માથી 22

વોરાળોઅ જેમોણોઅ દાખલુ

(લુક 14:15-24)

¹ હાતીઅ ઈસુ તીયો યેહુદી આગેવાનહોંન બીજા દાખલા આપ્યા. તીંહમે વેઅનું આય એક દાખલુ આહાય:

² “પોરમીહેર એક રાજાઅ ગાંઉં આહાય કા જીયા પોતાઅ પોયોરોઅ વોરાળોઅ જેમોણ તીયાર કોઅયો. ³ હાતીઅ તીયા વોરાળોઅ જેમોણોમ આવાઅન તીયા નોતરુઅનો લોકહોંન હાદાઅન પોતાઅ ચાકોરહોંન મોકન્યા. પોન તીયો લોકહોં તા આવાઅન ના પાળી.

⁴ “તીંહીંઅ લીદો, તીયા બીજો ચાકોરહોંન તીયો લોકહોંઅહીં એવ આખીન મોકન્યા, ‘નોતરુઅનો લોકહોંન આખજા , “માંઅ જેમોણ તીયાર આહાય. માંયોં ઘોણે તાજે જાનવોરે માઆવીન જેમોણ તીયાર કોઅયોહ, ઓનો બાદો તીયારુજ આહાય. વોરાળોઅ જેમોણોમ આવા.”’

⁵ “પોન તીયો લોકહોં ચાકોરહોંઅ ગોઠીઅ પારવાઅ નેંય કોઅયી. તે પોત-પોતાઅ કામો ચાલ્યા ગોયા. એક પોતાઅ ખેતોમ ચાલ્યુ ગોયુ. બીજુ પોતાઅ ધોંદામ ચાલ્યુ ગોયુ. ⁶ બીજહાં તીયો ચાકોરહોંન તેઅયા ઓનો તીંયહાંઅરી એકદોમ ખારાબ રીતો વોરતીન તીંયહાંન માઈ ટાક્યા. ⁷ તીંહીંઅ લીદો રાજા ભારી ઝાંજવાયન પોતાઅ સોયનીકહોંન મોકન્યા ઓનો તીયો ખુની લોકહોંન માઈ ટાકાવ્યા ઓનો તીંયહાંઅ સેરોન બાલી ટાકાવ્યો.

⁸ “હાતીઅ તીયા પોતાઅ બીજો ચાકોરહોંન હાદીન આખ્યો, ‘વોરાળોઅ જેમોણ તીયાર આહાય. પોન નોતરુઅના લોક જેમોણોમ આવાઅન લાયોક નાંહ રેયા. ⁹ તીંહીંઅ લીદો, તુમું ચોકહોંમ જાયન જેબી જોળે તીંયહાંન બાદહાંન જેમોણોમ નોતરુઅજા.’

¹⁰ “તાંહાંઅ તે ચાકોર ગોયા ઓનો હારે-માઠે જેબી મીલ્યે તીંયહાંન એકઠે કોઅયે. તે માંહેંઅ આલે તાંહાંઅ તીંયહાં કોઈન જેમોણોઅ કોઅ પોરાય ગોયો.

¹¹ “પોન રાજા ગોમારહાંન હેઆંન જેમોણોઅ કોઅમે ગોયુ તાંહાંઅ તીયા તાંહીં એક એંહડો માંહાંઅન દેખ્યો કા જો વોરાળોમ પોવાઅન મીલને પોતળે પોવ્યા વોગોર બોઠનો.

¹² “તાંહાંઅ રાજા તીયાન ફુચ્યો, “દોસ્ત, વોરાળોમ પોવાઅન પોતળે પોવ્યા વોગોર આંહીં આવાઅન તુંન કેકેવ હીંમોત વેયી?’ પોન તીયો માંઅહાંપોઅ તીંહીંઅ કાંય બી જોવાબ નોખુ. ¹³ તાંહાંઅ રાજા પોતાઅ ચાકોરહોંન આખ્યો, ‘આય માંહાંઅ આથ-પાગ બાંદીન તીયાન બાર્યોઅ આંદારામ ટાકી દેયા! તાંહીં માંહેંઅ રોળીઅ ઓનો પોતાઅ દાત કોકરાવીઅ.’”

¹⁴ આય દાખલુ પુરુ કોઅતા ઈસુ આખ્યો, “પોરમીહેરો પોતાઅ રાજોઅ ઓનુભોવ કોઆંન નોતરુઅને માંહેંઅ તા ઘોણે આહાય. પોન તીંહીંઅ ઓનુભોવ કોઅનારે માંહેંઅ તા થોળેજ આહાય.”

