11
1 જેવ માંય ખ્રીસ્તોઅ નોમુના પોરમાણો ચાનોંહ, તેવ તુમું માંઅ નોમુના પોરમાણો ચાના.
જાહેર આરાદનાઅ માટો હીકામોણી
2 ખ્રીસ્તી સેવામ માંયોં જોબી કોઅયોહ ઓનો તુમહાંન હીકવ્યોહ, તો તુમું કાયોમ ઈયાદ કોઅતેહ. ઓનો જે ખ્રીસ્તી ઉપદેસ માંયોં તુમહાંન આપ્યાહ ઓનો જે ખ્રીસ્તી રીવાજ માંયોં તુમહાંન હોપ્યાહ, તીંહીં પોરમાણો તુમું ચાનતેહ તીંહીંઅ લીદો, માંય તુમહાંન સાબાસી આપોંહ. 3 પોન તુમું આજી એક બાબોત જાંઈં નેયા એંહડી માંઅ મોરજી આહાય. એટલે કા, દોરેક ખ્રીસ્તી થેઈઅ ઉપરી તીયોઅ માટી આહાય, ઓનો દોરેક ખ્રીસ્તી માટ્યોઅ ઉપરી ખ્રીસ્ત આહાય, ઓનો ખ્રીસ્તોઅ ઉપરી પોરમીહેર આહાય. 4 તીંહીંઅ લીદો, જાહેર આરાદનામ જોબી માટી પોતાઅ મુનકો ફુંઅગીન પોરમીહેરોન ઓરોજ કોએહ, કા પોવીતોર આત્મા તીયાન જાણાવની ગોઠ જાહેર કોએહ, તો પોતાઅજ ઓપમાન કોએહ. 5 તેવુજ કોઈન, જાહેર આરાદસનામ જેબી થેઅ પોતાઅ મુનકો ઉગાળો રાખીન પોરમીહેરોન ઓરોજ કોએહ, કા પોવીતોર આત્મા તીયોન જાણાવની ગોઠ જાહેર કોએહ, તે બી પોતાઅજ ઓપમાન કોએહ. કેવકા, મુનકો ફુંઅગ્યા વોગોર એંહડો કોઅનુંઅ તો, પોતાઅ મુનકો બોળાવી ટાકે તીંહીંઅ બોરાબોર આહાય. 6 ઓં, જો તે પોતાઅ મુનકો નેંય ફુંઅગે તા, તે પોતાઅ મુનકો બી કાતરાવી ટાકે. પોન એક થેઅ પોતાઅ મુનકો કાતરાવી ટાકે કા બોળાવી ટાકે તો, તીયોઅ માટો સોરોમોઅ ગોઠ આહાય. તીંહીંઅ લીદો, જાહેર આરાદનાઅ મીટીંગોમ તીયોઅ પોતાઅ મુનકો ફુંઅગુનુંઅજ જોજવે. 7 માટ્યોન પોરમીહેરો પોતાઅ રુપોમ બોંણાવ્યુહ ઓનો પોતાઅ સોબાવોઅ ગાંઉંજ તીયાન સોબાવ આપ્યુહ. તીંહીંઅ લીદો, આરાદનાઅ મીટીંગોમ તીયાઅ પોતાઅ મુનકો ફુંઅગાઅન નેંય જોજવે. પોન થેઅ તા માટ્યોઅ મોડાય દેખાવેહ. 8 આપુ જાંઅતેહ કા, પોરમીહેરોઅ એંહડી મોરજી આહાય કા, માટી થેઈપોઅ ઓમોલ ચાનવે. કેવકા, પેલ્લામ-પેલ્લોઅ માટ્યોન પોરમીહેરો થેઈમ રેખ નોખુ બોંણાવ્યુ. પોન પેલ્લામ-પેલ્યોઅ થેઈન તીયા, માટ્યોમ રેખ બોંણાવની. 9 ઓનો થેઈઅ ફાયદાઅ માટો તીયા માટ્યોન નોખુ બોંણાવ્યુ, પોન માટ્યોઅ ફાયદાઅ માટો તીયા થેઈન બોંણાવની. 10 તીંહીંઅ લીદો, જાહેર આરાદનામ વીસવાસી થેઈઅ પોતાઅ મુનકાપોઅ પોતળો ફુંઅગનુંઅ જોજવે, ઈંહીંઅ ખાતોર કા, હોરગોઅ દુતહોંન બી ખોબોર પોળે કા, તે તીયોઅ માટ્યોઅ તાબ્યોમ રેનારી આહાય.
11 પોન એંહડી ધારણા બાંદી નોખે નેતે કા, માટી નો થેઈ એક-બીજાઅ આદારો વોગોર રેઅ સેકે. કેવકા, થેઈન માટ્યો વોગોર નેંય ચાને, ઓનો માટ્યોન થેઈ વોગોર નેંય ચાને. 12 કેવકા, પેલ્લામ-પેલ્યોઅ થેઈન પોરમીહેરો માટ્યોમ રેખ બોંણાવની તેબી, તેંહડામ રેખ બાદાજ માટી થેઈમ રેખુજ જોલમુઅતાહ; ઓનો બાદો હાયાતોમ દાવનારુ તા પોરમીહેરુજ આહાય.
