11
पीतोराअ खुलासो
1 मालीखाअ खास चेलाहां, आने येहुदीया जील्लाअ बीहरा बादा वीसवासी लोक उनाअया का, थोळाक येहुदी जातीअ नांह तेंहडा लोकाहीं बी पोरमेहेराअ गोठीपेअ वीसवास केअयोह। 2 तीयाअ लीदे, पीतोर येरुसालेम गीयो तांहांअ, थोळाक येहुदी ख्रीस्ती लोक तीयाअ टीका केरांअ टेक्या। 3 ते आखत्ला, “खोरेखोर तुं सुन्नोत नांय केरावी वीअ तेंहडा पापी लोकाहांअ कोअ गीयो। आने तीयाहांअरी बोहीन तुंयुं खादों बी खेरों।” 4 तांहांअ पीतोरांय, जे होकीकोत आथी ते बादी, वीगोतवार आखी देखावी:
5 “एक दीह, योप्पा सेहेराम आंय पोरमेहेराल ओरुज केअत्लो तांहांअ, मांन एक दोरसोन वीयों। तीया दोरसोनुम, मोडा चादराअ होच चारु सेळा बांदीन लोटकावी वीअ एंहडी एक वोस्तु जुगामेनेअ एठा उतुअता मांयुं देखी। ते उतुअती-उतुअती मांअहीं लोगुंअ आली। 6 तींहमें एक धीयाने मांयुं हेअयों ता, तींहमें, जें खांअ आपनेंह सुट नांह तेंहडें, तोरतीमॆन्यॆंअ बादी जातीअ हानेंअ जोनावोरें, ने जोंगली जोनावोरें, आने डेडी-डेडी होरनारें जोनावरें ने चीळें मांयुं देख्यें। 7 हातींअ आंय एगोह आवाज एंहकींअ आखता उनाअयो का, ‘पीतोर उठ! ईया जोनावोरुंहन आने चीळाहांन मायन खो!’ 8 तांहांअ मांयुं जोवाब देदो, ‘बीलकुर नांय मालीख, ईयामेर्येंअ जोनावरें ने चीळें, नीयोमाहांअ पोरमाणे नांय खावाय एंहडें हाय, आने एंहडों आजी लोगुंअ मांयुं कीदीह बी नांह खादों।’ 9 पेन आंय, तो आवाज बीहरी वोखत एंहकींअ आखता उनाअयो का, ‘जे वोस्तु पोरमेहेर चोख्खी गोंअहें, ते तुं एठी मां आखतो!’
10 एंहडों तीन वोखत बोंण्यों। हातींअ चादराअ होच आथी ते वोस्तु, आने तींहमें आथों तों बादों फाचों जुगाम ताणाय गीयों। 11 आने तीयुज वोखत, कायसारीयानेअ मांन हादनारें तीन मांहेंअ, आंय जीया कोअ आथो तींहीं आवी पोच्यें। 12 आने पोवीतोर आत्मांय मांन, येहुदी जातीअ नांह तेंहडा लोकाहांअरी जांव का नांय जांव एंहडी काय बी आनाकानी केअया वोगुर, तीयाहांअरी जांअ आख्यों। मांअरी ईंहींर्याअ ए सोव ख्रीस्ती पावुह बी आलला, आने तुरुतुज आमां आमनेंह हादावला तीया मांहांअ कोअ गीया। 13 तांहांअ तीया मांहांय आमनेंह आख्यों, ‘मांन मांअ कोअमें एक होरगाअ दुताअ दोरसोन वीयों। तीया दुतांय मांन आख्यों, योप्पानेअ सीमोन पीतोर नांवांअ मांहांअल हादाव! 14 तो, तुल आने तोअ बादा कोर्यांहन पोरमेहेर तुमांअ पापाहांअ सीक्सामेनेअ केंहकींअ वाचावीअ, तीया बाबोताम तुल आखीअ।’
15 आंय तीयाहांन हारी गोठ आखांअ टेक्यो, पेन मांयुं गोगांअ चालु केअयों तांव ता, पेअलांअ जेंहकींअ पोवीतोर आत्मा आपुंहपेअ उती आललो, तेंहकींअ तीयाहांपेअ बी उत्यो। 16 तांहांअ मांन मालीखांय आखली गोठ ईत आली, ‘योहान ता पांअयांकींअ लोकाहांन बापतीस्मा केअत्लो। पेन पोरमेहेर पोवीतोर आत्मा तुमांअ माज वोसावीअ।’ 17 तीयाअ लीदे, मालीख ईसु ख्रीस्तुपेअ वीसवास राखता, पोरमेहेरांय आपनेंह पोवीतोर आत्मा रुपी जे भेट देदली, तेज भेट पोरमेहेरांय तीयाहांन बी देदीह, ता, पोरमेहेराल एंहकींअ केअता केडों रोकी सेके?”
