16
1 ईसुंय आमनेंह आखांअ चालु राख्यों: “मांहेंअ तुमनेंह दुखें पाळे तांहांअ बी तुमां मांअपेर्योअ तुमांअ वीसवास नांय सोळा तीयाअ खातुरुज, मांयुं ए बादया गोठ्या तुमनेंह आख्याह। 2 तें मांहेंअ तुमनेंह आपुअ भोकती मोंडोळाअ पोंगाहांम भोकती केरांअ नांय दीअ। उलटों, एंहडो सोमोय आवीअ का जांहांअ मांहेंअ तुमनेंह माय टाकीअ आने एंहकींअ धारीअ का, तुमनेंह माय टाकीन तीयाहां खोरेखोर पोरमेहेराअ सेवाज केअयीह। 3 तें एंहडों ईयाअ खातुर कीअ का, आंय होकीकोतुम केडो हाय तों तीयाहां कोय वोखत बी नांह जांअयों, आने नांह ता तीयाहां मांअ पोरमेहेर बाहको केडो हाय तों जांअयों। 4 मांयुं ए बादया गोठ्या तुमनेंह आमी ईयाअ खातुर आख्याह का, तें तुमनेंह दुखें पाळे तांहांअ, तुमां फोम केरा का, मांयुं ईयु गोठीहींकींअ तुमनेंह चेतवुअला। पेअली वोखत तुमां मांअरी आवांअ चालु केअयों तांहांअ, मांयुं ए बादया गोठ्या तुमनेंह नांह आख्या। काहाका, तांहांअ आंय तुमांअरीज आथो, आने तें मांनुंज दुखें पाळत्लें, तुमनेंह नांय।
पोवीतोर आत्मा कीअ तें कामें
5 आमी आंय मांन मोकलुअनारा पोरमेहेर बाहकाअहीं फाचो जानारो हाय। पेन मांन दुख लागेह का, तुमाहांमेनेअ केडों बी मांन एंहकींअ नांह फुचतों का, ‘तुं कांहीं जाहो?’ 6 उलटों, मांयुं ए गोठ्या तुमनेंह आख्याह तीयाअ लीदे तुमां खुब दुखी वीअ गीयाह। 7 पेन होकीकोत ता ए हाय का, आंय जातो रीहुं तों तुमांअ खातुर हारों हाय। काहाका, आंय जातो नांय र्युंव ता, तुमनेंह उफ देनारो पोवीतोर आत्मा तुमांअहीं नांय आवे। पेन आंय जाहें तांहांअ, तीयाल तुमांअहीं मोकली देहें। 8 तो आवीअ तांहांअ तो साबीत कीअ देखावीअ का, जे पोरमेहेराअ लोक नांह ते, पापाअ बाबोताम, आने ‘केडों होकीकोतुम खेरों हाय’ तीया बाबोताम आने ‘पोरमेहेर केडाअ नीयाय कीअ’ तीया बाबोताम जों मानताह तों खोटों हाय। 9 तो लोकाहांन आखीअ, तीयाहांअ मोडांम-मोडो पाप ता ओ हाय का, ते मांन नांह मानता। 10 तो मांअ बाबोताम लोकाहांन आखीअ, होकीकोतुम जो हाचो हाय तो ता आंयज हाय। काहाका, आंय मांअ पोरमेहेर बाहकाअहीं फाचो जाहुं आने तुमां मांन हीअहा नांय। 11 तो लोकाहांन आखीअ, ईयु दुन्याअ लोकाहांपेअ राज केअनारा सेतानाल सीक्सा केरांअ पोरमेहेरांय एगुहवार्योंअ नोक्की कीअ लेदोंह; ईयापनेअ ईं देखाय आवेह का, एक दीह तो तीया लोकाहांन बी सीक्सा कीअ।
