4
ميمش نتّيسين رّوح ن لحقّ د رّوح ن لباطل.
1 أيايثما ئعزّن، أد ؤر تّامناث ݣ كول واوال نّا ديدّان زݣ لارواح، والاينّي حقّاثّن ئس ددّان زݣ ربّي ماد لا، ئتخ شيݣان ن لانبيا ئسحيلّيل فغند ݣ دّونيت.
2 ئمشيد أس تّيسينم رّوح ن ربّي: كول رّوح ئتقرّان ئد عيسى لمسيح ئدّاد ݣ دّات، هاثين ئݣا زݣ وارّاو ن ربّي.
3 كول رّوح ؤر داي تقرّان ئد عيسى لمسيح ئدّاد ݣ دّات ن بنادم، هاثين ؤر ئݣي زݣ وارّاو ن ربّي. واد أيد ئݣان رّوح ئݣان ضد ن لمسيح. دغي، هاثين ئلّا ݣ دّونيت.
4 كنّي ثاروا ن ربّي أي ثݣام، كنّي ثرّام لانبيّا ئسحيلّيلن، ئتخ رّوح ن ربّي نّا ئلّان ديݣون يوݣر ونّا ئلّان ݣ دّونيت.
5 نيثني ݣان وين دّونيت. أر ساوالن س واوال ن دّونيت أها أراسن سفليدن أيث دّونيت.
6 نكني نݣا وين ربّي، ونّاي ئسّن ربّي داخ ئسّفليد، ئد ونّا ؤر ئݣين وين ربّي ؤر داخ ئسّفليد. س-ؤياد أس دا نتّيسين رّوح ن لحقّ د رّوح ن تحلّال.
7 أيايثما ئعزّان، ئخصّاكن أت تمييريم ئنݣراتّون، ئتخ ثايري-اد ثدّاد زݣ ربّي، كول ونّا ئتّيرين هاثين ئتيارو زݣ ربّي أها أر ئتّيسين ربّي.
8 ئد ونّا ݣ ؤر ثلّي ثايري ؤر ئسّين ربّي. ئتخ ربّي ثايري.
9 س-ؤياد أس-اخ د-يسباين ربّي ثايري نّس: ألّيݣ د يوزن ممّيس أفرضي غر دّونيت حما أداخ ئش تودرت.
10 ثاد أيد ئݣان ثايري: ؤر ئد نكني أيد ئران ربّي، والاينّي نتّا أخ ئران يازند ممّيس أد ئݣ أم تمغروصت أد ئمّت خف دّنوب نّخ.
11 أيايثما ئعزّان، ألّيݣ داخ ئتّيري ربّي ئمشيدخ، ئخصّاياخ أود نكني أنمييري ئنݣراتنخ.
12 ربّي ؤر ئيلّي ماي ثيانّاين، والاينّي مش دا نتمييري ݣراخ هاثين دا ئتبيان ئس ئزدغ ربّي ديݣنخ، أها تشمّل ثايري نّس ديݣنخ.
13 ئمشيدخ أس دا نتّيسين ئس ئزدغ ربّي ديݣنخ أها نزدغ أود نكني ديݣس: ئتخ داخ ياكّا زݣ رّوح نّس ئقدسن.
14 نكني ننّاي أر نتشهاد ئس د يوزن باباثنخ ممّيس حما أد ئفوكّا ميدّن كول.
15 ونّا ئقرّان ئد عيسى ممّيس ن ربّي، هاثين ئدّا أد ئثبث ديݣس ربّي، ئيثبث نتّا ݣ ربّي.
16 نكني نسّن أها نامن س ثايري نّا س-اخ ئرا ربّي. ربّي ثايري، ونّا ئيثبثن ݣ ثايري هاثين ئيثبث ݣ ربّي أها ئيثبث ربّي ديݣس.
17 هان ماس تشمّل ديݣنخ ثايري ن ربّي : ئخصّا أد غورخ ييلي ليمان أخثار ݣ واسّ ن لحساب، ئتخ تودرت نّخ دا تشباه تودرت ن لمسيح ݣ دّونيت-اد.
18 لخوف ؤر ئلّي ݣ ثايري، والاينّي ثايري ئشمّلن دا تزّع ثوݣدا غر برّا، ئتخ لخوف دا د-يتدّو أدّاي ييلي لعقاب، ونّا دا يتݣدن ؤر ديݣس تشمّيل ثايري.
19 نكني، دا نتّيري ربّي ئتخ نتّا أخ ئران د-امزوارو.
20 ونّا ئنّان: «نكّين دا تّيريخ ربّي»، أر ئشرّه ݣماس هاثين دا ئسحيلّيل، ئتخ ونّا ؤر داي ئتّيرين ݣماس نّا دا ئتّانّاي، ميمش ئتݣّا أد ييري ربّي نّا ؤر يانّاي؟
21 ثاد أݣان لوصيث نّاخ ئشا ربّي: ونّا ئتّيرين ربّي دا ئتّيري أود ݣماس.