18
सोयनीक आने चोकीदार ईसुल तीअ लीअ जाताह
(माथी २६:४७-५६; मार्क १४:४३-५०; लुक २२:४७-५३)
1 ईसुंय ओरुज केरांअ पुरों केअयों हातींअ, तो तीयाअ चेलाहांअरी मोंजे का आमांअरी तींहींनेअ नींग्यो आने कीदरोन कोतुअ तीयु तोळी गीयो। तींहीं जेतुन चाळाहांअ एक वाळी आथी। तींहमें आमां गीया।
2 ईसुल तीयाअ दुसमोनाहांअ आथाम तेरावी देनारा येहुदाल खोबुर आथी का ईसु तींहींज वेरांअ जोजे। काहाका, खुब वोखत ईसु ने आमां तींहीं टोलवाअत्ला। 3 तीयाअ लीदे, येहुदा तींहीं आलो। तीयाअरी रोम सारकाराअ थोळाक सोयनीक आने मोडा पुंजाराहां ने फोरीसीहीं मोकलुअला मोंदीराअ थोळाक चोकीदाराहांअ एक टुकळी आथी। ते कोंदील, दीवालें आने आथ्यारें लीईन आलला। 4 ईसु जांअत्लोज का तीयाल काय-काय वेअनारों हाय। तीयाअ लीदे, तीयांय सोतेज तीया टोलाअ आगलांअ जायन तीयाहांन फुच्यों, “तुमां केडाल होदताह?” 5 तांहांअ तीयाहां तीयाल जोवाब देदो, “नाझारेथ गांवांअ ईसुल।” तांहांअ तीयांय तीयाहांन आख्यों, “तो ईसु आंयज हाय।” तीयाल तेरावी देनारो येहुदा बी तीयाहांअरी आथो। 6 ‘तुमां जीयाल होदताह तो आंयज हाय’ एंहकींअ ईसुंय तीयाहांन आख्यों तांहांअ तीयाअ आत्मीक ताकोतुअ लीदे, ते फाचलांअ होरक्या आने पुंय आसाटाय पोळ्या। 7 फाचों तीयांय तीयाहांन फुच्यों, “तुमां केडाल होदताह?” तीयाहां आख्यों का, “नाझारेथ गांवांअ ईसुल।” 8 तांहांअ ईसुंय तीयाहांन जोवाब देदो, “मांयुं पेअलांअज तुमनेंह आख्योंह का तो ईसु आंयज हाय। मोंजे, जो तुमां मांनुंज होदता वीअ ता, ईया मांअ चेलाहांन जांअ दा।” 9 ईं बादों ईयाअ खातुर बोंण्यों का, ईसुंय जों आखीन पोरमेहेराल ओरुज केअली तों खेरों पोळे। तीयांय एंहकींअ आखीन पोरमेहेराल ओरुज केअली का, “पोरमेहेर बाहका, जीयाहांन तुंयुं मांन होप्याह तीयाहांमेर्याअ एकाल बी आंय नांय गोमावुं।”
10 सीमोन पीतोरुपेअ तारवाअ आथी। मोंजे, तीयांय ते तारवाअ काडी, आने मोडांम-मोडा पुंजाराअ चाकोराल मारांअ चाटकाट्यो, पेन तो चुकी गीयो ने तीयाअ हुदो कान ओतोअज तीयांय वाडी टाक्यो। तीया चाकोराअ नांव मालखुस आथों। 11 तांहांअ ईसुंय पीतोराल आख्यों, “तोअ तारवायुल फाचो मीयानाम थोवी दे! होमजी ले का मांअ पोरमेहेर बाहको मांन जों दुख वेठावेह तों मांअ वेठांअ जोजे।”
सोयनीक आने चोकीदार ईसुल आन्नासाअहीं तीअ लीअ जाताह
