10
ईसु हारा भारवाळाअ होच हाय
1 आजी ईसुंय तीयाहांन आख्यों का “आंय तुमनेंह जों आखुंह तों बोराबोर उनाय ला! * जोबी घेटाहांअ वाळाम बांअणाम राखीन वीहांअ बोदले वाळ कुदीन तींहमें वीहेह, तो चोर आने बांड हाय। 2 पेन जो घेटाहांअ वाळाम बांअणाम राखीन वीहेह, तोज तीया घेटाहांअ भारवाळ हाय। 3 बांअणाअहीं चोकी केअनारों मांहुंअ तीया भारवाळाअ खातुर बांअणों उगाळेह। आने तो भारवाळ बादा घेटाहांन तीयाहांअ नांवें लीईन हात केअहे; तांहांअ घेटें तीयाअ आवाज ओअखुतेंह। हातींअ तो तीयाहांन वाळामनेअ बारे लीअ जाहे। 4 सोताअ बादा घेटाहांन बारे लीअ आवीन हातींअ, तो तीयाहांअ आगलांअ-आगलांअ चालेह, आने घेटें बी तीयाअ फाचलां-फाचलांअ जातेंह। काहाका, तें तीयाअ आवाज ओअखुअतेंह। 5 पेन तें घेटें ओजाण्या मांहांअ फाचलांअ कीदीह बी नांय जाय। उलटों, तें तीयाअहींनेअ नाही जाय। काहाका, तें ओजाण्या मांहांअ आवाज नांह ओअखुअतें।”
6 ईसुंय, तीयाम ने फोरीसीहींम काय फेर हाय तों देखावांअ, तीयाहांन ओ दाखलो देदो। पेन ईसु तीयाहांन जों आखत्‍लो तों ते नांय होमज्या। 7 तीयाअ लीदे, तीयांय तीयाहांन फाचों आख्यों, “आंय तुमनेंह जों आखुंह तों बोराबोर उनाय ला! * आंयज, घेटें जींहीं पादरें वाळाम वीहतेंह, तीया बांअणाअ होच हाय। * 8 मांअ पेअलांअ तुमांअ जे धोरमाअ आगेवान आलला, ते बादा बांड आने लुटाराहांअ होच आथा। पेन, जेंहकींअ घेटें ओजाण्या मांहांअ आवाजु पोरमाणे नांह केअतें, तेंहकींअ पोरमेहेराअ लोकाहीं बी तीया आगेवानाहांअ गोठ नांह मानी। 9 आंय बांअणाअ होच हाय। * जें मांहेंअ मांअ मारफोते पोरमेहेराअहीं आवतेंह, तीयाहांन तो पापाअ सीक्सामेनेअ वाचावीअ। जेंहकींअ घेटें बांअणाम राखीन वाळाम आवतेंह आने चोरांअ खातुर सोलामोत रीते बारे जातेंह, तेंहकींअ आंय बी तीया मांहांहांअ जोरुल्या पुर्या पाळेंह आने तीयाहांन हाचवेंह। 10 बांड ता घेटाहांअ वाळाम घेटाहांअ चोरी केरांअ ने तीयाहांन माय टाकांअ ने तीयाहांअ नास केरांअज आवताह। पेन आंय ता ईयाअ खातुर आलोह का, मांहेंअ कायोमाअ खातुर जीवे आने तीयाहांन टीकवी राखांअ जोंबी जोरुल हाय तों बादों तीयाहांपेअ वेअ।
11 आंय हारा भारवाळाअ होच हाय। * हारो भारवाळ सोताअ घेटाहांन वाचावांअ खातुर मोरांअ बी राजी हाय। 12 घेटाहांअ देखरेख राखांअ खातुर जीयाल मोजरी दीईन राख्योह, तो घेटाहांअ मालीख नांह। तीयाअ लीदे तो, वाग आवतो देखीन घेटाहांन टाकी दीईन नाही पोळेह। हातींअ तो वाग टोलामेर्याअ घेटांहपेअ हुमलो केअहे आने एक घेटाल तीअ जाहे आने बीहरा घेटाहांन फुटकोर कीअ टाकेह। 13 तो चाकोर ता मोजरीअ पुरतोज हाय तीयाअ लीदे, तो नाही पोळेह। घेटाहांन काय बी वेअ तीयाअ तीयाल काय पोळली नांह रेती। 