17
थेस्सालोनीका सेहेराम धामाल
1 ७८हातींअ पावुल आने सीला आंफीपोली आने आपोलोनीया सेहेराहांम रीईन थेस्सालोनीका सेहेराम आवी पोच्या। तींहीं येहुदीहींअ भोकती मोंडोळाअ कोअ आथों। 2 पावुल सोताअ होंवांयुं पोरमाणे येहुदीहींन मीलांअ तीया कोअ गीयो। आने तीन आठवाळ्यें लोगुंअ दोरेक आरामाअ दीह पावुल पोवीतोर लेखाण वाचीन तीया येहुदीहींअरी चारचा केअत्लो। 3 पावुलुंह येहुदीहींन ईया पोवीतोर लेखाणाहांअ बाबोताम होंमजावता तीयाहांन साबीत कीअ देखाव्यों का, ख्रीस्तुअ दुखें वेठीन मोय जांअ आने फाचों जीवतो उठांअ जोजत्लों। पावुलुंह आख्यों, “जीयाअ बाबोताम आंय तुमनेंह आखुंह, तो ईसुज ख्रीस्त हाय। तो मोय गेहलो आने फाचो जीवतो बी वीयोह।” 4 तीया येहुदींहमेर्याअ थोळाकाहीं पावुलाअ गोठ मानी आने पावुल ने सीलाअरी जोळाय गीया, आने तेंहकींअज कीईन खेरा पोरमेहेराअ भोकती केअनारा खुब गीरीक मांहांया आने आबरुदार कोर्याअ खुब बायुहुं बी पावुलाअ गोठ मानी लेदी। आने तें बी पावुल आने सीलाअरी जोळाअयें।
5 ओतेंअ बादें मांहेंअ पावुलाअ री जोळाय गीयें। तों देखीन पावुलाअ गोठ नांय माननारा थोळाक येहुदी आगेवानाहांन आदराय आली, आने तीयाहां बाजारामेर्याअ डांड मांहांहांन थोळाकाहांन टोलवीन एक टोलो बोंणाव्यो, आने ;तीयाहांन चोळवीन सेहेराम धामाल केरावी। आने पावुलुल आने सीलाल सेहेराअ पोंचाअ आगलांअ लीअ जांअ खातुर यासोन नांवांअ मांहांअ कोअ घेरी लेदों। 6 पेन पावुल आने सीला नांय झुळ्या तांहांअ, ते यासोनुल आने थोळाक बीहरा वीसवासी लोकाहांन सेहेराअ ओमोलदाराहांअहीं तांय लीअ गीया आने तीयाहांन बोंबलीन आख्यों, “आखा रोम राज्याअ बादी जागे भानगुळ पेदा केअनारा आदमी ईंहीं बी आवी गीयाह। 7 आने यासोनुंह तीयाहांन सोताअ कोअ गोवारा राख्याह। आने ते बादा, ‘ईसु नांवांअ एक बीहरो राजा हाय’ एंहकींअ आखीन बादसाअ हुकोमाहांअ वीरुद केअताह।” 8 तों उनायन लोकाहांम आने सेहेराअ ओमोलदारांयम खुब उचाट वीही गीयो। 9 आने ओमोलदाराहां यासोनुपेअ आने बीहराहांपेअ जामीनुअ तोरीके पोयसा पोराव्या आने हातींअ तीयाहांन सोळी देदा।
बेरेया सेहेराम पावुल आने सीला
10 तीयुज रातीं वीसवासी लोकाहीं पावुलुल आने सीलाल माहरी-माहरी बेरेया सेहेराम मोकली देदा। बेरेया पोच्या तांहांअ ते येहुदीहींअ भोकती मोंडोळाअ कोअ गीया। 11 बेरेयामेर्याअ येहुदी लोक थेस्सालोनीकामेर्याअ येहुदी लोकाहांअ केअता वादारे खुल्ला मोनुअ आथा। ते पावुलाअ गोठ खुस वीईन उनाअया, आने पावुलुंह आने सीलांह ख्रीस्तुअ बाबोताम आखल्या गोठ्या बोराबोर हाय का नांह तों हेरांअ खातुर ते रोददीह पोवीतोर लेखाणाहांन तापासत्ला। 