12 तांहांअ सोताअ उपरीअरी आलला तीया रोमुअ सोयनीकाहां आने येहुदी मोंदीराअ चोकीदाराहां ईसुल तेअयो। तीयाहां तीयाअ आथ तीयाअ टोंगुअ फाचाळी बांदी देदा। 13 पेअलांम-पेअलांअ ता ते ईसुल आन्नाअहीं लीअ गीया। तो आन्ना पेअलांअ मोडांम-मोडो पुंजारो आथो। आने तो तीया चालु वोरसाअ खातुर जो मोडांम-मोडो पुंजारो आथो तीया कायफाअ हाहरोह लागत्लो। 14 ‘बादा येहुदी लोक मोय तीयाअ केअता, तीयाहांअ खातुर एक मांहुंअ मोय तों वादारे हारों हाय’ एंहकींअ थोळाक वोखत पेअलांअ येहुदी पोंचाअ लोकाहांन सालाह देनारो ओज कायफा आथो।
पीतोर आखेह का तो ईसुअ चेलाहांमेर्योअ नांह
(माथी २६:६९-७०; मार्क १४:६६-६८; लुक २२:५५-५७)
15 सीमोन पीतोर आने आंय ईसुअ फाचलां-फाचलांअ जाहला। माडांम-मोडो पुंजारो मांअ ओअखात आथो तीयाअ लीदे, तीयांय मांन ईसुअरी तीयाअ कोअ चोवठाम वीहांअ देदो। 16 पेन पीतोराल ता, चोवठाअ बारे बांअणाअहीं उबी रीईन वाट जोवांअ पोळ्यों। पेन आंय मोडांम-मोडा पुंजाराल ओअखुत्लो तीयाअ लीदे, आंय बांअणाअहीं फाचो गीयो आने तींहीं चोकी केअनारी पोयरील गोठ केअयी। तांहांअ तीयुंय पीतोराल माज आवांअ देदो। 17 तांहांअ बांअणांअहीं चोकी केअनारी कामारी पोयरींय पीतोराल आख्यों, “तुं बी ते तीअ लालाह तीया मांहांअ चेलाहांमेर्योअ हायकने?” तांहांअ पीतोरांय आख्यों, “नांह, आंय तीयाअ चेलाहांमेर्योअ नांह।” 18 तांहांअ हीयालों लागत्लों, तीयाअ लीदे, मोडांम-मोडा पुंजाराअ गुलाम आने मोंदीराअ चोकीदार आकठो बालीन सोमकी उबी रीईन हेकाअत्ला। तांहांअ पीतोर बी तीयाहांअरी उबी रीईन हेकाअत्लो।
मोडांम-मोडो पुंजारो ईसुल सावाल फुचेह
(माथी २६:५९-६६; मार्क १४:५५-६४; लुक २२:६६-७१)
19 पीतोर तींहीं हेकाअत्लो तांहांअ, मोडांम-मोडा पुंजारांय ईसुल तीयाअ चेलाहांअ बाबोताम आने तीयाअ बोदाअ बाबोताम फुच्यों। 20 तांहांअ ईसुंय तीयाल जोवाब देदो, “आंय मांअ गोठ उनाअनारा लोकाहांअरी कायोम सीदोंज गोग्योह। मांयुं कायोम भोकती मोंडोळाअ पोंगाहांम आने मोंदीराम, जींहीं बादें येहुदी टोलवाअतेंह तेंहडी जागेज लोकाहांन बोद देदाह। मांयुं केल्ली बी गोठ दोबावीन नांह आखी। 21 तांहांअ तुं मांन कायदेसोर नांय वीअ एंहडा सोवाल काहाल फुचोह? जे मांअ बोद उनाअयाह तीया लोकाहांन फुचेअ, का मांयुं तीयाहांन काय हीकव्योंह! जों मांयुं आख्योंह तों ते जांअताहज!” 22 ईसुंय एंहकींअ आख्यों तांहांअ, तीयाअ पाही उबी रेहला मोंदीराअ चोकीदारुमेर्यांह एकांय तीयाल तीयाअ मुंयुंपेअ थापुळ ठोकी, आने आख्यों, “मोडांम-मोडा पुंजाराल तुं एंहकींअ कीईन जोवाब दीहो, का?” 