9
जोन्मेदेखुंअ आंदलों आथों तीया मांहांअल ईसु देखतों केअहे
1 ईसु ने आमां तीयाअ चेला वाटे जाहला तांहांअ, तीयांय जोन्मेदेखुंअ आंदलों आथों एंहडों एक मांहांअल देख्यों। 2 तांहांअ आमां चेलाहां ईसुल फुच्यों, “गुरुजी, ईं मांहुंअ तीयाअ सोताअ पापाहांअ लीदे आंदलों जोनम्योंह का, तीयाअ याहकी-बाहकाअ पापाहांअ लीदे?” 3 तांहांअ ईसुंय जोवाब देदो, “तो तीयाअ सोताअ पापाहांअ लीदे का तीयाअ याहकी-बाहकाअ पापाहांअ लीदे आंदलों नांह जोनम्यों। उलटों, तों ता तीयाअ जीवोनाम जों बोंणनारों हाय तीयाअ पोरीणामे मांहेंअ पोरमेहेराअ ताकोत हीअ सेके तीयाअ खातुर तो आंदलो जोनम्योह। 4 आजी मोको हाय तांव, * मांन मोकलुअनारो मांअपेअ जें कामें केरावांअ मागेह तें कामें मांअ केरांअ जोजे। जेंहकींअ दीहाअ फाचलांअ रात आवेह तांहांअ तीयु रातीं मांहांहांन काम नांह कीअ सेकाअतों तेंहकींअज, आपुअ जीनगींअ सेल्ला सोमोये पोरमेहेराअ मोर्जी पुरी केरुलोंअ तों खुब मोळों पोळेह। 5 आंदाराम काय हाय तों हेरांअ जेंहकींअ उजवोळ ईयु दुन्याअ लोकाहांन मोदोत केअहे, तेंहकींअज आंय ईयु दुन्याम हाय तांव, लोकाहांन पोरमेहेराअ बाबोताम जाणावनारो आंयज हाय।”
6 एंहकींअ आखीन हातींअ ईसुंय पुंय थुप्यों आने तीयाकींअ थोळोक कादुअ गारो बोंणावीन तीया आंदला मांहांअ डोंअहांपेअ थाब्यो। 7 हातींअ तीयांय तीयाल आख्यों, “जायन ‘सीलोवाम’ कुंडुम तोअ डोंआं तुवजे!” (सीलोवामुअ ओर्थो, “मोकलुअलो” एंहडो वेअहे।) मोंजे, तों मांहुंअ गीयों आने तीया कुंडुम तीयांय सोताअ डोंआं तुव्या। हातींअ तों देखतों वीईन सोताअ कोअ गीयों! 8 तीया मांहांअ पाहल्याहां ने जीयाहां तीयाल पेअलांअ भीक मागता देखलो तीयाहां एक-बीहराल आख्यों, “ईं ता ईंहीं बोहीन भीक माग्या केअत्लों तोंज मांहुंअ हायकने?” 9 तांहांअ थोळाकाहीं आख्यों, “आंह, तोंज हाय।” बीहराहां आख्यों, “नांह, ईं तों नांह, पेन तीयाअ होच देखाअनारों बीहरों हाय।” पेन तीया मांहांय आख्यों, “आंह, तों मांहुंअ आंयज हाय!” 10 तांहांअ तीयाहां तीयाल फुच्यों, “तुं केंहकींअ देखतो वीअ गीयो?” 11 तांहांअ तीयांय जोवाब देदो, “ईसु आखाअहे तीया मांहांय थोळोक कादुअ गारो बोंणावीन मांअ डोंअहांपेअ थाब्यो। हातींअ तीयांय मांन जायन सीलोवाम कुंडुम मांअ डोंआं तुवांअ आख्यों। मोंजे, आंय तींहीं गीयो आने जेंहडा मांयुं मांअ डोंआं तुव्या का तुरुतुज आंय देखतो वीअ गीयो।” 12 तांहांअ तीयाहां तीयाल फुच्यों, “तों मांहुंअ आमी कांहीं हाय?” तांहांअ तीयांय जोवाब देदो, “मांन खोबुर नांह।”
देखता वेअला मांहांअल फोरीसी लोक सावाल फुचताह
13 हातींअ ते लोक, पेअलांअ आंदलों आथों तीया मांहांअल, फोरीसीहींअहीं लीअ गीया। 14 ईसुंय कादुअ गारो बोंणावीन आंदला मांहांअल देखतों केअलों तो दीह आरामाअ दीह आथो। 15 तीयाअ लीदे, फोरीसीहीं बी तीया मांहांअल फुच्यों, तो केंहकींअ देखतो वीयो। तांहांअ तीया मांहांय तीयाहांन आख्यों, “ईसुंय मांअ डोंअहांपेअ कादुअ गारो थाब्यो; हातींअ मांयुं मांअ डोंआं तुव्या आने आमी आंय हीअ सेकुंह।” 16 तांहांअ तीया फोरीसीहींमेर्याअ थोळाकाहीं आख्यों, “ ‘आरामाअ दीह काम नांय केरुलोंअ’ ओ नीयोम तों मांहुंअ नांह पालतों। मोंजे, तों पोरमेहेराअहींनेंअ नांय आलों वीअ।” पेन बीहराहां आख्यों, “जो तों पापी मांहुंअ वेअतों ता, तों एंहडा चोमोत्कार कीअज नांय सेकतों!” एंहकींअ कीईन तीयाहांम भागला पोळी गीया। 17 तीयाअ लीदे फोरीसीहीं, पेअलांअ आंदलों आथों तीयाल फाचों एक वोखत फुच्यों, “तुल देखतों केअलों तीया मांहांअ बाबोताम तुं काय आखोह?” तांहांअ तीया मांहांय जोवाब देदो, “तो ता पोरमेहेराअ गोठ जाहेर केअनारो हाय!”
