2
Ipinangagin si Jesus
Mt. 1:18-25
1 Kaso panaon ni Emperador Augusto Cesar ipinagbuut niya na magparistro yo nga'min na nasasakupan nyo Emperyo nin Roma. 2 Amo adi yo o'nang pagparistrong nangyari kaso si Cerinio pa yo gobernador nyadtong Syria. 3 Kaya sominamput yo lambang usad sa sakandang sadiring banwaan tanganing magparistro.
4 Alin sa banwaan na piba'nong Nazareth sa Galilea, sominamput man si Jose sa banwaan nin Bethlehem sa Juda, yo banwaan na pinamundagan ki Adi'ng David. Sa Bethlehem iya nagparistro, ta iya alin sa gikan ag kapag-irinsyaan ni David. 5 Kaiba niya sa pagparistro si Maria, na naipanogang ikasal sa sakanya ag nyo panaon na adto niuwat na sanang mangagin. 6 Kaso adto na sira sa logar na adto, ominabot yo oras nin pagpangagin ni Maria. 7 Kina ipinangagin niya yo o'nang agin na lalaki sa kamalig, pinotos niya adi nin lampin saka ibinutang sa babaogan. Adto iya nangagin ta uda na nin ibang logar para sakanda adto sa manga baguy paarkilaan.
Yo manga Para-asikaso nin Karniro ag yo manga Angel
8 Sa logar na adto agko manga para-asikaso nin karniro na nasa kalangtaran ag nagipirot sa pagbantay nyo sakandang manga piasikasong manga karniro. 9 Agko usad na angel nin kagorangnan na biglang nagbotwa sa sakanda ag nag-ukup sa palibot nira yo nakakapasi' na kamorawayan nin Kagorangnan. Kaya grabing takot yo sakandang namatian. 10 Alagad sominabi sakanda yo angel, “Di kamo matakot, ta agko ako dara-darang maray na barita para sa sainyo na magitawun nin dakuung kaogma'an sa nga'min na tao. 11 Ta sa aldaw na adi sa banwaan ni David ipinangangin yo sainyong Parasalbar, yo Mesias na Kagorangnan. 12 Amo adi yo magigin sinyalis para sa sainyo. Maaanap ninyo yo agin na napopotos nin lampin ag nakakabatang sa babaogan.” 13 Insigida agko biglang nagbotwa na dakuung gropo nin kalangitan sa kaabay nyo angel na nagiomaw sa Dios saka nagisabi,
14 “Pag-omaw sa Dios sa kaoroitaasan,
ag katoninungan sa nga'min na tawong dididi sa raga na namumu'yan nin Dios.”
15 Kaso ba'yan na sira nyo manga angel ta nagbalik na sa kalangitan, yo manga para-asikaso nin manga karniro nag osip-osip ag sominabi, “Mosna kita sa Bethlehem ag ki'tun ta yo ipinabarita sa sa'tun nyo Kagorangnan.” 16 Kaya dali-dali sirang pominonta, ag nakita nira si Maria ag si Jose, ag yo agin na nakabatang sa babaogan. 17 Kaso makita nira yo agin, ipinamarita' nira adtong isinabi sa sakanda nyo angel manunungud sa agin. 18 Ag yo nga'min na nakarungug nyadtong ipinamarita' nyo manga para-asikaso nin karniro nagkakangalas. 19 Alagad si Maria isinaposo' yo nga'min niyang narungug ag pinagpara-urupurup niya adto. 20 Ag yo manga para-asikaso nin karniro ominalin na nagiomaw sa Dios ta yo nga'min nirang narungug ag nakita amo nang gayud yo ibinarita' sa sakanda nyo angel.
Jesus yo ipinangaran sa Agin.
21 Kaso ominabot na yo ikawalong aldaw, tinori' yo agin ag pinangaranan nin Jesus, yo pangaran na itinao nyo angel bago pa iya ipagrukut.
Dinara si Jesus sa Templo
22 Kaso ominabot na yo aldaw nin paglilinig para ki Jose ag ki Maria, oyon sa kasogoan ni Moises pominonta sira sa Jerusalem ag iniba nira si Jesus tanganing iatang nang dagos sa Kagorangnan, 23 ta nasusurat sa kasogoan nin Kagorangnan, “Ana lambang subang na agin na lalaki sadiri nin Kagorangnan.” 24 Kaya nag-atang sira sa pagkoyog oyon sa sinasabi sa kasogoan nin Kagorangnan: “Usad na padis nin salampati o kaya dowang ogbon na bato-bato.”
