17
ईसु ओरुज केअहे का पोरमेहेर ईसुअ नांव वादावे
1 ते गोठ्या आमनेंह आखीन हातींअ ईसुंय जुगीअ वेल हेअयों। हातींअ तीयांय पोरमेहेराल एंहडी ओरुज केअयी, “मांअ पोरमेहेर बाहका, मांअ दुखें वेठांअ ने मोरांअ ओ मांअ सोमोय हाय। लोकाहांअ आगलांअ मांअ नांव वादावेअ, ईयाअ खातुर का, आंय बी तीयाहांअ आगलांअ तोअ नांव वादावुं। 2 जीया लोकाहांन तुंयुं पोसोंद केअयाह तीयाहांन बादाहांन आंय आत्मीक रीते कायोमाअ खातुर जीवावुं तीयाअ खातुर, तुंयुं मांन बादा लोकाहांपेअ आदीकार देदोह। 3 लोक कायोम जीवे तीयाअ खातुर वाट ता ए हाय: ते जांय का, तुं एखलोज खेरो पोरमेहेर हाय, आने आंय ईसुज तुंयुं मोकलुअलो ख्रीस्त हाय। 4 केरांअ खातुर तुंयुं मांन देदलों बादों काम मांयुं पुरों केअयोंह, आने एंहकींअ कीईन मांयुं ईयु तोरतीपेअ तोअ नांव वादाव्योंह। 5 मांअ पोरमेहेर बाहका! दुन्या बोंणी तीयाअ पेअलांअ जे मोडाय मांअपेअ आथी ते मोडाय मांन, फाचो तोअहीं आंय आवुंह तांहांअ दीईन मांअ नांव वादावेअ।
ईसु ओरुज केअहे का पोरमेहेर ईसुअ चेलाहांन हाचवे
6 तोअ नांय आथा एंहडा लोकाहांमेनेअ तुं मांअहीं जीया लोकाहांन लीअ आललो, तीयाहांन मांयुं तुं केंहडो हाय तों जाणाव्योंह। मांअहीं आलला ते लोक तोअज हाय, आने तुंज तीयाहांन मांअहीं लीअ आललो। आमी ते तोअ गोठी पोरमाणे चाल्याह। 7 आने आमी ते जांय गीयाह का, जोंबी तुंयुं मांन देदोंह, मोंजे का, तोअ गोठ्या आने तोअ काम, तों बादों खोरेखोर तोअपेनेअज मांन मील्योंह। 8 जे गोठ्या तुंयुं मांन देदल्या ते बादया मांयुं तीयाहांन आखी देदयाह, आने ते बादया तीयाहां मानी बी लेदयाह। आने ते बोराबोर जांय गीयाह का, आंय तोअहींनेअज आलोह आने तीयाहां मानी लेदोंह का, तुंयुंज मांन मोकल्योह। 9 आंय तुल ओरुज कीअहुं का, तुं तीयाहांन मोदोत केअ। ईयु दुन्याम जे तोअ लोक नांह तीयाहांअ खातुर आंय तुल ओरुज नांह केअतो। उलटों, आंय ता, मांअ चेला बोंणांअ खातुर जीयाहांन तुं मांअहीं लीअ आलोह तीयाहांअ खातुर, तुल ओरुज कीअहुं। काहाका, ते तोअ लोक हाय। 10 मांअ बादा चेला तोअज हाय, आने जे तोअ लोक हाय, ते बादा मांअ बी हाय। तीयाहां बीहरा लोकाहीं अ आगलांअ मांअ नांव वादाव्योंह।
11 ईयु दुन्याम आंय आजी वादारे सोमोय नांह रेनारो, आने माहरीज आंय तोअहीं आवनारो हाय। पेन ते ता, ईयु दुन्याम तोअ वीरुद केअनारा लोकाहांअरीज रेनारा हाय। ओ मांअ पोवीतोर पोरमेहेर बाहका! तुंयुं मांन देदली तोअ ताकोताकींअ तीयाहांन हाचवुअजे, ईयाअ खातुर का, जेंहकींअ तुं ने आंय एक-बीहराअरी जोळाअला हाय तेंहकींअ ते बी एक-बीहराअरी जोळाअला रे। 12 आंय तीयाहांअरी आथो तांव ता, मांयुं तीयाहांन तोअ ताकोताकींअ बोराबोर हाचव्याह। पेन तीयाहांमेर्योंअ एक मांहुंअ कायोमाअ खातुर तोअ से ओलोग पोळी जानारों हाय। कायोमाअ खातुर तोअ से ओलोग पोळी जानारों ता तोंज हाय। एंहडों ईयाअ खातुर बोंणेह का, तुंयुं जाणावली गोठ जाहेर केअनारांय पोवीतोर लेखाणाहांम तीया मांहांअ बाबोताम जों लेख्योंह तों खेरों पोळे।