12 तुमनेंह आखांअ खातुर मांअपेअ आजी खुब गोठ्या हाय। पेन ते आमी तुमां मानी नांह सेकता। 13 पेन पोरमेहेराअ बाबोताअ हाचाय तुमनेंह हीकवुअनारो ता पोवीतोर आत्माज हाय। तो आवीअ तांहांअ, तो तुमनेंह बादी आत्मीक हाचाय होमजांअ दोरवोणी दीअ। तो सोताअ आदीकाराकींअ तुमनेंह काय बी गोठ नांय आखे। उलटों तो ता, मांअ पोरमेहेर बाहकापेनेअ तो जे गोठ्या उनाअहे, तेज तुमनेंह आखीअ। आने फाचलांअ नेअ जे बोनाव बोंणनारा हाय तीयाहांअ बाबोताम बी तो तुमनेंह आखीअ। 14 तो मांयुं आखली गोठ लीईन ते तुमनेंह जाणावीअ, आने एंहकींअ कीईन तो मांन मान दीअ। 15 मांअ पोरमेहेर बाहकापेअ जों काय हाय तों बादों मांअज हाय। तीयाअ लीदेज मांयुं तुमनेंह आखलों, पोवीतोर आत्मा, मांयुं आखली गोठ लीईन, ते तुमनेंह जाणावी सेकेह।
दुख आने खुसी
16 थोळाक वोखताम आंय तुमनेंह सोळीन जातो रेहें, आने तुमां मांन नांय हीअहा। आने थोळाक वोखत हातींअ तुमां फाचा मांन हीअहा।” 17 तांहांअ ईसुअ ते गोठ उनायन आमांअमेर्याअ थोळाक एक बीहराल आखांअ टेक्या का, “‘थोळाक वोखत हातींअ तुमां मांन नांय हीअहा’ आने ‘थोळाक वोखत हातींअ तुमां फाचा मांन हीअहा’ एंहकींअ तो आखेह तीयाअ काय ओर्थो वीअ? आने ‘आंय मांअ पोरमेहेर बाहकाअहीं फाचो जाहुं’ एंहकींअ बी तो आखेह तीयाअ काय ओर्थो वीअ?” 18 आमां एक बीहराल आख्याज केअत्ला का, “‘थोळाक वोखत हातींअ’ एंहकींअ तो आखेह तीयाअ काय ओर्थो वीअ? तो केंहडाअ बाबोताम आखेह तों आपनेंह नांह होमजाअतों।”
19 आमां ईयु बाबोताम फुचांअ मागताह तों ईसु जांय गीयो। मोंजे तीयांय आमनेंह आख्यों, “‘थोळाक वोखत हातींअ तुमां मांन नांय हीअहा आने थोळाक वोखत हातींअ तुमां फाचा मांन हीअहा’ एंहकींअ मांयुं तुमनेंह आख्यों तीयाअ ओर्थो काय वीअ तों तुमां एक-बीहराल फुचताहकने? 20 आंय तुमनेंह नोक्कीज आखुंह: तुमनेंह सोळीन आंय जातो रेहें तांहांअ जें पोरमेहेराअ वीरुद केअनारें हाय तें खुस वीअ, पेन तुमां दुखी वीअहा। पेन फाचलांअ नेअ तुमां दुखी वेरांअ सोळीन खुसीम आवी जाहा। 21 बायाअ सुटी वेरांअ वोखत आवेह तांहांअ तीयुल दुख वेअहे, काहाका, तो दुखावो वेरांअ सोमोयुज हाय। पेन तीयुअ पोयरो जोन्मेह तांहांअ, ते तीयुअ दुखुल वीहराय जाहे। काहाका, तीयुअ पोयरो जोनम्योह तीयाअ लीदे ते खुब खुस हाय। 22 तेंहकींअज कीईन, आमी आंय मोय जाहें तांहांअ तुमां दुखी वीअहा। पेन हातींअ, आंय फाचो तुमनेंह मीलेंह तांहांअ, तुमां खुब खुस वीअहा। आने तेंहकींअ खुस वेअता तुमनेंह केडों बी रोकी नांय सेकीअ। 