14-15 आंय हारा भारवाळाअ होच हाय। * जेंहकींअ हारो भारवाळ सोताअ घेटाहांन ओअखेह आने जेंहकींअ मांअ पोरमेहेर बाहको मांन ओअखेह, तेंहकींअ आंय मांअ लोकाहांन ओअखुंह। आने जेंहकींअ घेटें सोताअ भारवाळाल ओअखुअतेंह आने जेंहकींअ आंय मांअ पोरमेहेर बाहकाल ओअखुंह, तेंहकींअ मांअ लोक बी मांन ओअखुअताह। आंय मांअ लोकाहांअ खातुर भोगु तोरीके मांअ जीव दीहुं। 16 मांअ बीहरें बी मांहेंअ हाय। तें येहुदी जातीअ नांह। तें ता बीहरा वाळामेर्याअ घेटाहांअ होच हाय। मांअ तीयाहांन बी पोरमेहेराअहीं लीअ आवुलोंअ हाय। तें आंय जों आखेंह तों मानीअ आने सेल्‍ले, तें बादें एकुज टोलाअ होच बोंणी जाय आने आंय तीयाहांअ एकुज पालनारो-पोहनारो * बोंणेंह। 17 मांअ पोरमेहेर बाहको मांअपेअ माया राखेह तीयाअ कारोण ईं हाय का, आंय मांअ सोताअ जीव भोगु तोरीके देहें। पेन जीव दीईन हातींअ, आंय मोअलामेनेअ फाचो जीवतो उठेंह। 18 केडों बी मांअ जीव पाळावी नांह लेतों। आंय सोतेज राजी-खुसी मांअ जीव दीहुं। मांअ जीव दांअ बी मांन आदीकार हाय आने मोअलामेनेअ फाचो जीवतो वेरांअ बी मांन आदीकार हाय। मांअ पोरमेहेर बाहकांय एंहकींअज केरांअ मांन हुकोम केअयोह।”
19 ईसुअ ए गोठ्या उनायन, तींहीं आथा तीया येहुदी लोकाहांम फाचा भागला पोळी गीया। 20 तीयाहांमेर्याअ खुब लोकाहीं आख्यों, “तीयाल पुतळों लाग्योंह, आने तीया पुतळांह तीयाल गांडो बोंणावी देदोह। तीयाअ गोठ्या आपुअ उनायांअज काहाल जोजे?” 21 पेन बीहराहां आख्यों, “तो जों आखेह तेंहडों ता पुतळों लागलों मांहुंअ आखी सेके का? तीयांय आंदला मांहांअल देखतों केअयों तेंहडों ता पुतळों कीअ सेके का?”
येहुदी धोरमाअ आगेवान ईसुल धीक्कारताह
22 येहुदीहींअ आगलाअ डायाहां येरुसालेम मोंदीराअ बीहरी वोखत उटघाटोन केअलों तीयाअ ईयादगीरीअ उजवोणीअ तो सोमोय आथो। ते उजवोणी हीयालाम आवत्‍ली। 23 ईसु मोंदीराअ भागाम ‘सोलोमोनुअ पारसालों’ आखत्‍लें तीयु जागे फीरत्‍लो। 24 तांहांअ येहुदी धोरमाअ थोळाक वोळीलाहीं ईसुअ चारु वेल टोलवायन तीयाल फुच्यों, “तुं कांव लोगुंअ आमनेंह आंदाराम राखोह? तुं ख्रीस्त * वीअ ता, तों आमनेंह चोख्‍खों आखी दे!” 25 तांहांअ ईसुंय जोवाब देदो, “मांयुं ता तुमनेंह आखीज देदोंह, पेन तुमां तों नांय मान्‍यों। मांअ पोरमेहेर बाहकांय मांन देदला आदीकाराकींअ जे चोमोत्कार आंय कीअहुं तीयापेनेअ तेबी, आंय केडो हाय तों तुमां जांय सेकताह। 26 पेन तुमां मांअपेअ वीसवास नांह राखता। काहाका, तुमां मांअ लोक नांह। * 27 जेंहकींअ घेटें तीयाहांअ भारवाळाअ आवाज उनायन तीयाअ फाचलांअ चालतेंह, तेंहकींअ मांअ लोक मांअ आवाज उनायन मांअरी चालताह। आंय बी तीयाहांन ओअखुंह। 28 आंय तीयाहांन कायोमाअ खातुर जीवावेंह। आने ते कीदीह बी मांअ से ओलोग नांय पोळीअ। आने केडों बी तीयाहांन जोबोरजोस्ती मांअपेनेअ पाळावी नांय सेके। 29 मांअ पोरमेहेर बाहकांय जे लोक मांन देदाह, ते बीहरा बादा केअता वादारे कींमती हाय, मोंजे, केडों बी जोबोरजोस्ती तीयाहांन मांअपेनेअ पाळावी नांह सेकतों। 30 मांअ पोरमेहेर बाहको आने आंय बेनुं हारकाज हाय।”
