14
पोरमेहेर बाहकाअहीं लोकाहांन पोचवुअनारो ईसु हाय
1 ईसुंय आजी आमनेंह आख्यों, “तुमां तुमांअ मोनाहांम कीदराअता मां! पोरमेहेरापेअ वीसवास राखता रेजा! तेंहकींअज कीईन मांअपेअ बी वीसवास राखता रेजा! 2 मांअ पोरमेहेर बाहको रेहे तींहीं होरगाम, मांहेंअ रीअ सेके एंहडा खुब जागा हाय। तींहीं जागा नांय वेअता ता आंय तुमनेंह आखतो। आंय तुमांअ खातुर जागा रोकांअ * तींहीं जानारो हाय। 3 आंय तींहीं जायन तुमांअ खातुर जागा रोकीन * आंय फाचो आवेंह, आने तुमां मांअरी वेरा तीयाअ खातुर आंय तुमनेंह लीअ जाहें। 4 आंय जींहीं जाहुं तींहीं जांअ वाट तुमनेंह खोबुर हाय।”
5 तांहांअ थोमांह तीयाल आख्यों, “मालीख, तुं कांहीं जाहो तोंज आमनेंह नांह खोबुर। तांहांअ तींहीं जांअ वाट आमनेंह केंहकींअ खोबुर वीअ?” 6 तांहांअ ईसुंय तीयाल आख्यों, “मांअ पोरमेहेर बाहको रेहे तींहीं जांअ वाट आंयज हाय। लोकाहांन पोरमेहेराअ बाबोताअ हाचाय जाहेर केअनारो बी आंयज हाय, आने तीयाहांन आत्मीक रीते कायोमाअ खातुर जीवावनारो बी आंयज हाय। * मांअ पोरमेहेर बाहकाअहीं जांअ तुमनेंह मोदोत कीअ सेकनारो आंय एखलोज हाय। बीहरो केडो बी नांह। * 7 आंय खोरेखोर केडो हाय तों तुमां जांय गीयाह तीयाअ लीदे, तुमां मांअ पोरमेहेर बाहकाल बी ओअखाह। आमीनेअ तुमां तीयाल ओअखुअताह आने तों जाणेका तीयाल तुमां देख्यो वीअ तेंहडों हाय।”
8 तांहांअ फीलीपुंह तीयाल आख्यों, “मालीख, आमनेंह तोअ पोरमेहेर बाहको ओतोअज देखावी दे! तोतोंअज आमांअ खातुर पुरतों हाय!” 9 तांहांअ ईसुंय तीयाल आख्यों, “ओतोअ लांबो सोमोय आंय तुमांअरी रीयोह; तेबी फीलीप, आंय होकीकोतुम केडो हाय तों तुं काहाल नांह जांअतो? जीयाहां मांन देख्योह तीयाहां जाणेका मांअ पोरमेहेर बाहकाल देख्यो वीअ तेंहडों हाय। तांहांअ तुं एंहकींअ काहाल आखोह का ‘आमनेंह तोअ पोरमेहेर बाहको देखाव?’ 10 तोअ नोक्कीज वीसवास केरांअ जोजे का, आंय मांअ पोरमेहेर बाहकाअरी बोराबोर जोळाअलो हाय, ने मांअ पोरमेहेर बाहको बी मांअरी बोराबोर जोळाअलो हाय।” हातींअ ईसुंय आमनेंह बादाहांन आख्यों, “जे गोठ्या आंय तुमनेंह आखुंह ते खाली मांअ सोताअ नांह; मांअरी बोराबोर जोळाअलो मांअ पोरमेहेर बाहकोज, बोद दांअ आने जे चोमोत्कार तो मांअपेअ केरावांअ मागेह ते केरांअ, मांन मोदोत केअहे। 11 आंय मांअ पोरमेहेर बाहकाअरी बोराबोर जोळाअलो हाय आने मांअ पोरमेहेर बाहको मांअरी बोराबोर जोळाअलो हाय तों माना! मांअ आखल्यापेअ जो तुमां तों नांय मानता ता काय नांय, पेन मांयुं जे चोमोत्कार केअयाह, तीयाहांपेनेअ ता तों माना। 