10
कोरनेलीयु पीतोराल हादावेह
1 कायसारीया सेहेराम कोरनेलीयु नांवांअ मांहुंअ रेहलों। तों, रोम सारकाराअ लोस्कोरुम, ‘ईटालीवाली टुकळी’ आखाअत्ली तीयु टुकळीम, एक होव सोयनीकाहांअ उपरी आथों। 2 तों भोकतीभावुवालों मांहुंअ आथों। तों आने तीयाअ कोर्येंअ पोरमेहेराअ बीख राखीन चालनारें आथें। तो गोरीब येहुदी लोकाहांन भोला मोनाकींअ दान देहलो, आने नीयोमीत रीते पोरमेहेराल ओरुज केअत्लो। 3 एक दीह, पारगाप लोग-भोग तीन वाजे, तीयाल एक दोरसोन वीयों; तींहमें तीयांय एक होरगाअ दुताल कोअमें आवीन सोताल ‘कोरनेलीयु’ एंहकींअ आखीन हात केअतो हुद-मुद देख्यो। 4 तो काबराअलो-काबराअलो होरगाअ दुताल हीअ रीयो, आने तीयाल फुच्यों, “काय साहेब?”
तांहांअ होरगाअ दुतांय जोवाब देदो, “पोरमेहेरांय तोअ ओरुजया उनाअयाह। आने गोरीबाहांन तुंयुं जें दानें केअयेंह, तें बी तीयांय धीयानाम लेदेंह। आने तें बेनुं पोरमेहेराल चोळवुअला ओरपोणाअ होच हाय। 5 मोंजे, आमी तुं थोळेंक मांहेंअ मोकलीन योप्या सेहेरामेनेअ पीतोर नांवांअ मांहांअल हादावी ले। 6 तो हालमें डोगरांअ चांबळें पाकवांअ काम केअहे तीया सीमोनुंअहीं गोवारो गीयोह। तीया सीमोनुअ कोअ दोरीयाअ तोळीपेअ हाय।”
7 तीयाअरी गोगनारो होरगाअ दुत हातींअ जातो रीयो। तांहांअ कोरनेलीयुंह सोताअ बेन खानगी चाकोराहांन आने सोताअ एक खातरीअ आने भोकती भावुवाला सोयनीकाल हादया। 8 तीयांय तीयाहांन बादी गोठ जाणावीन तीयाहांन योप्पा सेहेराम मोकल्या।
9 बीहरे दीह, ते खोबुर देनारा योप्पा सेहेराअ पाही पोचला तीयाज सोमोयाम , लोगभोग पारगाप, पीतोर पोरमेहेराल ओरुज केरांअ खातुर पोंगाअ धाबापेअ गीयो। 10 तीयाल तोताअप पुख लागी। आजी ता मांडो चुळत्लोज। तांहांअ तीयाल एक दोरसोन वीयों। 11 तीया दोरसोनुम तीयांय जुग उगळी गेहली देखी आने जुगामेनेअ मोडों चादरों चारु सेळांहन बांदीन लोटकाव्यों वीअ, तेंहडी एक वोस्ताल तीयांय उतुअता देखी। 12 तींहमें तोरतीमेर्येंअ बादी जातीअ जोनावोरें, आने डेडी-डेडी होरकीन चालनारें जोनावोरें आने चीळें आथें। 13 हातींअ तो एक आवाज एंहकींअ आखता उनाअयो का, “पीतोर, उठ आने ईया जोनावोरुंहन आने चीळाहांन माय खो!” 14 पेन पीतोरांय तीयाल आख्यो: “बीलकुल नांय, मालीख। ईयामेर्येंअ जोनावरें ने चीळें आमांअ नीयोम ाहांअ पोरमाणे नांय खावाय। आने एंहडों मांयुं आजी लोगुंअ कीदीह बी नांह खादों।” 15 तांहांअ तो बीहरी वोखत तो आवाज एंहकींअ आखता उनाअयो का, “जीयु वोस्ताल पोरमेहेरांय चोखलावीह, तीयुल तुं एठी मां गोंअहों!” 16 एंहडों तीन वोखत बोंण्यों, आने हातींअ चादराअ होच आथी ते वोस्तु, आने तींहमेंर्योंअ बादों फाचों जुगाम ताणाय गीयों।
17 तीया दोरसोनुकींअ पोरमेहेर तीयाल काय आखांअ मागतो वीअ तीया बाबोताम, आजी पीतोर तीयाअ मोनुं-मोनुंम गुचवाया केअत्लो। तोताअमुज, कोरनेलीयुंह मोकलुअलें तें मांहेंअ सीमोनुअ कोअ फुचतें-फुचतें, तीयाअ पोंगाअ बांअणाअहीं आवी पोच्यें। 18 आने तीयाहां बोंबलीन फुच्यों, “सीमोन पीतोर नांवांअ एगोह गोवारो ईंहीं हाय का?”
