8
1-3 हातींअ, धोरमी लोकाहीं थोळाकाहीं आवीन स्तेफानुल डाटयो, आने तीयाअ खातुर ते खुब रोळ्या। सोतावोणीअ लीदे वीसवासी लोक वेरगाय जाताह तीदीहनेअज, येरुसालेमाअ मोंडोळाअ लोकाहांअ खुब मोडी सोतावोणी चालु वीयी, आने खास चेला सीवायने बीहरें बादें वीसवासी मांहेंअ, येहुदीया आने सामारीया जील्लांहमेर्याअ गांवांहांम वेरगाय, गीयें। स्तेफानुल माय टाकांअ बाबोताम सावुलुंह बी हां पाळली। तो मोंडोळाअ लोकाहांन खुब तारास पाळांअ टेक्यो। तो कोअ-कोअ जायन वीसवासी आदमीहींन ने बायाहांन कोअमेंनेअ तांय काडत्लो, आने तीयाहांन जेलाम कोंडावी देहलो।
सामारीया जील्लाम फीलीप हारी गोठ जाहेर केअहे
4 पेन जें वीसवासी मांहेंअ वेरगाय गेहलें, तें जींहीं-जींहीं जाहलें तींहीं हारी गोठ जाहेर केअत्लें। 5 दाखला तोरीके, फीलीप जो येरुसालेमाअ मोंडोळाम मोदोत केअनारा सांत जांअहांमेर्योअ आथो, तीयांय सामारीया जील्लाअ एक सेहेराम जायन, तींहींर्याअ लोकाहांन ख्रीस्तुअ बाबोताम आख्यों। 6 फीलीप जें-जें चोमोत्कारुवालें कामें केअत्लो, तें खुब लोकाहीं देखलें। तीयाअ लीदे, तें तीयाअ गोठ्या, एक धीयाने उनाअत्लें। 7 फीलीपुंह केअला चोमोत्काराहांअ पोरीणामे, पुतळें लागला खुब मांहांहांमेनेअ पुतळें बोंबलुअतेंज नींगी जाहलें, आने खुब लोकवावालें, आने खोळ्यें-लुलें मांहेंअ बी हारें वीअ जाहलें। 8 तीयाअ लीदे, तीया सेहेराअ लोक खुब खुसालीम आथा।
सीमोन नांवांअ एक मेली वीदया हीकलों मांहुंअ
9 तीया सेहेराम सीमोन नांवांअ एक मांहुंअ आथों। तों सोताअ मेली वीदयाअ कामें सामारीया जील्लाअ लोकाहांअ आगलांअ खुब वोरसेंनेअ कीअ देखावतों आललों, आने तीयांय तींहींर्याअ लोकाहांन बोगलावी टाकला। आने तों सोताल एगुंह मोडों मांहुंअ एंहकींअ आखावत्लों। 10 आने तीया सेहेराअ हान्ने-मोडें बादें मांहेंअ, एक धीयाने तीयाअ गोठ उनाअत्लें। तें आखत्लें, “ईया मांहांपेअ, जीयाल आपुंह ‘मोडी ताकोत’ आखतेंह तीया देवुअ ताकोत हाय।”
11 लोक तीयाअ गोठ्या एक धीयाने उनाअत्ला। ईयाअ कारोण ईं आथों का, तो तीयाहांन लांबा वोखतनेअ सोताअ मेली वीदयाकींअ खोरेखोर बोगलावी टाकतो आललो। 12 पेन आमी, खुब आदमीहीं आने बायुहुं, तीयाहांअ जीवोनाहांम पोरमेहेराअ राज्याअ ओनुभोव केंहकींअ वीअ सेके तीया बाबोताम, आने ईसु ख्रीस्तुअ बाबोताअ हारी गोठीअ बाबोताम फीलीपुंह आखली गोठीपेअ वीसवास केअयो। आने तीयाअ पोरीणामे तीयाहां बापतीस्मा केराव्यों। 13 सीमोनुंह सोते बी फीलीपुंह आखली गोठीपेअ वीसवास केअयो, आने बापतीस्मा केराव्यों। हातींअ तो फीलीपाअरीनरीज रेहलो। आने फीलीपुंह केअला खुब नोवाय लागवुअनारा आने चोमोत्काराअ कामाहांन देखीन तो सीमोन बोगलाय जाहलो।
