7
येहुदी लोकाहांअ रीवाज
(माथी १५:१-९)
1 एक दीह, येरुसालेमामेनेअ आलला फोरीसी आने नीयोम हीकवुअनारा थोळाक लोक ईसुअ चारु वेल टोलवाअया। 2 तीयाहां देख्यों का, तीयाअ थोळाक चेला आथ तुव्या वोगुर मांडा खाहला। 3 (फोरीसी आने बीहरा बादा येहुदी लोक तीयाहांअ आगलाअ डायाहां हीकवुअला रीवाजा पोरमाणे सोताअ आथ नांय तुवे तांव लोगुंअ ते नांह खाता। 4 बाजारामनेअ आवीन हातींअ ते सोताअ आथ बोराबोर तुव्या वोगुर नांह खाता। एंहडा-एंहडा ता ते बीहरा खुब रीवाज पालताह: ते सोताअ पीयालाहांन, पांअयांअ वेंडाहांन, केटलीहींन, आने फातारीअ पोतळाहांन खास रीते तुवताह।)
5 तीयाअ लीदे तीया फोरीसीहीं आने नीयोम हीकवुअनाराहां ईसुल फुच्यों, “तोअ चेला आपुअ आगलाअ डायाहां हीकवुअला रीवाजा पोरमाणे काहा नांह चालता, पेन मेला आथाहांकींअ काहा खाताह?”
6 तांहांअ ईसुंय तीयाहांन आख्यों, “येसायांय ढोंग केअनारा तुमांअ बाबोताम बोराबोरुज पोरमेहेराअ गोठ जाहेर केअहे। तीयांय ए गोठ एंहकींअ लेखीह:
‘ए लोक नांडा-नांडा आखताह का ते मांन मान देताह।
पेन ते होकीकोताम मांन मान देताज नांह।
7 ते नोक्कामीज मांअ भोकती केअताह।
काहाका, लोकाहां देदला हुकोमाहांन,
मांअ हुकोम हाय एंहकींअ आखीन ते हीकवुअताह।’
8 तुमां पोरमेहेरांय देदला हुकोम पालांअ ना पाळीन लोकाहां हीकवुअला रीवाजुज पालताह।”
9 हातींअ ईसुंय तीयाहांन आख्यों, “तुमांअ सोताअ रीवाज पालांअ खातुर पोरमेहेराअ नीयोमा पोरमाणे नांय केरांअ तुमां हुच्यार हाय। 10 मोसेंय आख्यों, ‘तोअ याहकी-बाहकाल मान दे!’ तीयांय एंहकींअ बी आख्यों, ‘जोंबी सोताअ बाहकाअ का याहकीअ बाबोताम खाराब गोगे तीयाल मोताअ साज्या देवुलोंअ!’ 11 पेन तुमां एंहकींअ हीकवुअताह का, जो कोय मांअहांपेअ सोताअ याहकी-बाहकाअ मोदोत केरांअ खातुर काय वीअ, पेन तों आखे का, ‘ईं ता कोरबान हाय’, मोंजे पोरमेहेराल ओरपोण वेअलों हाय, 12 ता तुमां तीया मांहांअल सोताअ याहकी-बाहकाअ मोदोत नांय केरांअ सुट देताह। 13 एंहकींअ बीहराहांन तुमां जे रीवाज हीकवुअताह, तीयाकींअ तुमां पोरमेहेराअ हुकोमाहांन ओर्था वोगुराअ बोंणावी देताह। आने तुमां एंहडें-एंहडें बीहरें खुब कामें केअताह।”
पोरमेहेर मांहांहांन धीक्कारे एंहडों केअनार्या बाबोत्या
(माथी १५:१०-२०)
14 हातींअ ईसुंय टोलामेर्याअ मांहांहांन फाचें सोताअ पाही हादीन तीयाहांन आख्यों, “तुमां बादें मांअ गोठ उनाया आने होमजा। 15 बारेनेअ कोयबी वोस्तु मांहांअ डेडीम जायन तीयाल बाटलावी नांह सेकती। पेन जे बाबोत्या मांहांअ मोनामेनेअ बारे नींगत्याह तेज तीयाल बाटलावत्याह। 16 [[तुमां ईं होमजांअ मागतें वीअ ता, मांयुं आमी जों आख्योंह तीयाअ कालजी राखीन वीचार केरा।”]]a
17 टोलामेर्याअ मांहांहांन सोळीन ईसु कोअमे गीयो तांहांअ तीयाअ चेलाहां तीयाल ईया दाखलाअ बाबोताम फुच्यों। 18 तांहांअ ईसुंय तीयाहांन आख्यों, “तुमां बी नांह होमजुअता का? मांहांअ बारेनेअ जों तीयाम वीहेह तों मांहांअल बाटलावी नांह सेकतों तों तुमां नांह जांअता का? 19 तों मांहांअ मोनाम नांह वीहतों, पेन तीयाअ डेडीम जाहे आने हातींअ झाळाअ वाटे बारे नींगी जाहे।” एंहकींअ कीईन ईसुंय बादी जातीअ मांडो खांअ लायोक हाय एंहकींअ जाहेर केअयों।
