9
सावुल ईसुपेअ वीसवास केअहे
(खास चेलाहांअ कामें २२:६-१६; २६:१२-१८)
1 सावुल मालीखाअ खास चेलाहांन माय टाकांअ आजी धोमकी देयाज केअत्लो। तीयांय मोडांम-मोडा पुंजाराअहीं जायन, 2 दामास्कु सेहरुमेर्याअ येहुदी भोकती मोंडोळाअ पोंगाअ आगेवानुंहपेअ कागलें लेखी माग्यें, ईयाअ खातुर का, मालीख ईसुअ पोंथाअ बाय-मांहेंअ का आदमी, जेंबी मीली जाय तीयाहांन तीईन तीयाहांअ तापास केरांअ खातुर येरुसालेम लीअ आवांअ ते तीयाल आदीकार दे। 3 तो मुसाफोरी केअतो-केअतो दामास्कु सेहेराअ पाही आलो तांहांअ, एककायुंअज जुगामेनेअ उजवोळाअ एक झोबकारो सावुलुअ चारुवेल झोबक्यो। 4 तांहांअ सावुल पुंय पोळी गीयो, आने तो एगाहाल एंहकींअ आखता उनाअयो का, “ओ सावुल, ओ सावुल, तुं मांन काहाल सोतावोह?” 5 तांहांअ सावुलुंह फुच्यों, “ओ साहेब, तुं केडो हाय?”
तांहांअ सावुलुअरी गोगनारांह आख्यों, “आंय ईसु हाय। मांअपेअ वीसवास राखनाराहांन तुं सोतावोह आने एंहकींअ कीईन तुं मांनुंज सोतावोह। 6 पेन आमीं तुं उठ आने सेहेराम जो, आने तोअ काय केरुलोंअ तों, तुल तींहीं आखाय।” 7 सावुलुअरी जे लोक मुसाफोरी केअत्ला, ते ता गोग-बोल केअया वोगुर उबी रीअ पोळला। ते एगाहाल गोगता उनाअला, पेन केडाल बी देख्यो नांय। 8 सावुलुंह पुंयुंनेअ उठीन सोताअ डोंआं उगाळ्या, पेन तीयाल काय बी देखाअयों नांय। तीयाअ लीदे, ते लोक तीयाअ आथ तीईन तीयाल दामास्कु सेहेराम हादी गीया। 9 तीन दीह लोगुंअ तो आंदलोज रीयो, आने तीया दीहाहांम तीयांय काय खादों नांय का पीदों नांय। 10 आमी दामास्कु सेहेराम आनानीया नांवांअ एक येहुदी ख्रीस्ती रेहलो। मालीखांय तीयाल दोरसोन दीईन आख्यों, “ओ आनानीया!”
तांहांअ तीयांय उकारो देदो का, “ओय! काय आखोह मालीख?” 11 मालीखांय तीयाल आख्यों, “तुं तीयार वीईन ‘सीदी गोली’ नांवांअ गोल्लीम जो, आने तींहीं येहुदाअ कोअमें तारसु सेहेराअ सावुल नांवांअ मांहांअ तापास केअ। तो आमी मांन ओरुज केअहे, 12 आने मांयु तीयाल एक दोरसोन देखाव्योंह। तींहमें मांयुं एंहडों देखाव्योंह का, आनानीया नांवांअ मांहुंअ आवेह, आने तीयाल फाचो देखतो केरांअ खातुर तों मांहुंअ सोताअ आथ तीयापेअ थोवेह।”
13 तांहांअ आनानीयांह वांदो उठावीन मालीखाल जोवाब देदो, “मालीख, तीया मांहांअ बाबोताम, आने येरुसालेमामेर्याअ तोअ लोकाहांन तीयांय कोतीअ बादी सोतावोणी केअयीह तीया बाबोताम, खुब लोकाहीं मांन आख्योंह। 14 आने ईंहीं बी तोअ भोकती केअनाराहांन तीईन येरुसालेमाम लीअ जांअ खातुर, मोडा पुंजारांयपनेअ आदीकार मीलवीन तो आलोह।”
15 तांहांअ मालीखांय आनानीयाल आख्यों, “तुं जोत खेरो! काहाका, मांयुं तीयाल मांअ सेवा केरांअ, आने येहुदी जातीअ नांह तेंहडा लोकाहांन, आने राजाहांन, आने ईसरायेल लोकाहांन मांअ बाबोताम होमजावांअ पोसोंद केअयोह। 16 आने मांअ बाबोताम एंहडों होमजावांअ खातुर तीयाअ कोतोंअ बादों दुख वेठांअ पोळीअ तों, आंय सोते तीयाल देखावेंह।”
