2
एक लोखवावाला मांहांअल ईसु हारों केअहे
(माथी ९:१-८; लुक ५:१७-२६)
1 ईसु कापेरनाहुम सेहेर फाचो वोल्यो। थोळाक दीह हातींअ लोकाहांन खोबुर पोळी का ईसु कोअमें हाय। 2 तीयाअ लीदे, खुब लोक तींहीं टोलवाअया। तीयाअ पोरीणामे कोअमें का बारे बांअणाअहीं उबी रांअ जागो नांय आथो। ईसु तीया लोकाहांन पोरमेहेराअ गोठ जाहेर केअत्लो। 3 तांहांअ थोळाक लोक एक लोखवावाला मांहांअल ईसुअहीं लीअ आला। चार आदमीहीं तीयाल उसल्यों। 4 ते तीया मांहांअल ईसुअहीं हुदींअ लावी नांय सेक्या। काहाका, तींहीं गोरदी आथी। तीयाअ लीदे तीयाहां, ईसु आथो तीया जागाअ उपेअ पाहाळाम बारदों पाळ्यों, आने लोखवावाला मांहांअल हुवावलों तीयु फातारील बारदाम राखीन ईसुअ आगलांअ उतावी। 5 तांहांअ तीया आदमीहींअ वीसवास देखीन ईसुंय लोखवावाला मांहांअल आख्यों, “दोस्त,a आंय तोअ पाप माफ कीअहुं!” b
6 नीयोम हीकवुअनारा थोळाक आदमी तींहीं बोठला। ते सोताअ मोनाहांम एंहकींअ वीचारत्ला का, 7 “ईं मांहुंअ एंहकींअ काहा गोगेह? तों पोरमेहेराअ नींदा केअहे। पोरमेहेराअ सीवाय बीहरों केडों पाप माफ कीअ सेकेह?”
8 तीयाहांअ मोनाहांअ एंहडा वीचार ईसु तुरुतुज जांय गीयो; तीयाअ लीदे, तीयांय तीयाहांन फुच्यों, “एंहडो सोवाल तुमां सोताअ मोनाहांम काहा उबो केअताह? 9 लोखवावाला मांहांअल ‘तोअ पाप माफ वीयाह’ एंहकींअ आखुलोंअ वादारे हेल्लों हाय का, ‘उठ, तोअ फातारी लीईन जातो रे!’ एंहकींअ आखुलोंअ? 10 पेन आंय तुमनेंह देखावेंह का मांहांअ पोयराल तोरतीपेअ पाप माफ केरांअ आदीकार हाय।” हातींअ तीयांय लोखवावाला मांहांअल आख्यों, 11 “आंय तुल आखुंह, उठ, तोअ फातारी लीईन कोअ जो!”
12 तांहांअ बादा लोकाहांअ देखताज तों मांहुंअ तुरुतुज उठ्यों आने सोताअ फातारी लीईन जातों रीयों। तांहांअ ते लोक बादा कांहवांय रीया आने “आमां एंहडों कीदीह बी नांह देख्यों!” एंहकींअ आखीन तीयाहां पोरमेहेराअ गुणगान केअया।
ईसु लेवील सोताअ चेलो बोंणांअ हादेह
(माथी ९:९-१३; लुक ५:२७-३२)
13 ईसु फाचो गालील तालावाअ तोळी-तोळी जाहलो। मांहांहांअ मोडो टोलो तीयाअहीं आलो। तांहांअ तीयांय तीयाहांन बोद देदो। 14 आजी आगलांअ जाता तीयांय आलफीअ पोयरा लेवील वेरो उगरावताह तीया ओफीसाम बोठलो देख्यो। ईसुंय तीयाल आख्यों, “मांअरी आव!”c तांहांअ लेवी उठ्यो आने ईसुअरीd गीयो।
15 फाचलांअ नेअ, ईसु लेवीअ कोअमें मांडो खाहलो। वेरो उगरावनारा खुब लोक आने बीहरा पापी लोक ईसुअ चेला बोंणला। आने ते बी ईसुअरी ने तीयाअ चेलाहांअरी खांअ बोठला। 16 नीयोम हीकवुअनारा जे फोरीसी पोंथाअ आथा तीयाहां हेअयों का, ईसु वेरो उगरावनाराहांअरी आने बीहरा पापी लोकाहांअरी खाहे। तांहांअ तीयाहां तीयाअ चेलाहांन फुच्यों, “तो काहा वेरो उगरावनाराहांअरी आने बीहरा पापी लोकाहांअरी खाहे?”
