15
येरुसालेम सेहेराम मोंडोळाअ पोंचाअ पेअलांम पेअलीअ मीटींग
1 पावुल आने बारनाबा सीरीया वीस्ताराअ आंतीयोख सेहेराम आथा तांहांअ, येहुदीया जील्लामेनेअ थोळाक येहुदी वीसवासी तींहीं आला, आने तींहींर्याअ येहुदी जातीअ नांह तेंहडा वीसवास्यांहन हीकवांअ टेक्या का, “मोसेअ नीयोमा पोरमाणे तुमां सुन्नोत नांय केरावा तांव लोगुंअ पोरमेहेरांय तुमनेंह तुमांअ पापाहांअ सीक्सामेनेअ वाचाव्यें एंहडों नांय गोंणाय।” 2 तीयाहांअरी ईयु बाबोताम पावुल आने बारनाबाअ बोराबोर वाद-वीवाद वीयो। तीयाअ लीदे, एंहडों नोक्की केअयों का, पावुल आने बारनाबा आने आंतीयोख मोंडोळाअ थोळाक लोक येरुसालेम जाय, आने ईयु गोठीअ सुलेवात केरांअ खातुर, मालीखाअ खास चेलाहांन आने मोंडोळाअ वोळीलुंहन मीले। 3 एंहकींअ कीईन आंतीयोख मोंडोळाअ लोकाहीं, तीयाहांअ वाट खोरचाअ खातुर जीयाअ बी जोरुल आथी ते दीईन, तीयाहांन येरुसालेम मोकली देदा। जाता-जाता ते वीसवास्यांअ मुलाकात लांअ खातुर वाटे फीनीकीया, आने सामारीया वीस्तारुंहम ओटक्या। तीयाहां तीया वीसवास्यांहन, येहुदी जातीअ नांह तेंहडें मांहेंअ केंहकींअ पोरमेहेराअ वेल फीर्येंह, तीयाअ हेवाल देदो। ईयु खोबुरुअ लीदे तीया वीसवास्यांहन खुब आनोंद वीयो।
4 ते येरुसालेमाम आला तांहांअ, मालीखाअ खास चेलाहां आने तींहींर्याअ वोळीलाहीं आने मोंडोळाअ बीहरा वीसवासी लोकाहीं तीयाहांअ आवकार केअयो, आने पावुल आने बारनाबांह, तीयाहांअ सेवाअ मारफोते पोरमेहेर जों कीअ रीयोह, तों बादों तीयाहांन जाणाव्यों। 5 पेन पेअलांअ फोरीसी पोंथाअ आथा तीयाहांमेर्याअ थोळाक लोकाहीं उठीन आख्यों, “येहुदी जातीअ नांह तेंहडा लोकाहांमेनेअ जे ख्रीस्ती बोंण्याह, तीयाहांमेर्याअ बादा आदमींअ सुन्नोत वेरांअज जोजे, आने मोसेअ बीहरा नीयोम बी पालांअ तीयाहांन आखांअ जोजे!”
6 तांहांअ मालीखाअ खास चेला आने मोंडोळाअ वोळील ईयु बाबोताम नोक्की केरांअ खातुर टोलवाअया। 7 तीयु मीटींगुम लांबी चारचा वीयी। हातींअ पीतोरांय उठीन आख्यों, “मांअ पावुहुं, तुमां जांअताह का, येहुदी जातीअ नांह तेंहडें मांहेंअ हारी गोठ उनायन मालीखापेअ वीसवास केअ तीयाअ लीदे तीयाहांन बोद दांअ खातुर, थोळाक वोखत पेअलांअ पोरमेहेरांय तुमाहांमेनेअ मांन पोसोंद केअयो। 8 मांहांहांअ वीचार बोराबोर जांअनारा पोरमेहेरांय जेंहकींअ आपनेंह येहुदीहींन पोवीतोर आत्मा देदो, तेंहकींअ येहुदी जातीअ नांह तेंहडा मांहांहांन बी दीईन ईं देखाव्यों का, तो येहुदी जातीअ नांह तेंहडा लोकाहांन बी सोताअ लोकाहांअ तोरीके मानेह। 9 आने तीयांय आपुअ आने तीयाहांअ नीसमें केल्लो बी भेदभाव नांह राख्यो; जेंहकींअ तीयांय आपुअ मोनुंहन चोख्खें केअयेंह, तेंहकींअ तीयांय, तीयाहां मालीख ईसुपेअ वीसवास केअयो तीयाअ लीदे तीयाहांअ मोनुंहन बी चोख्खें केअयेंह। 10 तांहांअ नीयोम पालांअ जे मुसकुल्या आपुअ आगलेंअ डायें, का आपुंह बी नांह वेठी सेक्यें, तें ईया येहुदी जातीअ नांह तेंहडा वीसवास्यांहन वेठांअ आखीन तुमां पोरमेहेराअ धीरोजुअ पारखों मां केअता। 11 आपुंह मानताह का, तीयाहांन आने आपनेंह पोरमेहेरांय एकुज रीते मालीख ईसुअ मेरबानीकींअ पापाहांअ सीक्सामेनेअ वाचाव्येंह।” 12 तींहीं तीया बाबोताम वादारे चारचा नांय वीयी, आने बारनाबा आने पावुल तीयाहांअ मारफोते येहुदी जातीअ नांह तेंहडा लोकाहांम पोरमेहेरांय केअला नोवाय लागे एंहडा कामाहांअ बाबोताम आने चोमोत्काराहांअ बाबोताम हेवाल देहला तांहांअ तींहीं बोठला बादा तो हेवाल चुप-चुप उनाअत्ला।