સારકારોન વેરુ પોઆંન બાબોતોમ

(માર્ક ૧૨:૧૩-૧૭; લુક ૨૦:૨૦-૨૬)

¹⁵ હાતીઅ ફોરોસી લોક ચાલ્યા ગોયા, ઓનો ઈસુન તીયાઅ ગોઠહીં કોઈન તેઆંન તીંયહાં નોક્કી કોઅયો. ¹⁶ હાતીઅ તીંયહાં પોતાઅ થોળોક ચેલહાંન ઈસુઅહીં મોકન્યા. ઓનો તીંયહાં હેરોદ રાજાઅ પોકસોઅ થોળોક લોકહોંન બી તીંયહાંઅરી મોકન્યા. તે બાદા ઈસુઅહીં આલા ઓનો તીયાન આખ્યો, “ગુરુજી, આમું જાંઅતાહ કા, તું બાદો રીતો હાચુજ આહાય ઓનો તું પોરમીહેરોઅ ગોઠ ઈમાનદાર્યો કોઈન હીકવોહ. ઓનો આમું ઈં બી જાંઅતાહ કા, ગોમે એંહડો મોડો માંહુંઅ વેય તેબી જે હાચી ગોઠ વેય તે તું તીયાન આખીજ દેહો. ¹⁷ તાંહાંઅ આમહાંન આખેઅ: રોમોઅ બાદસાન વેરુ પોઅનુંઅ તો આપોઅ નીયોમો પોરમાણો બોરાબોર આહાય કા નાંહ? તું કાય ધારોહ?”

¹⁸ પોન ઈસુ તા તીંયહાંઅ ખોટુ ઈરાદુ જાંઈ ગોયુ. તીંહીંઅ લીદો તીયા તીંયહાંન આખ્યો, “ઓ ઢોંગહ્યોં, તુમું માંન ગોઠહીંમ તેઆંન કેવ મોથતાહ? ¹⁹ વેરુ પોઆંન વાપરાઅહે તો સીક્કુ માંન દેખાવા.” તાંહાંઅ તીંયહાં તીયાન ડેનેરીયુ નામોઅ એક સીક્કુ દેખાવ્યુ. ²⁰ તાંહાંઅ તીયા તીંયહાંન ફુચ્યો, “ઈયો સીક્કાપોઅ કોડાઅ સાપ ઓનો નામ આહાય?” ²¹ તાંહાંઅ તીંયહાં જોવાબ આપ્યુ, “રોમોઅ બાદસાઅ સાપ ઓનો નામ આહાય.” તાંહાંઅ ઈસુ તીંયહાંન આખ્યો, “હારો તાંહાંઅ, જો બાદસાઅ લાગે તો બાદસાન આપા, ઓનો જો પોરમીહેરોઅ લાગે તો પોરમીહેરોન આપા!” ²² ઈસુઅ આય જોવાબ ઉનાયન, તે લોક ઈહવાયજ રેયા ઓનો ઈસુન સોળીન તે ચાલ્યા ગોયા.

માંહેંઅ મોઅનામ રેખ ફાચે જીવતે વેઈ તીંહીંઅ બાબોતોમ

(માર્ક ૧૨:૧૮-૨૭; લુક ૨૦:૨૭-૪૦)

²³ તો દીહજ સાદુકી પોંથોઅ થોળાક લોક ઈસુઅહીં આલા. (માંહેંઅ મોઅનામ રેખ જીવતે નેંય વેઈ એવ આય લોક માનતાહ.) તીંયહાં ઈસુન ઓ સોવાલ ફુચ્યો, ²⁴ “ગુરુજી, મોસે આખ્યોહ, ‘જો એક માટી વોગોર પોયરાઅ મોઈ જાય તા, તીયાઅ પાવોહ મોઅનારાઅ થેઈન રાખે ઓનો મોઅનારાઅ વોસ્તાર ચાલુ રાખે’. ²⁵ આમુ આમાંઅહીં હાંત પાવોહ આથા. મોડો પાવહો વોરાળ કોઅયો, ઓનો તો વોગોર પોયરોજ મોઈ ગોયુ. તીંહીંઅ લીદો, તીયાઅ થેઈન તીયા રેખ હાન્નો પાવહો રાખી. પોન આય પાવોહ બી વોગોર પોયરોજ મોઈ ગોયુ. ²⁶ એવ તીજુ પાવોહ હાતીઅ ચોથુ પાવોહ ઓનો એવ કોઈન હાંતુ પાવહોહોં તીયો થેઈન રાખી ઓનો તે બાદા વોગોર પોયરોજ મોઈ ગોયા. ²⁷ આખોર તે થેઅ બી મોઈ ગોયી. ²⁸ તાંહાંઅ, પોરમીહેર બાદો મોઅનો માંહાંહાંન ફાચે જીવતે કોઈઅ તો દીહ, તે થેઅ તીયો હાંતુ માટહ્યોં વેઅનો કોન્નો માટ્યોઅ થેઅ ગોંણાઈ? તો આખીજ નેંય સેકાય. કાંહાંનકા, તીયો બાદો માટહ્યોં તીયોન રાખની.” ²⁹ તાંહાંઅ ઈસુ તીંયહાંન જોવાબ આપ્યુ કા “ઈંહમેઅ તુમું ભુલ કોઅતાહ. તુમું પોવીતોર લેખાણહોંઅ ઓર્થુ બી નાંહ જાંઅતા ઓનો પોરમીહેરોઅ તાકોત બી નાંહ જાંઅતા. ³⁰ હોકીકોત તા આય આહાય કા, તે થેઅ તીંયહાં વેઅનો કોડાઅ બી થેઅ નેંય વેઈ. કેવકા, મોઅનો માંહાંહાંન પોરમીહેર ફાચે જીવતે ઉઠવીઅ તેંહડામ, કોડો બી કોડાઅરી બી વોરાળ નેંય કોઈઅ. ઉલટો, માંહેંઅ તા હોરગોઅ દુતહોંઅ ગાંઉં વેઈ. ³¹ પોન મોઅને માંહેંઅ જીવતે વેઈ તીંહીંઅ બાબોતોમ પોરમીહેરો તુમહાંન જો આખ્યોહ તો તુમહાં નાંહ વાચ્યો કા? ³² પોરમીહેરો આખ્યો, ‘માંય આબરાહામોઅ પોરમીહેર, ઓનો ઈસાકોઅ પોરમીહેર, ઓનો યાકોબોઅ પોરમીહેર આહાય.’ પોરમીહેર જીવતો લોકહોંઅ પોરમીહેર આહાય, મોઅનો લોકહોંઅ નાંહ.”

