6
नाझारेथ गांवांम ईसु
(माथी १३:५३-५८; लुक ४:१६-३०)
1 कापेरनाहुमामेनेअ नींगीन ईसु सोताअ गांव नाझारेथ गीयो। तीयाअ चेला बी तीयाअरी गीया। 2 आरामाअ दीह तो येहुदीहींअ भोकती मोंडोळाअ कोअमे लोकाहांन बोद दांअ टेक्यो। तीयाअ बोद उनाअनारा खुब लोकाहांन नोवाय लागी। पेन थोळाक लोख आखत्ला, “ईया मांअहांय ईं बादों कांहींनेअ हीक्योंह? पोरमेहेरांय ईयाल कोत्तो बादों गीयान देदोंह? आने ओ केंहडा-केंहडा चोमोत्कार केअहे? 3 ओ ता हुतार्यो, मारीयोमाअ पोयरो, ने याकोब, योसेफ, येहुदा आने सीमोनाअ पावुह नांह का? तीयाअ बोंअयुहुंह बी आपुअज गांवांम कोएं नांह केअयें का?” एंहकींअ आखीन तीयाहां ईसुअ धीककार केअयो।
4 तांहांअ ईसुंय तीयाहांन आख्यों, “पोरमेहेराअ गोठ जाहेर केअनाराहांन बीहरी जागे मांहेंअ मान देतेंह, पेन तीयाहांअ सोताअ गांवांहांअ मांहेंअ तीयाहांन मान नांह देतें। तीयाहांअ जातुलें आने कोर्येंअ मांहेंअ बी तीयाहांन मान नांह देतें!”
5 तींहीं ईसुंय थोळाक आजार्या लोकाहांपेअ सोताअ आथ थोवीन तीयाहांन हारा केअया तेबी, तींहीं तो वादारे चोमोत्कार कीअ नांय सेक्यो। काहाका, तींहींर्याअ लोकाहां तीयापेअ वीसवास नांय केअयो। 6 तीयापेअ तीयाहां वीसवास नांय केअयो तीयाअ तीयाल नोवाय लागी।
बारा चेलाहांन ईसु हारी गोठ जाहेर केरांअ मोकलेह
(माथी १०:५-१५; लुक ९:१-६)
हातींअ ईसु बोद देता-देता गांवां-गांव फीर्यो। 7 तीयांय बारा चेलाहांन हादया आने तो तीयाहांअ बेन-बेन आदमीहींअ टुकळ्या पाळीन तीयाहांन मोकलांअ टेक्यो, आने तीयांय तीयाहांन लोकाहांमेनेअ खाराब आत्मा काडांअ आदीकार देदो। 8 तीयांय तीयाहांन हुकोम केअयो, “तुमां सेवाअ खातुर जा तांहांअ, लाकळी सीवाय बीहरों काय बी मां लीअ जाता: मांडा नांय, ठेली नांय, पोयसा बी नांय। 9 चापलें ता पोवजा, पेन वादाराअ पोतळें मां लीअ जाता।” 10 तीयांय तीयाहांन ईं बी आख्यों, “जीया बी कोअमे तुमनेंह आवकार मीले, तीया गांवांमनेअ नींगा तांव लोगुंअ तीयाज कोअ रेजा। 11 पेन जो एक गांवांअ मांहेंअ तुमांअ आवकार नांय केअ आने तुमांअ गोठ नांय उनाय ता, तीया गांवांमेनेअ नींगता, तीयाहांन चेतवांअ खातुर तुमांअ पागाहांअरी चोटलो उदलो बी फोकळी टाकजा।”
12 तांहांअ ते चेला गीया आने लोकाहांन पोरमेहेराअ गोठ जाहेर केअत्ला का, ते सोताअ पापाहांअ लीदे दुखी वीईन ते सोळी दे। 13 ते चेला लोकाहांमेनेअ खुब पुतळाहांन बी काडत्ला आने खुब आजार्या लोकाहांन तेल चोपळीन हारा बी केअत्ला।
बापतीस्मा केअनारा योहानाअ मोत
(माथी १४:१-१२; लुक ९:७-९)
14 राजा हेरोद आंतीपा ईसुअ बाबोताम उनाअयो। काहाका, ईसु आमी नांवांअतो वीअ गेहलो। तीयाअ बाबोताम थोळाक लोक आखत्ला, “ओ ता बापतीस्मा केअनारो योहान वेरांअ जोजे का जो फाचो जीवतो उठ्योह। तीयाअ लीदे ईयापेअ एंहडा चोमोत्कार केरांअ ताकोत हाय!” 15 बीहरा लोक आखत्ला, “ओ ता पोरमेहेराअ गोठ जाहेर केअनारो एलीया हाय।” तांहांअ बीहरा लोक आखत्ला, “पोरमेहेराअ गोठ जाहेर केअनाराहांअ होच ओ बी पोरमेहेराअ गोठ जाहेर केअनारो हाय।”
16 ईं उनायन हेरोदांय आख्यों, “ईं मांहुंअ ता योहानुंज हाय। मांयुं तीयाअ मुनकों वाडी टाकावलों, पेन आमी तो फाचो जीवतो वीयोह!”
