8
चार हाजार मांहांहांन ईसु खावावेह
(माथी १५:३२-३९)
1 तीया दीहाहांम, मांहांहांअ खुब मोडो टोलो फाचो ईसुअहीं टोलवाअयो। तीनेक दीह वीया हातींअ, तीया मांहांहांपेअ काय बी खावुलोंअ नांय रीयों। तीयाअ लीदे, ईसुंय तीयाअ चेलाहांन सोताअ पाही हादीन तीयाहांन आख्यों, 2 “ईं मांहेंअ तीन दीहनेअ मांअरी हाय, आने तीयाहांपेअ खांअ खातुर काय बी नांह रीयों। तीयाअ लीदे तीयाहांपेअ मांन खुब दाया आवेह। 3 तीयाहांमेनेअ थोळेंक ता खुब सेटेनेअ आलेंह। तीयाअ लीदे, जो आंय तीयाहांन आदुराम-पुरों तीयाहांअ कोअ पुखेंज मोकली द्युंव ता, वाटे जाता-जाताज तें चांबलाय पोळीअ।”
4 तांहांअ तीयाअ चेलाहां तीयाल जोवाब देदो, “ईया उजाळ जागाम ओताअ बादा लोकाहांन खावावांअ पुरता मांडा आमनेंह केंहकींअ मीले?”
5 ईसुंय तीयाहांन फुच्यों, “तुमाहांपेअ कोताअ मांडा हाय?” तीयाहां जोवाब देदो, “आमाहांपेअ सांत मांडा हाय।”
6 ईसुंय टोलामेर्याअ लोकाहांन पुंय बोही जांअ हुकोम केअयो। हातींअ तीयांय ते सांत मांडा लेदा, आने तीयाहांअ खातुर पोरमेहेराअ आभार मानीन तीयाहांन पाज्या, आने लोकाहांन वाटी दांअ खातुर ते चेलाहांन देदा। चेलाहां ते लोकाहांन वाटी देदा। 7 चेलाहांपेअ पुजलें थोळेंक हानेंअ मासें बी आथें। ईसुंय तीयाहांअ खातुर बी पोरमेहेराअ आभार मान्यो, आने ते बी वाटी दांअ सोताअ चेलाहांन आख्यों। 8 बादा लोक खायन ताराअया। हातींअ, चेलाहां वादला कुटकाहांअ सांत सीबलें पोअयें। 9 तींहीं खानारा लोक लोगभोग चार हाजार आथा। ईसुंय तीया लोकाहांन वाटे पाळ्या। 10 हातींअ तुरुतुज तो सोताअ चेलाहांअरी उळीम बोहीन दालमानुथा जील्लाम गीयो।
थोळाक फोरीसी ईसुअ पारखों केअताह
(माथी १६:१-४)
11 थोळाक फोरीसी ईसुअहीं आला। तीयाल पोरमेहेरांयज मोकल्योह तों साबीत केअ एंहडो एक चोमोत्कार केरांअ तीयाहां तीयापेअ मागणी केअयी। मांहेंअ तीयाल धीक्कारे एंहडों तीयाहांन मानावांअ खातुर ते फोरीसी लोक मोको होदांअ मोर्जी राखत्ला। तीयाअ लीदे ते तीयाअरी वाद-वीवाद केरांअ टेक्या। 12 ईसुंय मोडो हुंअकाअ खाईन आख्यों, “ईया जोमानाअ तुमां लोक मांअपेअ चोमोत्कार केरांअ काहाल मागणी केअताह? आंय तुमनेंह नोक्कीज आखुंह: तुमनेंह एंहडो चोमोत्कार आंय कीअ देखावनारोज नांह!”
13 ईसु तीयाहांन सोळीन उळीम चोळ्यो आने तालावाअ सोमकींअ आजी आगलांअ जांअ नींग्यो।
खोटा बोदाहांअ बाबोताम चेतवोंणी!
(माथी १६:५-१२)
14 चेला पुरतो मांडो लावांअ वीहराय गेहला। उळीम तीयाहांपेअ खाली एकुज मांडो आथो। 15 ईसुंय तीयाहांन चेतवोंणी देता आख्यों, “खोबोरदार रेजा! फोरीसीहींअ खोमीराअa से आने हेरोदाअ खोमीराअ से चेतीन रेजा!”
16 चेलाहां एक-बीहराल आख्यों, “आपाहांपेअ पुरता मांडा नांह तीयाअ लीदे तो एंहकींअ आखतो वीअ।”
17 चेला जों आखत्ला तों ईसु जांय गीयो। तीयाअ लीदे तीयांय तीयाहांन आख्यों, “तुमाहांपेअ पुरता मांडा नांह तीयाअ काहाल तुमां चारचा केअताह? आजी लोगुंअ तुमां नांह जांअता का? आजी लोगुंअ तुमां नांह होमजुअता का? तुमां काहाल बोराबोर नांह वीचारता? 18 तुमांअ डोंआं हाय तेबी तुमां नांह हेअता का? तुमांअ कान हाय तेबी तुमां नांह उनाअता का? पांच हाजार लोकाहांअ खातुर मांयुं पांच मांडा पाजला तांहांअ जों वेअलों तों तुमनेंह ईत नांह का? तांहांअ तुमां वादला कुटकाहांकींअ पोअलें कोतेंअ सीबलें टोलवुअलें?” 19 तीयाहां जोवाब देदो, “बारा।”
20 हातींअ तीयांय फुच्यों, “चार हाजार लोकाहांअ खातुर मांयुं सांत मांडा पाजला तांहांअ तुमां वादला कुटकाहांकींअ पोअलें कोतेंअ सीबलें टोलवुअलें?” तीयाहां जोवाब देदो, “सांत।”
21 हातींअ तीयांय तीयाहांन आख्यों, “तांहांअ तुमां आजी काहा नांह होमजुअता?”
