3
चीमटाअला आथावाला एक मांहांअल ईसु हारों केअहे
(माथी १२:९-१४; लुक ६:६-११)
1 फाचो एक वोखत ईसु भोकती मोंडोळाअ कोअ गीयो। तींहीं एक मांहुंअ आथों। तीयाअ आथ चीमटाय गेहलो। 2 ईसु तीयाल आरामाअ दीह हारों केअहे का नांह तों हेरांअ खातुर फोरीसी लोक ईसुपेअ बोराबोर नोजुर राखत्ला। आरामाअ दीह ईसु तीयाल हारों केअ ता ते तीयापेअ गुनो थोवी सेके तीयाअ खातुर ते एंहकींअ केअत्ला। 3 तांहांअ ईसुंय चीमटाअला आथावाला मांहांअल आख्यों, “बादाहांअ आगलांअ उबी रे!” 4 हातींअ ईसुंय फोरीसीहींन फुच्यों, “आपुअ नीयोमाअ पोरमाणे आरामाअ दीह भोलों केरांअ सुट हाय का खोटों केरांअ? केडाल वाचावांअ का माय टाकांअ?”
पेन तीयाहां काय बी जोवाब नांय देदो।
5 तांहांअ ईसुंय तीयाहांपेअ खीजवायन नोजुर टाकी। ते तीया मांहांअ मोदोत केरांअ नांय मागत्ला तों देखीन तो खुब दुखी वीयो। तीयाअ लीदे, तीयांय तीया मांहांअल आख्यों, “तोअ आथ लांबो केअ!” तांहांअ तीया मांहांय सोताअ आथ लांबो केअयो आने तो आथ फाचो हारो वीअ गीयो! 6 तांहांअ फोरीसी लोक भोकती मोंडोळाअ कोअमेनेअ नींगीन हेरोद राजाल टेको देनारा येहुदी लोकाहांन तुरुतुज मील्या। तीयाहां बादाहां मीलीन ईसुल माय टाकांअ कावोतरों केअयों।
लोकाहांअ मोडो टोलो ईसुअ फाचलांअ जाहे
7 ईसु आने तीयाअ चेला सेहेरामेनेअ नींगीन गालील तालावाअ तोळी आजी आगलांअ गीया। तांहांअ लोकाहांअ मोडो टोलो तीयाअ फाचलांअ गीयो। ते लोक गालील जील्लामेनेअ, 8 येरुसालेमामेनेअ , येहुदीया जील्लाअ बीहरा सेहेराहांमेनेअ, ईदुमेया जील्लामेनेअ, योरदान खाडीअ दीह उगताअ वेल्याअ वीस्तारामेनेअ, आने तुर आने सीदोन सेहेराहांअ चारु वेल्याअ वीस्तारामेनेअ आलला। ईसु जें कामें केअत्लो तीया बाबोताम उनाअला तीयाअ लीदे लोकाहांअ ओ मोडो टोलो तीयाअहीं आललो। 9 लोकाहांअ टोलो तीयाल चीपली नांय टाके तीयाअ खातुर ईसुंय तीयाअ चेलाहांन तीयाअ खातुर एक उळी तीयार केरांअ आख्यों। 10 काहाका, तीयांय खुब आजार्याहांन हारें केअलें तीयाअ लीदे, जें जुदा-जुदा रोगाहांकींअ आजार्यें आथें तें तीयाल आथलांअ तीयापेअ पोळा-पोळी केअत्लें। 11 जांहांअ-जांहांअ पुतळाहां ईसुल हेअयो, तांहांअ-तांहांअ तें जीयाहांन लागला तीया मांहांहांन ईसुअ पागे पोळावीन बोंबली उठयें, “तुं पोरमेहेराअ पोयरो हाय!”