12 आंय तुमनेंह नोक्कीज आखुंह: जेंहडा चोमोत्कार मांयुं केअयाह, तेंहडा चोमोत्कार तुमाहांमेनेअ जोंबी मांअपेअ वीसवास राखेह तों बी कीअ। मांअ पोरमेहेर बाहकाअहीं जायन हातींअ, आंय तुमांअहीं पोवीतोर आत्मा मोकलेंह तीयाअ लीदे, मांयुं केअला चोमोत्कारुंअ केअता बी मोडा चोमोत्कार तुमां कीअ सेकाह। 13 तुमां मांअ चेला हाय तीयाअ लीदे जों काय बी केरांअ तुमां मांअपेअ मागा, तों आंय तुमांअ खातुर केअहें।, ईयाअ खातुर का, मांअ पोरमेहेर बाहको कोतोअ मोडो हाय तों, पोयरो, मोंजे आंय तुमनेंह देखावी सेकुं। 14 आंह, तुमां मांअ चेला हाय तीयाअ लीदे जों काय बी केरांअ तुमां मांअपेअ मागा, तों आंय तुमांअ खातुर केअहें।
ईसु तीयाअ चेलाहांअहीं पोवीतोर आत्मा मोकलांअ वोचोन देहे
15 जो तुमां मांअपेअ माया राखता वीअ ता, जों केरांअ मांयुं तुमनेंह हुकोम केअयोह, तों तुमां कीअहा। 16 तांहांअ आंय सोते मांअ पोरमेहेर बाहकाल कालावाला केअहें। आने तो एक बीहरा जांअहांल तुमांअहीं मोकलीअ, जो आवीन तुमनेंह उफ दीअ। 17 तो ता पोरमेहेराअ बाबोताअ हाचाय तुमनेंह जाहेर केअनारो पोवीतोर आत्मा हाय। तो कायोम तुमांअरीज रीअ। पोरमेहेराअ वीरुद केअनारें मांहेंअ, तीया आत्माल मीलवी नांय सेके। काहाका, तो काय केअहे ने तो केडो हाय तों तें जांय नांह सेक्तें। पेन तो केडो हाय तों तुमां जांअताह। काहाका, तो तुमांअरीज हाय, आने तो तुमांअ मोनाहांम रीअ। 18 आंय तुमनेंह सोळीन जाहें तांहांअ, आंय तुमनेंह एखला नांय सोळुं। जांहांअ आंय पोवीतोर आत्माल मोकलेंह, तों ता जाणेका, आंय जातेज फाचो तुमांअहीं आवतो वीअ एंहडों वीअ। 19 टुक सोमोयाम एंहडों बोंणीअ का, जें मांहेंअ पोरमेहेराअ नांह, तें फाचें मांन नांय देखे। पेन पोवीतोर आत्मा तुमांअहीं आवीअ तांहांअ, जाणेका, तुमां मांन फाचा हेअता वीअ एंहडों वीअ। आंय फाचो जीवतो वेअहें तीयाअ लीदे, तुमां बी आत्मीक रीते कायोमाअ खातुर जीवाह। 20 तांहांअ तुमां जांअहा का आंय मांअ पोरमेहेर बाहकाअरी बोराबोर जोळाअलो हाय। तुमां एंहकींअ बी जांअहा का, तुमां मांअरी बोराबोर जोळाअला रीहा, आने आंय बी तुमांअरी बोराबोर जोळाअलो रेहें। 21 मांअ हुकोम मानीन तीयाअ पोरमाणे चालनारेंज मांअपेअ माया राखनारें मांहेंअ हाय। जें मांअपेअ माया राखतेंह तीयाहांपेअ मांअ पोरमेहेर बाहको बी माया राखीअ। आंय बी तीयाहांपेअ माया राखेंह, आने आंय होकीकोतुम केडो हाय, तों आंय तीयाहांन जाणावेंह।”