18 तों मांहुंअ आंदलोंज जोन्मुअलों आने आमी तों हीअ सेकेह तों, ते येहुदी आगेवान आजी बी नांय मानत्ला। तीयाअ लीदे, तीयाहां तीया मांहांअ याहकी-बाहकाल हादाव्यें। 19 तें तींहीं आलें तांहांअ वोळीलाहीं तीयाहांन फुच्यों, “तो तुमांअ पोयरो हाय का? तो आंदलोज जोन्मुअलो का? जो ए गोठ हाची वीअ ता, आमी तो केंहकींअ देखतो वीयोह?” 20 तांहांअ तीयाअ याहकी-बाहकांय तीयाहांन जोवाब देदो, “आमां जांअतेंह का, तो आमांअ पोयरो हाय। तो आंदलोज जोन्मुअलो तों बी आमां जांअतेंह। 21 पेन तो आमी केंहकींअ हीअ सेकेह तीयाअ आमनेंह खोबुर नांह। आने तीयाल केडांय देखतो केअयो तीयाअ बी आमनेंह खोबुर नांह। आमांअ पोयरालुज तीया बाबोताम फुचा! तुमांअ जेंहडा आगेवानाहांन जोवाब दीअ सेके ओतोअ ता तो मोडो हायज। तो तीया-तीयाअज जोवाब दीअ!” 22 वोळीलाहीं पेअलांअज नोक्की केअलों का, जोंबी ईसुल ख्रीस्त तोरीके माने, तीयाल तीयाहांअ भोकती मोंडोळाअ पोंगाहांम आवतों ओटकावी देवुलोंअ। तीया मांहांअ याहकी-बाहकाल ईयु गोठीअ खोबुर आथी। मोंजे, तें येहुदी आगेवानाहांन बीहलें। 23 तीयाअ लीदे तीयाहां आख्यों का, “तो जोवाब दीअ सेके ओतोअ ता मोडो हायज। मोंजे, तुमां तीयालुज फुचा!”