17 हेरोदाअ एंहकींअ आखांअ ईं कारोण हाय: हेरोदांय सोताअ पावुह फीलीपाअ कोअवाली हेरोदीयाल तीयापेनेअ पाळावीन राखी लेदली।
18 योहान हेरोदाल आख्याज केअत्लो, “तोअ पावुह आजी जीवतोज हाय तांहांअ तीयाअ कोअवालील राखांअa पोरमेहेराअ नीयोमा पोरमाणे तुल सुट नांह।” हातींअ हेरोदीयांह योहानाल जेलाम कोंडावांअ हेरोदाल कालावाला केअया तीयाअ लीदे, हेरोदांय सोतेज सोयनीकाहांन मोकलीन योहानाल तेराव्यो आने तीयाहां तीयाल जेलाम कोंडवी देदो।
19 पेन योहानाअरी वादारे बोदलो वालांअ हेरोदीयाअ मोर्जी आथी तीयाअ लीदे, ते योहानाल माय टाकावांअ मागत्ली। पेन ते तेंहकींअ नांह कीअ सेकी। काहाका, हेरोदांय योहानाल हेरोदीयाअ से हाचवी राखलो।
20 तीयांय एंहकींअ ईया कारोणे केअलों का, तो योहानाअ मान राखत्लो आने तीयाल बीहलो। काहाका, तो जांअत्लो का, योहान हाचों आने पोवीतोर मांहुंअ हाय। तीयाल काय केरुलोंअ तों हेरोदाल नांय होमजाअत्लों। तेबी तीयाअ गोठ्या उनायांअ तीयाल गोंवत्लों।
21 पेन जांहांअ हेरोदाअ जोन्माअ दीहाअ उजवोणी वीयी तांहांअ, योहानाल माय टाकावांअ हेरोदीयाल लाग मीलीज गीयो। तीदीह हेरोदांय सारकारी ओमोलदाराहांन, लोस्कोराअ ओमोलदाराहांन, आने गालील जील्लामेर्याअ नांवांअता लोकाहांन नोतरुअला, ईयाअ खातुर का ते तीयाअरी जेवोंण केअ। 22 ते जेवोंण केअत्ला तांहांअ, हेरोदीयाअ पोयरी तीया होलाम आली आने नाची। आने तीयाकींअ तीयुंय हेरोदाल आने तीयाअ गोवाराहांन खुस कीअ देदें। तीयाअ लीदे, राजांय तीयुल आख्यों, “तुल जोंबी जोजे तों तुं मांअपेअ माग, आने तों आंय तुल देहें!” 23 तीयांय तीयुल ईं बी आख्यों, “जोंबी तुं मागोह, तों आंय तुल देहें! मांअ राज्याअ आरदो भाग बी मागो तेबी, आंय तों तुल देहें। मांयुं जों वोचोन देदोंह तों जो आंय पुरों नांय क्युंव ता मांन नोळे!”
24 तांहांअ ते पोयरी होलामनेअ बारे नींगी आने तीयुअ याहकीअहीं गीयी। हातींअ तीयुंय याहकील फुच्यों, “आंय काय मागुं?” तांहांअ तीयुअ याहकींह तीयुल जोवाब देदो, “बापतीस्मा केअनारा योहानाअ मुनकों माग!”
