18
1 हातींअ पावुल एथेन्स सेहेरामेनेअ नींगीन कोरींथ सेहेराम आलो। 2 तींहीं तीयाल आकीला नांवांअ एक येहुदी आदमी मील्यो। तो मुळ पोंतु वीस्ताराअ रेवासी आथो। तो ईटालीनेअ थोळाक वोखत पेअलांअज तीयाअ कोअवाली पीरीस्कीलाअरी कोरींथ आललो। काहाका, कोलोदीस नांवांअ रोमुअ बादसांह एंहडो हुकोम केअलो का, “बादा येहुदी लोक रोम सेहेर सोळीन जाता रे!” 3 पावुल बी पीरीस्कीला ने आकीलाअ होच तोंबु बोंणावांअज धोंदो केअत्लो। तीयाअ लीदे, तो तीयाहांअरीज रीयो आने तीयाहांअरी मीलीन धोंदो केअत्लो। 4 पावुल दोरेक आरामाअ दीह येहुदीहींअ भोकती मोंडोळाअ कोअमें जाहलो आने ईसुज ख्रीस्त हाय ए गोठ येहुदी आने गीरीक लोकाहांअ गोले उतावांअ कोसीस केअत्लो। 5 पेन सीला आने तीमोथी माकेदोनीयानेअ पावुलाअ हीं कोरींथ आवी पोच्या तांहांअ, पावुल सोताअ आखो सोमोय ईसुअ बाबोताम गोठ जाहेर केरांअनुंज दांअ टेक्यो। आने ईसुज ख्रीस्त हाय तों तीयांय बादाहांअ आगलांअ साबीत कीअ देखाव्यों। 6 पेन तींहींर्याअ येहुदी लोक तीयाअ हुंबुर वीअ गीया आने तीयाअ नींदा केरांअ टेक्या। तांहांअ पावुलुंह सोताअ पोतळें फोकळी टाक्यें आने आख्यों, “मांअ गोठ तुमां मानता नांह तीयाअ लीदे तुमनेंह काय बी वीअ ता, तुमां सोतेज तीयाअ जोवाबदार हाय, आंय नांह। आंय आमी येहुदी जातीअ नांह तेंहडा लोकाहांन ते गोठ आखांअ जाहें?” 7 हातींअ पावुल तीतीयु युस्तु नांवांअ मांहांअ कोअ रांअ जातो रीयो। तों मांहुंअ येहुदी जातीअ नांय आथों तेबी, तों पोरमेहेराअ भोकती केअत्लों। आने तीयाअ कोअ येहुदी भोकती मोंडोळाअ कोअरी नोकठीनुंज आथों। 8 आने तींहींर्याअ भोकती मोंडोळाअ पोंगाअ आगेवान कीरीस्पु ने तीयाअ बादा कोर्याहां ईसुपेअ वीसवास केअयो, आने कोरींथ सेहेराअ बीहरा खुब लोकाहीं बी ईसुअ बाबोताअ गोठ उनायन वीसवास केअयो आने बापतीस्मा लेदों। 9 एक रातीं मालीखांय पावुलुल दोरसोन दीईन आख्यों, “तुं वाय बी बीया वोगुर तीयाहांन ए हारी गोठ आखांअ चालुज राखजे! 10 काहाका, आंय तोअरीज हाय। तोअ बाल बी केडों वाको नांह केअनारों। काहाका, ईया सेहेराम एंहडा खुब लोक हाय का जे मांअपेअ वीसवास कीअ।” 11 आने पावुल डोळ वोरसों लोगुंअ कोरींथ रीयो आने तींहींर्याअ लोकाहांन पोरमेहेराअ बाबोताअ बोद देदो। 12 पेन गालीयो नांवांअ आदमी आखाया वीस्ताराअ राजपाल नीमाअयो तांहांअ, खुब येहुदी लोक एकुज गोठ कीईन पावुलाअ वीरुद उठया आने तीयाल तीईन राजपालाअ कोरोटाम लीअ गीया। 13 आने ते येहुदी लोक एंहकींअ आखांअ टेक्या का, “ईं मांहुंअ पोरमेहेराअ भोकती केरांअ एंहडी रीत हीकवेह का जे आमांअ नीयोम ाहांअ वीरुद हाय।” 14 तांहांअ पावुलुंह कायक आखांअ मुंय बी उसल्यों, पेन तांवज गालीयो आखी उठ्यो, “ओ येहुदी लोकुंह! तुमांअ ओरजी खाराब वोरतोनुअ बाबोत का केल्ला बी गुनाअ बाबोत वेअती ता, ते आंय हारकींअ उनाअतो। 15 पेन तुमांअ ओरजी ता, तुमांअ धोरमाअ सोब्दांअ आने नांवांअ आने तुमांअ नीयोमाहांअ बाबोताम हाय। तीयाअ लीदे, तीया बाबोताम तुमां तुमां-तुमांअ होमुज काडी टाका! आंय ईयु बाबोताम काय बी नीयाय केरांअ नांह मागतो।” 16 एंहकींअ आखीन तीयांय बादाहांन कोरोटामनेअ काडी थोवाव्या। 17 तांहांअ बारे आथें तीयाहां बादाहां, भोकती मोंडोळाअ पोंगाअ आगेवान सोस्थेनेल कोरोटुअ आगलांअज तीअ पाळीन ठोक्यो। आने गालीयांह तों देख्यों तेबी, तीयांय तीयाअ काय बी पारवाअ नांय केअयी।