14 येरुसालेमाम आथा ते मालीखाअ खास चेला उनाअया का, सामारीया जील्लाअ लोकाहीं पोरमेहेराअ गोठ मानी लेदीह। तांहांअ तीयाहां पीतोराल आने योहानाल तीया लोकाहांअहीं मोकली देदा। 15 ते आला तांहांअ, तीयाहां तीया सामारीया जील्लाअ वीसवास्यांअ खातुर पोरमेहेराल ओरुज केअयी, तो तीयाहांन पोवीतोर आत्माअ ताकोत दे। 16 काहाका, तीयाहां जांअयों का, तांव लोगुंअ पोवीतोर आत्मांय तीयाहांमेर्याअ केडाअ बी जीवोनाअ पुरो कोब्जो नांह लेदो। तीयाहां मालीख ईसुअ नांवांअ बापतीस्मा ओतोंअज केरावलों। पेन तांव लोगुंअ तीयाहांन पोवीतोर आत्माअ बाबोताम खोबुरुज नांय आथी। 17 हातींअ पीतोरांय ने योहानांय तीया वीसवास्यांहपेअ आथ थोव्या, आने तांहांअ तीयाहांन पोवीतोर आत्मा मील्यो।
18 मालीखाअ खास चेलाहां तीयाहांपेअ आथ थोव्या तांहांअ, तीयाहांन पोवीतोर आत्मा मील्यो तों देखीन, पोवीतोर आत्मा दांअ वोरदानुल वेचाअतों लांअ खातुर सीमोन, मालीखाअ खास चेलाहांन पोयसा दांअ तीयार वीयो, 19 आने तीयाहांन आखांअ टेक्यो का, “मांन बी ईं वोरदान दा, ईयाअ खातुर का, जीयापेअ बी आंय मांअ आथ थोवुं, तीयाल पोवीतोर आत्मा मीले।”
20 पेन पीतोरांय तीयाल जोवाब देदो, “पोरमेहेराअ ईया वोरदानुल वेचाअतों लेवाय एंहडों तुंयुं वीचार्यों तीयाअ, लीदे तोअरी तोअ पोयसा बी नास वीअ। 21 ईयु सेवाम तुं गोंवांदी नांह बोंणी सेकतो। काहाका, तोअ मोन पोरमेहेराअ आगलांअ चोख्खों नांह। 22 तीयाअ लीदे ईयु तोअ खाराब योज्नाअ खातुर दुखी वीईन ते सोळी दे, आने मालीखाल ओरुज केअ। कादास तो, तोअ खाराब वीचारुंअ तुल माफी दीअ। 23 काहाका, मांन एंहडों देखाअहे का, तोअ पुरा मोनाम आदरायुवाला वीचार हाय, आने तुं पापाअ गुलाम हाय।”
24 तांहांअ सीमोनुंह पीतोराल आने योहानाल कालावाला केअया, “तुमां मांअ खातुर मालीखाल ओरुज केरा का, तुमां जों आख्योंह तों काय बी मांअ जीवोनाम नांय बोंणे।”
25 एंहकींअ कीईन, पीतोर आने योहान, ईसुअ बाबोताम ते जों जांअत्ला आने तों, सामारीया जील्लाअ लोकाहांन आखीन आने मालीखाअ बाबोताअ गोठ बी जाहेर कीईन हातींअ, फाचा येरुसालेमाम गीया। आने वाटे तीयाहां सामारीया जील्लाअ खुब गांवांहांम हारी गोठ जाहेर केअयी।
फीलीप आने एथीयोपीया देसाअ ओमोलदार
26 एक दीह, मालीखांय मोकलुअला एक दुतांय फीलीपुल आख्यों, “तीयार वीईन दोकसीण दीसाअ वेल येरुसालेमेनेअ गाझा जानारी उजाळुअ वाटे जो!” 27 तांहांअ फीलीप तीयार वीईन गीयो। वाटे तीयाल एथीयोपीया देसाअ एक ईजळों मील्यों। तों ईजळों एथीयोपीया देसाअ राणी कांदाकेअ तीजोरीअ कारभार चालवुअनारों मोडो ओमोलदार आथों। 28 तों येरुसालेमाम पोरमेहेराअ पुंजा-भोकती केरांअ आललों, आने कोळाअ तांगांम बोहीन कोअ फाचों जाहलों। तांगांम बोठो-बोठो तों, पोरमेहेराअ गोठ जाहेर केअनारा जुना जोमानाअ येसायांय लेखली चोपळी वाचत्लों। 29 पोवीतोर आत्मांय फीलीपुल आख्यों, “एला तांगाअ पाही जायन, तीयाअ आरी-आरी चाली पोळ!” 30 तांहांअ फीलीप दोवळुअतो-दोवळुअतो पोची गीयो। तांहांअ तो तीया ओमोलदाराल, पोरमेहेराअ गोठ जाहेर केअनारा जुना जोमानाअ येसायांय लेखली चोपळी वाचता उनाअयो। फीलीपुंह तीयाल फुच्यों, “जों तुं वाचोह तों तुल होमजाअहे का?”