12 तीयाअ लीदे, तीया येहुदींहमेर्याअ खुब लोकाहीं आने खुब गीरीक आदमीहीं आने आबरुदार गीरीक बायुहुं मालीखापेअ वीसवास केअयो। 13 पेन थेस्सालोनीकामेर्याअ येहुदी उनाअया का, पावुल बेरेया सेहेराम बी पोरमेहेराअ गोठ जाहेर केअहे। तांहांअ तीयाहां बेरेया आवीन तींहींर्याअ लोकाहांअ टोलाल पावुलाअ वीरुद चोळवीन धामाल केरावी। 14 तांहांअ तुरुतुज तींहींर्याअ वीसवासी पावु-बोंअयुहुं पावुलुल दोरीयाअ तोळी मोकली देदो। पेन सीला आने तीमोथी बेनुं बेरेया सेहेरामुज रीया। 15 पावुलुल थोवांअ जानारा लोक वाहाणुम तीयाल एथेन्स सेहेर लोगुंअ थोवांअ गीया। तींहीं पावुलुंह तीयाहांन आख्यों, “सीलाल आने तीमोथील आखजा का ते मांअहीं माहरीज आवे।” हातींअ ते थोवांअ जानारा बेरेया फाचा गीया।
एथेन्स सेहेराम पावुलुंह जाहेर केअली गोठ
16 पावुल एथेन्स सेहेराम सीलाअ आने तीमोथीअ वाट जोवत्लो तांव तीयांय हेअयों ता, आखा सेहेराम जींहीं-तींहीं मुरत्यान-मुरत्याज आथ्या। तों देखीन पावुलाअ जीव कीदराय उठ्यो। 17 तीयाअ लीदे तो येहुदीहींअ भोकती मोंडोळाअ कोअमें येहुदीहींअरी आने पोरमेहेराअ भोकती केअनारा बीहरी जातीअ लोकाहांअरी रोददीह चारचा केअतो रेहलो। आने तो बाजाराअ चोकुंम बी जाहलो आने तींहीं जेबी लोक मीलत्ला तीयाहांअरी चारचा केअतो रेहलो। 18 एपीकुरी आने स्टोयीक नांवांअ पोंथुंअ थोळाक गुरुहुं बी पावुलाअ री चारचा केअयी। तीयाहांमेनेअ थोळाकाहीं आख्यों, “ओ पोंडयो काय आखांअ मागेह रा!” आने बीहरा थोळाकाहीं आख्यों, “ओ एगाह पारका देवुंअ बाबोताम आखतो वीअ एंहडों लागेह।” ते एंहकींअ आखत्ला काहाका, पावुल ईसुअ बाबोताम आने तो मोअलांमेनेअ फाचो जीवतो उठ्यो तीया बाबोताम जाहेर केअत्लो। 19 तीयाअ लीदे, ते लोक तीयाल आरेयोपागु नांवांअ जागे, मोंजे, जींहीं कायोम सेहेराअ पोंचाअ मीटींग पोराअतल्या तींहीं हादी गीया आने तीयाल आख्यों, “तुं जो नोवो बोद दीहो, तीया बाबोताम आमां जांणांअ मागताह। 20 तुं आखोह तींहमेर्याअ थोळ्याक गोठ्या आमनेंह नोवाय लागे एंहड्या हाय आने आमां तीयु गोठीहींअ ओर्थो जांणांअ मागताह।” 21 (एथेन्स सेहेराअ रेवासी आने तींहीं रेनारा बीहरा देसाअ लोक, नोव्या-नोव्या गोठ्या उनायांअ आने आखांअ खातुरुज वादारे सोमोय वेळफी टाकत्ला।)
