12
हेरोद आगरीप्पा राजा याकोबाल माय टाकावेह आने पीतोराल जेलाम कोंडावेह
1 लोग-भोग ईयाज सोमोयाम , हेरोद आगरीप्पा राजा, येरुसालेम मोंडोळाअ थोळाक वीसवास्यांहन तारास पाळांअ टेक्यो। 2 आने तीयांय मालीखाअ खास चेला याकोबाल (जो योहानाअ पावुह आथो तीयाल) तारवायुकींअ माय टाकाव्यो। 3 तों येहुदी लोकाहांअ आगेवानाहांन खुब गोव्योंह तों देखीन हेरोदांय, खोमीरा वोगुराअ मांडा खांअ तेहवाराअ सोमोयाम पीतोराल बी तेराव्यो। 4 पीतोराल तेरावीन हातींअ हेरोदांय तीयाल जेलाम कोंडावी देदो आने तींहीं चार-चार सोयनीकाहांअ बोंणावल्या चार टुकळ्या वाराफोरथी पीतोराअ चोकी केअ तीयाअ खातुर तीयांय तीयाल होपी देदो। पास्का तेहवार हातींअ तीयाल जाहेरामुज तापास केरुलोंअ आने माय टाकुलोंअज हेरोदाअ ईरादो आथो। 5 एंहकींअ हेरोदांय पीतोराल जेलाम कोंडावी देदो। पेन मोंडोळाअ लोक पीतोराअ खातुर पोरमेहेराल खुब ओरुज केअत्ला।
होरगाअ एक दुत पीतोराल जेलाम नेअ सोळवेह
6 हेरोद जाहेराम पीतोराअ तापास केरांअ आथो तीयाअ आगली रातींअ पीतोर बेन चोकीदाराहांअ नीसमें हुवत्लो। तो एक बेळीकींअ एकी वेल्याअ चोकीदाराअ री आने बीहरी बेळीकींअ बीहरी वेल्याअ चोकीदाराअ री बांदाअलो आथो। बीहरा चोकीदार जेलुअ बांअणाअहीं उबी रीईन चोकी केअत्ला। 7 तांहांअ ओचानोकुज मालीखांय मोकलुअलो एक दुत तींहीं पोरगोट वीयो आने तीयु खोलीम खुब उजवोळ वीयो। दुतांय पीतोराल खुकीअ वेल गोचालीन उठव्यो आने आख्यों, “माहरी-माहरी उठ!” तांहांअ पीतोराअ आथामेर्याअ बेळ्या टुटीन नींगी पोळ्या। 8 हातींअ दुतांय पीतोराल आख्यों, “तोअ पोतळें पोवी ले आने चापलें बी पोवी ले!” तांहांअ पीतोरांय तेंहकींअज केअयों। हातींअ दुतांय पीतोराल आख्यों, “आमी तोअ उपरीअ डोगली बी पोवी ले आने मांअ फाचलांअ आव!”
9 तांहांअ पीतोरांय देव दुताअ आखल्या पोरमाणे केअयों आने बारे नींगीन तीयाअ फाचलां-फाचलांअ गीयो। तीयाल एंहकींअ खोबुर नांय आथी का होरगाअ दुत जों केअत्लो तों होकीकोतुज आथी। तीयाल ता एंहकींअ लाग्यों का तीयाल एगोंह दोरसोन वेअहे। 10 पेअली ने बीहरी चोकी पार कीईन ते सेहेराअ वेल जांअ नोळाअ बांअणाअ आगलांअ आवी पोच्या। तों बांअणों तीयाहांअ खातुर तीया-तीयाअज उगळी गीयों। आने ते तींहींनेअ बारे नींगीन एक गोल्लीम चालत्ला तांवज होरगाअ दुत पीतोराल सोळीन जातो रीयो।
11 तांहांअ सेल्ले पीतोराल भान वीयो का ईं जों बोंण्यों तों बादों खोरेखोर होकीकोत आथी। आने तो गोगी उठ्यो का, “आमी आंय होमजी गीयो का ईं ता खोरेखोर होकीकोतुज हाय! मालीखांय सोताअ दुताल मोकलीन हेरोदाअ आथामनेअ आने मांन दुख दांअ येहुदी आगेवानाहांअ आस्या आथी तींहमेंनेअ वाचावी लेदोह!”
12 जे होकीकोत बोंणीह ते जांईन पीतोर योहानाअ मोंजे जीयाल मार्क बी आखत्लें तीयाअ याहकी मारीयोमाअ कोअ गीयो। तींहीं खुब मांहेंअ टोलवायन पोरमेहेराल ओरुज केअत्लें। 13 पीतोरांय बार्योंअ बांअणों ठोक्यों तांहांअ, रोदा नांवांअ एक कामारी पोयरी बांअणों उगाळांअ आली। 14 तीयुंय पीतोराअ आवाज ओअख्यो आने ते ओतीअ बादी खुस वीअ गीयी का बांअणों उगाळांअ रांअ दीईन फाची कोअमें दोवळी गीयी आने बादाहांन जाणाव्यो का, “बारे पीतोर बांअणाअहीं उबी रीयोह!”
