7
ईसु आने तीयाअ पावुह
1 ए बाबोत्या बोंण्या हातींअ बी ईसु गालील वीस्तारामुज फीरत्लो। येहुदीया वीस्ताराम तो फीरांअ नांय मागत्लो। काहाका, तो जांअत्लो का तींहींर्याअ येहुदी आगेवान तीयाल माय टाकांअ मागत्ला। 2 पेन जांहांअ येहुदी लोक मांडवें पाळीन रेताह तो तेहवार पाही आथो तांहांअ, 3 ईसुअ पावुहुं तीयाल आख्यों, “ईंहींनेअ नींगीन येहुदीया वीस्ताराम जाजे! तांहांअ तोअ चेला तोअ चोमोत्कारुअ कामें हीअ सेके! 4 काहाका, जोंबी मांहुंअ नांवांअतों बोंणांअ मागेह, तों दोबीन काय बी नांह केअतों। तुं ए चोमोत्कार कीअहो तीयाअ लीदे, दुन्याअ बीहरा लोकाहांन बी देखावी सेकोक्ने!” 5 तीयाहां ईसुअ टीका केरांअज एंहकींअ आख्यों। काहाका, तीयाअ पावुह बी तीयापेअ वीसवास नांय राखत्ला। 6 तांहांअ ईसुंय तीयाहांन आख्यों, “तेहवार वालांअ जांअ मांअ वोखत आजी नांह आलो। पेन तींहीं जांअ ता केल्लो बी सोमोय तुमांअ खातुर बोराबोरुज हाय। 7 ईयु दुन्याअ लोक तुमनेंह नोफरोत कीअ नांह सेकता। पेन ते मांन नोफरोत केअताह। काहाका, आंय तीयाहांन कायोम आखतोज रीहुं का तीयाहांअ कामें खाराब हाय। 8 तुमां तेहवार वालांअ येरुसालेम जा। पेन आंय तींहीं नांह जानारो। काहाका, तींहीं जांअ मांअ खातुर ओ सोमोय बोराबोर नांह।” 9 एंहकींअ आखीन ईसु थोळाक वादारे दीह गालील वीस्तारामुज रीयो।
मांडवांअ तेहवार वालांअ ईसु येरुसालेम जाहे
10 तीयाअ पावुह तेहवार वालांअ गीया ने थोळाक दीह हातींअ ईसु बी गीयो। तो ता लोकाहांअ देखता नांय गीयो, पेन ठाको-ठाकोज गीयो। 11 तीया तेहवारुम येहुदी आगेवान ईसुल होदत्ला। ते तेहवारुम आलला लोकाहांन फुचत्ला का, “तो आदमी कांहीं हाय?” 12 तेहवारुम आलला लोक ईसुअ बाबोताम ठाका-ठाका गोठ्या केअत्ला। थोळाक आखत्ला, “तो हारो आदमी हाय!” पेन बीहरा ता एंहकींअ आखत्ला, “नांह, तो लोकाहांन ठोगेह!” 13 पेन तीया बाबोताम केडो बी उगाळी रीते नांय आखत्लो। काहाका, ते लोक येहुदी आगेवानाहांन बीहला।
14 लोगभोग आरदो तेहवार पुरो वीयो तांहांअ, ईसु मोंदीराअ चोवठाम जायन लोकाहांन बोद दांअ टेक्यो। 15 ईसुअ गोठ उनायन येहुदी वोळीलुंहन नोवाय लागी। तीयाहां आख्यों का, “ओ आदमी आपुअ धोरमाअ एक बी नीसालुम लेख्योज नांह! तांहांअ तो ओतोंअ बादों केंहकींअ जांअहे? ईं आपनेंह नांह होमजाअतों।” 16 तांहांअ ईसुंय तीयाहांन जोवाब देदो, “आंय जो बोद दीहुं तो मांअ सोताअ नांह, पेन तो ता मांन मोकलुअनारा पोरमेहेराअ * हाय। 17 जें मांहेंअ पोरमेहेराअ मोर्जी पुरी केरांअ मागतेंह, तें जांय जाय का, आंय जो बोद दीहुं तो पोरमेहेराअ हाय का मांअ सोताअ हाय। 18 जें मांहेंअ सोते बोंणावल्या गोठ्या आखतेंह, तें बीहरें मांहेंअ तीयाहांन मान दे तीयाअ खातुरुज तेंहकींअ केअतेंह। पेन आंय जों कीअहुं तों ईयाअ खातुर कीअहुं का, बीहरें मांहेंअ मांन मोकलुअनाराल मान दे। आंय ता खेरोंज गोगनारो हाय। आंय कोय वोखत बी झुटों नांह गोगतो। 19 मोसेंय तुमनेंह देदला नीयोमाहांअ बाबोताम वीचारा! तुमाहांमेर्योअ एक बी ते नीयोम पुरी रीते नांह पालतो। तांहांअ आरामाअ दीहाअ बाबोताअ नीयोम आंय नांह पालतो एंहकींअ आखीन तुमां मांन माय टाकांअ काहाल कोसीस केअताह?”