25 Nyo panaon na adto agko usad na lalaki sa Jerusalem na yo pangaran Simeon. Usad iyang maraay na lalaki ag dibotadong maray sa Dios. Pono' iya nin Espirito Santo ag nagiuwat sa pagbalokat na gigib'wun nin Dios sa banwaan nin Israel. 26 Ag yo Espirito Santo ipinaisi sa sakanya na indi iya magagraan sagkud na indi niya nakikita yo Mesias na ipinanoga nyo Kagorangnan. 27 Sa pasabung nin Espirito Santo, lominuug iya sa templo. Ag ominabot man si Jose ag si Maria kaiba yo agin na si Jesus tanganing otobon yo kostombri na piayat nya Kasogoan. 28 Kaso makita ni Simeon yo agin kinumkum niya adi ag nag-omaw sa Dios na yo sabi:
29 “Kagorangnan, oyon sa saimong ipinanoga
ngowan agko na ako katoninungan dawa ako magraan na.
30 Ta nakita ko na yo saimong gigib'wun na pagsasalbar,
31 na ipinagpriparar mo para sa nga'min na tawo:
32 Iya yo ilaw na magiliwanagun sa manga Hentil
ag iya yo magigin kamorawayan sa banwaan nin Israel.”
33 Si Jose ag si Maria nagngalas sa sinabi ni Simeon manunungud sa agin. 34 Binindisyonan sira ni Simeon, ag sinab'yan si Maria na ina nyo agin: “Tandaan mo, ading agin na adi nakatoka sa ikakapadapla o pagbowat nin dakul sa Israel, magsisirbi iyang sinyalis sa pagpapatanid alagad dakul na tawo yo di niakoon sa sakanya, 35 kaya maiisyan yo sakandang manga piisip. Dail diyan, ana poso' mo baga man sana tinosok nin usad na tarum.”
36 Aadto man yo usad na babaying propeta na yo pangaran Anna, agin ni Panuel, alin sa tribo ni Aser. Gorang na iyang maray. Ag pitong taon sana sirang nag-iba-iba nyo sakanyang sugud, 37 kaso iya mabalo na ag ngowan otsinta y kwatro anyos na iya. Pirmi na iya adto sa templo nagisamba sa Dios aldaw man o ga'bi sa paagi nin pag-ayono ag pagparapangadyi. 38 Nyo oras man na adto si Anna rominani man, ag nagpasalamat sa Dios nagsabi man iya manunungud ki Jesus adto sa nga'min na niuwat sa pagtobos nin Dios sa Jerusalem.
Yo pagbalik sa Jerusalem
39 Kaso magibo na ni Jose ag ni Maria yo nga'min na kinakaipowan na piayat nyo kasogoan nin Kagorangnan, sominamput na sira sa sakandang banwaan sa Nazareth nin Galilea. 40 Yo agin dominakuung maksug, ag pono' nin kadonongan ag yo grasya nin Dios adto sakanya.
Yo Agin na si Jesus sa Luug nyo Templo
41 Kada taon, yo manga gorang ni Jesus nagiponta sa Jerusalem tanganing mag-atindir nyo Pista nin Paskwa. 42 Kaso pomonta sira sa panaon na adi adto sa Pista kaiba na nira si Jesus dail dosing taon na iya, pigibo nira adi oyon sa kostombri. 43 Pagkatapos nyo Pista, nagbaklay na sira pasamput. Nagpaobon si Jesus sa Jerusalem na indi naisiyan nyo sa sakanyang manga gorang. 44 Sa pagtaud na kaiba si Jesus sa gropo, nagpadagos sira sa sakandang pagbaklay sa mag-apon na adto. Kaso indi iya magpakita nagpoon na sirang mag-anap adto sa sakandang manga irinsiya ag manga kabisto. 45 Kaso indi nira maanap si Jesus, nagbiwlta sira sa Jerusalem tanganing adto anapun. 46 Pagkatapos nin tolong aldaw, naanap nira si Jesus sa luug nyo templo na naka-uuwa na kaiba nyo manga maestro, ag nagirungug iya sa sakanda ag nagi-onga. 47 Yo nga'min na nakarungug sa sakanya nagngalas sa sakanyang kadonongan ag manga simbag niya. 48 Biyong napangalas yo sakanyang manga gorang kaso makita iya, sominabi yo sakanyang ina, “Agin ko, taynga man ta bagadi ana ginibo mo sa sa'mun?” A'dit na ako ag yo saimong ama' sa pagpara anap sa saimo. 49 “Taono tabi ta pipara anap ako ninyo? Di ninyo isi na dapat na nasa baguy ako nin sa'kun na Ama?” Onga niya. 50 Alagad di nira naintindiyan yo sinabi sa sakanda. 51 Kina ominiba na sakanda si Jesus sa Nazareth ag naging masinonod-sonod na agin. Yo nga'min na bagay na adi sinaray sana ni Maria sa sakanyang poso'. 52 Nagtalobo si Jesus ag nadagdagan yo sa sakanyang kadonongan ag kinamu'yan iya nin Dios ag nyo manga tawo.