मार्कांय लेखली हारी गोठ
1
बापतीस्मा केअनारो योहान पोरमेहेराअ गोठ जाहेर केअहे
(माथी ३:१-१२; लुक ३:१-१८; योहान १:१९-२८)
1 पोरमेहेराअ पोयरा ईसु ख्रीस्ताअ बाबोताअ हारी गोठीअ सोरुवात, 2 पोरमेहेराअ गोठ जाहेर केअनारा येसायांय लेखली चोपळीम पोरमेहेरांय सोताअ पोयराल जों आखलों तीयाअ पोरमाणेज वीयी का,
“उनाअ! आंय तोअ आगलांअ मांअ खोबुर देनाराल मोकलुंह।
तो तोअ खातुर मारोग तीयार कीअ।
3 तो उजाळाम बोंबलीन आखीअ,
‘मालीखाअ खातुर मारोग तीयार केरा!
तीयाअ खातुर वाक्ळ्या वाट्या सीदया केरा!’”
4 बापतीस्मा केअनारो योहानुज तो खोबुर देनारो आथो। तो उजाळाम लोकाहांन एंहकींअ जाहेर कीईन तीयाहांअ बापतीस्मा केअत्लो का, “पोरमेहेर तुमांअ पापाहांअ माफी दे तीयाअ खातुर तुमां सोताअ पापाहांअ लीदे दुखी वीईन ते सोळी दा!” 5 येरुसालेमामेनेअ आने येहुदीया जील्लाअ बीहरा जागाहांमेनेअ खुब लोक योहानाअहीं गीया। आने तीयाहां सोताअ पाप कोबुल केअया आने योहानुंय योरदान खाडीम तीयाहांअ बापतीस्मा केअयो।
6 योहान उटाअ रुंहगाहांकींअ बोंणावलें पोतळें पोवत्लो, आने सोताअ कोंबराअरी चांबळाअ पोट्टो बांदत्लो, आने टीडें ने जोंगली मोद खाहलो। 7 तो लोकाहांन एंहकींअ जाहेर केअत्लो का, “मांअ केअता वादारे ताकोतावालो एक जांअ माहरीज आवनारो हाय। आंय ता एठा नोवीन तीयाअ सेंडोलाहांअ वादर्या सोळांअ बी लायोक नांह। 8 मांयुं पांअयांकींअ तुमांअ बापतीस्मा केअयोंह। पेन तो पोवीतोर आत्माकींअ तुमांअ बापतीस्मा कीअ।”
पोवीतोर आत्मा ईसुपेअ उतेह
(माथी ३:१३-४:११; लुक ३:२१-२२; ४:१-१३)
9 तीया दीहाहांम एंहडों वीयों का, ईसु गालील जील्लामेर्याअ नाझारेथ गांवांमेनेअ योहानाअहीं आलो, आने योहानांय योरदान खाडीम तीयाअ बापतीस्मा केअयों। 10 ईसु पांअयांमेनेअ बारे नींग्यो का तुरुतुज, तीयांय जुग उगळुअता आने पोवीतोर आत्माल कोबुतोराअ रुपाम सोतापेअ उतुअता देख्यो। 11 आने जुगामेनेअ पोरमेहेर गोग्यो a का, “तुं मांअ मेरालो पोयरो हाय। आंय तोअपेअ खुब राजी हाय।” 12 हातींअ तुरुतुज पोवीतोर आत्मांय ईसुल उजाळाम मोकल्यो। 13 आने उजाळाम ईसु चालीह दीह लोगुंअ रेहलो। तीयु वोखत सेतानांय तीयाअ पारखों केअयों। तींहीं जोंगली जोनावोरें बी आथें। आने होरगाअ दुताहीं आवीन ईसुअ सेवा केअयी।
ईसु हारी गोठ जाहेर केअहे
(माथी ४:१२-१७; लुक ४:१४-१५)
14 योहान जेलाम कोंडाअयो तीयाअ हातींअ ईसु गालील जील्लाम गीयो, आने पोरमेहेराअ बाबोताअ हारी गोठ जाहेर केअता तीयांय आख्यों, 15 “पोरमेहेराअ राज केरांअ वोखत आवीज गीयोह। b तीयाअ लीदे, तुमांअ पापाहांअ खातुर दुखी वीईन ते सोळी दा, आने हारी गोठीपेअ वीसवास राखा!”