18 तीयाअ गोठ उनायन, येरुसालेमाम आथा तीया येहुदी ख्रीस्तीहीं पीतोराअ टीका केरांअ बोंद केअयों, आने पोरमेहेराअ गुणगान केअता आख्यों, “तांहांअ ता पोरमेहेरांय, येहुदी जातीअ नांह तेंहडा लोकाहांन बी सोताअ पापाहांअ खातुर दुखी वीईन, पोरमेहेराअहीं फाचें वोली आवांअ, आने आत्मीक रीते कायोमाअ खातुर जीवांअ तोक देदीह।”
आंतीयोख सेहरुमेर्योंअ ख्रीस्ती मोंडोळ
19 स्तेफानुल येहुदी लोकाहीं माय टाकलो तांहांअ जे सोतावोणी वीयी, तीयाअ लीदे जे वीसवासी लोक येरुसालेमामनेअ नाही पोळला, तींहमेर्याअ खुब फीनीकीया, सीपरु बेट आने सीरीया वीस्ताराअ आंतीयोख सेहेर लोगुंअ गीया। तीयाहां एखला येहुदी लोकाहांनुंज हारी गोठ आखी। 20 पेन सीपरु आने कुरेन सेहरुमेर्याअ थोळाक वीसवास्याहां, आंतीयोख जायन तींहींर्याअ येहुदी जातीअ नांह तेंहडा मांहांहांन बी मालीख ईसुअ बाबोताम हारी गोठ आखी। 21 हाराम-हारी रीते बोद दांअ खातुर तीया वीसवास्यांहन मालीखांय आत्मीक ताकोत देदी, आने तीयाअ लीदे, तीया येहुदी जातीअ नांह तेंहडा मांहांयमेर्याअ खुब मांहांय ईसुपेअ वीसवास केअयो, आने मालीखाअ वेल तें फीर्यें।
22 ईयु बाबोताम येरुसालेमाअ मोंडोळाअ लोक उनाअया तांहांअ, तीयाहां बारनाबाल आंतीयोख सेहेराम मोकल्यो। 23 बारनाबा आंतीयोख आलो, ने तींहींर्याअ लोकाहांपेअ पोरमेहेरांय जे मेरबानी केअली ते देखीन खुब खुस वीअ गीयो। आने तीयांय तींहींर्याअ लोकाहांन मालीखाअ ईमानदार रांअ खुब उफ देदी। 24 बारनाबा हारों मांहुंअ आथों। तों पोवीतोर आत्माअ पुरा काबाम रेहलों। आने तों वीसवासाम एकदोम पाकों आथों। आने तीयाअ सेवाअ पोरीणामे, खुब लोकाहीं मालीखापेअ वीसवास केअयो।
25 हातींअ बारनाबा सावुलुल होदतो-होदतो तारसु सेहेराम गीयो। 26 आने तो मील्यो तांहांअ, तीयाल तो आंतीयोख सेहेराम हादी लालो। ते बेनुं एक आखों वोरसों तींहींर्याअ मोंडोळाअ लोकाहांअरी रीया, आने खुब लोकाहांन बोद देता रीया। (वीसवासी मांहेंअ पेअलांम-पेअलांअ आंतीयोखुमुंज “ख्रीस्ती” आखाअयें।) 27 लोग-भोग ईयाज सोमोयाम पोरमेहेराअ गोठ जाहेर केअनारा थोळाक जांअ, येरुसालेमेनेअ आंतीयोख आला। 28 तीयाहांमेर्याअ आगाबु नांवांअ एक जांअहांह उबी रीईन पोवीतोर आत्माअ दोरवोणीकींअ एंहडी भोवीसवाणी केअयी, “आखा रोम राज्याम मोडो काल पोळीअ।” (आने कोलोदीयु नांवांअ राजा राज केअत्लो तांहांअ ते भोवीसवाणी पुरी वीयी।) 29 तीयाअ लीदे आंतीयोखुमेर्याअ दोरेक वीसवासींह, येहुदीया वीस्ताराम रेनारा वीसवास्यांहन, सोताल बोंणे ओतीअ पोयसाहांअ मोदोत मोकलांअ नोक्की केअयों। 30 आने ते पोयसा तीयाहां बारनाबाअ आने सावुलुअ मारफोते येरुसालेमाअ मोंडोळाअ वोळीलुंहन मोकली देदा।