23 तांहांअ ईसुंय तीयाल जोवाब देदो, “जो मांयुं तुमांअ नीयोमाहांअ वीरुदुम काय बी आख्यों वीअ ता, तुं मांन आखी सेक्तो। पेन मांयुं जों खेरों हाय तोंज आख्योंह ता, तुंयुं मांन काहाल थापुळ ठोकी?” 24 हातींअ तीयाहां ईसुअ आथ फाचा बांदी देदा हातींअ आन्नांह ईसुल मोडांम-मोडा पुंजारा कायफाअहीं मोकलावी देदो।
पीतोर आजी बेन वोखत आखेह का तो ईसुअ चेलाहांमेर्योअ नांह
(माथी २६:७१-७५; मार्क १४:६९-७२; लुक २२:५८-६२)
25 सीमोन पीतोर आकठाअहीं उबी रीईन हेकाअत्लो तांहांअ, एगांह तीयाल आख्यों, “तुं बी तीया मांहांअ चेलाहांमेर्योअ हायकने?” तांहांअ पीतोरांय तीयाअ नाकार कीईन आख्यों, “नांह, आंय तीयाअ चेलाहांमेर्योअ नांह।” 26 थोळीक वाअ हातींअ, मोडांम-मोडा पुंजाराअ चाकोराहांमेर्याअ एकांय पीतोराल आख्यों, “तीया मांहांअरी मांयुं तुल जेतुन चाळाहांअ वाळीम देखलो। देखलोकनें?” तो चाकोर, जीयाअ कान पीतोरांय वाडी टाकलो, तीया चाकोराअ जातुलो आथो। 27 तांहांअ पीतोरांय फाचों तीयाअ नाकार केअयो। आने तुरुतुज, ईसुंय भोवीसवाणी केअली तीयाअ पोरमाणे, कुकळो वाह्यो।
राजपाल पीलात ईसुल सावाल फुचेह
(माथी २७:१-२, ११-१४; मार्क १५:१-५; लुक २३:१-५)
28 हातींअ येहुदी आगेवान ईसुल कायफाअ कोअनेअ रोम सारकाराअ राजपाल पीलाताअहीं लीअ गीया। तांहांअ उजालों वेरांअ तीयारीम आथों। पीलात येहुदी नांय आथो तीयाअ लीदे, तीया वोळीलाहीं वीचार्यों, जो ते पीलाताअ मेहेलाम जाय ता, ते बाटलाय जाय, आने तीयाअ पोरीणामे ते पास्का तेहवारुम खातेंह तो मांडो खाय नांय सेके। तीयाअ लीदे, ते राजपालाअ मेहेलाम जांअ नांय मागत्ला। 29 मोंजे, पीलात मेहेलाअ बारे नींगीन तीयाहांअहीं गीयो आने तीयाहांन फुच्यों, “ईया मांहांय केल्लो कायदो तोळ्योह एंहकींअ तुमां आखताह?” 30 येहुदी आगेवान जांअत्ला का, ईसुंय रोम सारकाराअ एक कायदो बी नांह तोळ्यो। मोंजे, ते पीलाताल काय बी जोवाब दांअ नांय मागत्ला। पेन तीयाअ बोदले तीयाहां आख्यों का, “जो ईं मांहुंअ गुनेगार नांय वेअतों ता, आमां तीयाल तोअहीं नांय लावता!” 31 तांहांअ पीलातांय तीयाहांन आख्यों, “तुमां ईयाल लीअ जा ने तुमांअ सोताअ नीयोमाहांअ पोरमाणे ईयाअ नीयाय केरा!” तांहांअ वोळीलाहीं आख्यों, “एंहकींअ नांय। तुमां रोमी मांहेंअज तीयाल मोताअ साज्या दा एंहडी आमांअ मोर्जी हाय। काहाका, केडाल बी मोताअ साज्या दांअ आमनेंह येहुदीहींन होक नांह।” 