16
पावुलाअ आने सीलाअरी तीमोथी जाहे
1 हातींअ पावुल आने सीला देर्बे गीया आने तींहीं तीयाहां वीसवास्यांअ मुलाकात लेदी। आने हातींअ तींहींनेअ ते लुसतीरा गीया। लुसतीराम तीमोथी नांवांअ एक वीसवासी आथो। तीयाअ याहकी मालीख ईसुपेअ वीसवास राखनारी येहुदी बाय आथी। पेन तीयाअ बाहको गीरीक जातीअ आथो। 2 लुसतीरा आने ईकोनीयोमाअ ख्रीस्ती लोक तीमोथील हारों मान देहला। 3 तीयाअ लीदे, पावुल तीयाल सोताअरी सेवाम लीअ जांअ मोर्जी राखत्लो। तीया वीस्ताराअ येहुदी लोकाहांअ मांन जालवांअ खातुर पावुलुंह तीमोथीअ सुन्नोत केरावी। काहाका, बादाहांन खोबुर आथी का तीमोथीअ बाहको गीरीक आथो। 4 हातींअ पावुल आने सीला, तीमोथीअरी सेहरु-सेहरु फीर्या। येरुसालेमामेर्याअ चेलाहां आने तीया मोंडोळाअ वोळीलाहीं जे-जे नीयोम नोक्की केअला, ते पालांअ तीया सेहेरामेर्याअ वीसवासी लोकाहांन होंमजावता फीर्या। 5 एंहकींअ मोंडोळाअ मांहेंअ दीहु-दीहु ईसुपेर्याअ वीसवासाम पाकें वेअतें गीयें आने मोंडोळाम नोवें-नोवें मांहेंअ जोळाअतें गीयें।
तुरोवा सेहेराम पावुलुल वेअलों दोरसोन
6 पोवीतोर आत्मांय तीयाहांन ईया सोमोये आसीया वीस्ताराम हारी गोठ आखांअ ना पाळली। तीयाअ लीदे, ते फीरुगीया आने गालातीया वीस्तारुंहम गीया। 7 हातींअ मुसीया वीस्ताराअ हीवांणापेअ आवीन ते बीथुनीया वीस्ताराम जांअ कोसीस केअत्ला। पेन ईसुअ आत्मांय तीयाहांन जांअ ना पाळी। 8 तीयाअ लीदे, ते मुसीया वीस्ताराम रीईन तुरोवा सेहेराम गीया। आने आंय लुक सोते बी तींहींनेअ तीयाहांअरी जोळाय गीयो। 9 तींहीं रातीं पावुलुल दोरसोन वीयों। तीया दोरसोनुम तीयाल गीरीस देसाअ माकेदोनीया वीस्ताराअ एक मांहुंअ देखाअयों। तों मांहुंअ उबी रीईन पावुलुल कालावाला केअत्लों का, “माकेदोनीयाअवेल आवीन आमनेंह मोदोत केअ!” 10 पावुलुल ईं होपनों पोळ्यों तांहांअ आमां नोक्की केअयों का, माकेदोनीया वीस्ताराअ लोकाहांन हारी गोठ जाहेर केरांअ खातुर, पोरमेहेर आमनेंह मोकलांअ मागेह। तीयाअ लीदे आमां तुरुतुज मोकेदोनीया वीस्ताराम जांअ तीयारी केअयी।
फीलीप्पी सेहेराम लुदीया नांवांअ बायाअ बोदलाण
11 तुरोवा सेहेरामेनेअ नींगीन आमां उळीम बोहीन पादराज सोमोत्राके बेट गीया आने बीहरे दीह नीयापोलीस गीया। 12 उळील तींहींज सोळीन आमां फीलीप्पी सेहेराम गीया। तों माकेदोनीया जील्लाअ खास सेहेर आथों। तींहीं रोम सारकाराअ राज चालत्लों। तीया सेहेराम आमां थोळाक दीह रीया। 13 आने आरामाअ दीह आमां सेहेराअ बारे खाडीअ तोळी गीया। आने तींहीं पोरमेहेराल ओरुज केरांअ खातुर येहुदी लोकाहांअ भोकती केरांअ जागो वीअ एंहकींअ धारीन आमां तींहीं बोठा आने तींहीं टोलवाल्या बायाहांन बोद दांअ टेक्या। 14 आमांअ बोद उनाअनार्या बायुंयमनेअ लुदीया नांवांअ एक बाय आथी। ते थीयातीरा सेहेराअ आथी आने ते जांबा रोंगुंअ खुब मोगा जातीअ पोतळाहांअ वेपारी आथी। आने ते पोरमेहेराअ भोकती केअनारी बी आथी। पावुलाअ गोठ्या मानांअ मालीखांय तीयुअ मोनाम उफ देदो। 15 तीयुंय आने तीयुअ कोर्याअ मांहांहां बापतीस्मा लेदों हातींअ तीयुंय आमनेंह कालावाला केअया, “तुमां मांन मालीखापेअ हाची रीते वीसवास राखनारी गोंअता वीअ ता, मांअ कोअ आवीन रा।” आमां तीयुअ कोअ गीया तांव लोगुंअ ते आमनेंह कालावाला केअयाज केअत्ली।