23 तों बोंणीअ तांहांअ, तुमां मांन काय बी सोवाल नांय फुचाह। आंय तुमनेंह नोक्कीज आखुंह: तों बोंणीअ हातींअ, तुमां मांअ चेला हाय तीयाअ लीदे, तुमां मांअ पोरमेहेर बाहकापेअ जोंबी मागाह, तों तुमनेंह तो दीअ। 24 तुमां मांअ चेला हाय तीयाअ आदारे आमी लोगुंअ तुमां पोरमेहेरापेअ काय बी नांह माग्यों। पेन आमी तीयापेअ वोस्तु मागा। जो तुमां तेंहकींअ कीअहा ता, ते वोस्तु तुमनेंह मीलीअ, आने हातींअ तुमां पुरी रीते खुस वीअहा।
ईसुंय तीयाल नांय माननारा लोकाहांन हारवी देदाह
25 आमी लोगुंअ मांयुं तुमांअरी दाखलाहांकींअज गोठ्या केअयाह। पेन एंहडो सोमोय माहरीज आवीअ का, जांहांअ आंय तुमांअरी मांअ पोरमेहेर बाहकाअ बाबोताम दाखलाहांकींअ नांय, पेन सीदोंज आखेंह। 26 तांहांअ, तुमां मांअ चेला हाय तीयाअ लीदे, तुमां पोरमेहेर बाहकापेअ मागाह; आने आंय तुमनेंह आखुंह, तुमां पोरमेहेर बाहकापेअ वोस्तु मागाह ते दांअ तीयाल मांअ आखांअ जोरुल नांय रीअ। 27 मांअ पोरमेहेर बाहको सोतेज तुमाहांपेअ माया राखेह। काहाका, तुमां मांअपेअ माया राखीह आने एंहकींअ मान्योंह का आंय पोरमेहेराअहींनेअज आलोह। मोंजे, तुमां सोतेज तीयापेअ मागा एंहडी तीयाअ मोर्जी हाय। 28 आंय मांअ पोरमेहेर बाहकाअहींनेअज ईयु दुन्याम आलोह। आमी आंय ए दुन्या सोळीन फाचो मांअ पोरमेहेर बाहकाअहीं जानारो हाय।”
29 तांहांअ आमां तीयाअ चेलाहां तीयाल आख्यों, “आमी तुं दाखलाहांअ रुपाम नांय, पेन सीदोंज आखोह। 30 आमनेंह आमी खोबुर पोळी गीयीह का, तुं बादोंज जांअहो। आने केडों तुल केल्ली बी बाबोताम सावाल फुचे तीयाअ जोरुल नांह। काहाका, आमां तुल काय फुचांअ मागताह तों तुं आमां फुचजी तीयाअ पेअलांअ जांय जाहो। तीयापेनेअ बी आमनेंह मान्याम आवेह का, तुं पोरमेहेराअहींनेअ आलोह।”
31 तांहांअ ईसुंय आमनेंह जोवाब देदो, “आंय पोरमेहेराअहींनेअ आलोह एंहकींअ आमी तुमनेंह मान्याम आवेह। 32 पेन उनाअजा! एंहडो सोमोय आवी रीयोह आने आज-काल आवीज बी गीयोह का जांहांअ तुमां बादा नाही पोळाह! तुमाहांमेर्योअ एका-एक जांअ सोत-सोताअ कोअ नाही पोळाह। तुमां मांन एखलोज सोळी दीहा। तेबी तांहांअ होकीकोतुम आंय एखलो नांय वेअहें। काहाका मांअ पोरमेहेर बाहको कायोम मांअरी हाय। 33 मांयुं तुमनेंह ए गोठ्या ईयाअ लीदे आख्याह का, मांअरी तुमां जोळाअला हाय तीयाअ लीदे तुमांअ मोनाहांम सांती वेअ। ईयु दुन्याम तुमां हाय तांहांअ तुमनेंह दुखें पोळीअज। पेन तुमां हींमोत राखजा! काहाका, मांअ वीरुद केअनारा तीया लोकाहांन मांयुं हारवी देदाह, आने तुमां बी तीयाहांन हारवी सेकाह।”