³³ તો ઉનાયન ટોલા વેઅના લોક તીયાઅ ઉપદેસોઅ લીદો ઈહવાયજ રેયા.

એકદોમ ખાસ હુકોમ

(માર્ક ૧૨:૨૮-૩૪; લુક ૧૦:૨૫-૨૮)

³⁴ ફોરોસહ્યોં ઉનાઅયો કા, ઈસુ સાદુકી લોકહોંન બોનતાજ બોંદ કોઈ દેદાહ. તાંહાંઅ તે એકઠા વેયા.³⁵ તીંયહાં વેઅનું એક જો યેહુદી નીયોમ હીકવુઅનારુ આથુ તીયા ઈસુઅ પારખો કોઆંન તીયાન સોવાલ ફુચ્યુ,³⁶ “ગુરુજી, બાદો નીયોમહોંમ રેખ એકદોમ ખાસ હુકોમ કોન્નું આહાય?”³⁷ ઈસુ તીયાલ આખ્યો, “‘તું તોઅ પુરો મોનો કોઈન, તોઅ પુરો જીવો કોઈન ઓનો તોઅ પુર્યો મોરજયો કોઈન માલીખ તોઅ પોરમીહેરોપોઅ માયા રાખ.’³⁸ એકદોમ ખાસ હુકોમ ઓજ આહાય.³⁹ ઓનો ઈયાઅ ગાંઉં બીજુ ખાસ હુકોમ ઓ આહાય: “તું પોતાપોઅ જેવ માયા રાખોહ તેવ બીજો લોકહોંપોઅ બી માયા રાખ.’⁴⁰ દોરેક નીયોમોઅ ઓનો પોરમીહેરોઅ ગોઠ જાહેર કોઅનારહાં લેખનો બાદયો ગોઠહીંઅ આદાર આય બેનુંજ હુકોમ આહાય.”

ખ્રીસ્ત કોડાઅ પોયોર આહાય?

(માર્ક ૧૨:૩૫-૩૭; લુક ૨૦:૪૧-૪૪)

⁴¹ ફોરોસી ઈસુઅ પાહો એકઠા વેયના તાંહાંઅ તીયા તીંયહાંન ફુચ્યો,⁴² “ખ્રીસ્તોઅ બાબોતોમ તુમું કાય ધારતાહ? તો કોડાઅ પોયોર આહાય?” તાંહાંઅ તીંયહાં જોવાબ આપ્યુ, “તો દાવીદોઅ પોયોર આહાય.”⁴³ તાંહાંઅ ઈસુ ફુચ્યો, “એંહડો વેય તા, તીયાઅ બાબોતોમ પોવીતોર આત્માઅ દોરવુણ્યો પોરમાણો દાવીદ બોનત્નું તાંહાંઅ, તીયા ખ્રીસ્તોન “માલીખ’ કેવ આખ્યુહ? દાવીદો આખ્યો,⁴⁴ 

“પોરમીહેરો માંઅ માલીખોન આખ્યો,

‘જાંઉં લોગોઅ માંય તોઅ દુસ્માનહોંન પુર્યો રીતો નેંય હારાવોં,

તાંઉં લોગોઅ તું માંઅ જોમણ્યો વેલ બોહ.’ ⁴⁵ દાવીદો પોતોજ ખ્રીસ્તોન “માલીખ’ આખ્યુહ તીંહીંઅ લીદો, ખ્રીસ્ત દાવીદોઅ પોયોર કેકેવ વેઅ સેકે?”

⁴⁶ ઈસુન કોડો બી કાંય જોવાબ આપી નેંય સેક્યો, ઓનો તો દીહ રેખ તીયાન ગોઠહીંમ તેઈ પાળાઅન કાંય બી સોવાલ ફુચાઅન કોડાઅ બી હીંમોત નેંય વેયી.