24 हातींअ तीया फोरीसीहीं, तीया मांहांअल फाचों हादाव्यों। तों तींहीं आलों तांहांअ, तीयाहां तीयाल आख्यों, “पोरमेहेराल माथे राखीन आमनेंह खेरोंज आख! आमां जांअताह का, तुल हारों केअनारों मांहुंअ पापी हाय।” 25 तांहांअ तीया मांहांय जोवाब देदो, “तों पापी हाय का नांह तों आंय नांह जांअतो। पेन एक बाबोत आंय नोक्कीज जांअहुं। पेअलांअ आंय आंदलो आथो, पेन आमी आंय हीअ सेकुंह!” 26 तांहांअ तीयाहां तीयाल फुच्यों, “तुल हारो केरांअ तीयांय काय केअयों? तीयांय तुल केंहकींअ देखतो केअयो?” 27 तांहांअ तीयांय जोवाब देदो, “मांयुं तुमनेंह पेअलांअज आखी देदोंह। पेन तुमां तों बोराबोर नांह उनाअया। तांहांअ तुमां तों फाचों मांअपेनेअ काहाल उनायांअ मागताह? तुमां बी तीयाअ चेला बोंणांअ मागताह का?” 28 तांहांअ तीयाहां खीजवायन तीयाअ ओपमान केअयों। तीयाहां आख्यों का, “तीया मांहांअ चेलो ता तुंज हाय। आमां ता मोसेअ चेला हाय! 29 आमां जांअताह का, पोरमेहेर मोसेअरी गोगलो। पेन ईया मांहांअल ईं बादों केरांअ आदीकार कांहींनेअ मील्योह तों बी आमां नांह जांअता।” 30 तांहांअ तीया मांहांय जोवाब देदो, “ए कोतीअ नोवायुअ गोठ हाय! तुमां आखताह का, ईं बादों केरांअ आदीकार तीयाल कांहींनेअ मील्योह तों तुमां नांह जांअता। पेन तीयांय ता मांन देखतो केअयोह! 31 आपुंह जांअतेंह का पोरमेहेर, पापी मांहांहांअ केअली ओरुजुअ जोवाब नांह देतो। पेन उलटों, जें तीयाअ बीख राखतेंह आने तीयाअ मोर्जी पुरी केअतें रेतेंह तें, तीयाहांअ ओरुज तो उनायन तीयाअ जोवाब देहे। 32 केडांय बी कीदीह बी मांअ जेंहडा जोन्मेदेखुंअ आंदला मांहांअल देखतों नांह केअयों। 33 मोंजे, जो ईं मांहुंअ पोरमेहेराअहींनेअ नांय आवतों ता, तों तेंहडों काम नांयज कीअ सेकतों!” 34 तांहांअ तीयाहां जोवाब देदो, “तुं तोअ याहकी-बाहकाअ पापाअ पोरीणामेज आंदलो जोनम्योह! तुं आमनेंह हीकवोह का?” एंहकींअ आखीन तीयाहां तीयाल भोकती मोंडोळाअ कोअमेंनेअ बारे काडी थोव्यो।
आत्मीक रीते आंदलें मांहेंअ
35 फोरीसी लोकाहीं तीया मांहांअल भोकती मोंडोळाअ कोअमेंनेअ काडी थोव्योंह एंहकींअ ईसु उनाअयो तांहांअ, तीयांय तीया मांअहांल होदी काडयों आने तीयाल आख्यों, “मांहांअ पोयरोज ‘ख्रीस्त’ हाय एंहकींअ तुं मानोह का?”* 36 तांहांअ तीया मांहांय जोवाब देदो, “साहेब तो केडो हाय? तों मांन आखेअ, ईयाअ खातुर का आंय तीयाल ‘ख्रीस्त’ तोरीके मानुं।” 37 तांहांअ ईसुंय तीयाल आख्यों, “तुंयुं तीयाल पेअलांअ बी देख्योह। तो ता, आमी तोअरी गोठ्या केअनारो आंयज हाय।” 38 तांहांअ तीया मांहांय आख्यों, “मालीख, आंय मानुंह का तुंज ख्रीस्त हाय!” एंहकींअ आखीन तीयांय ईसुअ भोकती केअयी।
39 तांहांअ ईसुंय आख्यों, “आंय ईयु दुन्याअ लोकाहांअ नीयाय केरांअ आलोह। तीयाअ पोरीणामे, ‘आमां पोरमेहेराअ हाचाय नांह जांअतें’ एंहकींअ माननारें ते हाचाय जांय। ए बाबोत ता, आंदलाहांन देखतें केअया बोराबोर हाय। तीयाअ पोरीणामे, ‘आमां पोरमेहेराअ हाचाय जांअतेंह’ एंहकींअ खोटी रीते धारनारें कीदीह बी ते हाचाय नांय होमजीअ। ए बाबोत ता, जें मांहेंअ आंदलें हाय तें कायोमाअ खातुर आंदलेंज रे तीयाअ बोराबोर हाय।” 40 ईसुअरी तींहीं थोळाक फोरीसी बी आथा। तीयाहां आख्यों का, “आमां बी आंदला हाय का?” 41 तांहांअ ईसुंय तीयाहांन आख्यों, “ ‘आमां पोरमेहेराअ हाचाय नांह जांअता’ एंहकींअ मानता वीअ ता, तुमां देखतें वेरांअ मोर्जी राखनारा आंदला मांहांहांअ होच वेअता। आने पोरमेहेर बी तुमांअ पाप माफ केअतो। पेन तुमां आखताह का, ‘आमां पोरमेहेराअ हाचाय जांअताह।’ तीयाअ लीदे, तुमां एंहडा मांहांहांअ होच हाय का जें आंदलें वीईन बी आखतेंह का, ‘आमां हीअ सेक्तेंह’! आने पोरमेहेर तुमांअ पाप माफ नांय केअ।”