20 ईसुंय आजी आख्यों, “मांहांअ मोनामेनेअ जों नींगेह तोंज तीयाल बाटलावेह। 21 काहाका, मांहांअ माजर्याअ भागामेनेअ, मोंजे तीयाअ मोनामेनेअ नींगनारा खाराब वीचार तीयाल नोकटें कामें केरांअ, चोरी केरांअ, खुन केरांअ, 22 सीनालों केरांअ, लोब राखांअ, बीहरें खोटें कामें केरांअ, ठोगांअ, नोकटा कामाहांमुज वीही रांअ, आदराय राखांअ, नींदा केरांअ, ओभीमान राखांअ आने गांडाअ होच वोरतांअ दोरवोणी देताह। 23 ए बादया खाराब बाबोत्या मांहांअ मोनामेनेअ नींगत्याह, आने तीयाल बाटलावत्याह।”
येहुदी नांह तेंहडी जातीअ एक बायाअ वीसवास
(माथी १५:२१-२८)
24 ईसु गालील जील्लामेनेअ नींगीन तुर सेहेराअ सोमकुल्याअ वीस्ताराम गीयो। तींहीं तो एक कोअ रोकाअयो, आने तो तींहीं हाय तीयाअ केडाल बी खोबुर नांय पोळे एंहडी तीयाअ मोर्जी आथी। पेन तो दोबी नांय रीअ सेक्यो। 25 एक बायाअ पोयरील खाराब आत्मा लागलो। ते बाय ईसुअ बाबोताम उनाअयी आने तुरुतुज ते तीयाअहीं आवीन तीयाअ पागाअहीं उंडली पोळी। 26 ते बाय येहुदी जातीअ नांय आथी। तीयुंय सोताअ पोयरीमेनेअ खाराब आत्माल काडांअ ईसुल कालावाला केअया। 27 पेन ईसुंय तीयुल आख्यों, “पेअलांअ ता, पोयराहांन खाय लांअ दे; काहाका, पोयराहांअ मांडो हुंणाहांन टाकी देवुलोंअ हारों नांह।”
28 पेन तीयुंय जोवाब देदो, “साहेब, ईं हाचों हाय। पेन टेबोलाअ थुले बोही रेनारें हुंणे बी पोयराहां वेराला कुटका ता खातेंहजक्ने?”
29 तांहांअ ईसुंय तीयुल आख्यों, “तोअ ईया जोवाबाअ लीदे तुं कोअ जो; तोअ पोयरीमेनेअ खाराब आत्मा नींगी गीयोह।”
30 तीयु बायुंय सोताअ कोअ जायन वेअयों ता, तीयुअ पोयरी खाटलाम आरामसे हुवी रेहली, आने तीयुमेनेअ खाराब आत्मा नींगी गेहलो।
एक बेरा आने बोबळ्या मांहांअल ईसु हारों केअहे
31 हातींअ ईसु तुर सेहेराअ सोमकुल्योअ वीस्तार सोळीन सीदोन सेहेराम गीयो, आने दोह सेहेराहांअ जील्लाम राखीन गालील तालावाअ पाहल्याअ गांवांहांम गीयो। 32 तींहीं लोक एक बेरा ने मुका मांहांअल ईसुअहीं लाला। तीयाहां ईसुल कालावाला केअया का तो तीयापेअ सोताअ आथ थोवे। 33 तांहांअ ईसु तीया मांहांअल लोकाहांअ टोलामेनेअ सेटे लीअ गीयो का ते बेनुं एखला पोळे। हातींअ ईसुंय सोताअ आकळ्या तीया मांहांअ कानाहांम काल्या, आने सोताअ आकळीहींपेअ थुपीन तीया मांहांअ जीबुल आथली। 34 हातींअ ईसुंय जुगीअ वेल वीईन हुंअकाअ खादो आने तीया मांहांअ कानाहांम आख्यों, “एफाथा!” तीयाअ ओर्थो ओ हाय का, “उगळी जा!” 35 तुरुतुज तों मांहुंअ बोराबोर उनाय सेक्यों आने चोख्खी रीते गोगी बी सेक्यों। 36 हातींअ ईसुंय लोकाहांन हुकोम केअयो का, ते गोठ ते केडाल बी नांय आखे। पेन जेंहकींअ-जेंहकींअ तो तीयाहांन वादारे हुकोम केअतो रेहलो, तेंहकींअ-तेंहकींअ तीयु गोठील ते वादारेज जाहेर केअता रेहला। 37 जे लोक ते गोठ उनाअया, तीयाहांअ नोवायाअ काय पार नांय आथी। ते एंहकींअ आखत्ला, “तीयांय बादों हारोंज केअयोंह! तो ता बेरा मांहांहांन उनाअतें आने मुका मांहांहांन गोगतें केअहे।”