4
पोअनाराअ बाबोताम दाखलो
(माथी १३:१-९; लुक ८:४-८)
1 ईसु फाचो गालील तालावाअ तोळी बोद दांअ टेक्यो। लोकाहांअ खुब मोडो टोलो तीयाअ चारु वेल टोलवाअयो। तीयाअ लीदे, तो तालावामेरीअ एक उळीम चोळीन बोठो। तांहांअ लोकाहांअ टोलो तालावाअ पाही तोळीपेअ आथो। 2 तीयांय तीयाहांन दाखलाहांकींअ खुब बाबोत्या हीकव्या। तीयाहांन हीकवुअता तीयांय एंहडों आख्यों,
3 “उनाया! एक खेळुत बीयारो पोरांअ गीयो। 4 तो पोअत्लो तांहांअ, बीयाराअ थोळाक दाणा वाटीवाली जोमीनाम पोळ्या आने चीळें आवीन तीया दाणाहांन खाय गीयें। 5 बीयाराअ बीहरा थोळाक दाणा खोळकावाली जोमीनाम पोळ्या; तींहीं वादारे कादुअ नांय आथो। बीयारो माहरीज हुकरी गीयो। काहाका, तींहीं कादुअ ओसो आथो। 6 पेन दीह वादारे उपेअ चोळ्यो तांहांअ, तोपाकींअ ते सोडा चींमटाय गीया। हातींअ ते माहरीज हुकाय गीया। काहाका, तीयाहांअ मुलें उंडे नांय गेहलें। 7 बीयाराअ बीहरा थोळाक दाणा काटाहांअ-चेखराहांवाली जोमीनाम पोळ्या। तीया काटाहांअ चेखराहां मोडें वीईन, उगला सोडाहांन दाबी टाक्या। तीयाअ लीदे, तीया सोडाहांअ पाक नांय आलो। 8 बीयाराअ बीहरा दाणा हारी जोमीनाम पोळ्या। तीयाहांअ सोडा उग्या, ते हारकींअ मोडा वीया आने तीयाहांअ खुब पाक आलो: थोळाक सोडाहांअ तीस दाणा, थोळाक सोडाहांअ सांहींट दाणा, आने थोळाक सोडाहांअ एकहोव दाणा आला।”
9 हातींअ ईसुंय आख्यों, “तुमां ईं होमजांअ मागतें वीअ ता, मांयुं आमी जों आख्योंह तीयाअ तुमां कालजी राखीन वीचार केरा!”a
दाखला दांअ ईरादो
(माथी १३:१०-१७; लुक ८:९-१०)
10 फाचलांअ नेअ, जांहांअ एखला बार चेला आने बीहरा थोळाक लोक ईसुअरी आथा, तांहांअ तीयाहां दाखलाहांअ बाबोताम तीयाल फुच्यों। 11 तांहांअ तीयांय तीयाहांन आख्यों, “पोरमेहेर लोकाहांअ जीवोनाहांम केंहकींअ राज केरांअ मागेह तीयु बाबोताअ गोठ पेअलांअ लोकाहीं नांय होमजी। तुमनेंहज ते गोठ आंय जाहेर कीअहुं। पेन जीयाहां पोरमेहेराल आजी सोताअ जीवोनाहांम राज केरांअ नांह देदो, तीयाहांन ता ईयु बाबोताम आंय दाखलाहांकींअज आखुंह। 12 तीयाअ पोरीणामे,
‘ते हेअयाज केअ,
तेबी तीयाहांन हुजेज नांय;
ते उनाअयाज केअ,
तेबी ते होमजीज नांय सेके;
जो होमजे ता, कादास ते सोताअ पाप सोळी देता,
आने पोरमेहेर बी तीयाहांन माफ केअतो।’”
