8
पारका माटीअरी हुवता तेराअली बायुल थोळाक लोक ईसुअहीं लावताह
1 पेन ईसु आने आमां तीयाअ चेला जेतुनाअ चाळावाली डोगीअपेअ गीया। 2 बीहरे दीह बोळे वेगर्याअ आमां फाचा मोंदीराअ चोवठाम गीया। तांहांअ खुब मांहेंअ ईसुअ चारु वेल टोलवाअयें। मोंजे, ईसु तीयाहांन बोद दांअ बोठो। 3 तांहांअ नीयोम हीकवुअनारा आने फोरीसी पोंथाअ थोळाक आदमी एक बायुल ईसुअहीं लाला। ते बाय पारका माटीअरी हुवताज * तेराअली। तीयाहां तीयुल, ईसुअ गोठ्या उनाअत्लें तीया लोकाहांअ टोलाअ आगलांअ, उबी राखी। 4 हातींअ तीयाहां ईसुल आख्यों, “गुरुजी, ईयु बायुल पारका माटीअरी हुवताज * आमां तेअयीह। 5 मोसेंय आपनेंह देदला नीयोमाम तीयांय आपनेंह एंहडो हुकोम देदोह का, एंहडी बायाहांन ढोगळाकींअ माय टाकांअ जोजे। ता, आमांअ काय केरांअ जोजे? तुं काय आखोह?” 6 ईसुपेअ गुनो थोवांअ तीयाहांन कांवींह कारोण मीले तीयाअ खातुरुज ते ओ सावाल फुचत्ला।
पेन ईसु ता, टोंगो वोलीन सोताअ आकळीकींअ पुंय कांवींह लेखत्लो। 7 ते उबी रीईन तीयाल सावाल फुच्याज केअत्ला तांहांअ तो उठ्यो आने तीयाहांन आख्यों, “तुमांअमेर्याअ जीयांय पापुज नांय केअयो, तो ईयुल पेअलांम पेअलांअ ढोगळा ठोकांअ सोरुवात केअ।” 8 एंहकींअ आखीन हातींअ बी ईसु फाचो टोंगो वोलीन पुंय आजी वादारे लेखत्लो। 9 ईसुंय आख्यों तों उनाअया तांहांअ, तीयाल सावाल फुचनारा लोक एक-एक कीईन जाता रीया। पेअलांअ मोडा लोक गीया, हातींअ हान्ना लोक गीया। आखरीप ईसु एखलोज तींहीं आथो आने ते बाय तींहीं उबी रेहली। 10 तांहांअ ईसु उठ्यो आने तीयु बायुल फुच्यों, “बाय! ते बादा कांहीं गीया? ‘तोअ पापाअ लीदे तुल माय टाकांअ जोजे!’ एंहकींअ केडांय बी चुकादो नांय देदो का?” 11 तांहांअ तीयुंय आख्यों का “नांह, साहेब!” तांहांअ ईसुंय आख्यों, “हारों, आंय बी एंहडो चुकादो नांह देतो। तुं आमी तोअ कोअ जो! पेन पापी जीवोन जीवांअ आमीनेअ सोळी देजे!”]] *
दुन्याअ लोकाहांअ खातुर ईसु उजवोळाअ होच हाय
12 लोकाहांअरी गोठ्या केअता फाचों ईसुंय आख्यों, “आंय दुन्याअ बादा लोकाहांअ खातुर उजवोळाअ होच हाय। जेंहकींअ आंदाराम काय हाय तों उजवोळाकींअ देखाय जाहे, तेंहकींअज कीईन पोरमेहेर केंहडो हाय तों आंय लोकाहांन देखावुंह। आंदाराम चालनारांहन तीयाहांअ आजु-बाजु काय हाय तीयाअ खोबुर नांह रेती। पेन जें मांअ चेलें बोंणतेंह, तें पोरमेहेर केंहडो हाय तों जांअया वोगुर नांय रीअ। पेन उलटों, तीयाहांपेअ मांअ उजवोळ रीअ, आने कायोम केंहकींअ जीवुलोंअ तों, तीया उजवोळाकींअ तें जांय जाय।” * 13 तांहांअ फोरीसीहीं ईसुल आख्यों, “तुं एखलोज सोताअ बाबोताम ए गोठ्या आखोह! तीयाअ लीदे, तुं जों आखोह तों खेरोंज हाय एंहकींअ मानांअ आमांअ जोरुल नांह।” 