31 तांहांअ तीया ओमोलदारांय जोवाब देदो, “केडों बी नांय होमजावे ता मांन केंहकींअ होमजाय?” हातींअ तीयांय फीलीपुल, उपेअ चोळीन तांगांम सोताअरी बोंहांअ आख्यों। 32 तो पोवीतोर लेखाणाअ जो भाग वाचत्लो, तो ओ आथो:
“जीयाल माय टाकांअ खातुर लीअ जातेंह तेंहडा घेटाअ होच तो वीअ।
घेटाअ रुंगाहांअ उन कातरुअनारांअ आगलांअ जेंहकींअ घेटें ठाकेंज वीअ रेतेंह,
तेंहकींअ तो गोगीअज नांय।
33 तीयाअ ओपमान वीअ, आने तीयाल नीयाय नांय मीलीअ।
तीयाअ वोसुलामेर्यांअ बाबोताम केडों बी आखी नांय सेकीअ।
काहाका, तोरतीपेर्योंअ तीयाअ जीवोन ओंण टेमे पुरों वीअ जाय।”
34 ओमोलदारांय फीलीपुल फुच्यों, “मेरबानी कीईन मांन आखेअ! पोरमेहेराअ गोठ जाहेर केअनारो ईं बादों केडाअ बाबोताम आखेह? सोताअ बाबोताम का बीहरा केडाअ बाबोताम?” 35 हातींअ फीलीपुंह गोगांअ चालु केअयों, आने पोवीतोर लेखाणाअ जो भाग तो ओमोलदार वाचत्लो तींहींनेअ चालु कीईन, तीयाल ईसुअ बाबोताअ हारी गोठ आखी। आने तीया ओमोलदारांय तीयु गोठीपेअ वीसवास केअयो। 36 वाटे जाता-जाता ते एक हानांअ तालावाअहीं आवी पोच्या तांहांअ, ओमोलदारांय फीलीपुल आख्यों, “हेअ! ईं फेलों पांय! वांदो नांय वीअ ता, मेरबानी कीईन मांअ बापतीस्मा केअ!” 37 ((तांहांअ फीलीपुंह तीयाल आख्यों, “तोअ पुरा मोनाकींअ तुं वीसवास क्योव ता, तुं बापतीस्मा केरावी सेकोह।” तांहांअ ओमोलदारांय जोवाब देदो, “ईसु ख्रीस्त पोरमेहेराअ पोयरो हाय।”))
38 एंहकींअ आखीन तीयांय तांगों उबी राखाव्यों, आने हातींअ फीलीप आने ओमोलदार बेनुं पांअयांम उत्या, आने फीलीपुंह तीयाअ बापतीस्मा केअयों। 39 ते पांअयांमेनेअ बारे नींग्या तांहांअ, पोवीतोर आत्मांय फीलीपुल चोमोत्काराअ रीते लीअ लेदो, आने ओमोलदारांय तीयाल फाचो नांय देख्यो, पेन तो खुस वेअतो-वेअतो सोताअ वाटे पोळ्यो। 40 पेन फीलीपुंह हेअयों का, तो सोते आजी उत्तोरुअ वेल, आसदोद सेहेराम पोची गेहलो; तींहींनेअ तो, वाटीपेअ आवनारा बादा गांवांहांम हारी गोठ आखतो-आखतो कायसारीया पोच्यो।