14
ईकोनीयोम सेहरुमेर्याअ लोकाहांन पावुल आने बारनाबा हारी गोठ जाहेर केअताह
1 पीसीदीया जील्लामेर्याअ आंतीयोख सेहेराम पावुलुल आने बारनाबाल जो ओनुभोव मीललो, तेंहडो ओनुभोव तीयाहांन ईकोनीयोम सेहेराम बी मीललो। तींहीं बी ते बेनुं मीलीन येहुदीहींअ भोकती मोंडोळाअ कोअमें गीया आने एंहकींअ गोग्या का, खुब येहुदी मांहेंअ आने येहुदी जातीअ नांह तेंहडें मांहेंअ ईसुपेअ वीसवास केअतें वीअ गीयें। 2 पेन जीया येहुदीहीं ईसुपेअ वीसवास केरांअ ना पाळी, तीयाहां येहुदी जातीअ नांह तेंहडा लोकाहांन चोळव्या आने तीयाहांअ मोनाहांम पावुलाअ आने बारनाबाअ वीरुद वेर पेदा केअयो। 3 तेबी, मालीखाअ खास चेला पावुल आने बारनाबा तींहीं लांबो वोखत लोगुंअ रीया आने मालीखाअ बाबोताम हींमोत राखीन बोद देता रीया। मालीख तीयाहांन चोमोत्कार केरांअ आने नोवाय लागे एंहडें कामें केरांअ ताकोत दीईन तीयाअ मेरबानीअ बाबोताअ गोठ हाचीज हाय एंहडी साबीती देतो रीयो। 4 तीया सेहरुमेर्याअ मांहांहांअ बेन टुकळ्या पोळी गीया। एक टुकळीअ मांहेंअ तीया येहुदी लोकाहांअरी जोळाय गीयें। आने बीहरी टुकळीअ मांहेंअ मालीखाअ खास चेलाहांअरी जोळाय गीयें।
5 येहुदी जातीअ नांह तेंहडा लोकाहीं आने येहुदीहीं तीयाहांअ आगेवानाहांअरी मीलीन मालीखाअ खास चेलाहांन हेरान केरांअ आने तीयाहांन ढोगळा ठोकीन माय टाकांअ नोक्की केअयों। 6 खास चेलाहांन तीयाअ खोबुर पोळी तांहांअ, ते लुकानीया जील्लामेर्याअ लुसतीरा आने देरबे सेहेराहांम आने तीयाहांअ पाहल्याअ वीस्तारुंहम नाही गीया। 7 तींहीं तीयाहां हारी गोठ जाहेर केअयी।
लुसतीरा आने देरबे सेहेराहांम पावुलाअ आने बारनाबाअ ओनुभोव
8 पावुल आने बारनाबा लुसतीरा सेहेराम आथा तांहांअ तींहीं तीयाहां एक लुलों मांहुंअ देख्यों। तों मांहुंअ जोन्मेदेखुंज लुलों आथों आने तीयाअ लीदे तों कीदीह बी चाल्योंज नांह। 9 पावुल बोद देहलो तांहांअ तों मांहुंअ उनाअया केअत्लों। आने पावुलुल एंहडों लाग्यों का, तों मांहुंअ हारों वीअ सेके तेंहडो तीयाअ मोनाम पुरतो वीसवास हाय। 10 तीयाअ लीदे, पावुल तीयाल हीईज रीयो आने जोरपेअ तीयाल आख्यों, “तोअ सोताअ पागुंहपेअ पादरो उबी रे!” तांहांअ तों मांहुंअ एकदोम कुदीन उठ्यों आने चालांअ टेक्यों।
11 पावुलुंह जों केअलों तों देखीन टोलामेर्याअ लोकाहीं सोताअ भासाम बोंबलीन आख्यों, “ईं बेनुं मांहेंअ होकीकोतुम देव हाय का जें आपुंअहीं आलेंह।” 12 बारनाबाल तीयाहां सोताअ मोडांम-मोडा गीरीक देव झुसुअ नांव देदों। पावुलुज खास गोगनारो आथो तीयाअ लीदे तीयाहां तीयाल हेरमेस नांव देदों। काहाका हेरमेस देव तीयाहांअ बादा देवुंअ खोबुर देनारो आखाअत्लो। 13 झुस देवुअ मोंदीर सेहेराअ बारे आथों। तीया मोंदीराअ पुंजारो मोंदीराअ बांअणाअहीं डोगरें आने फुलें लालो। तो आने लोकाहांअ टोलो खास चेलाहांन तीया डोगरांअ भोग चोळवांअ मागत्ला।
