Ana Ebanghelyo sa Pagkasurat ni
Lukas
1
Pagprisintar
1 Ginagalangan kong Teopilo:
Dakul na yo nagmaigut na sominorat manunungud sa manga bagay na nangyari sa bitnga namun. 2 Isinorat nira yo manga bagay na oyon sa isinabi sa sa'mun nyo manga nakakita nyadto poon pa sa kapinonan, ag nagtoro manunungud sa sasabyun nin Dios. 3 Ngowan ginagalangan na Teopilo pagkatapos kong pagpara adalan yo nga'min na agko biyong paglikay poon sa kapinonan, pinagmaray ko man na isorat yo pasonodsonod na pangyayari para sa saimo, 4 tanganing magin malinaw saimo yo bilog na kaostowan manunungud adto sa nga'min na itinoro na sa saimo.
Ipinaisi na Ipapangagin si Juan na Parabunyag
5 Kaso pana'on ni Herodes adi' nin Judea, agko usad na saserdote na yo pangaran Zacarias, kaibanan sa manga kasaserdoteyan sa gropo ni Abiha. Yo sugud niyang si Elisabet alin man sa gikan ni Aaron. 6 Ana magsugud na adi matanos sa atobangan nin Dios, ag nisonod sa nga'min na kasogoan ag ipinagibuut nin Kagorangnan. 7 Alagad uda sira agin, ta si Elizabeth baog, ag gorang na sira.
8 Nyo panaon na adto yo gropo ni Zacarias among nakatoka sa pagsirbi sa templo ag iya yo nagisirbi sa atobangan nin Dios bilang saserdote. 9 Kaso maglo'go sira oyon sa kostomri nyo manga saserdote, iya yo napili' na magluug adto sa templo nyadtong aldaw na adto tanganing sobsoban yo kamangyan. 10 Nyo oras nin pagsobsob nyo kamangyan, yo nga'min na manga tao na nasa lowas nipangadyi man. 11 Nyo oras man sanang adto yo angel nin Kagorangnan nagpakita sakanya na nakatitindug sa toong parti nyo altar, adto sa pisobsoban nyo kamangyan. 12 Kaso makita ni Zacarias yo angel nasindakan iya ag natakot na maray na agko pagngalas. 13 Alagad sominabi yo angel sa sakanya, “Di ika matakot, Zacarias; ta yo pangadyi mo narungug nin Dios. Yo sugud mong si Elisabet nipangaginun nin usad na lalaki ag papangaranan mo iyang Juan. 14 Magiging maogma ikang maray kin iya maipangagin na, ag dakul man yo makikiogma saimo. 15 Ta iya magigin dakuu sa atobangan nin Kagorangnan. Ag di basang iya niinomon nin alak o ono man na nakaboborat na inomon ag iya mapopono' nin Espirito Santo bago pa iya ipangagin. 16 Kadakul sa manga gikan nin Israel ana papanombalikun niya sa Kagorangnan na sa kandang Dios. 17 Mao'ona iya sa Kagorangnan na agko kapariyong espirito ag kapangyariyan na arug nyo itinao nin Dios ki Elias, tanganing maibalik otro ana buut nyo gorang sa agin ag pabalikun yo manga tawong kusung sa kadonongan nyo manga karaayan, ag ipipriparar yo manga tawo sa pag-abot nyo Kagorangnan.” 18 Inonga ni Zacarias yo angel. “Paono ko tabi masisigoro adi? Gorang na ako ag yo sugud ko gorang naman.” 19 Sominimbag yo angel, “Ako si Gabriel, nagisirbi sa atobangan nin Dios. Sinogo ako tanganing ipaisi saimo ag daraun ana maray na baritang adi. 20 Ag ngowan dail indi ika nitood sa manga ipisabi ko saimo, mangongola ika ag indi makapagsabi sagkud sa mangyari ading ipisabi ko saimo.” 21 Mintras na ni uwat yo manga tawo ki Zacarias ag nagingalas sira kin taynga ta kauguy niya na di nilowas sa templo. 22 Kaso maglowas na iya, di na iya nakakasabi. Napag-urup-urup nira na agko iya nakitang pangitaun adto sa luug nyo templo, ta manga pasabot na sana yo sakanyang pigamit ag nagpadagos iya sa pagkangola.
23 Kaso matapos na yo panaon nin pagsirbi niya, sominamput na iya sa sakandang baguy. 24 Di nag-uguy yo sugud niyang si Elisabet rinuk'tan, ag di adi naglowas-lowas adto sa luug nyo sa kandang baguy sa luug nin limang bolan. 25 Sinabi ni Elizabeth, “Ngowan kinairakan ako nin Kagorangnan, ginibo niya adi tanganing alinun ako sa kasusupgan sa atobangan nin manga tawo.”
