13
सीरीया वीस्ताराअ आंतीयोख सेहेराअ मोंडोळ बारनाबाल आने सावुलुल सेवाअ खातुर मोकलेह
1 सीरीया वीस्ताराअ आंतीयोख सेहेराअ मोंडोळाम ओमुक-ओमुक जांअ पोरमेहेराअ गोठ जाहेर केअनारा आने ख्रीस्ती बोद देनारा आथा। तीयाहांमेर्याअ बारनाबा, (“काल्यो” एंहकींअ आखत्लें तो), सीमोन, कुरेन सेहेराअ लुकीयु, हेरोद आंतीपा राजा हानोअ आथो तांहांअ तीयाअरी मोडो वेअलो तो मानायीन, आने सावुल आथा। 2 एक दीह, ईं मांहेंअ उपास राखीन मालीखाअ भोकती केअत्लें तांहांअ पोवीतोर आत्मांय तीयाहांन आख्यों, “जीया कामुअ खातुर मांयुं बारनाबाल आने सावुलुल हादयाह, तीया कामाहांअ खातुर ईयाहांअ नीमणुक केरा!” 3 तांहांअ मोंडोळाअ लोकाहीं फाचा वादारे उपास राखीन पोरमेहेराल वादारे ओरुज केअयी हातींअ, वोळीलाहीं बारनाबाअ आने सावुलुअ मुंनकांहपेअ सोताअ आथ थोवीन तीयाहांन तों काम होप्यों।
बारनाबा आने सावुल सीपरु बेटुम हारी गोठ जाहेर केअताह
4 एंहकींअ कीईन, पोवीतोर आत्मांय मोकलुअला बारनाबा आने सावुल सेलुकीया गीया आने तींहींनेअ जाहाजाम बोहीन सीपरु बेट जाता रीया। 5 तींहीं, सालामी सेहेराम येहुदीहींअ भोकती मोंडोळाअ पोंगाहांम ते गीया आने पोरमेहेराअ गोठ जाहेर केअयी। (योहान मार्क तीयाहांअ मोदोत केरांअ खातुर तीयाहांअरी गीयो।) 6 हातींअ तीयाहां तीया बेटुअ एक सेळाअहींनेअ बीहरा सेळाअहीं लोगुंअ फीरता-फीरता लोकाहांन हारी गोठ आखी। आखरीप ते पाफोअ सेहेराम पोच्या। तींहीं तीयाहांन बार-ईसु नांवांअ एक येहुदी जादुगोर मील्यो। तो सोताल पोरमेहेराअ गोठ जाहेर केअनारो एंहकींअ आखावत्लो, पेन खोरेखोर तो तेंहडो नांय आथो। 7 तो तीया बेटुअ राजपाल सेरगीयु पावुलाअ आरी-आरी कायोम जानारांअ टुकळीमेर्योअ आथो । सेरगीयु पावुल गीयानी ने हुच्यार मांहुंअ आथों। तीयांय पोरमेहेराअ गोठ उनायांअ मोर्जी राखीन बारनाबाल आने सावुलुल हादाव्या। 8 पेन जादुगोर एलीमास (बार ईसुअ नांव गीरीक भासाम, “एलीमास” हाय।) राजपालाल ईसुपेअ वीसवास राखता ओटकावांअ ईरादो राखीन बारनाबाअ आने सावुलुअ वीरुद केरांअ टेक्यो।
9 तांहांअ सावुल जीयाअ बीहरों नांव पावुल आथों, तो पोवीतोर आत्माअ पुरा काबाम आलो, आने तीया मोडवील हीईज रीयो आने तीयाल आख्यों, 10 “ओ, सेतानाअ होचुज वोरतुअनारा! जोंबी हारों हाय तीयाअ तुं वीरुद कीअहो आने तोअ आखा जीवोनाम बादी जातीअ लुच्चाय ने ढोंग हाय। मालीखाअ बाबोताअ हाची गोठीहींन खोट्या बोंणावांअ तुं कीदीह सोळोह? 11 आमी हेअ! मालीख ईयुज घेळी तुल सीक्सा केअहे। तुं आंदलो वीअ जाहो आने पोरमेहेरांय नोक्की केअला वोखत लोगुंअ तुं दीहाअ उजवोळ हीअ सेकनारो नांह।”