14 पेन ते काय केरांअ मागत्ला तीया बाबोताम पावुल आने बारनाबा उनाअया तांहांअ, तीयाहांन कोतोंअ दुख वीयोंह तों देखावांअ खातुर तीयाहां सोताअ पोतळें फाळी टाक्यें आने टोलाअ नीसमें दोवळी जायन बोंबलीन आख्यों, 15 “दोसदारुहुं! तुमां एंहडों काहाल केअताह? तुमांअ होच आमां बी खाली मांहेंअज हाय। आमां देव नांह। तुमां ईयु नोककामी मुरतींहन पुंजांअ सोळीन जुग-तोरती आने दोरीया आने तीयाहांमेर्योंअ बादों बोंणावनारा जीवता पोरमेहेराअ वेल फीरा तीयाअ खातुर तुमनेंह हारी गोठ जाहेर केरांअ आमां ईंहीं आलाह। 16 गीया दीहाहांम पोरमेहेरांय तुमनेंह-येहुदी जातीअ नांह तेंहडा बादा लोकाहांन सोत-सोताअ मोर्जी पोरमाणे चालांअ देदला। 17 पेन सोते केअहे तीया हारा कामाहांकींअ पोरमेहेर कायोम साबीती दीअ रीयोह का तो हायाताम हायज। तो तुमनेंह जुगामेनेअ वोहरात देहे आने खेरा वोखतुंहम तुमनेंह तुमांअ खेताम पाक बी देहे आने तो तुमनेंह खांअ दीईन तुमांअ मोनुंहन खुस केअहे।” 18 एंहडों आखीन बी तीयाहांन डोगरांअ भोग चोळवुअता तीया लोकाहांन ओटकावांअ खास चेलाहांअ खातुर खुब ओगरों आथों।
19 आमी थोळाक येहुदी लोक पीसीदीया वीस्ताराअ आंतीयोख सेहेरामेनेअ आने ईकोनीयोम सेहेरामेनेअ तींहीं आला आने तीयाहां तींहींर्याअ लोकाहांन सोताअ तोरफयाअ बोंणावी लेदा। आने तीयाहां पावुलुल ढोगळाहांअ मार ठोक्यो, आने तीयाल ते सेहेराअ बारे तांय लीअ गीया, आने तो मोय गीयोह एंहकींअ धारीन ते तीयाल सेहेराअ बारे टाकी आला। 20 पेन वीसवासी मांहेंअ तीयाअ चारु वेल टोलवाअयें तांहांअ पावुलुल सुद्दीजे वोली। आने तो उठीन सेहेराम फाचो गीयो। बीहरे दीह तो आने बारनाबा देरबे गीया।
पावुल आने बारनाबा सीरीया वीस्ताराअ आंतीयोखुम फाचा जाताह
21 पावुलुंह आने बारनाबांह देरबे सेहेराम हारी गोठ जाहेर केअयी आने तींहींर्याअ खुब लोकाहांन ईसुपेअ वीसवास राखनारा बोंणाव्या। हातींअ ते लुसतीरा फाचा गीया, आने तींहींनेअ ईकोनीयोम, आने तींहींनेअ पीसीदीया वीस्तारामेर्याअ आंतीयोख गीया। 22 तीयाहां तीया सेहेरामेर्याअ वीसवास्यांहन वीसवासाम मोजबुत बोंणाव्यें आने तीयाहांन मालीखापेअ भोरुचो राखतें रांअ उफ देदो। तीयाहां तीयाहांन ईत केराव्यों का, “पोरमेहेराअ राज्याअ ओनुभोव केरांअ खातुर आपुअ खुब दुखें वेठांअ जोरुल हाय।” 23 दोरेक मोंडोळाम तीयाहां वोळीलुंहन नीम्या, आने तीयाहांअ खातुर उपास राखीन पोरमेहेराल ओरुज केअयी, आने जीया मालीखापेअ तीयाहां वीसवास राखलो तो तीयाहांअ कालजी ले तीयाअ खातुर तीयाल होप्या।
24 पीसीदीया वीस्ताराम फीरीन हातींअ ते पाम्फुलीया फाचा आला। 25 तीया वीस्ताराअ पेरगा सेहेराअ लोकाहांन तीयाहां हारी गोठ जाहेर केअयी, आने हातींअ ते दोरीयाअ तोळीपेर्याअ आत्तालीया नांवांअ सेहेराम गीया। 26 आखरीप ते जाहाजाम सीरीया वीस्ताराअ आंतीयोख सेहेराम फाचा आला। ईया आंतीयोख सेहेरामुज वीसवासी लोकाहीं तीयाहांन, तीयाहां आमी पुरी केअली तीयाअ सेवाअ खातुर पोरमेहेराल ओरपोण केअला, आने तीयाल एंहडी ओरुज केअली का, तो तीयाहांपेअ मेरबानी कीईन तीयाहांअ देखरेख राखे।
27 पावुल आने बारनाबा आंतीयोख आला तांहांअ तीयाहां मोंडोळाअ लोकाहांन टोलव्या, आने पोरमेहेरांय तीयाहांअ खातुर जों-जों केअलों आने येहुदी जातीअ नांह तेंहडें मांहेंअ ईसुपेअ वीसवास केअ तीयाअ खातुर तीयांय तीया मांहांहांन केंहकींअ मोको देदलो, तों बादों मोंडोळाअ लोकाहांन आखी देखाव्यों। 28 तींहीं ते आंतीयोखुअ बीहरा वीसवास्यांअरी लांबो सोमोय रीया।