25 तांहांअ तुरुतुज ते पोयरी माहरी-माहरी होलाम फाची वीठी। हातींअ तीयुंय राजाअहीं जायन तीयाल कालावाला केअया, “बापतीस्मा केअनारा योहानाअ मुनकों एक पाराताम थोवीन आमीन-आमी मांन दे। एज तोअपेअ मांअ मागणी हाय।”
26 तों उनायन राजा खुब दुखी वीयो। पेन जोंबी ते मागे तों तीयुल दांअ तीयांय बादा गोवाराहांअ आगलांअ वोचोन देदलों तीयाअ लीदे, तो तीयुल ना नांय पाळी सेक्यो। 27 तीयाअ लीदे राजांय केदीहींन माय टाकनारा एक आदमील हुकोम केअयो का, तो जाय आने योहानाअ मुनकों वाडीन तों तीयाअहीं लावे। तांहांअ तीया आदमीहीं जेलाम जायन योहानाअ मुनकों वाडी टाक्यों। 28 हातींअ तो तीया मुनकाल एक पाराताम थोवीन लालो आने तीयांय तों तीयु पोयरील देदों। आने पोयरी तों सोताअ याहकीहींअहीं लीअ गीयी। 29 जों बोंण्यों तीया बाबोताम योहानाअ चेला उनाअया तांहांअ, तीयाहां जायन योहानाअ मुळदाल लीईन तीयाल एक कोबीरामb होजी देदों।
ईसु पांच हाजार आदमीहींन खावावेह
(माथी १४:१३-२१; लुक ९:१०-१७; योहान ६:१-१४)
30 मालीखाअ खास चेला सोताअ सेवा पुरी कीईन फाचा ईसुअहीं आला आने तीयाहां जों-जों केअलों ने जों-जों हीकवुअलों, तों बादों तीयाहां तीयाल आखी देखाव्यों। 31 तांहांअ ईसुंय तीयाहांन आख्यों, “मांअरी एक उजाळ जागे आवा, ईयाअ खातुर का, आपुंह एखला पोळजी आने थोळोक वोखत आराम केअजी।” खुब लोक ईसु आने तीयाअ चेलाहांअहीं एक-धार्या आवत्ला-जाहला। तीयाअ पोरीणामे, तीयाहांन खांअ बी सोमोय नांय मीलत्लो। तीयाअ लीदे, तीयांय एंहकींअ आख्यों।
32 हातींअ ते एखलाज उळीम बोहीन एक उजाळ जागे गीया।
33 पेन खुब लोकाहीं तीयाहांन नींगता देख्या आने तीयाहांन ओअखी बी काडया। तीयाअ लीदे, ते पाहल्याअ बादा गांवांहांमेनेअ, ईसु ने तीयाअ चेला जाहला तीयु जागे तोळी-तोळी दोवळुअता-दोवळुअता गीया। ते तींहीं ईसु आने तीयाअ चेलाहांअ पेअलांअज पोची गीया। 34 ईसु आने तीयाअ चेला उळीमेनेअ उत्या तांहांअ, ईसुंय लोकाहांअ ईया मोडा टोलाल देख्यो। तीयाहांपेअ तीयाल दाया आली। काहाका, ते भारवाळा वोगुराअ घेटाहांअ होच आथा। ईसुंय तीयाहांन खुब बाबोत्या हीकव्या।
35 दीह बुडांअ तीयारीम आथो तांहांअ चेलाहां ईसुअहीं आवीन आख्यों, “ओ उजाळ जागो हाय आने दीह बी बुडांअ तीयारीम हाय। 36 तीयाअ लीदे, ईया लोकाहांन मोकली दे, ईयाअ खातुर का ते पाहल्याअ खेताहांम ने गांवांहांम जायन सोताअ खातुर कावींह खावुलोंअ वेचाअतों ले।”
37 पेन तीयांय तीयाहांन जोवाब देदो, “तुमां सोतेज तीयाहांन कांवींह खांअ दा” तांहांअ तीयाहां तीयाल जोवाब देदो, “आमाहांपेअ चांदीअ बेनहोव सीक्काc वेअ तेबी, ईया बादाहांन पुगे ओताअ मांडा खावावांअ आमां जायन केंहकींअ वेचाअता लावी सेकजी?”