17 तांहांअ आनानीया गीयो, जीया कोअमें सावुल आथो तीया कोअमें वीठो, आने सावुलुल फाचो देखतो केरांअ खातुर तीयापेअ सोताअ आथ थोवीन आख्यों, “सावुल मांअ पावुह! मालीखांय, मोंजे का, ईंहीं तुं आवत्लो तांहांअ जीयांय तुल दोरसोन देदलों तीया ईसुंय सोतेज, तुं फाचो देखतो व्योव आने पोवीतोर आत्मा तुल सोताअ पुरा काबाम राखे तीयाअ खातुर मांन मोकल्योह।” 18 तांहांअ तुरुतुज सावुलुअ डोंअहांमनेअ मासाअ पींगाअ होच एंगोंह कांवींह नींगी पोळ्यों, आने तो फाचो देखतो वीअ गीयो। हातींअ तीयांय उठीन बापतीस्मा केराव्यों। 19 आने हातींअ तीयांय खादों तांहांअ, तीयाल फाची गोती आली।
दामास्कु सेहेराम सावुल हारी गोठ जाहेर केअहे
सावुल दामास्कुमेर्याअ चेलाहांअरी थोळाक दीह रीयो। 20 तींहीं पादरोज तो येहुदीहींअ भोकती मोंडोळाअ कोअमें गीयो, आने जाहेर केरांअ टेक्यो का, “ईसु खोरेखोर पोरमेहेराअ पोयरो हाय!”
21 तीयाअ गोठ उनाअनारें बादें कांहवांयज रीयें, आने एक-बीहराल फुच्यों, “जीयांय येरुसालेमाम ईसुअ चेलाहांन खुब सोतावलें तों मांहुंअ ईंज हायकने? आने ईंहीं बी तों तीयाहांन तीईन मोडा पुंजाराहांअहीं लीअ जांअ खातुरुज आलोंहकने?”
22 पेन सावुल सोताअ गोठीकींअ वादारे ने वादारे लोकाहांन ईसुअ बाबोताम खातरी केरावत्लो, आने “ईसु खोरेखोर ख्रीस्त हाय” एंहकींअ तो एंहडी साबीती देहलो का, दामास्कुम रेनारा येहुदी लोक तीयाअ वीरुद काय बी वाद-वीवाद कीअ नांय सेक्या। 23 खुब दीह हातींअ, येहुदीहीं टोलवायन सावुलुल माय टाकांअ नोक्की केअयों। 24 तीयाल माय टाकांअ खातुर तीयाहां कालजी राखीन रात-दीह सेहेराअ बांअणाअहीं चोकी केअयी। पेन तीयाहांअ कावोतराअ बाबोताम सावुलुल खोबुर पोळी गीयी। 25 तीयाअ लीदे, सावुलुअ चेलाहां तीयाल रातीं एक सीबलांम बोहावीन सेहेराअ कोटुअ एक बारीअ पादरो बारीअ वेल उतावी थोव्यो।
सावुल येरुसालेमामेर्याअ वीसवास्यांअ मुलाकात लेहे
26 सावुल येरुसालेम गीयो, आने तींहीं ईसुअ जें चेलें आथें तीयाहांअरी जोळायांअ कोसीस केअयी। पेन तें बादें तीयाल बीहलें, काहाका, तीयाहांन वीसवास नांय बोहत्लो का, तो बी ईसुअ चेलो बोंणी गीयोह। 27 तेबी बारनाबांह तीयाल साथ देदो, आने तीयाल मालीखाअ खास चेलाअहीं लीअ गीयो, आने सावुल दामास्कु सेहेराअ वेल मुसाफोरी केअत्लो तीयु वोखत दोरसोन दीईन, मालीखांय तीयाअरी केंहकींअ गोठ्या केअल्या, तों तीयाहांन होमजाव्यों। आने तींहीं कोतीअ हींमोत राखीन सावुलुंह ईसुअ बाबोताम बोद देदलो, ईं बी बारनाबांह तीयाहांन होमजाव्यों। 28 तांहांअ मालीखाअ खास चेलाहां सावुलुल बी ईसुअ चेलो मानी लेदो। तीयाअ हातींअ, तो तीयाहांअरी कायोम रीयो आने आखा येरुसालेमाम फीरीन हींमोत राखीन मालीखाअ बाबोताम बोद देतो रीयो। 29 तीयांय गीरीक भासा गोगनारा येहुदी लोकाहांअरी गोठ्या आने चारचा बी केअया; पेन ते तीयाल माय टाकांअ कोसीसुज केअता रेहला। 30 तीयाअ आर्याअ वीसवास्यांहन तीयाअ खोबुर पोळी तांहांअ, ते सावुलुल कायसारीया लीअ गीया, आने तींहींनेअ तीयाल वाहाणुम बोहावीन तारसु सेहेराम मोंजे का, तीयाअ सोताअ सेहेराम मोकली देदो।
