13
ईसु तीयाअ चेलाहांअ पाग तुवेह
1 पास्का तेहवाराअ आगला दीहाअ वाअतों पोळ्यों। तांहांअ ईसु जांय गीयो का, ए दुन्या सोळीन फाचे होरगामेर्याअ तीयाअ पोरमेहेर बाहकाअहीं जांअ तीयाअ वोखत आवी गीयोह। तीयांय ईयु दुन्यामेर्याअ तीयाअ खास दोस्दार आमाहांपेअ कायोम माया राखली। तीयाल खोबुर आथी का, आमां आजी ईयु दुन्याम जीवता रेनारा हाय। तीयाअ लीदे, तो आमाहांपेअ कोतीअ माया राखत्लो तों आमी तीयांय आमनेंह पुरी रीते देखाव्यों। 2 आमां पास्काअ मांडो खाहला। केरीयोत गांवांअ सीमोनुअ पोयरा येहुदाल सेतानांय पेअलांअज एंहडी सालाह देदली का तो ईसुल तेरावी दे। 3 पेन ईसु जांअत्लो का तीयाअ पोरमेहेर बाहकांय तीयाल ईया बादा सोंजोगुंहन आथाम राखांअ आदीकार देदोह। तो ईं बी जांअत्लो का तो पोरमेहेराअहींनेअ आलोह आने माहरीज तीयाअहीं फाचो जानारो हाय। 4 पेन तेंहकींअ जाता पेअलांअ तो आमनेंह देखावांअ मागत्लो का, आमांअ एक-बीहरापेअ केंहकींअ माया राखांअ जोजे। तीयाअ लीदे, तो खाहलो तींहींनेअ उठ्यो, आने तीयांय सोताअ उपर्योंअ पोतळों काडी लेदों, आने एक मोडी रुंबाल सोताअ कोंबराअरी वेटाली लेदी। 5 हातींअ तीयांय एक बासनाम पांय रीसव्यों, आने आमांअ पाग तुवांअ चालु केअयों। हातींअ तो सोताअ कोंबराअरी वेटालली रुंबालीकींअ ते पाग नुसांअ टेक्यो।
6 बादाहांअ पाग तुवतो-तुवतो तो सीमोन पीतोराअ पाग तुवांअ तीयाअहीं आलो। तांहांअ पीतोरांय तीयाल आख्यों, “मालीख, मांअ पाग तुवीन तुं सोताल नीचो पाळो तों बोराबोर नांह।” 7 तांहांअ ईसुंय तीयाल आख्यों, “आंय जों कीअहुं तीयाअ ओर्थो तुं आमी नांह होमजुअतो, पेन बागेनेअ होमजोह।” 8 तांहांअ पीतोरांय आख्यों, “आंय कीदीह बी तुल मांअ पाग तुवांअ नांय द्युंव।” तांहांअ ईसुंय तीयाल आख्यों, “जो आंय तोअ पाग नांय तुवुं ता, तुं मांअ चेलो नांय रीअ सेको।” 9 तांहांअ सीमोन पीतोरांय तीयाल आख्यों, “मालीख, एंहडों वीअ ता, मांअ पाग एखला नांय, पेन मांअ आथ आने मांअ मुनकों बी तुवजे!” 10 ईसुंय तीयाल आख्यों, “जों मांहुंअ उंग्योंह तीयाअ ता, फाचलांअ नेअ पाग ओताअज तुवांअ जोरुल रेहे। सोरीलाअ बीहरा भाग ता चोख्खाज रेताह। तुमां चोख्खा हाय। पेन तुमां बादा चोख्खा नांह।” 11 आमांहमनेअ केडो तीयाल तेरावी देनारो हाय तों ईसु जांअत्लो। तीयाअज लीदे तीयांय एंहकींअ आख्यों, “तुमां बादा चोख्खा नांह।”