32 रोमी मांहेंअज गुनेगाराल कुरुसापेअ जोळीन मोताअ साज्या देहलें। मोंजे तीयाहां ईयाअ खातुर एंहकींअ आख्यों, ईसुंय केंहडा मोते मोरांअ हाय तीया बाबोताम पेअलांअ जों आखलों तों खेरों पोळे।
33 तांहांअ पीलात फाचो मेहेलाम गीयो आने ईसुल हादयो। ईसु सोताल राजा आखावेह एंहकींअ वोळीलाहीं पीलाताल आखलों तीयाअ लीदे, तीयांय ईसुल फुच्यों, “तुं येहुदीहींअ राजा हाय का?” 34 तांहांअ ईसुंय जोवाब देदो, “आंय सोताल राजा आखावुंह का नांह तों तुं सोते जांणांअ मागोह तीयाअ लीदे एंहकींअ तुं फुचोह का, एगांह तुल आख्योंह तीयाअ लीदे एंहकींअ फुचोह?” 35 तांहांअ पीलातांय जोवाब देदो, “आंय ता येहुदी नांह, मोंजे आंय ए बाबोत होमजी नांह सेक्तो। तुल मांअहीं लावनारा ता, तोअ येहुदी लोक आने तुमांअ मोडा पुंजारा हाय! ते तुल माय टाकांअ मागे एंहडो तुंयुं काय गुनो केअयोह?” 36 तांहांअ ईसुंय जोवाब देदो, “मांन राजा बोंणावनारा ता ईयु दुन्याअ लोक नांह। जो मांन राजा बोंणावनारा ते लोक वेअता ता, येहुदी आगेवानाहांन मांन तेअता ओटकावांअ खातुर मांअ चेला तीयाहांअरी लोळता। पेन मांन राजा बोंणावनारों ता ईयु दुन्यापेर्योंअ केडों बी नांह।” 37 तांहांअ पीलातांय तीयाल फुच्यों, “मोंजे, तुं एंहकींअ आखोह का तुं राजा हाय?” तांहांअ ईसुंय तीयाल जोवाब देदो, “आंह, आंय राजा हाय एंहकींअ तुंयुं आख्योंह तों खेरोंज हाय। आंय राजा बोंणांअज जोन्मुअलो, आने पोरमेहेराअ बाबोताअ हाचाय लोकाहांन आखांअज ईयु दुन्याम आलोह। जोंबी हाचायुल टेको देनारों हाय, तों मांअ गोठ मानेह।” 38 तांहांअ पीलातांय ईसुल फुच्यों, “केडों बी केंहकींअ जांय सेके का हाचाय काय हाय?”
ईसुल मोताअ साज्या मीलेह
(माथी २७:१५-३१; मार्क १५:६-२०; लुक २३:१३-२५)
39 पेन तुमांअ येहुदीहींअ एंहडो रीवाज हाय का, दोर वोरसे पास्का तेहवाराअ वोखत तुमांअ खातुर एक केदील आंय सोळी थोवुंह। तांहांअ सोताल येहुदीहींअ राजा आखावेह तीया मांहांअल आंय सोळी थोवुं एंहडी तुमांअ मोर्जी हाय का?” 40 तांहांअ ते बोंबली उठया, “नांह, नांह। ईया मांहांअल मां सोळतो। तीयाअ बोदले, बाराबासाल सोळी दे!” बाराबास ता सारकाराअ वीरुद धामाल केअनारो आथो तीयाअ लीदे, तीयाल जेलाम कोंडलो!