13 पावुलुंह आने बारनाबांह गोगांअ पुरों केअयों तांहांअ तींहींर्याअ मोंडोळाअ वोळील याकोब गोगी उठ्यो का, “पावुहुं, मांअ गोठ उनाया! 14 सीमोन पीतोरांय आमीज होमजाव्यों का, पोरमेहेरांय येहुदी जातीअ नांह तेंहडा लोकाहांमेनेअ थोळाकाहांन सोताअ लोक बोंणाव्याह आने एंहकींअ कीईन तीयाहांअ खातुर पोरमेहेर सोतेज कालजी राखेह तों देखाव्यों। 15 पोरमेहेराअ गोठ जाहेर केअनाराहां केअली ते भोवीसवाणी , येहुदी जातीअ नांह तेंहडा लोक आमी ख्रीस्ती बोंण्याह ईंहमें पुरी वेअहे। दाखला तोरीके, पोवीतोर लेखाणाहांम एंहडों लेखलों हाय:
16 ‘मालीख आखेह: “भोवीस्यांम आंय फाचो फीरेंह,
आने दावीदाअ पोळी गेहला राजाल आंय फाचों उबों केअहें।
तीयाअ नास वेअली हालोतामेनेअ आंय तीयाल हुदारेंह,
आने तीयाल फाचों बांदेंह,
17 ईयाअ खातुर का, बीहरा बादा लोक,
मोंजे का, जीयाहांन मांयुं मांअ सोताअ लोक वेरांअ हादयाह एंहडा येहुदी जातीअ नांह तेंहडा बादा लोक,
मांअ सेवा केरांअ मांन होदीअ।”’
18 खुब वोखत पेअलांअज ए गोठ जाहेर केअनारो मालीख एंहकींअ आखेह।” 19 याकोबांय आजी गोगांअ चालु राख्यों, “आंय धारुंह का, मालीखाअ वेल फीरनारा येहुदी जातीअ नांह तेंहडा लोकाहांन मोसेअ नीयोम पालांअ फोरोज पाळीन तोकलीत दांअ आपुअ सोळी दांअ जोजे। 20 तीयाअ बोदले, आपुंह तीयाहांपेअ एंहडों कागलों लेखजी का, मुरतींहन चोळवुअली केल्ली बी वोस्तु तीयाहांअ खावुलोंअ नांय, केल्ली बी जातीअ सीनालों केरुलोंअ नांय, आने डुअकाय मोअला केल्ला बी जोनावोरुअ रोगुत पीयुलोंअ नांय आने तीयाअ माह खावुलोंअ बी नांय। 21 काहाका, मोसेअ नीयोमाअ चोपळी लांबा वोखतनेअ दोरेक आरामाअ दीह दोरेक सेहेराअ येहुदीहींअ भोकती मोंडोळाअ पोंगाहांम वाचाअहे आने तीयु चोपळीम ईयु बाबोतीहींअ जे गोठ्या लेखल्या हाय, तीया बाबोताम बोद देवाअताह।”
येहुदी जातीअ नांह तेंहडा वीसवास्यांहपेअ लेखलों कागलों
22 याकोबाअ ते सालाह मानीन मालीखाअ खास चेला, मोंडोळाअ वोळील, आने मोंडोळाअ बीहरा बादा लोकाहीं मीलीन ओमुक मांहांहांन पोसोंद केअयें आने तीयाहांन, जों नोक्की केअलों तों जाणावांअ, पावुल ने बारनाबाअरी आंतीयोख मोकलांअ नोक्की केअयों। तीयाहां मोंडोळाअ वोळीलुंहमेर्याअ बेन आदमीहींन , मोंजे का, (बारसाबा आखाअत्लो तीया) येहुदाल आने सीलाल पोसोंद केअया। 23 तीया बेन मांहांहांअरी तीयाहां एंहडों कागलों लेखी मोकल्यों:
“आंतीयोख सेहेराम, आने सीरीया आने कीलीकीया वीस्तारुंहम रेनारा बादा येहुदी जातीअ नांह तेंहडा वीसवास्यांहन, ईं कागलों लेखनारांअ, मोंजे का, मालीखाअ खास चेला, मोंडोळाअ वोळील, आने येरुसालेम मोंडोळाअ तुमांअ बीहरा ख्रीस्ती पावुंअ सालाम।