पोअनाराअ बाबोताअ दाखलाअ खुलासो
(माथी १३:१८-२३; लुक ८:११-१५)
13 ईसुंय तीयाहांन ईं बी आख्यों, “तुमां ओ दाखलो नांह होमजुअता का? तांहांअ तुमां बीहरा दाखला केंहकींअ होमजाह! 14 पोरमेहेराअ गोठ जाहेर केअनारों मांहुंअ बीयारो पोअनाराअ होच हाय। 15 थोळाक लोक, बीयाराअ थोळाक दाणा पोळ्या तीयु वाटीवाली जोमीनाअ होच हाय। जांहांअ ते ते गोठ उनाअताह, तांहांअ तुरुतुज सेतान आवेह आने ते उनाअयाह ते गोठ वीहरावी देहे। 16 थोळाक लोक खोळकाली जोमीनाअ होच हाय। जांहांअ ते पोरमेहेराअ गोठ उनाअताह, तांहांअ ते तीयुल तुरुतुज राजी-खुसी मानी ता लेताह। 17 पेन ते तीयु गोठील सोताअ मोनाहांम उंडे नांह उतावता तीयाअ लीदे, ते थोळाक वोखत लोगुंअज तीयु गोठीपेअ वीसवास राखताह। तीयु गोठीपेअ तीयाहां राखला वीसवासाअ लीदे बीहरा लोक तीयाहांन दुखें पाळे का तीयाहांअ सोतावोणी केअ तांहांअ, तुरुतुज ते तीयु गोठीपेअ वीसवास राखांअ सोळी देताह। 18 थोळाक लोक काटाहांअ-चेखराहांवाली जोमीनाअ होच हाय। ते पोरमेहेराअ गोठ उनाअताह तेबी, 19 ते मालदार बोंणांअ आने बीज्या खुब वोस्तु मीलवांअ मोर्जी राखताह। तीयाअ लीदे, ते ईयु दुन्याअरी लागती-वीअगुअती वोस्ताहांअ बाबोतामुज चींता केअताह। ईयाअ पोरीणाम ईं आवेह का, ते पोरमेहेराअ गोठील वीहराय जाताह आने ते पोरमेहेराल गोंवनारें कामें नांह केअता। 20 पेन, थोळाक लोक हारी जोमीनाअ होच हाय। ते पोरमेहेराअ गोठ उनाअताह, तीयुल मानी लेताह, आने तीयुपेअ वीसवास राखताह। तीयाअ लीदे, ते पोरमेहेराल गोंवनारें कामें केअताह। ते तीस, सांहींट, का एकहोव दाणा पाकवुअनारा हारा सोडाहांअ होच हाय।”
आदालाअ थुले थोवली चीमनी
(लुक ८:१६-१८)
21 हातींअ ईसुंय तीयाहांन आख्यों, “मांहेंअ चीमनी सीलगावीन तीयुल आदालाअ थुले का खाटलाअ थुले थोवांअ खातुर कोअमें लावतेंह का? नांह, गोखलापेअ थोवांअ खातुरुज तीयुल सीलगावीन कोअमें लावतेंह। 22 तेंहकींअज कीईन, पोरमेहेराअ गोठीअ थोळाक भाग एंहडा हाय का जे मांहेंअ नांह जांअतें। पेन पोरमेहेर एंहडी मोर्जी राखेह का, मांहांहांन आमी जे बाबोत्या नांह होमजाअत्या ते बादया तें होमजे। 23 ईं तुमां होमजांअ मागतें वीअ ता, तुमां आमी जों उनाअयेंह तीयाअ कालजी राखीन वीचार केरा!”