तांहांअ तीयुज घेळी तुअरों आने आंदारों एलीमासुल घेरी वोल्यें, आने आथ तीईन सोताल लीअ चाले एंहडा एगाहाल तो होदांअ टेक्यो। 12 जों बोंण्यों तों देखीन राजपालांय ईसुपेअ वीसवास केअयो, आने मालीखाअ बाबोताम तीयांय जों हीकयों तीयाकींअ तीयाल खुब नोवाय लागी।
पीसीदीया वीस्ताराअ आंतीयोख सेहेराम बारनाबा आने पावुल हारी गोठ जाहेर केअताह
13 हातींअ पावुल आने तीयाअ आर्याअ बेन जांअ पाफो सेहेर सोळीन जाहाजाम बोहीन पाम्फीलीया वीस्तारामेर्याअ पेरगा सेहेराम गीया। तींहीं योहान मार्क तीयाहांन सोळीन येरुसालेम फाचो जातो रीयो। 14 पेन बारनाबा आने पावुल पेरगानेअ नींगीन पीसीदीया वीस्ताराअ पाहल्याअ आंतीयोख सेहेराम पोच्या। आरामाअ दीह, ते भोकती मोंडोळाअ कोअमें जायन बोठा। 15 मोसेअ नीयोमाअ चोपळीमनेअ आने पोरमेहेराअ गोठ जाहेर केअनाराहां लेखला लेखाणाहांमनेअ पाठ वाचाय गीया हातींअ, भोकती मोंडोळाअ पोंगाअ ओमोलदाराहां तीयाहांन आखाव्यों का, “जाती-भायुहुं! आमनेंह उफ मीले एंहड्या काय गोठ्या तुमांअ आखुलोंअ वीअ ता आवीन ते आखा!” 16 मोंजे, पावुल उबी रीयो, आने सोताअ आथ उचो कीईन लोकाहांन ठाका रांअ ईसारो केअयो आने आख्यों,
“ओ ईसरायेल लोकुंह आने पोरमेहेराअ बीख राखीन चालनारा येहुदी नांह तेंहडा लोकुंह, उनाया!
17 आमां ईसरायेल मांहेंअ जीया पोरमेहेराअ भोकती केअतेंह, तीया पोरमेहेरांय आमांअ आगलाअ डायाहांन पोसोंद केअयें, आने तें मीसोर देसाम पोरदेसींअ तोरीके रेहलें। तोताअमुज तीयांय ईया मांहांहांन मोडी जाती बोंणावी। हातींअ तो तीयाहांन मीसोरुअ गुलामीमेनेअ खुब ताकोताकींअ काडी लीअ आलो। 18 आने लोगभोग चालीस वोरसें लोगुंअ उजाळाम तीयांय तीयाहांपेअ खुब धीरोज राखी। 19 हातींअ तीयांय कानान देसामेर्याअ सांत जातीअ लोकाहांन हारवांअ आमांअ आगलाअ डायाहांन मोदोत केअयी आने तीयाहांअ देसुपेअ आमांअ आगलाअ डायाहांन मालीकी होक देदो। 20 एंहकींअ केअता, आगलेंअ डायें मीसोरुम गेहलें तें लोगभोग चारहोव ने पाचास वोरसें नींगी गीयें।