ईसुअ चार चेला
(माथी ४:१८-२२; लुक ५:१-११)
16 ईसु गालील तालावाअ तोळीपेनेअ जाहलो तांहांअ, तीयांय सीमोनाल आने तीयाअ पावुह आंदरीयाल तालावाम तांगळें टाकता देख्या। ते बेनुं मासमार्या आथा। 17 ईसुंय तीयाहांन आख्यों, “मांअरी आवा। c आंय तुमनेंह लोकाहांन मांअ चेला बोंणावांअ हीकवेंह।” d 18 तुरुतुज ते सोताअ तांगळें सोळीन ईसुअरी गीया।
19 तींहींनेअ जाराक आगलांअ जायन ईसुंय झेब्दीअ पोयरो याकोब आने तीयाअ पावुह योहानाल उळीम सोताअ तांगळें हांदता देख्या। 20 तुरुतुज ईसुंय तीयाहांन हादया। तांहांअ ते सोताअ बाहका झेब्दील मोजर्याहांअरी उळीम सोळीन ईसुअरी गीया।
ईसु पुतळाल काडेह
(लुक ४:३१-३७)
21 हातींअ ईसु आने तीयाअ चेला कापेरनाहुम सेहेराम पोच्या। बीहरा आरामाअ दीह, ईसु येहुदीहींअ भोकती केरुलोंअ कोअमे गीयो आने तींहीं टोलवाअला लोकाहांन बोद दांअ टेक्यो। 22 बोद दांअ तीयाअ रीत देखीन ते लोक कांहवांयज रीया। काहाका, तो येहुदी नीयोम हीकवुअनाराहांअ होच नांय, पेन सोताअज आदीकाराकींअ बोद देहलो।
23 तो बोद देहलो तांहांअ, ओचींतोंज, पुतळों लागलों एक मांहुंअ तीयाहांअ भोकती केरांअ कोअमें देखाअयों, आने तों बोंबल्यों का, 24 “ओ नाझारेथ गांवांअ ईसु, तोअ ने आमांअ काय लेवो-देवो नांह। आमांअ नास मां केअतो! तुं केडो हाय तों आंय जांअहुं। तुं पोरमेहेराअहींनेअ आललों पोवीतोर मांहुंअ हाय।” 25 ईसुंय तीया पुतळाल ठोपको दीईन आख्यों, “ठाको रे आने ईया मांहांअमेनेअ नींगी जो!” 26 तांहांअ तीया पुतळांह तीया मांहांअल खुब मोअळ्यों। आने जोरपेअ बोंबलीन हातींअ तों तीया मांहांअमेनेअ नींगी गीयों। 27 तांहांअ तींहीं आथें तें बादें मांहेंअ कांहवांयज रीयें। तीयाहां एक-बीहराल आख्यों, “ए ता नोवाय लागे एंहडी गोठ हाय! तो आदीकाराकींअ बोद देहे ओतोअज नांय, पेन तो पुतळाहांन बी हुकोम केअहे, आने तें बी तीयाअ आखल्यों मानतेंह!” 28 आने तुरुतुज तीया मांहांहां, ईसुंय जों केअलों तीया बाबोताम आखा गालील जील्लामेर्याअ बीहरा खुब मांहांहांन आख्यों।
ईसु खुब आजार्यें मांहांहांन हारें केअहे
(माथी ८:१४-१७; लुक ४:३८-४१)
29 तीया भोकती मोंडोळाअ कोअमेनेअ नींगीन हातींअ ईसु, याकोब आने योहानाअरी पादरोज सीमोन आने आंदरीयाअ कोअ गीयो। 30 सीमोनुअ हावुळील बोरो चोळलो तीयाअ लीदे ते तींहीं फातारीम हुवी रेहली। ईसु तींहीं आलो का तुरुतुज एगांह तीयाल आख्यों, “ते आजार्यें हाय।” 31 तांहांअ ईसु तीयुअहीं गीयो आने तीयुल आथ तीईन उठवी। तांहांअ तुरुतुज तीयुअ बोरो उती गीयो। हातींअ ते उठी आने ईसु आने तीयाअ चेलाहांन मांडो रांदीन खावाव्यो।
32 वाअतीवेल दीह बुड्यो हातींअ, थोळेंक मांहेंअ खुब आजार्यें मांहांहांन आने पुतळें लागला बीहरा मांहांहांन ईसुअहीं लालें। 33 तीया सेहेराम रेनारों दोरेक मांहुंअ सीमोनुअ तीया पोंगाअ आगलांअ टोलवाय गीयों वीअ एंहडों लाग्यों। 34 जुदी-जुदी जातीअ आजारीहींकींअ जें आजार्यें आथें तीया खुब मांहांहांन ईसुंय हारें केअयें। आने पुतळें लागला खुब मांहांहांमेनेअ तीयांय खुब पुतळें बी काडयें। ईसुंय तीया पुतळाहांन तीया बाबोताम गोगांअ नांय देदें। काहाका, तें पुतळें जांअत्लें का ईसु पोरमेहेराअहींनेअ आलोह।
ईसु गालील जील्लाम लोकाहांन बोद देहे
(लुक ४:४२-४४)
35 बीहरे दीह वेगीअ, बोग-बोगोंह वेअती वोखत ईसु उठ्यो, आने कोअनेअ नींगीन हुना जागे गीयो। आने तींहीं तीयांय पोरमेहेराल ओरुज केअयी। 36 तांहांअ सीमोन आने तीयाअ आर्याअ ईसुल होदता-होदता तीयाअ फाचलांअ गीया। ते तीयाल मील्या तांहांअ, तो बीहरा लोकाहीं अ मोदोत केरांअ खातुर फाचो सेहेराम जाय एंहडी मोर्जी राखीन, तीयाहां तीयाल आख्यों, 37 “खुब मांहेंअ तुल होदतेंह!”