पावुल फाचो आंतीयोख जाहे
18 हातींअ बी पावुल आजी थोळोक वादारे सोमोय कोरींथ सेहेराम रीयो। हातींअ तींहींर्याअ वीसवासी लोकाहांअ राज्या लीईन, तो पीरीस्कीला आने आकीलाअरी सीरीया वीस्ताराम जांअ वाहाणुम बोठो। पावुलुंह राखली मानता सुटांअ खातुर तीयांय केंखरीयाम मुनकों बोळावी टाक्यों। तें तीनुं एफेसु सेहेराम गीयें, आने पावुल पीरीस्कीलाल ने आकीलाल तींहीं सोळीन आगलांअ जानारो आथो। 19 पावुल एफेसु सेहेराम रोकाअयो तांहांअ, तो तींहींर्याअ येहुदी भोकती मोंडोळाअ कोअ गीयो, आने तींहींर्याअ येहुदीहींअरी वाद-वीवाद केअत्लो। 20 तींहींर्याअ थोळाक लोकाहीं पावुलुल वादारे रोकायांअ आख्यों, पेन पावुल नांय रोकाअयो। 21 पावुलुंह जाती वोखत तीयाहांन आख्यों, “पोरमेहेराअ मोर्जी वीअ ता, आंय फाचो तुमांअहीं आवेंह।” एंहकींअ आखीन तो एफेसुनेअ जाहाजाम बोहीन सीरीया जांअ नींग्यो।
22 पावुल वाहाणुम उतीन कायसारीया गीयो, आने तींहींनेअ तो मोंडोळाअ लोकाहांन सालाम केरांअ येरुसालेमाम गीयो। हातींअ तींहींनेअ तो सीरीया वीस्ताराअ आंतीयोख सेहेराम फाचो गीयो। 23 हातींअ पावुल खुब दीह आंतीयोख रीयो, आने हातींअ फाचो तो गालाती वीस्ताराम आने फीरुगीया वीस्ताराम गीयो। ईया वीस्तारुंहम तो गांवां-गांव फीर्यो आने बादा वीसवास्यांहन वीसवासाम मोजबुत वेरांअ उफ देदो। 24 तांहांअ आपोल्लो नांवांअ एक येहुदी मांहुंअ एफेसु सेहेराम आलों। तीयाअ जोन्मो मीसोर देसाअ आलेकसांदारीया सेहेराम वेअलों। तों बोद दांअ आवळोतावालों मांहुंअ आथों, आने पोवीतोर लेखाणाहांअ खुब जाणकार आथों। 25 तों मालीखांय देखावली वाटीअ जाणकार आथों। आने तों लोकाहांन मालीखाअ बाबोताम खुब हुची-हुचीम आने कालजी राखीन हीकवुअत्लों। पेन बापतीस्मा केअनारो योहान ईसुअ बाबोताम जोतोंअ जांअत्लो तोतोंअज तों बी जांअत्लों। 26 आपोल्लो भोकती मोंडोळाअ कोअमें काबराअया वोगुर बोद देहलो। तांहांअ पीरीस्कीला आने आकीला तीयाअ बोद उनाअयें, आने हातींअ तीयाल तें सोताअ कोअ हादी गीयें, आने हातींअ तीयाहां तीयाल पोरमेहेराअ गोठ वादारे उंडी रीते होमजावी। 27 हातींअ आपोल्लो आखाया वीस्ताराम जांअ मागत्लो तीयाअ लीदे, एफेसु सेहेराअ वीसवासी लोकाहीं तीयाल मोदोत केअयी आने उफ बी देदो। आने तीयाहां आखाया वीस्ताराअ वीसवास्यांहपेअ कागलों लेखीन आपोल्लुअ आवकार केरांअ भोलामोण केअयी। तो तींहीं पोच्यो तांहांअ, पोरमेहेराअ मेरबानीकींअ जीयाहां ईसुपेअ वीसवास केअलो, तीयाहांन तीयांय खुब आत्मीक मोदोत केअयी। 28 आने पोवीतोर लेखाणाहांमनेअ साबीत्या दीअ-दीईन आने चारचांहकींअ तीयांय येहुदीहींन खोटा पाळ्या आने तीयाहांन साबीत कीअ देखाव्यों का, “जीया ख्रीस्तुअ तुमां वाट जोवतेंह, तो ता ईसुज हाय।”