38 पेन तीयांय तीयाहांन आख्यों, “तुमाहांपेअ कोताअ मांडा हाय? जायन हेरा!” हीईन हातींअ तीयाहां आख्यों, “आमाहांपेअ पांच मांडा आने बेन पुजलें मासें हाय।”
39 तांहांअ ईसुंय तीयाअ चेलाहांन हुकोम केअयो का, ते बादा लोकाहांन टुकळ्या पाळीन लीला चारापेअ बोहावे। 40 तांहांअ लोक एकहोव-एकहोव आने पाचाह-पाचाह जांअहांअ टुकळीहींम लाईन-दोरी बोही गीया। 41 हातींअ ते पांच मांडा ने बेन मासें लीईन ईसुंय जुगीअ वेल हेअयों, मांडाहांअ ने मासाहांअ खातुर पोरमेहेराअ आभार मान्यो, मांडा ने मासें पाजीन कुटका केअया, आने ते कुटका लोकाहांन वाटी दांअ खातुर चेलाहांन देदा। 42 बादा लोक खायन ताराअया! 43 हातींअ चेलाहां मांडाहांअ ने मासाहांअ वादला कुटका बारा सीबलाहांम टोलव्या। 44 तींहीं मांडा खानारा आदमी-आदमीज पांच हाजार आथा।
ईसु पांअयांपेअ चालेह
(माथी १४:२२-३३; योहान ६:१५-२१)
45 हातींअ तुरुतुज ईसुंय तीयाअ चेलाहांन उळीम बोंहांअ आने गालील तालावाअ तीयु तोळी बेथसायदा सेहेराम तीयाअ आगलांअ जांअ हुकोम केअयो। हातींअ तीयांय तींहीं आथा तीया खुब लोकाहांन बी वाटे पाळ्या। 46 लोकाहांन आवजा कीईन हातींअ तो पोरमेहेराल ओरुज केरांअ खातुर डोगीअपेअ गीयो। 47 चेला जाहला ते उळी वाअतों पोळ्यों तांहांअ पोरा-पोर तालावाम आथी, आने ईसु तोळीपेअ एखलोज आथो। 48 तीयांय देख्यों का चेला चाटलें ठोकत्ला तांहांअ वारों हुंबुरुज चालत्लों। तीयाअ लीदे तीयाहांन खुब तोकलीत आथी। रातींअ तीनेक वाजे ईसु पांअयांपेअ चालतो-चालतो तीयाहांअहीं आलो। तीयाहांअ जागेनेअज नींगी जांअ तीयाअ मोर्जी आथी। 49 पेन तीयाहां ईसुल पांअयांपेअ चालतो देख्यो तांहांअ तीयाहां धार्यों का तों पुतळों हाय। ते बोंबली उठया। 50 काहाका, तीयाल देखीन ते बादा काबराय गीया। पेन ईसु तुरुतुज तीयाहांअरी गोग्यो। तीयांय तीयाहांन आख्यों, “हींमोत राखा! ओ ता आंय हाय! काबराता मां!” 51 हातींअ तो उळीम तीयाहांअरी चोळी गीयो आने वारों बी पोळी गीयों। तों देखीन ते एकदोम कांहवांयज रीया। 52 मांडाहांकींअ ईसुंय जो चोमोत्कार केअलो तीयु बाबोताम ते नांह होमज्या। तीया बाबोताम तीयाहां चोख्खी रीते नांह वीचार्यों।
गेन्नेसारेत वीस्ताराम ईसु आजार्याहांन हारें केअहे
(माथी १४:३४-३६)
53 तालावाम आजी थोळेक जायन ते गेन्नेसारेत गांवांअ तोळी आवी पोच्या। हातींअ तीयाहां तींहीं उळील बांदी। 54 ते उळीमेनेअ उत्या का तुरुतुज लोकाहीं ईसुल ओअखी काडयो। 55 तीयाअ लीदे ते लोक तीया आखा जील्लाम दोवळी वोल्या। हातींअ ईसु फोलाणी जागे हाय एंहकींअ तीया लोकाहांपेनेअ बीहरा लोक उनाअया तांहांअ, ते तीयु जागे आजार्याहांन डोली कीईन तीयाअहीं उसली लाला। 56 ईसु जीयाबी गांवांम, सेहेराम, का बीहरी जागे गीयो, तींहीं लोक आजार्याहांन बाजाराअ हेरीहींम बोहावत्ला। हातींअ आजार्यें मांहेंअ ईसुल कालावाला केअत्लें का, तो तीयाहांन तीयाअ पोतळाअ कोरील तेबी आथलांअ दे। आने जीयाहां बी तीयाअ पोतळाल आथल्यों तें बादें हारें वीअ गीयें।