19 पीतोर आजी तीया दोरसोनुअ ओर्थो काय वीअ तीया बाबोताम वीचारत्लो। तांहांअ पोवीतोर आत्मांय तीयाल आख्यों, “पीतोर, उनाअ! तुल तीन मांहेंअ होदतें-होदतें आलेंह। 20 मोंजे, तुं येहुदी जातीअ नांह तेंहडा मांहांअरी जांव का नांय जांव एंहडी आना-कानी केअया वोगुर तीयाहांअरी जो। काहाका, मांयुंज तीयाहांन मोकल्येंह।” 21 तांहांअ पीतोरांय एठाअ जायन तीयाल होदांअ आलला लोकाहांन आख्यों, “तुमां जीयाल होदताह तो आंयज हाय। तुमां काहा आलाह?”
22 तांहांअ तीयाहां आख्यों का, “कोरनेलीयु नांवांअ एक सोयनीकाहांअ उपरी हाय। तीयांय आमनेंह मोकल्याह। तो भोकतीभावुवालो, आने पोरमेहेराअ बीख राखीन चालनारों मांहुंअ हाय; आने बादें येहुदी मांहेंअ तीयाल खुब मान देतेंह। तुं तीयाअ कोअ जाय सेको, आने तीयाल पोरमेहेराअ गोठ आखी सेको तीयाअ खातुर तुल हादावांअ, पोरमेहेरांय मोकलुअला एक दुतांय तीयाल आख्योंह।”
23 तांहांअ पीतोरांय तीया लोकाहांन कोअमें हादया, आने तीयाहांन तींहीं रातींअ गोवारा राख्या।
बीहरे दीह, तो तीयार वीईन तीयाहांअरी गीयो। तीयाअरी योप्पा सेहेराअ थोळाक वीसवास्या बी गीया। 24 तीयाअ बीहरे दीह, ते बादा कायसारीया पोच्या। तींहीं कोरनेलीयु आने तीयाअ जातुलें, ने तीयाअ आर्येंअ बीहरें मांहेंअ पीतोराअ आवांअज वाट जोवत्लें। 25 पीतोर कोअमें वीहांअज जाहलो तांवज, कोरनेलीयु तीयाल पागे पोळ्यो। 26 पेन पीतोरांय तीयाल आख्यों, “उठ! मांअ भोकती मां केअतो, काहाका आंय बी तोअ होच मांहुंअज हाय!”
27 तीयाअरी गोठ केअतो-केअतो पीतोर कोअमें गीयो। आने तींहीं तीयांय खुब मांहांहांन टोलवाअलें देख्यें। 28 तांहांअ तीयांय तीयाहांन आख्यों, “तुमां जांअतेंह का, एक येहुदी मांहुंअ बीहरी जातीअ मांहांअहीं जाय, का, तीयाअरी सोबोंद राखे तों, नीयोम पोरमाणे बोराबोर नांह। पेन पोरमेहेरांय मांन देखाव्योंह का, केल्ला बी मांहांअल मांअ एठों नांय गोंणांअ जोजे। 29 तीयाअ लीदे तुंयुं मांन हादाव्यो तांहांअ, आंय काय बी आनाकानी केअया वोगुर आलो। आमी आंय ईं जांणांअ मागुंह का, तुंयुं मांन काहाल हादाव्योह?”
30 तांहांअ कोरनेलीयुंह आख्यों, “चार दीह पेअलांअ लोग-भोग ईयाज सोमोयाम , मोंजे पारगो नोंवता तीनेक वाजे, आंय मांअ कोअमें पोरमेहेराल ओरुज केअत्लो। तांहांअ पांडेंअ-फोट पोतळें पोवलों एक मांहुंअ एककायुंअज मांअ आगलांअ पोरगोट वीयों। 31 तीयांय मांन आख्यों का ‘ओ कोरनेलीयु! पोरमेहेरांय तोअ ओरुज्या उनाअयाह। आने गोरीबाहांन तुंयुं जें दानें केअयेंह, तें बी तीयाअ धीयानाम हाय। 32 मोंजे, आमी तुं एंहकींअ केअ! थोळाक खोबुर देनाराहांन योप्पा सेहेराम मोकलीन, सीमोन पीतोर नांवांअ मांहांअल हादाव! तो डोगरांअ चांबळें पाकवांअ काम केअनारा सीमोन नांवांअ मांहांअहीं गोवारो गीयोह। तीया सीमोनुअ कोअ दोरीयाअ तोळीपेअ हाय।’ 33 तीयाअ लीदे, मांयुं तुरुतुज तुल हादाव्यो। आने हारों केअयों, तुं बी ईंहीं आलो। आमी मालीखांय तुल जों आखांअ आख्यों वीअ, तों उनायांअ आमां बादें ईंहीं पोरमेहेराअ आगलांअ हाजोर वीयेंह।”
कोरनेलीयुल आने तीयाअ कोर्यांहन पीतोर हारी गोठ जाहेर केअहे