20 तांहांअ टोलामेर्याअ थोळाक लोकाहीं जोवाब देदो, “एंहकींअ आखीन तुं देखावोह का तुं गांडो हाय! नोक्कीज केडो बी तुल माय टाकांअ नांह कोसीस केअतो!” 21 तांहांअ ईसुंय तीयाहांन आख्यों, “आरामाअ दीह मांयुं केअला एकुज चोमोत्कारुअ लीदे तुमनेंह बादाहांन आघात लाग्योह। 22 मोसेंय देदला हुकोमा पोरमाणे तुमां बी आरामाअ दीह वेअ तेबी, तुमांअ पोयराहांअ सुन्नोत केरावताह। तों बी एक कामुज हायक्ने? होकीकोतुम ता मोसेंय नांह, पेन आपुअ आगलाअ डायाहांज तो रीवाज चालु केअलो। 23 आरामाअ दीह तुमां तुमांअ पोयराहांअ सुन्नोत केरावताह तेबी तुमां धारताह का तीयाकींअ आरामाअ दीहाअ बाबोताअ नीयोम नांह टुटतो। तांहांअ आरामाअ दीह मांयुं एक मांहांअल पुरी रीते हारों केअयों तीयाअ लीदे तुमां मांन खीजवाअताह। ते ओहांअ जेंहडी गोठ हाय!
24 तुमां जों हेअताह तीयापेनेअ गोंवें ते बाबोत खेरी हाय का खोटी तों धारी लांअ सोळी दा! पेन उलटों, जों होकीकोतुम खेरों हाय तीयापेनेअ धारी लेजा!”
ईसुज ख्रीस्त हाय का नांह तीया बाबोताम लोकाहांअ चारचा
25 तांहांअ येरुसालेमामेर्याअ थोळाक लोक आखांअ टेक्या का, “आपुअ ओमोलदार माय टाकांअ कोसीस केअताह तो आदमी ओज हायकने? 26 हेरा! तो ए बादया बाबोत्या जाहेरामुज आखेह तेबी, आपुअ धोरमाअ ओमोलदार तीयाअ वीरुदुम काय बी नांह आखता। तो ख्रीस्त * हाय एंहकींअ तीयाहां होकीकोतुमुज मानी लेदोंह का? 27 पेन ख्रीस्त * आवीअ तांहांअ तो कांहींनेअ आवेह तों केडाल बी खोबुर नांय पोळीअक्ने? ओ आदमी कांहींनेअ आलोह तों आपुंह जांअताहजक्ने!”
28 तीयाअ लीदे, मोंदीराअ चोवठाम ईसु बोद देहलो तांहांअ तीयांय बोंबलीन आख्यों, “आंय केडो हाय आने आंय कांहींनेअ आलोह, तों तुमनेंह खोबुर हाय। आंय मांअ-मांअ नांह आलो। पेन उलटों, होकीकोतुम पोरमेहेरांयज मांन मोकल्योह। तीयाल तुमां नांह ओअखुअता। 29 पेन आंय तीयाल ओअखुंह। काहाका, आंय तीयाअहींनेअज आलोह। आने तीयांयज मांन मोकल्योह!”
30 तो पोरमेहेराअहींनेअज आलोह एंहकींअ आख्यों तीयाअ लीदे, तीयाहांमेर्याअ थोळाक लोकाहीं तीयाल तेरांअ कोसीस केअयी। पेन तीयाल तेरांअ केडांय बी तीयाल आथ बी नांय लागव्यो। काहाका, लोक तीयाल माय टाके तो वोखत आजी नांह आलो। 31 पेन तीया टोलामेर्याअ खुब लोकाहीं, तो पोरमेहेराअहींनेअज आलोह तों मान्यों। तीयाहां आख्यों का, “ख्रीस्त* आवीअ तांहांअ, तो ईया आदमींह केअला चोमोत्काराहांअ केअता वादारे चोमोत्कार ता नांयज केअकने?” 32 ईसुअ बाबोताम लोक ठाका-ठाका एंहकींअ गोठ्या केअत्ला तों फोरीसी उनाअया। तीयाअ लीदे, तीयाहां आने मोडा पुंजाराहां तीयाल तेरांअ मोंदीराअ थोळाक चोकीदाराहांन मोकल्या।
33 तांहांअ ईसुंय आख्यों, “आंय आजी थोळाकुज वोखत तुमांअरी रेहें। हातींअ आंय मांन मोकलुअनारांअहीं फाचो जाहें। 34 तांहांअ तुमां मांन होदाह, पेन आंय तुमनेंह नांय झुळुं। आने आंय रेहें तीयु जागे तुमां आवी नांय सेकाह।” 35 तांहांअ वोळीलाहीं माजाअ-माज आख्यों, “आपुंह ईया आदमील होदी नांय सेक्जी एंहडो तो एंहडा केल्ली जागे जानारो हाय? ओमुक येहुदी लोक गीरीक लोकाहांम रेताह। तो जायन तीयाहांम रीईन तीयाहांन बोद दीअ का? 36 तो आखेह का, ‘तुमां मांन होदाह, पेन आंय तुमनेंह नांय झुळुं।’ आने एंहकींअ बी आखेह का, ‘आंय रेहें तीयु जागे तुमां आवी नांह सेकता।’ ता ईयाअ ओर्थो काय वीअ?”