Ipinaisi nyo Angel na Ipapangagin si Jesus
26 Kaso ika-unum na bolan na nyo pagmabrus ni Elizabeth, sinogo nin Dios yo angel Gabriel sa usad na banwaan na pibanong Nazaret nin Galilea, 27 adto sa usad na birgin na pangaran Maria. Na naipanogang ikasal sa usad na lalaki na ana pangaran Jose, alin sa gikan ni David. 28 Pag-abot nyo angel, rominani sa kanya ag sominabi, “Ana katoninungan mapasaimo, pina-orog na babayi! Ta ana Kagorangnan didiyan sa saimo.” 29 Naribaraw si Maria sa sasabyun na adto ag pinag urup-urup niyang maray kin ono yo gostong sab'yun nyadto. 30 Alagad sinabi nyo angel sakanya, “Di ika matakot, Maria, ta ika pinaborang maray nin Dios. 31 Runggun mo adi! Ruruktan ika ag mangangagin nin usad na lalaki ag papangaranan mo iyang Jesus. 32 Magigin makapangyariyan iya ag baba'nowun nya manga tawo na Agin nin Kaoroitaasang Dios, ag gigibwun iyang adi' nyo Kagoranan na Dios arug nyo sa kanyang ginikanan na si David. 33 Mag-aadi' iya sa nga'min na gikan ni Jacob magpakinaono pa man ta yo sa kanyang kaadi'an uda kasagkuran.” 34 Inonga' ni Maria yo angel, “Paono mangyayari? Ta ako bergin pa?” 35 Sominimbag yo angel, “Nipontaun saimo yo Espirito Santo ag lilindongan ika nin kapangyariyan nyadtong kaoroitasang Dios kaya banal ana saimong ipapangagin ag baba'nowun iyang Agin nin Dios. 36 Narurumruman mo yo pinsan mong si Elisabet? Pinagisabi na di na iya mangangagin ta iya baog, alagad pinagruktan iya ngowan dawa iya gorang nang maray. Ngowan unum na bolan na iyang mabrus. 37 Ta uda imposible sa Dios.” 38 Sominimbag si Maria, “Ako usad na oripun nin Kagorangnan. Mangyari man logod sa'kun ana saimong manga ipisabi.” Kina bina'yan na iya nyo angel.
Yo Pagbisita ni Maria ki Elisabet
39 Pagkaagi nin pirang aldaw si Maria nagpriparar ag dali'daling pominonta sa usad na banwaan sa kababantuyan nin Juda. 40 Pag-abot niya sa baguy ni Zacarias nagtaong galang iya ki Elisabet. 41 Kaso marungug ni Elisabet yo taong galang ni Maria, ominiron yo agin sa luug nyo sa kanyang tuyan, ag napono' nin Espirito Santo si Elisabet. 42 Kaya sa makusug na bosis sominabi iya, “Pinaorog ika sa nga'min na babayi ag pinaorog man ana agin na pidara mo sa luug nyo saimong tuyan. 43 Kadakuung pabor ana itinao sa'kun ta biminisita ako nyo ina nyo sa'kun na Kagorangnan. 44 Ta pagkarungug ko nyo saimong pagtaong-galang ominiron sa kaogmaan yo agin sa sa'kun na tuyan. 45 Pinaorog ika ta tominood ika na mangyayari yo isinabi saimo nyo Kagorangnan!”
Yo Kanta nin Pag-omaw ni Maria
46 Ag sinabi ni Maria:
“Ana sa'kun na poso' niomaw sa Kagorangnan,
47 Ana sa'kun na espirito niogma sa Dios na sa'kun na Parasalbar.a
48 Ta narumruman niya yo kapakombabaan
nyo sa kanyang oripun.
Poon ngowan baba'nowun akong pinaorog sa nga'min na manga ginikanan.
49 Ta iya na Makapangyariyan ag banal ana pangaran gominibo sa'kun nin makangangalas na manga bagay.
50 Ag yo sakanyang pagkairak adto sa manga agko pagkatakot sa sakanya
sa nga'min na inirasyon.
51 Ipinakita niya yo kusug nyo sakanyang kamut;
ag iwinaras niya yo manga taong abawun ana kaisipan.
52 Inalin niya yo manga adi' adto sa sakandang trono,
alagad itinaas niya yo manga nasa ababang kamutangan.