31 आखा येहुदीया, गालील, आने सामारीया जील्लांअ मोंडोळुंअ लोक केल्ली बी जातीअ सोतावोणी वोगुर सांतीअ ओनुभोव केअत्ला, ते आत्मीक रीते मोजबुत वेअता जाहला, मालीखाअ बीख राखीन चालत्ला, आने पोवीतोर आत्माअ उफुकींअ वादारे ने वादारे लोकाहांन ईसुपेअ वीसवास बी बोहतो जाहलो।
लुददा आने योप्पा सेहेराहांम पीतोर चोमोत्कार केअहे
32 आमीं एंहडों बोंण्यों का, बादी जागे फीरतो-फीरतो पीतोर, लुददा सेहेराम रेनारा पोरमेहेराअ लोकाहांअ मुलाकात लांअ गीयो। 33 तींहीं तो एनीया नांवांअ एक मांहांअल मील्यो का जों लोकवावालों आथों, आने आठ वोरसेंनेअ फातारींमनेअ उठी नांय सेकत्लों। 34 पीतोरांय तीयाल आख्यों, “एनीया, ईसु ख्रीस्त तुल हारो केअहे! मोंजे, आमी उठीन तोअ फातारी फेळी ले!।” तांहांअ तुरुतुज एनीया हारो वीईन उठ्यो। 35 लुददा आने सारोन सेहेराहांम रेनारा खुब लोकाहीं तीयाल देख्यो, आने ते मालीखापेअ वीसवास केअनारा बोंण्या।
36 योप्पा सेहेराम ताबीथा नांवांअ एक वीसवासी बाय आथी। (तीयुअ नांव गीरीक नोवा काराराम, “दोरका” हाय, तीयाअ ओर्थो बी “फोकळी” हाय।) ते बादो सोमोय बीहराहांअ भोलों केअत्ली आने गोरीबाहांअ मोदोत केअत्ली। 37 पीतोर लुददा सेहेराम आथो तांहांअ एंहडों बोंण्यों का, ताबीथा मांदी पोळीन मोय गीयी। तीयुअ दोस्दारुहुं तीयुअ मुरदाल उंगावीन मालापेअ एक खोलीम हुवावी थोवलों। 38 आमी, लुददा सेहेर योप्पा सेहेराअ पाहीज आथों; आने योप्पामेर्येंअ वीसवास्यें उनाअयें का, पीतोर लुददाम हाय; तांहांअ तीयाहां बेन मांहांहांन तीयाअहीं मोकलीन तीयाल कालावाला केअया, “मेरबानी कीईन, तुं योप्पा माहरी आव!”
39 तांहांअ पीतोर तीयार वीईन तीयाहांअरी गीयो। तींहीं पोचताज तें मांहेंअ तीयाल उपरीअ खोलीम लीअ गीयें। तींहीं रोळनार्या रोंडेअ बाया तीयाअ चारु वेल फीरी वोल्या, आने रोळता-रोळता ते, दोरका जीवती आथी तांहांअ तीयुंय जे डोगल्या आने झोब्बा बोंणावला ते पीतोराल देखावत्या जायन रोळतल्या। 40 पेन पीतोरांय बादा मांहांहांन बारे काडी थोव्यें, आने गुठोणें पोळीन पोरमेहेराल ओरुज केअयी; हातींअ मुरदाअ वेल फीरीन आख्यों, “ताबीथा उठ!” तांहांअ तीयुंय सोताअ डोंआ उगाळीन पीतोराल हेअयो, आने ते बोठी। 41 पीतोरांय तीयुल आथाअ टेको दीईन उबी केअयी; आने हातींअ तीयांय तीयु रोंडेअ बायाहांन, आने बीहरा बादा वीसवास्यांहन हादीन तीयाहांअ आगलांअ तीयुल जीवती देखावी।