हातींअ पोरमेहेराअ गोठ जाहेर केअनारा सामुयेलुअ वोखत लोगुंअ पोरमेहेर तीयाहांपेअ ओमोल चालवुअनारा वोळीलुंहन नीमतो रीयो। 21 हातींअ लोकाहीं सामुयेलुपेअ राजाअ मागणी केअयी, आने पोरमेहेरांय बीन्यामीन वोसुलामेर्याअ कीसुअ पोयरा सावुलुल तीयाहांअ राजा बोंणाव्यो। सावुलुंह चालीस वोरसें तीयाहांपेअ राज केअयों। 22 पेन पोरमेहेरांय तीयाल राज-गादीपनेअ उथलावी टाक्यो, आने तीयाअ जागे दावीदाल राज-गादीपेअ बोहाव्यो। दावीदाअ बाबोताम पोरमेहेरांय एंहकींअ आख्यों, ‘ईसायाअ पोयरो दावीद मांन खुब पोसोंद आललों मांहुंअ हाय। तों मांअ बादया मोरज्या पुर्या कीअ।’
23 पोरमेहेरांय जीयाल आमांअ ईसरायेल लोकाहांअ वाचावनारो बोंणावांअ वोचोन देदलों, तो ईसु दावीदाअ वोसुलामुज पेदा वीयो। 24 पेन ईसुंय सोताअ सेवा चालु केअयी तीयाअ पेअलांअ, बापतीस्मा केअनारा योहानांय ईसरायेल देसाअ बादा लोकाहांन सोताअ पाप सोळीन पोरमेहेराअ वेल फीरांअ आने बापतीस्मा केरावांअ जोरुलुअ बाबोताम बोद देदलो। 25 योहानाअ सेवा पुरी वेरांअ तीयारीम आथी तांहांअ तीयांय लोकाहांन एंहकींअ आख्यों, ‘आंय ख्रीस्त हाय एंहकींअ तुमां धारताह का? नांह, आंय तो नांह। पेन तो ता माहरीज आवनारो हाय। आंय तीयाअ गुलाम वेरांअ बी लायोक नांह।’
26 आबराहामाअ वोसुलामेर्याअ मांअ जातीअ पावुहुं, आने आमांअ येहुदी लोकाहांअ पोरमेहेराल पुंजनारा ईंहींर्याअ येहुदी नांह तेंहडा लोकुंह! पोरमेहेर आपनेंह आपुअ पापाहांअ सीक्सामेनेअ केंहकींअ वाचावेह तीयु बाबोताअ ए गोठ आपुअ बादाहांअ खातुरुज पोरमेहेरांय मोकली देदीह। 27 तीयाअ लीदे येरुसालेमाम रेनारा लोक आने तीयाहांअ आगेवान पोरमेहेराअ गोठ जाहेर केअनाराहां लेखल्या गोठ्या दोरेक आरामाअ दीह वाचता उनाअताह तेबी, ते जांअता नांह का ईसुज वाचावनारो हाय ने होमजुअता नांह का तीया बाबोतामुज तीया पोरमेहेराअ गोठ जाहेर केअनाराहां लेख्योंह। तीया लोकाहीं आने तीयाहांअ वोळीलाहीं ईसुल मोताअ साज्या देवावी आने एंहकींअ कीईन तीयाहां पोरमेहेराअ गोठ जाहेर केअनारांअ भोवीसवाणी हाची पाळी। 28 तीयाल मोताअ साज्या देवावांअ काय बी कारोण नांय झुळ्यों तेबी तीयाहां तीयाल मोताअ साज्या दांअ रोम राज्याअ राजपाल पीलातापेअ मागणी केअयी। 29 तीयाल कुरुसापेअ जोळीन माय टाक्यो आने एंहकींअ कीईन पोवीतोर लेखाणाहांम जों लेखलों आथों तों बादों तीयाहां पुरों केअयों। हातींअ थोळाक जांअहांहां तीयाअ मुरदाल कुरुसापेनेअ उतावीन कोबीराम ओजी देदों। 30 पेन पोरमेहेरांय तीयाल मोअलांमेनेअ फाचो जीवतो केअयो! 31 आने तीयांय सोताअरी गालील जील्लामेनेअ येरुसालेम जें मांहेंअ गेहलें तीयाहांन खुब दीह लोगुंअ दोरसोन देदलों आने तें मांहेंअ आमी ईसरायेल लोकाहांअ आगलांअ तीयाअ साक्सी हाय।