17 तों उनाअयो तांहांअ ईसुंय नीयोम हीकवुअनाराहांन आख्यों, “सोताल नीरगु माननाराहांन दाकतोराअ जोरुल नांह, पेन आजार्याहांनुंज तीयाअ जोरुल हाय! आंय सोताल हाचा माननाराहांन नांय, पेन पापी माननाराहांनुंज हादांअ आलोह।”e
उपासाअ बाबोताम सोवाल
(माथी ९:१४-१७; लुक ५:३३-३९)
18 बापतीस्मा केअनारा योहानाअ चेला आने फोरीसी उपास राखत्ला। एक दीह, थोळाक लोकाहीं ईसुअहीं आवीन तीयाल फुच्यों, “बापतीस्मा केअनारा योहानाअ चेला आने फोरीसी उपास राखताह। पेन तोअ चेला काहा उपास नांह राखता?”
19 ईसुंय जोवाब देदो, “जानीअ लोक, जांव वोल्लो तीयाहांअरी वेअ तांव, उपास राखीअ का? नांह, जांव तो तीयाहांअरी वेअ तांव ते उपास नांयज राखे। 20 पेन एंहडो दीह आवीअ का, जांहांअ वोल्लो तीयाहांअहींनेअ लीअ लेवाय; तो दीह ते उपास राखीअ।
21 “केडों बी नोवा पोतळाहांअ कुटकाहांकींअ जुना डोगलापेअ ठीगलों नांह लागवुअतों। जो लागवे ता, नोवा पोतळाअ कुटको खेचाय जाय आने तो जुना डोगलाल वादारे चीरी टाकीअ। आने तीया डोगलाम पेअलांअ केअता वादारे मोडा डुचा पोळीअ। 22 तेंहकींअज कीईन, केडों बी नोवो दाराख्साअ रोह चांबळाअ जुनी खोतलीहींम नांह पोअतों। जो पोय ता, तीया रोहाअ फेबदें वोले हातींअ तें तीयु खोतलीहींन फाळी टाकीअ। आने दाराख्साअ रोह ने चांबळाअ खोतल्या बेनुं नोककामे वीअ जाय। तीयाअ लीदे, नोवा दाराख्साअ रोहुल चांबळाअ नोवी खोतलीहींमुज पोरांअ जोजे!”
आरामाअ दीहाअ बाबोताम बोद
(माथी १२:१-८; लुक ६:१-५)
23 आरामाअ एक दीह ईसु सोताअ चेलाहांअरी ओनाजाअ थोळाक खेताहांम राखीन जाहलो। चालता-चालता तीयाअ चेला उंब्या पाजांअ टेक्या। 24 तांहांअ फोरीसीहीं ईसुल फुच्यों, “हेअजे! आरामाअ दीह जों काम नांय केरांअ जोजे तों काम तोअ चेला काहाल केअताह?”
25 ईसुंय तीयाहांन जोवाब देदो, “दावीद राजा आने तीयाअरी जे आदमी आथा ते पुखा वेअला आने तीयाहांन मांडो जोजत्लो तांहांअ दावीदांय काय काम केअलों तीया बाबोताम तुमां नांह वाच्यों का? 26 आबीयाथार मोडो पुंजारो आथो तीयु वोखत दावीद पोरमेहेराअ कोअमें वीठलो आने पोरमेहेराल चोळवुअला मांडा तीयांय खादला। आपुअ नीयोमा पोरमाणे , ते मांडा एखला पुंजाराज खाय सेकताह। पेन दावीदांय ते मांडा खादला आने तीयाअर्याअ आदमीहींन बी देदला।”