31 एंहकींअ ईसुंय आख्यों तीयाअ लीदे, तीया येहुदी धोरमाअ आगेवानाहांन तीयापेअ रोग चोळी आने तीयाल ठोकीन माय टाकांअ तीयाहां फाचा ढोगळा वीस्या। 32 पेन ईसुंय तीयाहांन आख्यों, “मांअ पोरमेहेर बाहकांय मांन केरांअ आखलों तीयाअ पोरमाणे मांयुं तुमांअ आगलांअ खुब हारें कामें कीअ देखाव्येंह। तींहमेंनेअ केल्‍ला कामुअ लीदे तुमां मांन ढोगळाकींअ ठोकीन माय टाकांअ मागताह?” 33 तांहांअ तीया येहुदी धोरमाअ वोळीलाहीं तीयाल जोवाब देदो, “तुंयुं केअला हारा कामाहांअ लीदे आमां तुल माय टाकांअ नांह मागता। पेन उलटों, तुं एक मांहुंअज हाय तेबी, तुं सोताल पोरमेहेर आखावीन तीयाअ ओपमान कीअहो तीयाअ लीदेज आमां तुल माय टाकांअ मागताह।” 34 तांहांअ ईसुंय तीयाहांन जोवाब देदो, “पोरमेहेरांय सोते नीमला ओमोलदाराहांन तीयांय जों आखलों, तों तुमांअ नीयोमाहांअ चोपळीम एंहकींअ लेख्योंह का, ‘तुमां देव हाय एंहकींअ मांयुं आख्योंह।’ 35 पोरमेहेर तीया आगेवानाहांन नीमत्‍लो तांहांअ, तीयांय तीयाहांन एंहकींअ आख्यों। आने केडांय बी तीया बाबोताम वांदो नांह उठाव्‍यो। आने पोवीतोर लेखाणाहांमेरीअ कोय बी बाबोत केडों बी काडी टाकी नांह सेक्तों। आंय ता पुरी रीते मांअ पोरमेहेर बाहकाअ व्युंव तीयाअ खातुर तीयांय ओलोग केअलो जांअ हाय। तीयांयज मांन ईयु दुन्याम मोकल्योह। 36 तांहांअ ‘आंय पोरमेहेराअ पोयरो हाय’ एंहकींअ आखीन आंय पोरमेहेराअ हारकोज हाय एंहकींअ आखुंह तींहमें तुमनेंह मांअपेअ काहाल रोग चोळेह? 37 मांअ पोरमेहेर बाहकांय मांन केरांअ आखलें कामें जो आंय नांय केअतो ता, तुमां मांअपेअ वीसवास केरा एंहडी आस्या आंय नांय राखतो। 38 पेन आंय जों आखुंह तीयापेअ तुमां वीसवास नांय केरा तेबी, आंय जें कामें कीअहुं तीयाअ लीदे ता, मांअपेअ वीसवास केरा! जो तुमां एंहकींअ वीसवास कीअहा ता, तुमां नोक्कीज जांअहा का, मांअ पोरमेहेर बाहकाअ मांअरी खुब सोबोंद हाय आने मांअ तीयाअरी खुब सोबोंद हाय।”
39 ईसुअ गोठ उनायन तीयांय फाची तीयाल तेरांअ कोसीस केअयी। पेन तो तीयाहांअहींनेअ सोटकी गीयो।
40 हातींअ ईसु आमांअरी योरदान खाडीअ दीह उगताअ वेलीअ तोळी फाचो गीयो आने तींहीं थोळाक दीह रीयो। तीयुज जागे योहान पेअलांअ लोकाहांअ बापतीस्मा केअत्‍लो। 41 खुब मांहेंअ ईसुअहीं आवत्‍लें। तें आखत्‍लें, “योहानांय कोय बी वोखत चोमोत्कार नांह केअयो; पेन तीयांय ईया मांहांअ बाबोताम जों काय आखलों, तों बादों खेरोंज हाय!” 42 तींहीं आलला तींहमेंनेअ खुब लोकाहीं ईसुपेअ वीसवास केअयो।