14 तांहांअ ईसुंय जोवाब देदो, “मांअ बाबोताम ए गोठ्या आखनारो आंय एखलोज हाय तेबी, आंय जों आखुंह तों खेरोंज हाय। काहाका, मांन खोबुर हाय का, आंय कांहींनेअ आलोह आने कांहीं जानारो हाय। पेन तुमनेंह खोबुर नांह का, आंय कांहींनेअ आलोह ने कांहीं जानारो हाय। 15 तुमां मांहांहांअ रीता पोरमाणेज लोकाहांअ नीयाय केअताह। आंय ईयु दुन्याम हाय तों लोकाहांन गुनाला गोंणांअ खातुर नांह। 16 तेबी, जो आंय लोकाहांअ नीयाय क्युंव ता, आंय जों नोक्की क्युंव तों खेरोंज वीअ। काहाका, तों नोक्की केअनारो आंय एखलोज नांय वेअहें। पेन तों नोक्की केअनारा ता आंय आने जीयांय मांन मोकल्योह तो, आमां बेनुं वीअहुं। 17 तुमांअ नीयोमाम मोसेंय लेख्योंह का, जो केल्ली बी बाबोताअ ओसाम ओसा बेन आदमी साक्सी दे ता, तीयाहांअ साक्सी हाची हाय। 18 तुमनेंह मांअ बाबोताम आखनारो आंय सोते बी हाय, आने मांन मोकलुअनारो मांअ पोरमेहेर बाहको बी हाय।” 19 तांहांअ तीयाहां ईसुल फुच्यों, “तोअ बाहको कांहीं हाय?” तांहांअ ईसुंय तीयाहांन जोवाब देदो, “आंय केडो हाय तों बी तुमां नांह जांअता, ने मांअ बाहको केडो हाय तों बी नांह जांअता। जो तुमां आंय केडो हाय तों जांअता ता, मांअ बाहको केडो हाय तों बी तुमां जांअता।” 20 ईसुंय ए बादया गोठ्या मोंदीराअ भागाम आख्या, जींहीं मांहेंअ सोताअ दान टाकत्लें। तो जागो येहुदी पोंचाअ लोक टोलवाअत्ला तीयाअ एकदोम पाही आथो। पेन केडांय बी ईसुल नांय तेअयो। काहाका, दुखे वेठीन मोरांअ तीयाअ वोखत आजी नांह आलो।
ईसु आखेह का तो होरगामेनेअ आलोह
21 फाचों ईसुंय तीयाहांन आख्यों, “आंय माहरीज जानारो हाय। हातींअ तुमां मांन होदाह। पेन तुमां तुमांअ पापाहांअ माफी मीलव्या वोगुरुज मोअहा। आंय जींहीं जाहुं, तींहीं तुमां आवी नांय सेकाह।” 22 मोंजे, वोळीलाहीं तीयां-तीयाहांअ आख्यों, “तो आपघात केरांअ वीअ तीयाअ लीदे, ‘आंय जाहुं तींहीं तुमां आवी नांह सेकनारा’ एंहकींअ आखतो वीअ का?” 23 पेन ईसुंय तीयाहांन आखांअ चालुज राख्यों का, “तुमां ईयु दुन्याम जोन्मुअलें हाय, पेन आंय ता होरगामेनेअ आलोह। जें पोरमेहेराअ वीरुद केअनारें हाय तीयाहांमेनेअ तुमां हाय। पेन आंय तीयाहांमेर्योअ नांह। 24 मांयुं तुमनेंह आखलों, तुमांअ पापाहांअ माफी मीलव्या वोगुरुज तुमां मोअहा। होकीकोतुम आंय केडो हाय तों जो तुमां नांय मानांह ता, तुमां तुमांअ पापाहांअ माफी मीलव्या वोगुरुज * मोअहा!”