32-33 आने आमी बारनाबा आने आंय तुमनेंह ए हारी गोठ जाहेर केअताह का, पोरमेहेरांय आपुअ आगलाअ डायाहांन देदलों वोचोन ईसुल जीवतो उठवीन तीयाहांअ वोसुलामेर्यांअ आपुअ आगलांअ आमीर्याअ सोमोयाम पुरों केअयोंह। तीया ईसुअ बाबोताम पोवीतोर गीतुंअ चोपळीमेर्याअ बीहरा पोवीतोर गीतुम एंहडों लेखलों बी हाय का, ‘पोरमेहेरांय ख्रीस्तुल आख्यों,
“तुं मांअ पोयरो हाय,
आज आंय तोअ बाहको बोंण्योह।”’ 34 आने पोरमेहेरांय तीयाल जीवतो उठव्यो आने तो कीदीह बी फाचो मोअनारो नांह। ईयु बाबोताम पोवीतोर लेखाणाहांम एंहडो नोंदलों हाय का, ‘पोरमेहेरांय आपुअ आगलाअ डायाहांन आख्यों,
“दावीदाल मांयुं पोवीतोर रीते जे आसीरवाद दांअ वोचोन देदलों, ते आसीरवाद आंय तुमनेंह नोक्कीज देहें।”’ 35 आने पोवीतोर गीतुंअ चोपळीअ बीहरी एक जागे दावीद पोरमेहेराल एंहकींअ आखेह का, “तोअ ईमानदार सेवोक आंय मोय जाहें हातींअ, तुं मांअ मुरदाल कोबीराम होळांअ नांय दीहो।” 36 दावीद ता, सोताअ जोमानाम पोरमेहेराअ ईरादा पुरा कीईन हातींअ मोय गीयो; आने तीयाअ मुरदाल मांहांहां तीयाअ आगलाअ डायाहांअ कोबीरुंअ पाही एक कोबीराम ओजी देदों। आने तों मुरदों होळी बी गीयों। ईयापनेअ आपनेंह खोबुर पोळेह का, ईंहीं दावीद सोताअ बाबोताम नांय आखत्लो। 37 पेन उलटों, तो ता बीहरा एगाअ बाबोताम, मोंजे का, ईसुअ बाबोतामुंज आखत्लो का जीयाल पोरमेहेरांय मोअलांमेनेअ फाचो जीवतो उठव्यो आने जो फाचो नांय मोअयो आने जीयाअ मुरदों बी होळी नांय गीयों।
38-39 मांअ पावुहुं, तुमां जांय ला का, ईयाज ईसुअ मारफोते तुमनेंह तुमांअ पापाहांअ माफी मीलीअ। ए गोठ आमां बेनुं तुमनेंह आमी जाहेर केअताह। तुमां ईं बी होमजी ला का, मोसेअ मारफोते पोरमेहेरांय देदला नीयोम पालीन तुमनेंह पापामनेअ जो सुटकारो नांय मीलत्लो, तो सुटकारो आमी ईसुपेअ वीसवास राखनारा बादा मांहांहांन तीयाहांअ बादा पापामनेअ मीली सेकेह। 40 तीयाअ लीदे, पोरमेहेराअ गोठ जाहेर केअनाराहां लेखली चोपळीम जों लेखलों हाय तीयाअ पोरमाणे तुमांअ जीवोनाहांम नांय बोंणे तीयाअ कालजी राखजा। तींहीं एंहडों लेखलों हाय का,
41 ‘पोरमेहेरांय आख्यों, ओ मांअ मोस्कुरी केअनाराहां,
बोगलाय जायन मोय जा!