13 એક થેઅ જાહેર આરાદનામ પોતાઅ મુનકો ઉગાળો રાખીન પોરમીહેરોન ઓરોજ કોએ તો તીયોન સોબે કા? ઈંહીંઅ બાબોતોમ તુમું પોતોજ વીચાર કોઅજા! 14 માટી લાંબે કેંહેં રાખે તો તીયાઅ માટો સોરોમોઅ ગોઠ આહાય એવ, કુદરોત બી તુમહાંન હીકવેહ કને? 15 પોન થેઅ લાંબે કેંહેં રાખે તા, તે તીયોઅ માટો સોબા વાદવુઅનારે આહાય એવ, કુદરોત બી તુમહાંન હીકવેહ કને? કાંહાંનકા, તે તીયોન પોતાઅ મુનકો બુજાઅન માટો આપાઅયેહ. 16 પોન ઈંહીંઅ બાબોતોમ કોડો બી વાદ-વીવાદ કોઆંન માગતો વેય તા, તીયાન માંઅ ઓતોહજ આખનુંઅ આહાય: જાહેર આરાદનામ ઈંહીં સીવાય બીજુ રીવાજ નેંય વેનુંઅ જોજવે એંહડો, આમું માલીખોઅ ખાસ ખોબરી ઓનો પોરમીહેરોઅ બીજો મોંડોળહોંઅ માંહેંઅ બી ધારતેહ.
માલીખોઅ ઈયાદગીર્યોઅ ખાણો
20 તીંહીંઅ લીદો, તુમું એકઠાઅતેહ તેંહડામ તુમું જો ખાતેહ તો ખોરેખોર માલીખોઅ મોતોઅ ઈયાદગીર્યોઅ ખાણો ઝ્ડ્ડ 1 ઝ્ડ્ડદ્ 11:20 માલીખ ઈસુ ખ્રીસ્ત આપોઅ માટો મોઅયુ તીંહીંઅ ઈયાદગીર્યોઅ ખાણો ઝ્ડ્ડ। ખાતે વેય એંહડો નાંહ લાગતો. 21 કેવકા, ખાઆંન વોખોત તુમહાં વેઅને થોળેક, પોતાઅ ખાણો બીજહાંઅરી વાઅટયા વોગોર ઉતવાલ્યે-ઉતવાલ્યે ખાય જાતેહ. તીંહીંઅ પોરીણામો, થોળેક ફુકેજ રેઅ જાતેહ; તાંહાંઅ બીજે જી બોરાબોર ખાય-પીયન સાકટે પોળતેહ. 22 એવ! એંહડો આહાય કા? હોકીકોતોમ આય હાચોજ આહાય કા? ખાઆંન પીઆંન માટો તા તુમાંઅ પોતાઅ કોએ આહાય કને? એટલે, માલીખોઅ મોતોઅ ઈયાદગીર્યોઅ ખાણો તુમું ખાતેહ તેંહડામ, ઈગનાય કોઈન તુમું ગોરીબ વીસવાસહ્યોંન સોરમાવતેહ. ઓનો એવ કોઈન તુમું પોરમીહેરોઅ મોંડોળોઅ ઓપમાન કોઅતેહ. ઈંહીંઅ બાબોતોમ માંઅ તુમહાંન કાય આખનુંઅ? તુમું જો કોઅતેહ તો માંન ગોમેહ એવ માંય આખોં કા? નાંહ, એવ તા માંય નેંયજ આખોં.