24 आमां एंहडों उनाअयाह, आमांअमेर्याअ थोळाक लोकाहीं सोताअ बोदा कींअ तुमांहम मुस्कुली आने गुचवोण पेदा केअयीह। पेन ईयु बाबोताम आमां तीयाहांन केल्लो बी हुकोम नांह केअयो। 25 तीयाअ लीदे, आमां टोलवाअयाह आने थोळाक चेलाहांन पोसोंद कीईन तीयाहांन तुमांअहीं मोकलांअ आमां बादाहां एकुज गोठ नोक्की राखीह। ते चेला, आपुअ मेराला दोस्दार बारनाबाअ आने पावुलाअ री आवताह 26 का जीयाहां आपुअ मालीख ईसु ख्रीस्तुअ सेवाम सोताअ मोताअ बी पारवाअ नांह केअयी। 27 तांहांअ आमां येहुदाल आने सीलाल तुमांअहीं मोकलुअताह। ते तुमांअ सावालुअ बाबोताम आमां जों नोक्की केअयोंह, तों तुमनेंह उरु-बुरु आखीअ। 28 नीयोम ुंहमनेअ ईया खास नीयोमाहांअ सीवाय, बीहरो केल्लो बी वोजो तुमाहांपेअ थोवुलोंअ नांय एंहकींअ पोवीतोर आत्मांय आने आमां नोक्की केअयोंह। 29 ते नीयोम ए हाय: मुरतींहन चोळवुअलो मांडो खावुलोंअ नांय, डुअकायन माअला केल्ला बी जोनावोरुअ रोगुत पीयुलोंअ नांय, आने तीयाअ माह खावुलोंअ नांय, आने केल्ली बी जातीअ सीनालों केरुलोंअ नांय। जो तुमां ओताअ नीयोम पालाह ता, तों पुरतों हाय। आवजा!”
30 बादाहांअ राज्या लीईन येहुदा, सीला, पावुल, आने बारनाबा, तींहींनेअ तुरुतुज आंतीयोख गीया। तींहीं जायन तीयाहां मोंडोळाअ बादा वीसवासी लोकाहांन टोलवीन तों कागलों देदों। 31 उफ देनारों तों कागलों वाचीन मोंडोळाअ बादा वीसवासी लोक खुब खुस वीया।
32 येहुदा आने सीला बेनुं बी सोते पोवीतोर आत्मांय जाणावल्या गोठ्या जाहेर केअनारा आथा। तीयाअ लीदे, तीयाहां तींहींर्याअ वीसवास्यांहन खुब गोठ्या आख्या आने तीयाहांन वीसवासाम मोजबुत केअया। 33 ते बेनुं खुब आठवाळ्यें तींहीं रीया। हातींअ मोंडोळाअ पावु-बोंअयुहुं तीयाहांन सालाम दीईन फाचा येरुसालेम जांअ वीदाय देदी। 34 ((पेन सीला फाचलांअ नेअ फाचो आंतीयोख आलो। आने तींहींज रांअ तीयांय पोसोंद केअयों।)) 35 पावुल आने बारनाबा थोळाक वोखत आंतीयोखुमुज रोकाअया आने ते तींहीं मालीखाअ बाबोताम बोद आने हीकामोण देनारा बीहरा खुब लोकाहांअ मोदोत केअत्ला।
पावुल आने बारनाबा सुटा पोळताह
36 थोळाक दीह वीया हातींअ पावुलुंह बारनाबाल आख्यों, “चाला, आपुंह फाचा जाजी, आने जीया-जीया सेहेराहांम आपुंह मालीखाअ बाबोताअ गोठ आखीह तीया दोरेक सेहेराअ मुलाकात लेजी, आने तींहींर्याअ नोवा वीसवासी आत्मीक जीवोनाम केंहडा हाय तों हेअजी!” 37 तांहांअ बारनाबांह हां पाळी आने योहान मार्कल बी आरी लीअ जांअ तीयाअ मोर्जी आथी। 38 पेन पावुलुल ए गोठ नांय गोंवी। काहाका, मार्क सेवाम सेवोट लोगुंअ तीयाहांअरी नांह रीयो, पेन तीयाहांन पांफुलीयाम सोळीन तो जातो रेहलो। 39 ईयु बाबोताम पावुल आने बारनाबाअ नीसमें खुब बोला-चाली वीयी। तीयाअ पोरीणामे ते सुटा पोळी गीया: बारनाबा सोताअरी योहान मार्कल लीईन सीपरु बेट गीयो, 40 आने पावुलुंह सीलाल पोसोंद कीईन सोताअरी लेदो। आंतीयोखुअ वीसवासी पावु-बोंअयुंह पावुलुल आने सीलाल मेरबानीवाला मालीखाल तीयाअ सेवाअ खातुर होपीन तीयाहांन मोकल्या। 41 मोंजे ते सीरीया आने कीलीकीया वीस्तारुंमेर्याअ मोंडोळाअ वीसवास्यांहन वीसवासाम मोजबुत केरांअ खातुर तींहीं गीया।