24 हातींअ तीयांय तीयाहांन आख्यों, “मांअ गोठ जे तुमां उनाअतेंह, तीयाअ कालजी राखीन वीचार केअजा! काहाका, मांअ गोठीअ जोतोंअ तुमां वीचार केअतेंह, ओतोंअज होमजांअ पोरमेहेर तुमनेंह मोदोत कीअ। तीयाअ केअता वादारे होमजांअ बी तो तुमनेंह मोदोत कीअ। 25 जें मांअ गोठीअ वीचार कीईन तीयुल होमजुअतेंह, तीयाहांन पोरमेहेर वादारे होमजांअ मोदोत कीअ। पेन, जें मांअ गोठीअ वीचार नांह केअतें, तें पेअलांअनेअ जों जांअतें वीअ, तों बी तें वीहराय जाय।”b
बीयारो उगीन सोडा वादताह तीयाअ दाखलो
26 ईसुंय ईं बी आख्यों, “पोरमेहेराअ राज जोमीनाम बीयारो पोअतो वीअ एंहडा आदमीअ होच हाय। 27 तो आदमी दोरेक रातींअ हुवे ने वेगीअ उठे; तीया सोमोयाम बीयारा उगी नींगताह आने हातींअ सोडा वादताह; पेन तों केंहकींअ बोंणेह तों तो आदमी नांह जांअतो। 28 ते जोमीनुज सोडा वादे ने ओनाज पाके एंहकींअ केअहे। पेअलांअ हुका नींगताह, हातींअ कोंहेंअ नींगतेंह, आने हातींअ कोंहांहांम दाणा पोराअताह। 29 दाणा पाकी जाताह का तुरुतुज तो आदमी तीयाहांन दाहलाकींअ वाडांअ टेकेह। काहाका, वाडणीअ वोखत आलोह।”
रायाअ बीयाराअ दाखलो
(माथी १३:३१-३२,३४; लुक १३:१८-१९)
30 हातींअ ईसुंय आख्यों, “पोरमेहेराअ राज्याल आपुंह केंहडाअरी हारकावजी? तों होमजावांअ आपुंह केल्लो दाखलो वापरुअजी? 31 तीयाअ हारकामणी रायाअ बीयाराअरी कीअ सेकाय: रायाअ बीयारो बीयाराहांम हानांम हानोअ हाय। 32 पेन केडों तीयाल पोए तांहांअ तो उगीन वादेह आने वाळीअ बीहरा सोडाहांअ केअता तीयाअ सोडो मोडो वेअहे आने तीयाअ डालख्या ओत्या मोडया वेअत्याह का तीयुहुंअ सांयाम चीळें आवीन कोरेंअ कीअ सेकतेंह।”
33 लोकाहांन पोरमेहेराअ बाबोताअ गोठ हीकवांअ खातुर ईसुंय एंहडा खुब दाखला वापर्या। ते होमजी सेके तोतोंअ तीयांय तीयाहांन हीकव्यों। 34 तीयाहांअरी तो दाखलाहांकींअज गोग्यो। पेन सोताअ चेलाहांअरी तो एखलो पोळत्लो तांहांअ, तो तीयाहांन बादा दाखलाहांअ खुलासो देत्लो।
ईसु वादुंअ बोंद पाळेह
(माथी ८:२३-२७; लुक ८:२२-२५)
35 तीदीहज, दीह बुडताअरी ईसुंय तीयाअ चेलाहांन आख्यों, “चाला, आपुंह तालावाअ तीयु तोळी जाजी!” 36 तांहांअ चेलाहां लोकाहांअ टोलाल सोळ्यो आने ईसु पेअलांअज बोठलो तीयु उळीम चोळीन ते नींग्या। बीहरा लोक बीहरी उळीहींम तीयाहांअरी गीया। 37 तालावाम मोडों वादुंअ आलों आने उळीम चुवें पोळांअ टेक्यें। आने तुरुतुज उळी पांअयांकींअ लोगभोग पोरायज गीयी। 38 ईसु ता उळीअ फाचलार्याअ भागाम तोकयाअपेअ मुनकों थोवीन हुवत्लो। तांहांअ चेलाहां तीयाल उठवीन आख्यों, “गुरुजी! आपुंह मोय जानारा हाय तीयाअ तुल काय चींता नांह का?” 39 तांहांअ ईसुंय उठीन वादुअल ठोपको देदो आने तालावाल आख्यों, “ठाकोरे! सांत वेअ!” तांहांअ वादुंअ बोंद पोळी गीयों आने बादों सांत वीअ गीयों। 40 हातींअ ईसुंय चेलाहांन आख्यों, “तुमां काहाल काबराअयाह? तुमनेंह आजी बी वीसवास नांह का?” 41 पेन ते ता खुब काबराय गेहला आने एक-बीहराल आखांअ टेक्या, “ओ केंहडो आदमी हाय? वारों आने चुवें बी तीयाअ आखलों मानतेंह!”