12 पेन सोते केडो हाय ते गोठ जाहेर नांय केरांअ ईसुंय पुतळाहांन कोळोक रीते हुकोम केअयो।
ईसु बार खास चेलाहांन नीमेह
(माथी १०:१-४; लुक ६:१२-१६)
13 हातींअ ईसु एक डोगापेअ चोळ्यो आने तीयांय सोताल पोसोंद पोळला लोकाहांन हादया। तांहांअ ते तीयाहांअहीं आला। 14 हातींअ तीयांय तीयाहांमेनेअ बार आदमीहींन नीम्या आने तीयाहांअ नांव “खास खोबुर देनारा” एंहडों पाळ्यों। तीयांय एंहडी मोरजी राखी का ते तीयाअरी रे, हारी गोठ जाहेर केरांअ तो तीयाहांन मोकले, 15 आने तीयाहांपेअ पुतळें काडांअ आदीकार रे।
16 तीयांय नीमला बारा आदमीहींअ नांवें ईयाअ पोरमाणे हाय: सीमोन (ईसुंय तीयाअ नांव “पीतोर” पाळलों।), 17 झेब्दीअ पोयरो याकोब, याकोबाअ पावुह योहान (ईसुंय तीयाहांअ नांव “बोनेरगेस” पाळलों। ईयाअ ओर्थो “गाजाअ पोयरा”), 18 आंदरीया, फीलीप, बारथोलोमी, माथी, थोमा, आलफीअ पोयरो याकोब, थादी, रोम सारकाराअ वीरुद केअनारी टुकळीमेर्योअ आथो तो सीमोन, 19 आने केरीयोत गांवांअ येहुदा जीयांय ईसुल तेरावी देदलो तो।
ईसु आने पुतळाहांअ राजा बेएलझेबुल
(माथी १२:२२-३२; लुक ११:१४-२३; १२:१०)
20 हातींअ ईसु कोअ गीयो। तांहांअ तींहीं फाचो लोकाहांअ टोलो टोलवाय गीयो। तीयाअ लीदे, ईसुल आने तीयाअ चेलाहांन खांअ बी सोमोय नांय मील्यो। 21 ईयु बाबोताम तीयाअ होगावालें उनाअयें तांहांअ तें तीयाल तीअ लावांअ खातुर नींग्यें। काहाका, मांहेंअ आखत्लें, “तो गांडो वीअ गीयोह।”
22 तोताअमुज नीयोम हीकवुअनारा थोळाक लोक जे येरुसालेमामेनेअ आलला, ते ईसुअ बाबोताम आखत्ला, “ईया मांहांअम पुतळाहांअ राजा बेएलझेबुल हाय! तीयाअ मोदोताकींअज ईं पुतळाहांन काडेह!”
23 तांहांअ ईसुंय तीया लोकाहांन सोताअहीं हादीन तीयाहांअरी दाखलाहांकींअ गोठ्या केअया, “सेतान सोतालुज केंहकींअ काडी सेके? 24 जो एक देसाअ लोक एक-बीहराअरी लोळे ता, तों देस टीकीज नांय सेके। 25 आने जो एक कुटुंबाअ लोक एक-बीहराअरी चुलाय ता, तों कुटुम टीकीज नांय सेके। 26 तेंहकींअज कीईन जो सेतान आने तीयाअ खाराब आत्मा एक-बीहराअरी लोळे ता, तो टीकीज नांय सेके, पेन तीयाअ ओंतुज आवी जाय।
27 “ताकोतावाला मांहांअल पेअलांअ बांदया वोगुर केडों बी तीयाअ कोअमें वीहीन तीयाअ माल-मीलकोत लुटी सेकतों नांह। तीयाल बांदया हातींअज तों तीयाअ कोअ लुटी सेकेह।”
28 “आंय तुमनेंह नोक्कीज आखुंह: मांहांहांन तीयाहांअ बादा पापाहांअ आने पोरमेहेराअ बाबोताम तें खोटों गोगे तीयाअ माफी मीली सेकेह। 29 पेन पोवीतोर आत्माअ वीरुद जों केडों बी खोट्या गोठ्या केअ ता, तीयाल पोरमेहेर कीदीह बी माफ नांय कीअ। काहाका, तीयांय एंहडो पाप केअयोह का जीयाअ गुनो तीयापेअ कायोम रेय।”
30 ते लोक आखत्ला, “तीयाल खाराब आत्मा लाग्योह।” तीयाअ लीदे ईसुंय एंहडों आखलों।
ईसुअ याहकी आने तीयाअ पावुह
(माथी १२:४६-५०; लुक ८:१९-२१)
31 हातींअ ईसुअ याहकी आने तीयाअ पावुह तींहीं आला। पोंगाअ बारे उबी रीईन तीयाहां तीयाल बारे हादांअ एक मांहांअल कोअमें मोकल्यों। 32 ईसुअ चारु वेल लोक टोलो वोलीन बोठला। तीयाहां तीयाल आख्यों, “उनाअ! तोअ याहकी, तोअ पावुह, आने तोअ बोंअयांह बारे तोअ वाट जोवतेंह।”