ईसु एक आंदला मांहांअल देखतों केअहे
22 ईसु ने तीयाअ चेला बेथसायदा गांवांम आवी पोच्या। तींहीं थोळाक लोक एक आंदला मांहांअल ईसुअहीं लाला आने तीयाल कालावाला केअया का तो तीया आंदलाल आथले। 23 तांहांअ ईसु आंदला मांहांअ आथ तीईन तीयाल गांवांअ बारे लीअ गीयो। आने सोताअ थुप तीया मांहांअ डोंअहांअरी चोपळीन तीयांय तीयापेअ सोताअ आथ थोव्या आने तीयाल फुच्यों, “तुल काय देखाअहे का?”
24 तांहांअ तीया मांहांय हीईन आख्यों, “आंह, मांन मांहेंअ देखाअतेंह। पेन तें चालता चाळाहांअ होच देखाअतेंह!”
25 ईसुंय फाचा आंदला मांहांअ डोंअहांन आथल्या। तों मांहुंअ हीईज रीयों। आने तीयुज घेळी तों पुरी रीते हारों वीअ गीयों। तों बादों चोख्खी रीते हीअ सेक्यों। 26 हातींअ ईसुंय तीयाल कोअ मोकलुअता आख्यों, “गांवांम मां जातो।”
पीतोराअ कोबुलात
(माथी १६:१३-२०; लुक ९:१८-२१)
27 हातींअ ईसु आने तीयाअ चेला कायसारीया फीलीप्पी सेहेराअ पाहल्याअ गांवांहांम गीया। वाटे जाता-जाता ईसुंय चेलाहांन सोवाल केअयो का, “आंय केडो हाय तीया बाबोताम लोक काय आखताह?”
28 तीयाहां जोवाब देदो, “थोळाक लोक आखताह का तुं बापतीस्मा केअनारो योहान हाय; बीहरा आखताह का तुं एलीया हाय; बीहरा आखताह का तुं पोरमेहेराअ गोठ जाहेर केअनाराहांमेर्योअ एक हाय।”
29 ईसुंय तीयाहांन फुच्यों, “पेन आंय केडो हाय तीया बाबोताम तुमां काय आखताह?” पीतोरांय तीयाल जोवाब देदो, “तुं ख्रीस्त हाय।”
30 तांहांअ ईसुंय तीयाहांन कोळोक रीते चेतवोंणी देदी का, ते तीयाअ बाबोताम केडाल बी नांय आखे।
ईसु सोताअ मोताअ ने जीवतो वेरांअ बाबोताम आखेह
(माथी १६:२१-२८; लुक ९:२२-२७)
31 हातींअ ईसु तीयाअ चेलाहांन हीकवांअ टेक्यो का, “मांहांअ पोयरो आंय खुब दुखें वेठुं, येहुदी वोळील, मोडा पुंजारा आने नीयोम हीकवुअनारा मांन धीक्कारे आने माय टाकावे, आने तीजे दीह आंय फाचो जीवतो उठुं तीयाअ जोरुल हाय।।” 32 तीयांय तीयाहांन ए गोठ चोख्खी रीते आखी। तांहांअ पीतोर ईसुल एक वेल लीअ जायन ठोपको दांअ टेक्यो। 33 पेन ईसुंय फाचलांअ फीरीन सोताअ चेलाहांअ वेल हेअयों आने पीतोराल ठोपको देता आख्यों, “ओ सेतान, सेटे जो! तुं पोरमेहेराअ रीते नांह, पेन मांहांअ रीते वीचारोह।”
34 हातींअ ईसुंय टोलामेर्याअ लोकाहांन आने सोताअ चेलाहांन सोताअहीं हादीन आख्यों, “जो केडों मांअ चेलो बोंणांअ मागतों वीअ ता, तों सोताअ नाकार केअ, सोताअ कुरुस उसले, आने एंहकींअ कीईन मांअ चेलो बोंणे। 35 काहाका, जोंबी सोताअ जीव वाचावांअ मागे, तों तीयाल गोमावीअ; पेन जोंबी मांअ लीदे आने हारी गोठीअ लीदे सोताअ जीव गोमावीअ, तों तीयाल वाचावीअ। 36 मांहुंअ आखी दुन्या मीलवे, पेन खेरों जीवोन गुमावे ता, तीयाल काय लाब हाय? 37 खेरा जीवोनाअ बोदलाम पोरमेहेराल दांअ खातुर मांहांपेअ काय हाय का? 38 जों केडों बी मांअ बाबोताम आने मांअ बोदाअ बाबोताम ईया जोमानाअ ईमानदारी वोगुराअ आने खाराब लोकाहांअ आगलांअ नाजवाय ता, मांहांअ पोयरो, मोंजे आंय बी मांअ बाहकाअ मोडाय लीईन पोवीतोर दुताहांअरी आवेंह तांहांअ तीया मांहांअ बाबोताम नाजवाअहें।”