13 आमी आंय फाचो तोअहीं आवांअ तीयारीम हाय। आंय आजी दुन्यामुज हाय तांवज ए गोठ्या आखी दीहुं, ईयाअ खातुर का, जेंहकींअ आंय खुसीअ ओनुभोव कीअ रीयोह, तेंहकींअ मांअ चेला बी पुरी रीते खुसीअ ओनुभोव केअ। 14 मांयुं तीयाहांन तोअ गोठ्या आख्याह। तीयाअ पोरीणामे, तोअ वीरुद केअनारा लोकाहीं तीयाहांन नोफरोत केअयीह। काहाका, जेंहकींअ आंय तोअ वीरुद केअनारा लोकाहांअ टुकळीमेनेअ नांह, तेंहकींअ ते मांअ चेला बी तोअ वीरुद केअनारी तीया लोकाहांअ टुकळीमेर्याअ नांह। 15 आंय तुल एंहकींअ ओरुज नांह केअतो का, तुं मांअ चेलाहांन ईयु दुन्यामनेअ लीअ ले। पेन उलटों, आंय तुल एंहकींअ ओरुज कीअहुं का, सेतान जो खाराब हाय, तीयाअ हुमलामनेअ तुं तीयाहांन हाचवो। 16 जेंहकींअ आंय तोअ वीरुद केअनारा लोकाहांअ टुकळीमेनेअ नांह, तेंहकींअ मांअ चेला बी तोअ वीरुद केअनारी तीया लोकाहांअ टुकळीमेर्याअ नांह। 17 मांअ चेलाहांन तोअ गोठीहींअ पोरमाणे चालांअ मोदोत केअजे, आने एंहकींअ कीईन तीयाहांन तोअ सेवाअ खातुर दुन्याअ बीहरा लोकाहीं अ से जुदा केअजे। तोअ गोठ्या हाच्या हाय। 18 जेंहकींअ तुंयुं मांन ईयु दुन्याम मोकल्योह, तेंहकींअ आंय बी तीयाहांन दुन्याअ बीहरी-बीहरी जागे नोक्कीज मोकलेंह। 19 आंय पुरी रीते तोअ बोंणुं तीयाअ खातुर आंय सोताल ओलोग कीअहुं, ईयाअ खातुर का, ते बी हाची रीते सोताल तोअ सेवाअ खातुर ओलोग केअ।
ईसु भोवीस्यांम तीयापेअ वीसवास केअनारांअ खातुर ओरुज केअहे
20 आंय खाली ईया ओग्यार चेलाहांअ खातुर ओतोअज ओरुज नांह केअतो। ईयाहांअ गोठ उनायांअ पोरीणामे जें मांअपेअ वीसवास कीअ, तीयाहांअ खातुर बी ओरुज कीअहुं। 21 ओ मांअ पोरमेहेर बाहका! जेंहकींअ तोअ आर्याअ सोबोंदुअ लीदे आंय तोअरी जोळाअलो हाय, आने मांअ आर्याअ सोबोंदुअ लीदे तुं मांअरी जोळाअलो हाय, तेंहकींअ ते मांअ बादा चेला बी एक-बीहराअरी जोळाअला रे एंहडों वेरांअ दे, ईयाअ खातुर का जें तुल नांह ओअखुतें तें जांएं का, तुंयुंज मांन मोक्ल्योह। 22 जेंहकींअ तुंयुं मांन मान देदोंह, तेंहकींअ मांयुं बी तीयाहांन मान देदोंह, ईयाअ खातुर का, जेंहकींअ आपुंह एक-बीहराअरी जोळाअला हाय तेंहकींअ ते बी एक-बीहराअरी जोळाअला रे। 23 जेंहकींअ आंय तीयाहांअरी जोळाअलो हाय आने तुं मांअरी जोळाअलो हाय, तेंहकींअ ते एक-बीहराअरी पुरी रीते जोळाअला रे एंहडों वेरांअ दे, ईयाअ खातुर का, जे तोअ लोक नांह तीयाहांन खोबुर पोळे का, तुंयुंज मांन मोकल्योह। आने तीयाहांन ईं बी खोबुर पोळे का, जेंहकींअ तुंयुं मांअपेअ माया राखीह, तेंहकींअ मांअ तीया चेलाहांपेअ बी माया राखीह।
24 ओ मांअ पोरमेहेर बाहका! मांअ एंहडी मोर्जी हाय का, तुंयुं मांन देदला ए चेला बी, आंय जींहीं वेअहें तींहीं होरगाम मांअरी रे। ते मांअ मोडाय हेअ एंहडी मांअ मोर्जी हाय। तुंयुं मांअपेअ राखली मायाअ लीदे जे मोडाय तुंयुं मांन देदीह, ते मोडाय ते हेअ एंहडी मांअ मोर्जी हाय। तुंयुं दुन्या बोंणावी तीयाअ पेअलांअज तुंयुं ते मोडाय मांन देदी। 25 ओ हाचायुवाला मांअ पोरमेहेर बाहका! जे तोअ लोक नांह ते तुं केंहडो हाय तों नांह जांअता तेबी, आंय जांअहुंज का तुं केंहडो हाय। आने मांअ ए चेला जांअताह का, तुंयुंज मांन मोकल्योह। 26 तुं केंहडो हाय तों मांयुं तीयाहांन जाणाव्योंह, आने तों आंय आजी बी जाणावतो रेहें। आंय एंहकींअ ईयाअ खातुर केअहें का, जेंहकींअ तुं मांअपेअ माया राखोह तेंहकींअ ते बी बीहराहांपेअ माया राखे, आने आंय मांअ आत्माअ मारफोते तीयाहांअ मोनाहांम जीवुं।”