22 तांहांअ येहुदा ईसुअरी गोग्यो। ओ ता केरीयोत गांवांअ येहुदा नांय आथो। तीयांय ईसुल फुच्यों, “मालीख, तुं होकीकोतुम केडो हाय तों आमनेंह ओतोअज जाहेर कीअहो ने जे लोक पोरमेहेराल नांह ओअखुअता तीयाहांन नांय जाहेर क्योव, एंहकींअ काहा?” 23 तांहांअ ईसुंय तीयाल जोवाब देदो, “जें मांहेंअ मांअपेअ माया राखतेंह, तें मांअ आखलों मानीअ। तीयाहांपेअ मांअ पोरमेहेर बाहको बी माया राखीअ। तीयाज मांहांहांअरी मांअ पोरमेहेर बाहको ने आंय आवीन रीहुं। 24 पेन जें मांहेंअ मांअपेअ माया नांह राखतें, तें मांअ आखलों बी नांय माने।
जे गोठ्या आंय तुमनेंह आखुंह ते मांअ ओत्याअज नांह। पेन ते मांन मोकलुअनारा मांअ पोरमेहेर बाहकाअ बी हाय।
25 आंय तुमांअरी हाय तांवज मांयुं ए बादया गोठ्या तुमनेंह आखी देदयाह। 26 पेन मांअ पोरमेहेर बाहको तुमांअहीं पोवीतोर आत्मा मोकली दीअ। तोज आत्मा तुमनेंह उफ दीअ। तो मांअ आदीकाराकींअ आवीअ। तो तुमनेंह पोरमेहेराअ बाबोताअ जे हाचाय तुमांअ जांणांअ जोरुल हाय, ते बादी हाचाय हीकवीअ। मांयुं तुमनेंह आख्याह ते बादया गोठ्या बी तो तुमनेंह ईत केरावीअ। 27 आंय तुमनेंह सांती दीईन जाहुं; मांअज सांती आंय तुमनेंह दीहुं। जेंहकींअ दुन्या देहे तेंहकींअ आंय तुमनेंह नांह देतो। तुमांअ मोनाहांम कीदराअता मां आने बीता मां!
28 ‘आंय जातो रीहुं पेन फाचो आंय तुमांअहीं आवेंह’ एंहकींअ मांयुं तुमनेंह आखलों तों तुमां उनाअयाह। जो तुमां मांअपेअ माया राखी वीअ ता, आंय मांअ पोरमेहेर बाहकाअहीं फाचो जाहुं तीयाअ तुमनेंह खुसी वीअ। काहाका तो मांअ केअता मोडो हाय। आने तींहीं तो मांन मान दीअ, आने तुमांअहीं पोवीतोर आत्माल मोकली दीअ। 29 ए बादया गोठ्या बोंणे तीयाअ पेअलांअज आमी मांयुं तुमनेंह ते आखी देदयाह, ईयाअ खातुर का, ते बादया बोंणे तांहांअ तुमनेंह खातरी वीअ का, जोंबी मांयुं तुमनेंह आखलों तों खेरोंज हाय। 30 आमी आंय वादारे सोमोय तुमांअरी गोठ्या नांह कीअ सेक्नारो। काहाका, मांन जो तेरावनारो हाय, तो जाणेका, ईयु दुन्याअ खुब लोकाहांपेअ राज केअनारो सेतान मांअपेअ हुमलो केरांअ आवतो वीअ एंहडों वीअ। पेन मांन जों वेअनारों हाय तीयापेअ तीयाअ काय बी आदीकार नांह। 31 तेबी मांन जो वेअनारों हाय तीयापेनेअ, पोरमेहेराल नांय ओअखुअनारा लोकाहांअ हीकांअ जोजे का, आंय मांअ पोरमेहेर बाहकापेअ माया राखुंह, आने तीयांय जों केरांअ मांन हुकोम केअयोह तोंज आंय कीअहुं। चाला, आपुंह उठजी ने ईंहींनेअ जाजी!”