25 तांहांअ तीयाहां ईसुल फुच्यों, “तुं सोताल काय धारोह?” तांहांअ ईसुंय तीयाहांन आख्यों, “मांयुं बोद दांअ चालु केअलों तेंहडामेर्योअ आंय तुमनेंह आख्याज कीअहुं का आंय केडो हाय! 26 आंय तुमांअ नीयाय कीईन आखी सेकुंह का, तुमां खुब बाबोतींहम गुनालें हाय। पेन, आंय ता जीयांय मांन मोकल्योह तो जोतोंअ आखांअ आखेह तोतोंअज आखेंह। तो जों आखेह तों खेरोंज हाय। आने तीयापेनेअ जे गोठ्या आंय उनाअयोह, तेज आंय ईयु दुन्याअ लोकाहांन आखुंह।”
27 ईसु तीयाअ पोरमेहेर बाहकाअ बाबोतामुज आखेह तों ते नांय होमज्या। 28 तीयाअ लीदे ईसुंय तीयाहांन आख्यों, “मांहांअ पोयरो आंयज हाय। पेन तुमां मांन माय टाकांअ खातुर कुरुसापेअ चोळवाह तांहांअज तुमनेंह खोबुर पोळीअ का आंय खोरेखोर केडो हाय। आने तांहांअ तुमनेंह ईं बी खोबुर पोळीअ का आंय मांअ-मांअ काय बी नांह केअतो, पेन मांअ पोरमेहेर बाहकांय मांन जों हीकव्योंह तोंज आंय आखुंह। 29 तीयांयज मांन मोकल्योह बी आने तोज मांन मोदोत बी केअहे। काहाका, तीयाल गोंवनारें कामेंज आंय कायोम कीअहुं। आने तीयांय मांन कीदीह बी सोळी नांह देदो।”
30 ईसु ए गोठ्या आखत्लो तांहांअ, उनाअनारा खुब लोकुंह मानी लेदों का तो पोरमेहेराअहींनेअज आलोह।
पोरमेहेराअ पोयरो ईसु लोकाहांन सेतानाअ गुलामीमेनेअ सोळवेह
31 तांहांअ जीया येहुदी लोकाहीं एंहकींअ मानी लेदलों, तीयाहांन ईसुंय आख्यों, “जो तुमां मांअ गोठीहींअ पोरमाणे जीवाह ता, तुमां खोरेखोर मांअ चेला बोंणाह। 32 तांहांअ तुमां पोरमेहेराअ बाबोताअ हाचाय जांअहा, आने तो तुमनेंह सोताअ गुलाम बोंणावनाराअ आथामनेअ सोळवीअ।” * 33 तांहांअ तीयाहां ईसुल जोवाब देदो, “आमां आबराहामाअ वोसुलामेर्याअ लोक हाय। आने आमां कीदीह बी केडाअ गुलाम नांह बोंण्या। तांहांअ एंहकींअ तुं काहा आखोह का, ‘पोरमेहेर तुमनेंह सोताअ गुलाम बोंणावनाराअ आथामनेअ सोळवीअ?’” 34 तांहांअ ईसुंय जोवाब देदो, “आंय तुमनेंह नोक्कीज आखुंह: जेंहकींअ गुलामाल सोताअ सेटुअ आखलों मानांअ पोळेह, तेंहकींअ जोंबी पाप केअया केअहे तीयाल सोताअ पापी मोर्जींअ पोरमाणे वोरतांअ पोळेह। 35 गुलाम तीयाअ मालीखाअ कुटुंबुमेर्योअ नांह तीयाअ लीदे तो तीया कुटुंबुम कायोम नांह रेनारो। पेन मालीखाअ पोयरो ता कुटुंबुमेर्योअ हाय तीयाअ लीदे तो तीया कुटुंबुम कायोम रेनारो हाय। तेंहकींअज कीईन, तुमां आबराहामाअ वोसुलामेर्याअ हाय तीयाअ लीदे तुमां सोताल पोरमेहेराअ कुटुंबुमेर्याअ आखावताह। पेन होकीकोतुम तुमां तुमांअ पापी मोर्जींअ गुलाम हाय तीयाअ लीदे तुमां पोरमेहेराअ कुटुंबुमेर्याअ नांह, पेन आंय ता तीयाअ कुटुंबुमेर्योअ हायज। 