पावुलुल आने सीलाल फीलीप्पी सेहेराअ जेलाम पुरी देतेंह
16 एक दीह आमां पोरमेहेराल ओरुज केरांअ जागे जाहला तांहांअ आमनेंह एक जुवान गुलाम पोयरी मीली। तीयुल भोवीसवाणी केअनारों पुतळों लागलों। आने ते पोयरी भोवीसवाणी कीईन सोताअ सेटांयन खुब लाब कीअ देहली। 17 ते पावुलाअ आने आमांअ बादाहांअ फाचलां-फाचलांअ आवीन बोंबलीन आखांअ टेकी का, “आय आदमी मोडांम-मोडा पोरमेहेराअ सेवोक हाय आने पोरमेहेर तुमनेंह केंहकींअ वाचावी सेके तीया बाबोताम तुमनेंह बोद देताह।” 18 खुब दीह लोगुंअ ते एंहकींअ केअयाज केअत्ली। आखरीप पावुल काटलाय गीयो आने फाचलांअ फीरीन पुतळाल हुकोम केअता आख्यों, “ईसु ख्रीस्तुअ आदीकाराकींअ आंय तुल ईयु पोयरीमनेअ बारे नींगीं जांअ हुकोम कीअहुं।” आने तीयुज घेळी तों पुतळों तीयु पोयरीमनेअ नींगी गीयों। 19 तीयु पोयरीअ मालीखांयन लाग्यों का, तीयुअ मारफोते तीयाहांन जे कामावांअ तोक मीलत्ली ते सोटकी गीयीह। तांहांअ तीयाहां पावुल आने सीलाल तेअया आने तांअता-तांअता तीयाहांन बाजाराम ओमोलदाराहांअहीं लीअ गीया। 20 तींहीं तीयाहां तीयाहांन रोम सारकाराअ ओमोलदाराहांअ आगलांअ उबी राखीन आख्यों, “आय आदमी येहुदी हाय आने आपुअ सेहेराअ लोकाहांन गुचवोंणुम टाकताह। 21 आने आपुअ रोम राज्याअ मांहांहांन जे मानांअ आने पालांअ नांय जोजवे, तेंहडा रीवाज ते हीकवुअताह।” 22 टोलामेर्येंअ मांहेंअ बी पावुल आने सीलापेअ हुमलो केअनारांअरी जोळाय गीयें, आने तीया ओमोलदाराहां पावुल आने सीलाअ पोतळें फाळी टाकाव्यें, आने तीयाहांन होटीहींअ मार ठोकांअ हुकोम केअयो। 23 होटीहींअ खुब मार ठोकावीन तीया ओमोलदाराहां पावुल आने सीलाल जेलाम कोंडाव्या आने तीयाहांपेअ कोळोक चोकी राखांअ जेलोरुल हुकोम केअयो। 24 ओ हुकोम मीलताज जेलोरुंह तीयाहांन जेलुअ माजरीअ खोलीम पुरी देदा आने तीयाहांअ पागुंहम लाकळांअ मोडया-मोडया बेळ्या टाक्या।
25 लोगभोग पोरा-पोर रातीं पावुल आने सीला गीतें आखीन पोरमेहेराअ गुणगान केअत्ला आने तीयाल ओरुज केअत्ला। आने बीहरा केदी तों उनाअत्ला। 26 तांहांअ ओचींतोज, जेलुअ पाया बी आली उठे ओतेअ जोरपेअ तोरतीकोंप वीयो। आने तुरुतुज जेलुअ बादें बांअणें उगळी गीयें, आने जेलाम ेर्याअ केदीहींन बांदला ते बादया हाकल्या सुटी गीया। 27 आने जेलोर जागी गीयो, ने तीयांय जेलुअ बांअणें उगाळें देख्यें, आने बादा केदी नाही सुटया एंहकींअ वीचारीन तो तारवाअ काडीन आपघात केरांअ तीयार वीअ गीयो। 28 पेन पावुलुंह बोंबलीन आख्यों, “आमां बादा ईंहींज हाय! तुं आपघात मां केअतो!”
