केअयें। 19 आने जें जादु-मोंतोर केअत्लें, तीयाहांमेर्याअ खुब जांअहांहां सोताअ मोंतोरुअ बादें चोपळें लावीन बादाहांअ आगलांअ बाली टाक्यें। तीयाहां बादा चोपळांअ कींमोत गोंअयी ता, पाचास हाजार चांदीअ सीक्कांअ ओतीअ वीयी। 20 आने एंहकींअ कीईन मालीखाअ बाबोताअ गोठ वादारे ने वादारे फेलाअती गीयी आने ते उनाअनारांहमेर्याअ खुब जांअहांअ जीवोन बोदलाय गीयों। 21 ईं बादों बोंण्यों हातींअ पावुलुंह माकेदोनीया आने आखाया वीस्तारुंहम रीईन येरुसालेमाम जांअ नोक्की केअयों। आने तीयांय आख्यों, “तींहीं जायन हातींअ मांअ रोम बी जांअ जोजे।”
22 तीयाअ लीदे तीयांय तीयाअ आर्याअ तीमोथी आने आरास्ताल आगलांअ माकेदोनीया मोकली देदा। आने पावुल आजी थोळोक वादारे सोमोय आसीया वीस्ताराम रीयो।
होनारीयाहां केअली धामाल
23 ईयाज सोमोयाम , मालीखांय देखावली वाटीअ लीदे एफेसु सेहेराम खुब मोडी धामाल फाटी नींगी। 24 देमेत्रीयुस नांवांअ एक होनार्यो खुब कारीगोरुंहन रोकीन आरतेमी देवीअ मोंदीराअ नोमुनाअ हानेंअ-हानेंअ चांदीअ मोंदीरें बोंणावावत्लो आने तीयाअ वेपार केअत्लो। तीयाअ धोंधाअ लीदे खुब कारीगोरुंहन रोजी-रोटी मीलत्ली। 25 तीया देमेत्रीयुंह कारीगोरुंहन आने तीयाअ धोंदाल लागता-वीअगुअता बीहरा लोकाहांन टोलवीन आख्यों, “पावुहुं, तुमां जांअताह का, ईया धोंदाकींअ आपुअ हाराम-हारी कामाणी वेअहे। 26 पेन तुमां हेअताह आने उनाअताह का, ईया पावुलुंह एफेसु सेहेराम ओतोंअज नांय, पेन आखा आसीया वीस्ताराम लोकाहांन एंहडों मानतें कीअ देदेंह का, मांहांअ बोंणावल्या मुरत्या होकीकोतुम देव नांह। बादी जागे तो ईंज हीकवी फीरेह। आने तीयाअ पोरीणामे, मांहेंअ आपुअ मुरतींहन नांय लीअ। 27 ईंहमें मुस्कुल्या पेदा वीअ एंहडों हाय। जाता दीह मांहेंअ आपुअ धोंदाअ बाबोताम खोटों गोगीअ। ओतोंअज नांय, पेन आपुअ नावांअती आरतेमीस देवीअ मोंदीराअ काय बी कींमोत नांय रीअ। आने आखा आसीया वीस्ताराम आने आखा दुन्याम जीयुअ भोकती वेअहे तीयुअ मोडाय ओसी वीअ जाय।”
28 देमेत्रीयुअ गोठ उनायन टोलवाअला बादा खीजवाय गीया, आने बोंबली उठया, “एफेसु सेहेराअ आरतेमी माता की जोय!” 29 लोकाहांअ टोलो टोलवाय गीयो आने आखा सेहेराम एकदोम गुचवोण पेदा वीअ गीयी। लोकाहीं पावुलाअ आर्याअ जे माकेदोनीया वीस्ताराअ रेवासी आथा तीया गायु आने आरीस्तारखुल तेअया। आने तीयाहांन तांअता-तांअता सेहेराअ मीटींग्या वेअतल्या तीया जागाअ वेल लीअ जांअ टेक्या। एंहकींअ कीईन आखो टोलो तीया जागाअ वेल दोवळी गीयो। 30 तों देखीन पावुल तीया टोलाअ आगलांअ जायन तीयाहांन होमजावांअ मागत्लो। पेन चेलाहां तीयाल तेंहकींअ केअता ओटकाव्यो। 31 आसीया वीस्ताराअ खुब ओमोलदार पावुलाअ दोस्दार आथा। तीयाहां बी पावुलुल आखाव्यों का, “टोलाअ आगलांअ जांअ जोखोम मां लेतो!” 32 तांहांअ टोलवाअला तीयाहांमेर्याअ केडा काय बोंबलुअत्ला आने केडा बीहरों काय बोंबलुअत्ला। आने तींहीं गुचवोण पेदा वीअ रेहली। तीयाहांमेनेअ आरदांहन ता ते बादा तींहीं काहाल टोलवाअला तीयाअज खोबुर नांय आथी। 33 थोळाक येहुदी लोक आलेकसांदोरुल ठेअपीन आगलांअ लाला, ईयाअ खातुर का, तो टोलामेर्याअ लोकाहांअरी गोठ्या केअ। आलेकसांदेरुंह लोकाहांन ठाका रांअ खातुर आथाअ ईसारो केअयो। तो तीयाहांन खुलासो दांअ कोसीस केअत्लो का, ईयु बाबोताम आमांअ येहुदीहींअ काय बी भुल नांह। 34 पेन तो येहुदी हाय एंहकींअ लोकाहीं जांअयों तांहांअ, लोगभोग बेन काल्लाक लोगुंअ तीयाहां बोंबली-बोंबलीन आख्यों, “एफेसु सेहेराअ आरतेमी माता की जोय!”
35 आखरीप, सेहेराअ ओमोलदारांय लोकाहांन ठाका राखीन आख्यों, “बादें मांहेंअ जांअतेंहज का आपुंह एफेसु सेहेराअ मांहेंअ आरतेमी देवीअ मोंदीराअ आने जुगामेनेअ पोळली तीयुअ मुरतीअ देखरेख राखनारें हाय। 36 ईयु गोठीअ केडों बी नाकार कीअ नांह सेकतों। मोंजे, तुमां ठाका रा, आने वीचार्या वोगुर काय बी मां कीअहा! 37 तुमां जीया बेन आदमीहींन तीअ लालाह, तीयाहां मोंदीरामेनेअ काय बी चोअयों नांह का आपुअ देवीअ नींदा बी नांह केअयी। 38 तीयाअ लीदे, देमेत्रीयुअ आने तीयाअ आर्याअ कारीगोरुंअ केडाअ बी वीरुद काय बी फोरीयाद वीअ ता, कोरुट हायज आने नीयायाअ केअनारा जोज बी बोठलाज हाय। ते तीयाहांन ओरजी कीअ सेके। 39 पेन ईयु सीवाय बीहरी केल्ली बी बाबोत वीअ ता, तीयाअ खुलासो कायदेसोर पोंचाअ आगलांअ वेरांअ जोजे। 40 तीयाअ खुलासो कायदेसर नांय वेअ ता, आज जो बोनाव बोंण्योह तीयाअ लीदे रोम सारकार आपुंहपेअ धामाल केरांअ गुनो थोवे एंहडी मांन बीख हाय। काहाका, एंहकींअ कीईन टोलवायांअ तुमाहांपेअ काय बी कारोण नांह, आने रोम सारकार आपुंहपेअ खुलासो मागे ता, काय आखुलोंअ तीयाअ आपनेंह खोबुर नांय पोळीअ।” 41 एंहकींअ आखीन तीया ओमोलदारांय बादाहांन जाता रांअ आख्यों आने ते बादा जाता रीया।