लोकाहांन कायोमाअ जीवोन देनारों पांय
37 तेहवाराअ सेल्ला आने मोडा दीह ईसु मोंदीराअ चोवठाम उबी रीयो आने तीयांय बोंबलीन आख्यों, “जोंबी फांअप्यों वीअ तों, आंय जों देहें तों पीयांअ मांअहीं आवे! 38 पोवीतोर लेखाणाहांम लेखलों हाय तेंहकींअ, जें मांअपेअ वीसवास राखीअ, तीयाहांअ मोनाहांमेनेअ कायोमाअ जीवोन देनारा पांअयांअ चोर वोअया कीअ।” 39 ईसु ए गोठ तीयापेअ वीसवास राखनाराहांन मीलांअ आथो तीया पोवीतोर आत्माअ बाबोताम आखत्लो। तांव लोगुंअ पोरमेहेरांय तीया आत्माल वीसवासी लोकाहांन नांह देदो। काहाका, तांहांअ ईसु होरगाम तीयाअ मोडायावाला कोअ फाचो नांह गीयो।
लोक ईसुअ बाबोताम जुदया-जुदया गोठ्या आखताह
40 ईसुअ ए गोठ उनायन टोलामेर्याअ थोळाक लोकाहीं आख्यों, “नोक्कीज ओ आदमी, आवनारो आथो तो पोरमेहेराअ गोठ जाहेर केअनारो हाय!” 41 तांहांअ बीहराहां आख्यों, “तो ख्रीस्त* हाय।” पेन बीहरा थोळाकाहीं आख्यों, “ख्रीस्त ता गालील वीस्तारामनेअ नांह आवनारो। 42 काहाका, पोवीतोर लेखाणाहांम एंहकींअ लेख्योंह का, ख्रीस्त दावीदाअ कुळुमनेअ आवीअ, आने तो रेहलो तीया बेथलेहेम गांवांम जोन्मीअ!” 43 एंहकींअ कीईन ईसुअ बाबोताम टोलामेर्याअ लोक जुदों-जुदों धारत्ला तीयाअ लीदे, तीयाहांम भागला पोळी गीया। 44 थोळाक लोक ईसुल तेरांअ मागत्ला, पेन केडांय बी तीयापेअ आथ बी नांय लागव्यो।
येहुदी ओमोलदार नांह मानता का “ईसुज ख्रीस्त हाय”
45 तांहांअ ते मोंदीराअ चोकीदार तीयाहांन ईसुल तेरांअ मोकलुअनारा मोडा पुंजाराअहीं ने फोरीसीहींअहीं फाचा आला। तांहांअ तीया मोडा पुंजाराहां आने फोरीसीहीं तीयाहांन फुच्यों, “तुमां ईसुल ईंहीं काहा नांय तीअ लाला?” 46 तांहांअ चोकीदाराहां जोवाब देदो, “ओ आदमी गोगेह एंहड्या हार्या बाबोत्या आजी लोगुंअ केडो बी नांह गोग्यो! मोंजे, आमां तीयाल नांय तेअयो!” 47 तांहांअ फोरीसीहीं तीयाहांन आख्यों, “तीयांय तुमनेंह बी ठोग्याह का? 48 येहुदी आगेवानुंहमनेअ का फोरीसीहींमनेअ एंहकींअ माननारो एक बी नांह का ‘ओ ख्रीस्त हाय’! 49 पेन उलटों, ईया टोलामेर्याअ थोळाक लोक एंहकींअ मानताह। ते ता मोसेंय देदला नीयोम नांह जांअता। ते ईयाअ गोठ उनाअताह तीयाअ लीदे पोरमेहेर तीयाहांन हाराप दीअ।”
50 तांहांअ नीकोदेमु, जो पेअलांअ एक वोखत ईसुअरी गोठ केरांअ आललो आने जो येहुदी पोंचाअ आदमी बी आथो, तो गोग्यो। तीयांय तीया फोरीसीहींन आख्यों, 51 “केल्ला बी आदमील तीयाअ गोठ्या उनाअया पेअलांअ आने तीयाअ कामाहांन जांअया पेअलांअ साज्या दांअ आपुअ नीयोमा पोरमाणे आपनेंह सुट नांह।” 52 तांहांअ तीयाहां नीकोदेमुल जोवाब देता आख्यों, “तुं बी गालीलामेर्योअ हाय का? पोवीतोर लेखाणाहांम जों लेखलों हाय तों बोराबोर वाची हेअ! तांहांअ तुल खोबुर पोळीअ का, पोरमेहेराअ गोठ जाहेर केअनारो एगोह बी गालील वीस्तारामेनेअ नांह आवनारो!” 53 [[हातींअ ते बादा सोत-सोताअ कोअ गीया।