29 तांहांअ जेलोरुंह दीवा लीअ हादया, आने माहरी-माहरी जेलुअ माज गीयो। आने कापतो-कापतो पावुलाअ आने सीलाअ पागे पोळ्यो। 30 हातींअ पावुल आने सीलाल जेलुअ बारे हादी जायन तीयांय तीयाहांन फुच्यों, “साहेबुहुं, पापाहांअ सीक्सामेनेअ वाचायांअ खातुर मांअ काय केरांअ पोळे?”
31 तांहांअ तीयाहां तीयाल आख्यों, “मालीख ईसुपेअ वीसवास केअ! तांहांअ पोरमेहेर तुल आने तोअ कोर्यांहन पापाहांअ सीक्सामेनेअ वाचावीअ।” 32 हातींअ पावुल आने सीलांह तीया जेलोरुल आने तीयाअ बादा कोर्यांहन मालीख ईसुअ बाबोताअ गोठ आखी आने तीयाहां बादाहां ते गोठ मानी। 33 आने तीया जेलोरुंह रातीन-रातींज पावुल आने सीलाल हादी जायन तीयाहांअ सोरीलाम लागलों तों बादों तुव्यों। हातींअ तुरुतुज तीयांय आने तीयाअ कोर्याहां बापतीस्मा लेदों। 34 हातींअ तो जेलोर पावुल आने सीलाल तीयाअ कोअ हादी गीयो आने तीयाहांन मांडो देदो। आने तो आने तीयाअ बादें कोर्येंअ खुब खुस वीअ गीयें।
35 उजालों वीयों तांहांअ तीया ओमोलदाराहां पोलीसुंहन मोकलीन जेलोरुंहन आखाव्यों का, “तीया बेनुं जांअहांन सोळी थोव!” तीयाहां जायन जेलोरुल ते गोठ आखी।
36 तांहांअ जेलोरुंह पावुलुल आख्यों, “ओमोलदाराहां तुमनेंह सोळी थोवांअ आखी मोकल्योंह। तीयाअ लीदे, तुमां आमी सुख-सांतीम जा!”
37 पेन पावुलुंह तीया पोलीसुंहन आख्यों, “आमां रोम राज्याअ नागरीक हाय। तेबी, आमां काय गुनो केअयोह का नांह तीयाअ तापास बी केअया वोगुर कायदाअ वीरुद आमनेंह बादा लोकाहांअ आगलांअ होटीहींअ मार ठोकाव्यो आने जेलाम बी कोंडाव्या। आने आमी आमनेंह ठाका-ठाका मोकली दांअ मागताह। एंहकींअ ता बोंणेज नांय! ते सोतेज आवीन आमनेंह बारे काडे।”
38 मोंजे, पोलीसुंह जायन पावुलुंह जों आखलों तों ओमोलदाराहांन आखी देखाव्यों। ते रोम राज्याअ नागरीक हाय तों उनायन ते ओमोलदार काबराय गीया। 39 तीयाअ लीदे, तीयाहां जायन पावुल ने सीलापेअ माफी मागी आने सेहेरामेनेअ जाता रांअ तीयाहांन कालावाला केअया। 40 तांहांअ पावुल आने सीला जेलाम नेअ नींगीन लुदीयाअ कोअ गीया। आने तींहीं तीयाहां बीहरा बादा वीसवासी पावु-बोंअयुंहन मीलीन तीयाहांन उफ देदो। हातींअ ते तीया सेहेरामेनेअ जाता रीया।