15
ईसु हारा दाराख्साअ वेलाअ होच हाय
1 आमां वाटे जाहला तांहांअ ईसुंय आमांअरी गोठ्या केअया। पोरमेहेराअ मोर्जी पोरमाणे आमांअ जीवांअ जोरुलुअ बाबोताम दाखलाअ रुपाम गोठ्या केअता तीयांय आख्यों, “आंय ता खेरा दाराख्साअ वेलाअ होच हाय। * मांअ पोरमेहेर बाहको दाराख्साअ वाळीम काम केअनाराअ होच हाय। * 2 जीयु डालखींअ दाराखसें नांह लागतें, तीयु डालखींहन जेंहकींअ वाळीम काम केअनारो वाडी टाकेह, तेंहकींअ मांअ पोरमेहेर बाहको, जें सोताल मांअ हाय एंहकींअ आखीन बी पोरमेहेराल राजी नांह राखतें तीयाहांन, काडी थोवेह। जीयु डालखींअ दाराखसें लागतेंह, तीयु डालखींअ वादारे दाराखसें लागे तीयाअ खातुर जेंहकींअ वाळीम काम केअनारो तीयुहुंन होरेह, तेंहकींअ मांअ पोरमेहेर बाहको, जें तीयाल राजी राखतेंह तीयाहांन, तें तीयाल वादारे राजी राखे तीयाअ खातुर वारेह। 3 वाळीम काम केअनारो होरी टाकेह तेंहडी डालखींअ होच तुमां ता एगुहवार्येंअ हाय। काहाका, मांयुं तुमनेंह जे गोठ्या आख्याह ते तुमां मान्याह। 4 तुमां मांअरी जोळाअला रा! तांहांअ आंय बी तुमांअरी जोळाअलो रेहें। दाराख्साअ वेलाअ डालखी वेलाअरी जोळाअली नांय रे ता, ते फोलवें नांह दीअ सेकती। तीयुअ फोलवें आवांअ खातुर ते वेलाअरी जोळाअली रांअ जोजे। तेंहकींअज कीईन, तुमां मांअरी जोळाअला नांय रा ता, पोरमेहेराल राजी राखे एंहडी रीते तुमां जीवी नांय सेकाह।
5 आंय दाराख्साअ वेलाअ होच हाय। * तुमां डालखींअ होच हाय। * जें मांहेंअ मांअरी जोळाअलें रेतेंह आने आंय तीयाहांअरी जोळाअलो रीहुं, तें, वादारे फोलवें लागतेंह तीयु डालखींअ होच, पोरमेहेराल राजी राखे एंहडें कामें वादारे कीअ। ईत केरा: मांअ मोदोतु वोगुर तुमां खोरेखोर पोरमेहेराल राजी राखे एंहडों काय बी नांय कीअ सेकाह। 6 पेन जेंबी मांअरी जोळाअलें नांह रेतें, तीयाहांन ता, जेंहकींअ वाळीम काम केअनारो नोक्कामी डालखींहन वाडीन फेकी देहे तेंहकींअ, पोरमेहेर काडी थोवीअ। वाडीन फेकी टाकल्या डालख्या हुकाय जात्याह तांहांअ केडों बी तीयुहुंन वीसीन आगीम टाकीन सीलगावी देहे। 7 जो तुमां मांअरी जोळाअला रा आने मांअ गोठी पोरमाणे चाला ता, तुमांअ मोर्जी वेअ तों तुमां पोरमेहेरापेअ मागी सेकाह, आने तो तुमनेंह तों दीअ। 8 मांअ पोरमेहेर बाहकाल राजी राखे एंहडें कामें वादारे कीअनुंज तुमां तीयाल मान दीअ सेकताह। आने एंहकींअ कीअनुंज तुमां देखावी सेकाह का तुमां मांअ चेला हाय।
9 जेंहकींअ मांअ पोरमेहेर बाहकांय मांअपेअ माया राखीह, तेंहकींअज मांयुं बी तुमाहांपेअ माया राखीह। मोंजे, जींयांहपेअ आंय माया राखुंह एंहडा लोकाहांन सोबे तेंहडों जीवोन जीवा। 10 जेंहकींअ मांयुं मांअ पोरमेहेर बाहकाअ हुकोम पाल्याह आने जीयापेअ तो माया राखेह एंहडा मांहांअल सोबे तेंहडों जीवोन जीवुंह तेंहकींअज, जो तुमां मांअ हुकोम पालाह ता, जींयांहपेअ आंय माया राखुंह एंहडा लोकाहांन सोबे तेंहडों जीवोन तुमां बी जीवाह। 11 जेंहकींअ आंय खुस हाय तेंहकींअ तुमां बी खुस रा, आने तुमां पुरी रीते खुस रा तीयाअ खातुर, मांयुं ए गोठ्या तुमनेंह आख्याह। 12 आंय तुमनेंह जो हुकोम कीअहुं तो ओ हाय: जेंहकींअ मांयुं तुमाहांपेअ माया राखीह तेंहकींअ तुमां बी एक-बीहरापेअ माया राखा। 13 केडापेअ बी एक मांहुंअ माया राखतों वीअ ता, तों तीयाअ खातुर सोताअ जीव दे तेज, ते माया देखावांअ हाराम हारी रीत हाय। ईयाअ केअता बीहरी केल्ली बी हारी रीत नांह। 14 मांयुं तुमनेंह देदला हुकोम जो तुमां पालाह ता, तीयाकींअ तुमां देखावाह का तुमां मांअ दोस्दार हाय। 