12 आमांअ बादाहांअ पाग तुवी पारवाअयो हातींअ, ईसुंय तीयाअ उपर्योंअ पोतळों फाचों पोवी लेदों। आने हातींअ तो बोठो आने आमनेंह आख्यों, “मांयुं तुमांअ खातुर जों केअयों तों तुमनेंह होमजाअयों का? 13 तुमां मांन ‘गुरुजी’ आने ‘मालीख’ आखताह। तुमां तेंहकींअ आखताह तों बोराबोरुज हाय। काहाका, होकीकोतुमुज आंय तुमांअ ‘गुरु’ आने ‘मालीख’ हाय। 14 पेन आंय तुमांअ मालीख आने गुरुजी हाय तेबी मांयुं तुमांअ पाग तुव्या ता, तुमांअ बी एक-बीहराअ पाग तुवांअ जेंहडें कामें कीईन एक-बीहराअ सेवा केरांअ जोजे। * 15 मांयुं तुमांअ आगलांअ मांअ सोताअ नोमुनो देदो, ईयाअ खातुर का तुमां बी मांअ होच सोताल नीचा पाळीन एक-बीहराअ सेवा केरा। 16 आंय तुमनेंह नोक्कीज आखुंह: चाकोर तीयाअ मालीखु केअता मोडो नांह। आने खोबुर देनारो तीयाल मोकलुअनारा केअता मोडो नांह। मोंजे तुमां बी मांअ केअता मोडा नांह तीयाअ लीदे, ओभीमान राख्या वोगुर आने राजी वीईन तुमांअ एक-बीहराअ सेवा केरांअ जोजे। 17 ए बादया बाबोत्या आमी तुमां जांय गीयाह। मोंजे, जो तुमां तीयुहुंअ पोरमाणे कीअहा ता, पोरमेहेर तुमनेंह आसीरवाद दीअ।
18 पोरमेहेर तुमनेंह बादाहांन आसीरवाद दीअ एंहकींअ आंय नांह आखतो। मांयुं तुमनेंह पोसोंद केअला तांहांअ तुमां केंहडा आथा तों आंय जांअत्लोज। पेन मांन तेरावी देनाराल बी मांयुं पोसोंद केअलो, ईयाअ खातुर का पोवीतोर लेखाणाहांम जों लेख्योंह तों खेरों पोळे। तींहमें एंहकींअ लेख्योंह, ‘जो मांअ दोस्दार वीअ एंहडो ढोंग कीईन मांअरी बोहीन खाहे, तोज मांअ दुसमोन बोंण्योह।’
19 ‘एगोंह मांन तेरावी दीअ’ एंहकींअ आंय तो बोनाव बोंण्या पेअलांअज तुमनेंह आखी दीहुं, ईयाअ खातुर का, तो मांन तेरावी दीअ तांहांअ बी तुमां वीसवास केरा का आंयज ख्रीस्त हाय। 20 आंय तुमनेंह नोक्कीज आखुंह: मांयुं मोकलुअला तुमांअमेर्याअ एकाल जोंबी मानेह, तों जाणेका मांनुज मानतों वीअ तेंहडों हाय। आने जोंबी मांन मानेह, तों जाणेका मांन मोकलुअनारा मांअ पोरमेहेर बाहकाल मानतों वीअ एंहडों हाय।”
ईसु सोताल तीयाअ दुसमोनाहांअ आथाम तेरावी देनाराअ बाबोताम आखेह
(माथी २६:२०-२५; मार्क १४:१७-२१; लुक २२:२१-२३)
21 ए गोठ्या आखीन हातींअ ईसु सोताअ मोनु-मोनाम खुब दुखी वीयो, आने आमनेंह चेलाहांन आख्यों, “आंय तुमनेंह नोक्कीज आखुंह: तुमाहांमेर्योअ एक मांन तेरावी देनारो हाय।” 22 ईसु केडाअ बाबोताम आखेह तों आमां होमजी नांय सेक्या तीयाअ लीदे आमां एक-बीहराअहें हेरांअ टेक्या। 23 जीयाअ बाबोताम मांहेंअ आखतेंह का, ‘ईसुंय तीयापेअ माया राखली’, तो मोंजे आंय योहान, तांहांअ ईसुल टेकीनुंज बोठलो। 24 तांहांअ सीमोन पीतोरांय मांन ईसारो कीईन आख्यों, ईसु केडाअ बाबोताम एंहकींअ आखेह तों आंय तीयाल फुचुं। 25 तांहांअ मांयुं मांअ मुंय ईसुअ सातीअरी राखीन तीयाल फुच्यों, “मालीख, आमांअमेर्याअ केडाअ बाबोताम तुं एंहकींअ आखोह?” 26 तांहांअ ईसुंय मांन जोवाब देदो, “मांडाअ ओ कुटको ठालीमेर्याअ रोहाम बुडवीन हातींअ आंय जीयाल देहें, तोंज तों मांहुंअ हाय।” हातींअ, तीयांय मांडाअ कुटको ठालीमेर्याअ रोहाम बुडव्यो, ने हातींअ तो केरीयोत गांवांअ सीमोनुअ पोयरा येहुदाल देदो। 