38 पेन ईसुंय तीयाहांन आख्यों, “नांह, आपुंह पाहल्याअ बीहरा गांवांहांम जाजी, ईयाअ खातुर का, आंय तींहीं बी लोकाहांन बोद द्युंव। काहाका, तीयाअ खातुरुज आंय आलोह।” 39 एंहकींअ ईसु आने तीयाअ चेला आखा गालील जील्लाम फीर्या। आने ईसु दोरेक आरामाअ दीह येहुदीहींअ भोकती मोंडोळाअ पोंगाहांम जायन लोकाहांन बोद देहलो। आने पुतळें लागला मांहांहांमेनेअ तो पुतळाहांन बी काडत्लो।
एक कोडला मांहांअल ईसु हारों केअहे
(माथी ८:१-४; लुक ५:१२-१६)
40 एक दीह एक कोडलों मांहुंअ ईसुअहीं आलों। तीयांय ईसुअ आगलांअ गुठोणे पोळीन तीयाल कालावाला केअया, “मांन हारो केरांअ तोअ मोर्जी वीअ ता, मेरबानी कीईन तेंहकींअ केअ! काहाका, मांन खोबुर हाय का, तुं मांन हारो कीअ सेकोह।” 41 तांहांअ ईसुल तीयापेअ दाया आली। तीयाअ लीदे, तीयांय सोताअ आथ लांबो कीईन कोडलाल आथल्यो, हातींअ तीयाल आख्यों, “तुल हारो केरांअ मांअ मोर्जी हाय तीयाअ लीदे, आंय तुल हारो कीअहुं!” 42 तांहांअ तुरुतुज तों मांहुंअ हारों वीअ गीयों! तीयाअ कोड मीटीज गीयो! 43 तीयाल मोकली देता पेअलांअ, ईसुंय तीयाल कोळोक रीते आख्यों, 44 “तुं हारो वीयोह ईया बाबोताम बीहराहांन मां आखतो। पेन उलटों, येरुसालेमाअ मोंदीराअ पुंजाराअहीं जाजे आने तीयाल तोअ सोरील देखावजे, ईयाअ खातुर का तो तीयाल तापासे आने तुं हारो वीयोह तीयाअ खातरी केअ। कोडलें मांहेंअ हारें वेअ तांहांअ जो भोग चोळवांअ मोसेंय तीयाहांन हुकोम केअयोह, तो तुं तीया पुंजाराअहीं लीअ जाजे, ईयाअ खातुर का तो तीयाल पोरमेहेराल चोळवे। हातींअ, पुंजारो तींहींर्याअ लोकाहांन आखे तांहांअ ते जांय लीअ का तुं हारो वीयोह।”
45 पोन तों मांहुंअ गीयों आने ईसुंय तीयाल केंहकींअ हारो केअलो तीया बाबोताम तों बीहरा लोकाहांन आखांअ टेक्यों। तीयाअ पोरीणामे, ईसु जाहेर रीते केल्ला बी सेहेराम जाय नांय सेक्यो। सेहेराहांअ बारे उजाळ जागाहांमुंज तीयाल रांअ पोळत्लों। तेबी, तीया आखा वीस्तारामनेअ मांहेंअ तीयाअहीं आवांअ चालुज रेहलें।