5
ثايري ن ربّي
1 كول ونّا ئتّامنّ ئد عيسى نتّا أݣان لمسيح هاثين ئتيارْو زݣ ربّي. د كّول ونّا ئتّيرين باباس ن وارّاو، دا ئتّيري أود تّاروا نّس ألثو.
2 س-ؤياد أس دا نتّيسين ئس دا نتّيري ثاروا ن ربّي: مش دا نتّيري ربّي أر نتݣا س لوصيّاث نّس.
3 ثايري ن ربّي دا تّيضهير أدّاي دا نتݣا س لوصيّاث نّس. د لوصيّات نّس ؤر وعيرنث.
4 ئتخ كول ونّا ئتيارون زݣ ربّي دايترّو دّونيت. د ليمانّخ نتّا أيداخ ئتّادجان أنرّو دّونيت.
5 ماݣ تّيغين أد ئرّو دّونيت؟ غاس ونّا يومن ئد عيسى نتّا أݣّان ممّيس ن ربّي.
شّهاتّ يي عيسى لمسيح
6 عيسى لمسيح نتّا أيد ديدّان س وامان د ئدامّن، ؤر ئد غاس س وامان وحدوثن، والاينّي س وامان د ئدامّن. د رّوح ن ربّي نتّا أدّا ئتشهادن، ئتخ رّوح نّس نتّا أݣّان لحقّ.
7 هاثين لّان شراض نّا ئتشهادن يي لمسيح.
8 رّوح، د وامان د ئدامّن. شراض-اد لّان ݣ يون.
9 نكني دا نتقبال شّهاتّ ن ميدّن، والاينّي شّهاتّ ن ربّي تمقّور خف (زݣ) كولشي، ئتّخ ثاد أݣّان شّهاتّ نّا س-ئشاهد ربّي يي ممّيس.
10 ونّا يومن س ممّيس ن ربّي هاثين ثثبث شّهاتّ ݣ-ؤل نّس. ونّا ؤر يومين س ربّي هاثين ئرورا ربّي دا ئسحيلّيل، ئتخ ؤر يومين س شّهاتّ نّا س-ئشاهد خف ممّيس.
11 ثاد أيد ئݣان شّهاتّ: ربّي ئشاياخ تودرت ن دوام، د تودرت-اد ئشاخت زݣ ممّيس.
12 ونّا غر ئلّا ممّيس ن ربّي، تلّا غورس تودرت، ئد ونّا غر ؤر ئلّي ممّيس ن ربّي ؤر غورس ثلّي تودرت.
تودرت ن وابدا
13 أروخاون أياتخ، كنّي نّا ئݣان ئمومن س-ئسم ن ممّيس ن ربّي، حما أت تيسنم ئس ثلّا غورون تودرت ن وابدا.
14 هان نكني غورّخ ليقين ݣ ربّي: مش أس نسّوثر شان ؤسكّين نّاس ديوسان خف لخاضر داخ ئتسلا.
15 مش نسّن ئس داخ ئسّفليد ربّي أدّاي أس نسّوثر شا زّيݣس، هاثين نسّن ئد كول أينّاس نسّوثور دا ث نتّامز.
16 مش يانّاي شان يون ديݣون ݣماس دا ئتݣا شان دّنب ؤر دا ئتسبّابن ݣ لموث، ئخصّاص أد-ئتّر يي ربّي أداس ئش تودرت. ئلّا دّنب نّا دا ئتّاوين غر لموث، ماشي خف واد أخف أخ ئخصّا أن نسّوثر يي ربّي.
17 كّو لفعايل ؤر حلنين نّا دا تݣات هاثين دّنوب أينّا، والاينّي ماشي كّو دّنب دا ئتّاوي غر لموث.
18 نكني نسّن ئد كّو يون ئتيارون زݣ ربّي ؤر دا ئتزاياد ݣ دّنوب، ئتخ ونّا ئتيارون زݣ ربّي دا ث يوحطّو. ئد شّيطان ؤر دا ئتّيغيي أد ئسيرس غيفس أفوس.
19 نكني نسّن ئد أرّاو ن ربّي أيد نݣا، ئد دّونيت كول تلّا دّاو ن لحشام ن-إبليس.
20 ألتو دا نتّيسن ئد ممّيس ن ربّي ئدّاد أها ئسّفهماخ حما أنّيسين لحقّ. نكني نلّا ݣ لحقّ س لفضل ممّيس عيسى لمسيح. واد أيد ئݣان ربّي ئحقّان د تودرت ن وابدا.
21 أيارّاو ئنو حضوياث ئخفاون نّون زݣ لاصنام. آمين.