53 Binosog niya nin manga mararaay na bagay yo manga napoponaw,
ag pinalayas niya yo manga mayayaman na uda basang dara maski ono man.
54 Rinugpan niya yo Israel na nagisirbi sa sakanya
2 kaya rinumrum niya yo ipinanoga niya nyadto na pagkairak,
55 ki Abraham ag sa sakanyang manga apo sagkud pa man
oyon sa kanyang sinabi sa sa'tun na manga gorang.”
56 Ag si Maria oministar adto ki Elisabet sa luug nin tolong bolan kina sominamput na iya adto sa sakandang baguy.
Ipinangagin si Juan na Parabunyag
57 Kaso ominabot na yo oras na si Elisabet nipangaginun na, nangagin iya nin usad na lalaki. 58 Nabari'tan nyo sakanyang manga pag-arabayan ag manga sadiring tawo na iya pinaki'tan nyo Kagorangnan nin dakuung pagkairak kaya nakiogma man sira sa sakanya.
59 Kaso ikawalong aldaw na nyo agin, pominonta sira adto, ta muya nirang makiusad sa sirimonya adto sa pagtotori sa agin, ag muya kintana nirang pangaranan yo agin nin Zacarias arug nyo pangaran nyo sa kanyang ama', 60 alagad sominabi yo sa kanyang ina', “Indi! Juan ana ipapangaran sa kanya.” 61 “Ono?” Riklamo nira, “Uda man basang pangaran na bagaan sa manga kapinsanan ninyo.” 62 Kaya pinasabotan nira si Zacarias tanganing maisiyan nira kin ono ana muyang ipangaran sa agin. 63 Ominayat si Zacarias nin masosoratan ag isinorat niya yo bagadi, “Juan ana ipapangaran sakanya.” Nga'min sira nangagngalas. 64 Nyo oras man sanang adto nakapagsabi na otro si Zacarias ag nagpoon na iyang mag-omaw sa Dios. 65 Yo manga kaabay na baguy nira nagkakangalas ag inabotan nin pagkatakot adto sa manga nangyari, kaya nakaukup yo manga pangyayari sa bilog na banwaan nin Judea maski adto sa manga pwirang logar. 66 Pinag para urup-urup adi nyo nga'min na nakarungug ag yo sakandang sabi, “Magiging ono kaya ading agin na adi kin magdakuu na?” Ta yo kamut nin Kagorangnan maliwanag na didiyan sa sakanya.
Yo Propisiya ni Zacarias
67 Si Zacarias na ama' ni Juan napono' nin Espirito Santo ag nagpropesiya nin bagadi:
68 “Omawun ana Kagorangnan, Dios nin Israel,
ta iya pominadidi ag tinabangan yo manga taong nisonod sakanya.
69 Nagpadara iya sa sa'tun nin usad na makapangyariyan na parasalbar na
alin sa gikan ni David na sa kanyang sorogoon.
70 Oyon sa panoga niya nyadto sa paagi nyo sa kanyang manga banal na propeta
71 kaya isasalbar niya kita sa sa'tun na manga kalaban
ag sa kamut nyo manga nagagasa' sa sa'tun.
72 Tanganing kairakan niya yo sa'tun na manga gorang
ag rurumrumun niya yo banal na kasondoan,
73 amo a'an yo bini'liwan niyang kasondoan sa sa'tun na ama' na si Abraham:
74 Tanganing isalbar kita sa sa'tun na manga kalaban,
ag makapagsamba kita sa Dios na uda takot,
75 na agko kabanalan ag katanosan,
sa nga'min na aldaw nin sa'tun na pagkaboway.
76 “Ag ika, agin ko, baba'nowun na propeta nin Kaoroitaasang Dios;
ta mao'ona ika sa Kagorangnan tanganing ipriparar yo sakanyang aagyan.
77 Ag ipapaintindi mo sa sakanyang banwaan ana manunungud sa pagsalbar sa sakanda
sa paagi nin kapatawaran nyo sakandang manga kasa'lan.
78 Sa sobrang pagkamairakun nya sa'tun na Dios,
papaliwanagun niya sa'tun arug sa aldaw nin kalangitan ana kaligtasan
79 tanganing magtaong liwanag adto sa manga nasa kadulman,
ag nasa anino nin kagra'nan,
saka pangongo'naan kita sa dagan nin katoninungan.”
80 Ag yo agin nagdakuu ag nagkusug sa espirito; ag oministar iya sa kalangtaran sagkud sa omabot yo aldaw na iya magpabisto na sa Israel.