15 तांहांअ तीया मांहांहां तीयुल आख्यों, “तुं गांडी वीअ गीयीह।” पेन ते आख्याज केअत्ली का होकीकोतुम पीतोर तींहीं हायज। तांहांअ तीयाहां एंहकींअ मान्यों का, “नोक्की तीयाल हाचवुअनारो होरगाअ दुतुज वेरांअ जोजे।”
16 तांव पीतोर बांअणों ठोकयाज केअत्लो। आखरीप तीयाहां बांअणों उगाळ्यों तांहांअ तींहीं पीतोराल देखीन तें बोगलायज रीयें। 17 तांहांअ पीतोरांय तीयाहांन आथाकींअ ठाकें रांअ ईसारो केअयो आने मालीख तीयाल जेलाम नेअ केंहकींअ काडी लाललो तों आखी देखाव्यों। आने तीयांय फाचों आख्यों, “मोंडोळाअ आगेवान याकोब आने मोंडोळाअ बीहरा पावु-बोंअयुंहन ए गोठ आखजा!” एंहकींअ आखीन हातींअ पीतोर बीहरी जागे जातो रीयो।
18 पीतोराअ चोकी केअनारा सोयनीक उजालों वेअताज खुब गुचवोंणुम पोळी गीया। ते एक-बीहराल आख्या केअत्ला का, “पीतोराअ काय वीयों?” 19 हेरोद आगरीप्पांह पीतोराअ बोराबोर होदणी केरांअ हुकोम केअयो। पेन तो नांय झुळ्यो तांहांअ हेरोदांय तीया चोकीदारुंहपेअ जोवाब माग्यो। आने ते काय बी पादरो खुलासो नांय दीअ सेक्या तीयाअ लीदे तीयांय तीयाहांन मोताअ साज्या देदी।
हातींअ हेरोद येहुदीया वीस्तार सोळीन कायसारीया सेहेराम जातो रीयो आने तींहीं थोळाक दीह रीयो।
हेरोद आगरीप्पाअ मोत
20 हेरोदाल तुर आने सीदोन सेहेराहांअ लोकाहांपेअ खुब रोग चोळी। तीयाअ लीदे, तीया सेहेराहांअ थोळाक जांअ, पोंच तोरीके हेरोदाल मीलांअ आने होमजोण काडांअ गीया। काहाका, तीया सेहेराहांअ मांहांहांअ ओनाज-पांअयांअ बादो आदार हेरोदाअ वीस्तारुपेअ आथो। आने तीयांय तीयाहांन ओनाज-पांई पुरों पाळांअ बोंद कीअ देदलों। तीया पोंचाअ लोकाहीं हेरोदाअ मेहेलाअ कारभारी बालासतुसुअरी दोस्ती केअयी, 21 आने तीयाअ पोरीणामे तीयाहांन हेरोदाल मीलांअ राज्या मीली गीयी। मीलांअ नोक्की केअला दीह हेरोद एंहडा खास दीहाअ खातुर राजा ओमुक जातीअ पोतळें पोवत्लो तें पोतळें पोवीन सोताअ राज-गादीपेअ बोठो आने तीयाहांअ आगलांअ बोद दांअ टेक्यो। 22 तांहांअ लोक बोंबली उठया, “वाह! एंहडों गोगनारो ता देवुज हाय, मांहुंअ नांह! मांहुंअ एंहडों नांय गोगी सेके!”
23 तांहांअ मालीखांय मोकलुअला एक दुतांय हेरोदाल तुरुतुज एक जातीअ आजाराम आसाटी पाळ्यो। काहाका, मांहांय तीयाअ गुणगान केअया तों तीयाल खुब गोंवीं गीयों आने तीयांय पोरमेहेराअ गुणगान नांय केअया। तीयाअ लीदे, तीयाल कीळाहां माजाअ-माज खोरवी खादो। कीळा तीयाल खाय गीया आने तो माहरीज मोय गीयो।
24 पेन खुब-बादा लोकाहीं पोरमेहेरापेनेअ आवनारी हारी गोठ उनाअयी आने ईसुपेअ वीसवास केअयो।
25 सावुल आने बारनाबा, जीया कामुअ खातुर ते येरुसालेमाम गेहला, तों काम पुरों कीईन, मोंजे येरुसालेम मोंडोळाअ वीसवास्यांहन पोयसा दीईन आने योहान मार्कल सोताअरी लीईन येरुसालेमेनेअ आंतीयोख फाचा आला।