15 आमीनेअ आंय तुमनेंह मांअ चाकोर नांय आखुं, काहाका, चाकोर तीयाहांअ सेट तीयाहांन जें कामें केरावेह तें काहाल केरावेह, तों नांह जांअता। पेन उलटों, आंय ता तुमनेंह मांअ दोस्दार आखुंह, काहाका, मांअ पोरमेहेर बाहकांय मांन जेबी गोठ्या आख्याह ते बादया मांयुं तुमनेंह जाणावी देदयाह। 16 मांअ चेला बोंणांअ तुमां नांह नोक्की केअयों। * उलटों, मांयुंज तुमनेंह पोसोंद केअयाह, ईयाअ खातुर का तुमां मांअ पोरमेहेर बाहकाल राजी राखे एंहडें खुब कामें केरा। तुमां जों कीअहा तीयाअ पोरीणाम कायोमाअ खातुर रीअ। मांयुं तुमनेंह ईयाअ लीदे बी पोसोंद केअयाह का, तुमां मांअ चेला हाय तीयाअ लीदे जोंबी केरांअ तुमां मांअ पोरमेहेर बाहकापेअ मागाह, तों तुमांअ खातुर तो केअ।
17 मांयुं तुमनेंह जो हुकोम देदोह तो आंय फाचो आखुंह: तुमां एक-बीहरापेअ माया राखा।
पोरमेहेराअ वीरुद केअनारा लोक ईसुअ चेलाहांन बी नोफरोत केअताह
18 पोरमेहेराअ वीरुद केअनारें मांहेंअ तुमनेंह नोफरोत केअतेंह तांहांअ ईत राखजा का, तुमनेंह नोफरोत केअता पेअलांअ तीयाहां मांनुज नोफरोत केअयीह। 19 जो तुमां बी पोरमेहेराअ वीरुद केअनाराहांमेर्याअ वेअता ता, तें तुमनेंह सोताअ आर्याअ गोंईन तुमाहांपेअ माया राखतें। पेन तुमां ता पोरमेहेराअ वीरुद केअनाराहांमेर्याअ नांह। उलटों, मांयुं तुमनेंह ईयाअ खातुर पोसोंद केअयाह का, तुमां पोरमेहेराअ वीरुद केअनारा तीया लोकाहांमेनेअ ओलोग पोळा। ईयाज कारोणे, पोरमेहेराअ वीरुद केअनारें तें तुमनेंह नोफरोत केअतेंह। 20 ‘केल्लो बी चाकोर तीयाअ सेटु केअता मोडो नांह’ एंहकींअ मांयुं पेअलांअ तुमनेंह जों आखलों, तों तुमां ईत केरा! ईयाअ ओर्थो ओ हाय का, तुमां मांअ चाकोर एंहडी आस्या नांह राखी सेकता का, मांहेंअ मांअरी जीयु रीते वोरतुअतेंह तीयाअ केअता हारकींअ तें तुमांअरी वोरतीअ। मोंजे, जेंहकींअ तीयाहां मांन दुखें पाळ्येंह, तेंहकींअ तें तुमनेंह बी दुखें पाळीअज। जो तीयाहां मांयुं तीयाहांन हीकवुअली गोठींहपेअ धीयान देदों वीअ ता, तुमां तीयाहांन जों हीकवुअताह तीयापेअ बी ते धीयान देता। 21 पेन तुमां मांअ चेला हाय तीयाअ लीदे, आने तें मांन मोकलुअनारा पोरमेहेर बाहकाल नांह ओअखुअतें तीयाअ लीदे, तें तुमांअरी ईयु रीतेज वोरतीअ। 22 जो आंय ईयु दुन्याम आवीन तीयाहांन पोरमेहेराअ बाबोताअ हाचाय नांय आखतो ता, तें मांन आने मांअ गोठील नोफरोत केरांअ बाबोताम गुनालें नांय बोंणतें। पेन आमी आंय आलोह आने मांयुं तीयाहांन पोरमेहेराअ बाबोताअ हाचाय आखीह। तीयाअ लीदे, पोरमेहेर तीयाहांअ पापाहांअ खातुर तीयाहांअ नीयाय कीअ तांहांअ तें काय बी बानो नांह काडी सेकतें। 23 जेंबी मांहेंअ मांन नोफरोत केअतेंह, तें जाणेका मांअ पोरमेहेर बाहकाल बी नोफरोत केअतें वीअ तेंहडों हाय। 24 जोबी हरा केल्ला बी मांहांय नांय केअया वीअ तेंहडा चोमोत्कार मांयुं तीयाहांअ आगलांअ नांय केअया वीअ ता, तें मांन दुर केरांअ पापाअ बाबोताम गुनालें नांय बोंणतें। पेन आमी तीयाहां मांयुं केअला ते चोमोत्कार देख्याह तेबी, तीयाहां मांन आने मांअ पोरमेहेर बाहकाल नोफरोत केअयीह। 25 पेन ईं बादों ता, तीयाहांअ पोवीतोर लेखाणाहांम जों लेख्योंह तों खेरों पोळे तीयाअ खातुर, एंहडों बोंण्योंह। तींहमें एंहकींअ लेख्योंह का, ‘तीयाहां काय बी कारोणा वोगुर मांअ नोफरोत केअयीह।’
26 फाचलांअ नेअ आंय मांअ पोरमेहेर बाहकाअहींनेअ तुमनेंह उफ देनाराल तुमांअहीं मोकली देहें। तो ता पोरमेहेराअ बाबोताअ हाचाय तुमनेंह हीकवुअनारो पोवीतोर आत्मा हाय। तो मांअ पोरमेहेर बाहकाअहींनेअ आवीअ, आने लोकाहांन मांअ बाबोताम आखीअ। 27 पेन तुमांअ-मांअ चेलाहांअ बी, मांअ बाबोताम लोकाहांन आखांअ जोजे। काहाका, मांयुं मांअ सेवा चालु केअयीह तेहेअनेअज तुमां मांअरीज रीयाह।”