36 तीयाअ लीदे, जो तुमां मांन तीयु गुलामीमेनेअ सोळवांअ दा ता, तुमां होकीकोतुमुज तींहमेंनेअ सुटी जाहा। 37 मांन खोबुर हाय का, तुमां आबराहामाअ वोसुलामेर्याअ हाय। तेबी तुमां मांन माय टाकांअ कोसीस केअताह। काहाका, मांअ गोठ तुमांअ मोनुंहन बोदले एंहडों तुमां वेरांअ नांह देता। 38 आंय मांअ पोरमेहेर बाहकाअरी आथो तांहांअ मांयुं जों देखलों, तोंज आंय तुमनेंह आखुंह। पेन तुमां ता, तुमांअ बाहकापेनेअ तुमां जीया कामाहांअ बाबोताम उनाअयाह तेंज कामें केअताह।”
39 तांहांअ तीयाहां तीयाल जोवाब देदो, “आमांअ आगलोअ डायो ता आबराहाम हाय।” तांहांअ ईसुंय तीयाहांन आख्यों, “जो तुमां खोरेखोर आबराहामाअ वोसुलामेर्याअ वेअता ता, तुमांअ सोबाव बी आबराहामाअ सोबावाअ होच वेअतो, आने तीयांय केअलें तेंहडें हारें कामें तुमां बी केअता। 40 पोरमेहेरापेनेअ जे हाची गोठ आंय उनाअयोह, तेज गोठ आंय तुमनेंह आखतो रीहुं। तेबी तुमां मांन माय टाकांअ कोसीस केअताह। आबराहामुंह ता एंहडों काम नांह केअयों। 41 नांह, नांह! तुमां ता तुमांअ खेरो बाहको केअहे तेंज कामें केअताह।”
तांहांअ तीयाहां तीयाल आख्यों, “आमां काय सीनालीअ पोयरें नांह। आने आमांअ एकुज बाहको हाय। तो ता, पोरमेहेरुज हाय।” 42 तांहांअ ईसुंय तीयाहांन आख्यों, “जो पोरमेहेर खोरेखोर तुमांअ बाहको वेअतो ता, तुमां मांअपेअ माया राखता। काहाका, आंय तीयाअहींनेअज ईयु दुन्याम आलोह। आंय मांअ-मांअ नांह आलो, पेन तीयांयज मांन मोकल्योह। 43 तुमां मांअ गोठ्या काहा नांह होमजुअता तों आंय तुमनेंह आखुंह। तीयाअ कारोण ईं हाय का, तुमां मांअ गोठ्या मानांअज नांह मागता। 44 तुमां ता तुमांअ बाहका सेतानाअ हाय, आने तीयाल जों गोंवेंह तोंज केरांअ तुमां मोर्जी राखताह। पोरमेहेरांय मांहांहांन बोंणावलें तेंहडामेर्योअ तो सेतान लोकाहांन खुनी बोंणावतो आलोह। * हाचाय तीयापेअ नांह तीयाअ लीदे, तो हाचायु पोरमाणे नांह वोरतुअतो। जांहांअ बी तो झुटों गोगेह, तांहांअ तो सोताअ सोबावु पोरमाणेज गोगेह, काहाका, तो झुटों गोगनारो हाय आने झुटों गोगनाराहांअ बाहको हाय। 45 पेन आंय ता तुमनेंह हाची गोठुज आखुंह तीयाअ लीदे, तुमां मांअपेअ वीसवास नांह केअता! 46 तुमांअमेर्योअ केडो बी मांन एंहकींअ आखी नांह सेकतो का, ‘तुंयुं पाप केअयोह।’ मोंजे, आंय हाची गोठ आखुंह तेबी तुमां काहा मांअपेअ वीसवास नांह राखता? 47 जें पोरमेहेराअ हाय, तें पोरमेहेराअ गोठीपेअ धीयान देतेंह। पेन तुमां ता पोरमेहेराअ नांह; तीयाअ लीदे, तुमां पोरमेहेराअ गोठीपेअ धीयान नांह देता।”