34 तांहांअ पीतोरांय गोगांअ चालु केअयों: “आमी आंय होमजयो का, पोरमेहेर केडाअरी बी भेद-भाव राखीन नांह वोरतुअतो। 35 पेन उलटों, केल्लीबी जातीमेर्योंअ मांहुंअ तीयाअ बीख राखीन चाले, आने हाचें कामें केअ तीयाल तो सीकारेहज। 36 ईसु ख्रीस्तुअ मारफोते मांहेंअ पोरमेहेराअरी मेल-मीलाप कीअ सेकतेंह ए हारी गोठ, पोरमेहेरांय आमनेंह ईसरायेल लोकाहांन मोकली देदली। ओज ईसु आमांअ येहुदीहींअ आने तुमांअ येहुदी जातीअ नांह तेंहडा लोकाहांअ, बादाहांअ मालीख हाय। 37 ‘बादें बापतीस्मा केरावे!’ एंहडी जाहेरात बापतीस्मा केअनारा योहानांय केअली। तीयाअ फाचलांअ गालील जील्लामेनेअ चालु वीईन, आखा येहुदीया जील्लाम जो खास बोनाव बोंणलो तो तुमनेंह खोबुर हाय। 38 आने तुमनेंह ईं बी खोबुर हाय का, पोरमेहेरांय नाझारेथावाला ईसुल केंहकींअ पोसोंद केअलो, आने तीयाल केंहकींअ पोवीतोर आत्मा, आने पोरमेहेरांय ताकोत देदली। ने तुमां ईं बी जांअतेंह का, ईसु खुब लोकाहांअ भोलों केरांअ, आने सेतानाअ आथाम पोळला खुब लोकाहांन हारें केरांअ, खुब जागे फीरत्लो। काहाका, तीयाअ मोदोत केरांअ खातुर, पोरमेहेर तीयाअरी आथो। 39 आने तीयांय येरुसालेमाम, आने येहुदीया जील्लाअ बीहरी बादी जागे; जों काय केअयों, तीयाअ आमां साक्सी हाय। वोळीलाहीं तीयाल कुरुसापेअ जोळीन माय टाकाव्यो। 40 पेन तीन दीह हातींअ, पोरमेहेरांय तीयाल जीवतो उठव्यो, आने आमनेंह तीयाअ दोरसोन केराव्यों। 41 तेबी, तीयांय बादा लोकाहांन नांय, पेन पोरमेहेरांय जीयाहांन पेअलांअनेअ पोसोंद केअला साक्सींहन, मोंजे का, आमनेंह मालीखाअ खास चेलाहांन एखलोंज दोरसोन केराव्यों। मोअलांमेनेअ तो जीवतो उठ्यो तीयाअ फाचलांअ ता, आमां तीयाअरी खादोंह-पीदोंह बी। 42 तीयांय आमनेंह लोकाहांन, हारी गोठ जाहेर केरांअ, आने तीयाहांन एंहडी साक्सी दांअ हुकोम केअयोह का, जीवता ने मोअला लोकाहांअ नीयाय केअनारा तोरीके तीयालुज पोरमेहेरांय नीम्योह। 43 पोरमेहेराअ गोठ जाहेर केअनाराहां बादाहां, तीया बाबोताम एंहकींअ आख्योंह, ‘जोंबी तीयापेअ वीसवास राखेह तीयाल, ख्रीस्त जों काय कीअ तीयाअ मारफोते पापाहांअ माफी मीलीअ।’”
कोरनेलीयुल आने तीयाअ कोर्यांहन पोवीतोर आत्मा मीलेह
44 पीतोराअ गोगांअ आजी चालुज आथों तांवज, तीयाअ गोठ उनाअनारा बादाहां पेअ पोवीतोर आत्मा उती आलो। 45 येहुदी जातीअ नांह तेंहडा लोकाहांन बी पोरमेहेरांय पोवीतोर आत्माअ भेट देदी तों देखीन, पीतोराअरी योप्पानेअ जे येहुदी वीसवास्या आलला ते कांहवांयज रीया। 46 काहाका, तीयाहां ईया लोकाहांन, तीयाहांन आवळुअतल्या नांय एंहडया बीहरी-बीहरी बोलींहम पोरमेहेराअ गुणगान केअता उनाअया। तांहांअ पीतोर गोगी उठ्यो: 47 “जेंहकींअ कीईन आमनेंह पोवीतोर आत्मा मील्योह, तेंहकींअज कीईन ईया लोकाहांन बी मील्योह। तीयाअ लीदे, पांअयांकींअ बापतीस्मा केरावता ईयांहन केडाअ बी ओटकावांअ नांय जोजे।”
48 हातींअ तीयांय ईसु ख्रीस्तुअ नांवांअ तीयाहांन बापतीस्मा केरांअ हुकोम केअयो। तांहांअ तीयाहां बापतीस्मा केराव्यो। हातींअ तीया लोकाहीं पीतोराल तीयाहांअरी रांअ कालावाला केअया। आने पीतोर आने तीयाअ आर्याअ तीयाहांअरी खुब दीह रीया।