27 येहुदांय जेंहडो तीदीह कुटको खादो का तुरुतुज, सेतानांय तीयाल सोताअ काबाम लीअ लेदो। हातींअ ईसुंय येहुदाल आख्यों, “तुं जों केरांअ हाय, तों माहरी केअ!” 28 पेन ईसुंय तीयाल एंहकींअ काहाल आख्यों तों, तींहीं बोठलांहमेर्याअ आमांहमनेअ केडाल बी नांय होमजाअयों। 29 पोयसाहांअ कारभारो येहुदापेअ आथो तीयाअ लीदे, आमांअमेर्याअ थोळाकाहीं एंहकींअ धार्यों का, तेहवार वालांअ आमांअ जीयु वोस्ताहांअ जोरुल हाय ते वोस्तु वेचाअत्या लावांअ ईसुंय तीयाल आख्यों वीअ। थोळाकाहीं एंहकींअ धार्यों का, गोरीबाहांन थोळाक पोयसा दांअ ईसुंय तीयाल आख्यों वीअ। 30 येहुदांय तो मांडाअ कुटको जेंहडो खादो का तुरुतुज, तो तींहींनेअ नींगी गीयो। बारे आंदारों आथों।
नोवो हुकोम: एक-बीहरापेअ माया राखा!
31 येहुदा तींहींनेअ नींगी गीयो हातींअ ईसुंय आख्यों, “होरगामेनेअ आललो आंय कोतोअ मोडो हाय तों आमी मांअ पोरमेहेर बाहको देखावीअ। आने आंय जों कीअहुं तीयापेनेअ, पोरमेहेर कोतोअ मोडो हाय तों मांहेंअ हीअ। 32 आंय जों कीअहुं तीयापेनेअ, पोरमेहेर कोतोअ मोडो हाय तों, मांहेंअ हीअ तीयाअ लीदे, आंय कोतोअ मोडो हाय तों, पोरमेहेर सोतेज लोकाहांन देखावीअ। आने तो माहरीज तेंहकींअ कीअ।
33 मांअ मेराला पोयराहां, तुमांअरी आंय आजी थोळाज सोमोयाअ खातुर वेअहें। हातींअ तुमां मांन होदाह, पेन आंय ईंहीं नांय व्युंव। जेंहकींअ मांयुं येहुदी आगेवानाहांन आखलों तेंहकींअज आमी आंय तुमनेंह बी आखुंह: आंय जींहीं जाहुं तींहीं, आमी तांव तुमां आवी नांह सेकता। 34 आंय आमी तुमनेंह नोवो हुकोम दीहुं: तुमां एक-बीहरापेअ माया राखा! जेंहकींअ मांयुं तुमाहांपेअ माया राखीह तेंहकींअ तुमां बी एक-बीहरापेअ माया राखा! 35 जो तुमां एक बीहरापेअ माया राखता रा ता, तों हेअनारें बादें मांहेंअ जांय का तुमां मांअ चेला हाय।”
ईसु भोवीसवाणी केअहे का पीतोर तीयाल ओअखांअ ना पाळीअ
(माथी २६:३१-३५; मार्क १४:२७-३१; लुक २२:३१-३४)
36 तांहांअ सीमोन पीतोरांय ईसुल फुच्यों, “मालीख, तुं कांहीं जानारो हाय?” तांहांअ ईसुंय तीयाल जोवाब देदो, “आंय जींहीं जानारो हाय तींहीं तुं आमी मांअरी आवी नांह सेकतो, पेन तुं फाचलांअ नेअ आवी सेकोह।” 37 तांहांअ पीतोरांय फुच्यों, “मालीख, आंय आमी तोअरी काहा नांह आवी सेकतो? आंय ता तोअ खातुर मोरांअ बी तीयार हाय!” 38 तांहांअ ईसुंय जोवाब देदो, “तुं आखोह का तुं मांअ खातुर मोरांअ बी तीयार हाय। पेन ए गोठ बोराबोर उनाय ले: हाकाल बोळे वेगर्योंअ, कुकळो वाहता पेअलांअ, तुं तीन वोखत आखोह का तुं मांन नांह ओअखुअतो!”