आबराहामाअ पेअलांअ बी ईसु आथो
48 तांहांअ तीया वोळीलाहीं ईसुल आख्यों, “‘तुं बी सामारीयाअ लोकाहांअ होच खोटोंज मानोह’ * आने ‘तुल पुतळों लाग्योंह!’ एंहकींअ आमां आखताह तों खेरोंज हाय!” 49 तांहांअ ईसुंय तीयाहांन आख्यों, “मांन पुतळों नांह लाग्यों! उलटों आंय ता, मांअ पोरमेहेर बाहकाल मान दीहुं, पेन तुमां मांन मान नांह देता। 50 आंय मांअ मोडाय नांह होदतो। पेन ते होदनारो ता बीहरो एक जांअ हाय, आने आंय खेरों आखुंह, तुमांअ नीयाय केअनारो बी तोज हाय। 51 आंय तुमनेंह नोक्कीज आखुंह: जेंबी मांअ गोठी पोरमाणे चालतेंह, तें कीदीह बी मोअनारें नांह!”
52 तांहांअ तीया वोळीलाहीं तीयाल जोवाब देदो, “आमी आमनेंह खातरी वीअ गीयीह का, तुल नोक्कीज पुतळों लाग्योंह। काहाका आबराहाम मोय गीयो आने पोरमेहेराअ गोठ जाहेर केअनारा बी मोय गीया। तेबी तुं आखोह का, तोअ गोठी पोरमाणे जें चालतेंह तें कीदीह बी नांय मोय! 53 तुं आबराहामाअ केअता मोडो हाय का? तो मोय गीयो आने पोरमेहेराअ गोठ जाहेर केअनारा बी मोय गीया। एंहडों-एंहडों आखीन तुं सोताल काय धारोह?” 54 तांहांअ ईसुंय जोवाब देदो, “जो आंय सोतेज मांअ मोडाय कीअहुं ता, तीयाअ काय ओर्थो नांह। मांअ मोडाय केअनारो ता मांअ बाहकोज हाय। तीयालुज तुमां बी सोताअ पोरमेहेर आखताह। 55 तीयाल तुमां नांह ओअखुअता, पेन आंय ओअखुंह। तीयाल आंय नांह ओअखुअतो एंहकींअ जो आंय आखुं ता, आंय बी तुमांअ होच झुटों गोगनारो व्युंव। पेन आंय तीयाल ओअखुंहज, आने तीयाअ आखलों बी मानुंह। 56 तुमांअ आगलोअ डायो आबराहाम, आंय मांअ जीवोनाम जों-जों केरांअ आथो तीयाअ वीचार कीईन खुब खुस वेअलो। जाणे का, तों तीयांय देख्योंज वीअ एंहडो खुस वेअलो।”
57 तांहांअ वोळीलाहीं तीयाल आख्यों, “तुं आजी पोचास वोरसांअ बी नांह! मोंजे, तुंयुं आबराहामाल देख्यो वीअ एंहकींअ ता बोंणेज नांय!” 58 तांहांअ ईसुंय तीयाहांन आख्यों, “आंय तुमनेंह नोक्कीज आखुंह: आबराहाम जोनम्यो बी नांह तीयाअ पेअलांअ बी आंय हायाताम आथो!” 59 ईं उनाअनारा तीयाहां, तीयाल ढोगळाकींअ ठोकीन माय टाकांअ खातुर ढोगळा वीस्या। पेन ईसु दोबी गीयो, आने मोंदीराअ चोवठामनेअ जातो रीयो।