માલીખોઅ મોતોઅ ઈયાદગીર્યોઅ ખાણાઅ વીદ્યોઅ બાબોતોમ પાવુલોન મીલનું રીવાજ
23 આય પોવીતોર ખાણાઅ વીદયોઅ બાબોતોમ માલીખો પોતો માંન જો આખનો, તો ઈંજ આહાય, ઓનો તે વીદી જેંહડી માંન મીલીહ તેંહડીજ માંય તુમહાંન બી હોપોંહ. જીયો રાતી યેહુદા તીયાન દોગુ કોઈન તેઆવ્યુ તીંહીંઅ પેલ્લાઅ, માલીખ ઈસુ માંડુ નેદુ, 24 ઓનો તીયાઅ માટો પોરમીહેરોઅ આબાર માનીન તો પાગ્યુ, ઓનો તો પોતાઅ ચેલહાંન આપતા તીંયહાંન આખ્યો, “આય માંડુ, તુમાંઅ માટો માંય આપનારુ આહાય તીયો ભોગો રુપી માંઅ સોરીદોઅ નીસાણી આહાય. તુમાંઅ માટો માંયોં જો કોઅયોહ તો ઈયાદ કોઆંન આય માંડુ ખાયા!” 25 એવુજ કોઈન ખાય પાળ્યો હાતીઅ, તીયા દારખાઅ રોહોઅ પીયાલુ નેદુ, ઓનો તો પોતાઅ ચેલહાંન આપતા તીંયહાંન આખ્યો, “આય પીયાલા વેઅનું દારખાઅ રોહ, પોરમીહેર તુમાંઅરી જો નોવુ કારાર કોએહ તો પાકુ કોઆંન માટો માંય માંઅ જો નોય પાળનારુ આહાય. તીંહીંઅ નીસાણી આહાય; જેંહડામ-જેંહડામ તુમું એવ કોઈન આય દારખાઅ રોહ પીયા, તેંહડામ-તેંહડામ માંયોં તુમાંઅ માટો જો કોઅયોહ તો ઈયાદ કોઆંન તો પીજા!” 26 એટલે ઈંહીંઅ ઓર્થુ ઓ આહાય કા, જીયો બી વોખોત એવ કોઈન તુમું આય માંડુ ખાતેહ, ઓનો પીયાલા વેઅનું આય દારખાઅ રોહ પીતેહ, તેંહડામ માલીખ ફાચુ આવે તાંઉં લોગોઅ તુમું, તો તુમાંઅ માટો મોઅયુ તીંહીંઅ જાહેરાત કોઅતેહ.
માલીખોઅ મોતોઅ ઈયાદગીર્યોઅ ખાણો ખાઆંન રીત
27 તીંહીંઅ લીદો, જોબી ખ્રીસ્તી બીજો ખ્રીસત્યોહોંપોઅ લાગણી રાખ્યા વોગોર આય ખાણો ખાહે ઓનો એવ કોઈન તો માલીખોઅ ઓપમાન કોએ તા, ઈંહીંઅ ઓ ઓર્થુ વેહે કા, બાદે વીસવાસી એકુજ ટુકળી વેનુંઅ જોજવે ઓનો તીંયહાંમ ફાટ-ફુટી નેંય પોળનુંઅ જોજવે એ હોકીકોત, તો હોમજુઅતો નાંહ ઓનો ઈયો બાબોતોમ તો ગુનાલો ગોંણાઈ. 28 એટલે, દોરેક વીસવાસી પોતાઅ જીવોમ તાપાસ કોઈન, કાંય બી ખોટો જાણાય તા તીયાન કાડી ટાકે! ઓનો હાતીઅજ આય વીદયોમ વાપરાઅનારુ માંડુ ખાય ઓનો દારખાઅ રોહ પીય. 29 કેવકા, જો તુમું માલીખોઅ સોરીદોઅ ઓર્થુ હોમજ્યા વોગોર તો માંડુ ખાયા નો તો ધારખાઅ રોહ પીયા તા, પોરમીહેર તુમહાંન સીકસા કોઈઅ. 30 આયોજ કારોણોઅ લીદો, તુમહાં વેઅને ઘોણે લોબલે ઓનો માંદે આહાય ઓનો બીજે થોળેક તા મોઈ બી ગોયેહ.
31 પોન આય પોવીતોર ખાણો ખાતા પેલ્લાઅ, આપોઅ જીવોમ કાંય ખોટો આહાય કા નાંહ, તો તાપાસીન હાતીઅ આપુ ખાતે નો પીતે તા, માલીખ આપહોંન સીકસા નેંય કોઅતુ. 32 ખ્રીસ્તોપોઅ વીસવાહ નેંય કોઅનારો લોકહોંઅરી સેન્નો દીહ પોરમીહેર આપહોંન ખ્રીસત્યોહોંન બી સીકસા નેંય આપે તીંહીંઅ ખાતોર, માલીખ આમુજ આપહોંન નીત્યો વોગોરોઅ આપોઅ વોરતોનોઅ માટો સીકસા કોઈન વારેહ. 33 તીંહીંઅ લીદો, માંઅ મેરાલો પાવોહ-બોંઅયોંહોં, માલીખોઅ મોતોઅ ઈયાદગીર્યોઅ ખાણો ખાઆંન માટો તુમું એકઠે વેયા તેંહડામ એક-બીજાઅ વાટ હેઅજા, ઓનો બાદે આરીજ તો ખાજા! 34 જોબી ફુકો વેય તો પોતાઅ કોઅ ખાય નેય! તાંહાંઅ તુમું આય પોવીતોર ખાણો ખાઆંન એકઠે વેયા તેંહડામ બીજો વીસવાસહ્યોંેપોઅ તુમહાંન લાગણી નાંહ તીંહીંઅ માટો, પોરમીહેર તુમહાંન સીકસાઅ ચુકાદુ નેંય આપે. બીજો બાદો માંય તુમાંઅહીં આવહીં તાંહાંઅ સીદો કોઅહીં.