काहाका, तुमां आजी जीवतेंज हाय तांवज आंय जों काम कीअहुं तों,
एंहडों खोतोरनाक हाय का,
जो तुमनेंह केडों होमजावे तेबी तुमां तों मानाह नांय।’”
42 तीदीह पावुल आने बारनाबा येहुदीहींअ भोकती मोंडोळाअ कोअमेंनेअ बारे नींगत्ला तांहांअ लोकाहीं तीयाहांन आवता आठवाळ्ये फाचा आवीन ईयु गोठीहींअ बाबोताम वादारे आखांअ कालावाला केअया। 43 आने आरादना मीटींग पुरी वीयी हातींअ, खुब येहुदी लोक आने येहुदी धोरमो माननारा येहुदी जातीअ नांह तेंहडा लोक, पावुल आने बारनाबाअ फाचलांअ-फाचलांअ गीया, आने तीयाहां ईया लोकाहांन बोद देदा आने पोरमेहेराअ मेरबानीअ आदारे जीवता रांअ उफ देदो।
44 बीहरा आरामाअ दीह, लोगभोग सेहेराअ बादें मांहेंअ मालीखाअ बाबोताअ गोठ उनायांअ टोलवाअयें। 45 येहुदीहींअ वोळीलाहीं मांहांहांअ टोलांहन देख्या तांहांअ तीयाहांन खुब आदराय आली। तीयाअ लीदे तीयाहां पावुलुंह जों आख्यों तीयाअ वीरुद गोगीन तीयाअ ओपमानुअ गोठ्या आख्या।
46 पेन पावुलुंह आने बारनाबांह आजी वादारे हींमोत राखीन आख्यों, “पोरमेहेराअ गोठ पेअलांम-पेअलांअ तुमनेंहज आखांअ आमांअ फोरोज आथी। पेन तुमां तीयुल धीककारताह तीयाअ लीदे तुमां एंहडों देखावताह का, तुमां आत्मीक रीते कायोमाअ खातुर होरगाम जीवांअ लायोक नांह। तीयाअ लीदे, आमां तुमनेंह सोळीन येहुदी जातीअ नांह तेंहडा लोकाहांन हारी गोठ आखांअ जाताह। 47 काहाका, मालीखांय आमनेंह ओज हुकोम केअयोह का,
‘तोरतीअ सेळा लोगुंअ रेनारा लोक सोताअ पापाहांअ सीक्सामेनेअ वाचाय जाय तीयाअ खातुर,
मांयुं तुल येहुदी जातीअ नांह तेंहडा लोकाहांन उजवोळा तोरीके नीम्योह।’”
48 ए गोठ उनायन येहुदी जातीअ नांह तेंहडा लोक खुब खुस वीया आने मालीखाअ गोठीअ लीदे तीयाअ आभार मान्यो। आने कायोमाअ खातुर जीवांअ तीयाहांमेनेअ पोरमेहेरांय जीयाहांन पोसोंद केअलें, तें ईसुपेअ वीसवास राखनारें बोंण्यें।
49 तीया वीस्ताराअ वादारे लोकाहीं मालीखाअ बाबोताअ गोठ उनाअयी। 50 पेन येहुदीहींअ वोळीलाहीं येहुदीहींअ पोरमेहेराल पुंजनार्या आबरुदार बायाहांन थोळीकुंहन आने आगेवानाहांन चोळव्या, आने तीयाहां पावुल आने बारनाबाल सोतावांअ बीहरा लोकाहांन चोळव्या, आने तीयाहांन तीया सेहेरामेनेअ काडी थोव्या। 51 पेन पावुलुंह आने बारनाबांह, तीया सेहेराअ खुब लोकाहीं मालीखाअ बाबोताअ गोठ नांय मानी तीयाअ लीदे, तीयाहांअ आत्माहांअ जोवाबदारी तीया लोकाहांपेअज हाय तों देखावांअ खातुर सोताअ पागाहांअ आर्योअ उदलो बी फोकळी टाक्यो, आने ते बेनुं ईकोनीयोम सेहेराम जाता रीया। 52 तांहांअ आंतीयोख सेहरुमेर्येंअ वीसवासी मांहेंअ खुब खुस आथें आने तें पोवीतोर आत्माअ पुरा काबाम रेहलें।