22 तांहांअ सेहेराअ पोंचाअ आगलांअ उबी रीईन पावुलुंह आख्यों, “एथेन्स सेहेराअ लोकुंह! आंय हीअहुं का तुमां बादी रीते धोरमाअ वाटे चालनारा हाय। 23 काहाका, तुमांअ सेहेराम फीरता आने तुमांअ भोकती केरांअ जागा हेअता मांयु एंहडी एक वेदी देखी। तीयु वेदीपेअ एंहडों लेखाण कोतरुअलों हाय का, ‘ए वेदी ओजाण्या पोरमेहेराल भोग चोळवांअ खातुर हाय।’ जीयाल ओअख्या वोगुर तुमां पुंजताह, तीयाज पोरमेहेराअ बाबोताम आंय तुमनेंह जाहेर कीअहुं। 24 जीया पोरमेहेरांय ए दुन्या आने तींहमेर्योंअ बादों बोंणाव्यों, तोज जुग-तोरतीअ धोणी हाय। आने तीयाअ लीदे, तो मांहांहां बांदला मोंदीराम नांह रेतो। 25 आने बादा मांहांहांन जीव, हाह, आने बीज्या बादया वोस्तु बी देनारो तो सोतेज हाय, तीयाअ लीदे, तीयाल मान दांअ मांहेंअ केल्ली बी वोस्तु बोंणावे तीयाअ जोरुल नांह, आने मांहांअ आथाअ सेवा तीयाल जोजवुअती बी नांह। 26 पेअलांम-पेअलांअ तीयांय एकुज मांहुंअ बोंणाव्यों, आने तीया मांहांअमेनेअ बादी जातीअ मांहेंअ बोंणाव्यें, आने तीयाहांन आखी तोरतीपेअ वोसाव्यें। आने तीयांय मांहांहांअ जुदया-जुदया जात्या नोक्की केअया आने रांअ खातुर देसाहांअ हीवाणां बी नोक्की कीअ देदाह, 27 ईयाअ खातुर का, ते पोरमेहेराल होदांअ आने कादास होदता-होदता तीयाहांन तो झुळी बी जाय। होकीकोतुम ता, तो आपुअसे सेटे हायज नांह। 28 तुमांअमेर्याअ एक कोवीता लेखनारांह आख्योंह तेंहकींअ, ‘तीयाअ मोदोताकींअज आपुंह जीवतेंह, ईरतेंह-फीरतेंह, आने रेतेंह।’ आने तुमांअज कोवीता लेखनारांहमनेअ थोळाकाहीं आख्योंह तेंहकींअ, ‘खोरेखोर आपुंह तीयाअज पोयरें हाय।’ 29 आपुअ पोरमेहेराअ पोयरें हाय। तीयाअ लीदे आपुअ एंहकींअ धारांअ नांय जोजे का, पोरमेहेर मांहांअ आवळोतावाला कामुकींअ आने वीचारुकींअ बोंणावली होनाअ का, चांदीअ का, ढोगळाअ मुरतींअ होच हाय। 30 पोरमेहेराअ मोर्जी मांहेंअ जांअत्लें नांय तेंहडा सोमोयाम , मांहांहां केअला पापाहांअ खातुर पोरमेहेरांय तीयाहांन सीक्सा नांह केअयी। पेन आमी तो बादी जागे रेनारा बादा मांहांहांन एंहडो हुकोम केअहे का, तें सोताअ पापाहांअ खातुर दुखी वीईन ते सोळी दे। 31 काहाका, तीयांय एंहडो एक दीह नोक्की केअयोह का जांहांअ तो तीयाअ नीमला एक मांहांअ मारफोते हाची रीते दुन्याअ लोकाहांअ नीयाय कीअ। आने पोरमेहेरांय तीया मांहांअल मोअलांमेनेअ फाचों जीवतो कीईन बादा लोकाहांन साबीत कीअ देखाव्योंह का, तों मांहुंअ ईसु सीवाय बीहरों केडों बी नांह।”
32 एक मांहुंअ मोअलांमेनेअ जीवतों उठ्यों ए गोठ उनायन थोळाक लोकाहीं पावुलाअ मोस्कुरी केअयी। पेन बीहराहां आख्यों, “आमी तीया बाबोताम आजी वादारे फाचों एगु वोखत तोअपेनेअ उनाअहुं।” 33 हातींअ पावुल तीयु मीटींगुमनेअ जातो रीयो। 34 पेन पावुलाअ री जोळाअया तीयाहांम, डायोनीयु नांवांअ एक आदमी आथो। तो आरेयोपागु नांवांअ जागे वेअतल्या मीटींग्या चालवुअनारांअ आर्योअ आथो। आने दामारी नांवांअ नामाअती एक बाय, आने बीहरें मांहेंअ बी पावुलाअ री जोळायन वीसवास केअतें वीयें।