ثابراتّ ن ـ ؤمازان يعقوب
1
لهنا
1 زݣ يعقوب، ئسمخ ن ربّي د عيسى لمسيح، دا تبلّاغخ سّلام يي تقبيلين س ثناعش ن ثاروا ن - إسرائيل نّا ئتّوزلعن.
ليمان د لحكما
2 فرحات شيݣان، أيايتما مش تلاّم ݣ شيݣان ن تمارا.
3 تسينم ئس دا د - يتّاوي ؤجرّب ن ليمان نّون صّبر.
4 ماشان أدجّات صّبر أد ئݣ ديݣون لخدمث نّس ئشمّلن، حما أت تشمّلم، تيليم ؤر تناقّصم ݣ أود يون ن-ؤسكين.
5 داي مش ئلّا ونّا مي تخصّا لحكما، أت تيتّر يي ربّي نّا دا ياكّان يي ميدّن س بلا لحساب أها ؤر دا يتلامّا.
6 ماشان ئلازم أد ئتّر س ليمان، ؤر ئتّݣا شّك. ئدّخ ونّا ݣ ئلّا شّكّ دا د-يتّاوي يي يوث ن ثمزازث ن لبحر نّا دا يتّاسي ؤژوُو أها أر ت-ئݣّار.
7 ؤر ئتضونّا بنادم نّا ئس ئدّا أد يامژ شا زݣ مولانا.
8 ئد أرݣاز غر لّان سين ئيبردان، ؤسار ئثبيث.
ونّا ئݣان أمژلوض د ونّا ئطرّحن
9 أد ئفرح ݣماثون أمژلوض، ئتخ ئيهزّا ربّي شّان نّس.
10 ئد ونّا ئطرّحن أد ئفرح، ئتخ ئسّن ئس ثيݣا ربّي د يون ئيتواضعن أها ئسّن ئس ئݣا أم يون ؤلدجّيݣ ن ثوݣا ؤر ئتدامن.
11 ئتخ أدّاي دا تنقّار ثافوشث س لحما، تسغر ثوݣا، ئتّوتّي ؤلدجّيݣ نّس، ئمّث، ئدّو زّين ن-ؤراعا نّس. س-ئيمشيد أس ئتّالوُو ونّا ئطرّحن ألثو ݣ شغالات نّس.
تامارا د ؤجرّب
12 أياعريت يي ؤرݣاز ئتصبارن ݣ لمحاين، ئدّخ أدّاي ئسّيك أجرّب دا ئتّامژ تّاج ن تودرت نّا ئقاول مولانا يي وينّا ثيتّيرين.
13 ؤر ئتّيني أود يون أدّاي ييلي ݣ ؤجرب س-ؤينّا ؤر ئحلين: «هان أجرّب-اد ئدّاد زݣ ربّي!» ئتخ ربّي ؤر دا ئتوجرّاب س-ؤينّا ؤر-ئحلين، د ؤر دا ئتجرّاب أود يون س-ؤينّا ؤر-ئحلين.
14 ݣ لحق، كّو بنادم دا ئتّوغرّا أدّاي ئدفور شهوات نّس.
15 أدّاي دا ثّارو شهوث دا ثّارو دّنوب، ئد دّنوب أدّاي مغورن، دا تّاوين غر لموث.
16 أيايتما ئعزّان، أد ؤر تّادجات أود يوت لحاجت أكون تسّوفغ زݣ ؤبريد.
17 كو ثوكي ئژيلن د كو لهديث ئشملن ثݣزد زݣ وافلّا، تضرد زݣ غور ربّي، باب ن-ئثران نّا ؤر دا ئتبدّالن، ؤلا ئضور ئݣ أمالو.
18 س لموراض نّس، ياروياخ س واوال ن لحق حما أد نݣ لغلت ثامنزوت سنّيث، يي كو مايد ئخلق.
سّغداث أر تݣّيم س واوال ن ربّي
19 ئوا أيايثما ئعزّان، ئلازم يي بنادم أد ئسل دغيا، أها ؤر ئزرّب ݣ واوال، ؤلا ئزرب ݣ-ؤحراق،
20 ئتخ بنادم أدّاي ئقلّق، ؤر دا ئتݣا أينّا ئرا ربّي.
21 خف ؤياد، كساث زݣ ديݣّون أينّا ئسّوساخن د كول تيخوث نّا تݣام، ثرحبم س-ؤوتواضع يي واوال ئتّوزرعن ديݣون، ئغيين أكن ئفوكّا.
22 ماشان ݣاث س واوال ن ربّي، ؤر ئد غاس أتسلم أر تغشّام ئخفاون نّون.
23 ئدّخ ونّا ئسغادن يي واوال أها ؤر دا ئس ئتّݣّا، هاثين دا ئتشباه يون ن-ؤرݣاز ئتّانّاين ؤدم نّس ݣ لمري.
24 داي أدّاي يانّاي ئخف نّس، دغيا ئتّو ميمش ئݣا.
25 ئد ونّا ئتراعان ݣ شّرع ئشمّلن، ئݣان شّرع ن-ؤفوكّا أها أر ثيتݣّا كّويّاس، ؤر ئد غاس أد ئسل ئتّو، ماشان دا ئتّݣّا س واوال ن ربّي. هان واد أياعرين نّس س-ؤينّا ئتّݣّا.
26 مش ئلّا شان يون ئغال ئس ئلّا غورس دّين ئصفان أها ؤر ئغي أد-ئحشم ݣ ئلس نّس، هاثين دا ئتغشّا ئخف نّس د دّين نّس ؤر ئسوي أود حاح.
27 دّين ئصفان غر ربّي بّاتنخ، هان ماي تيݣان: أد ئشتّي أها ئتهلّا بنادم ݣ ئووجيل د تيدجّال نّا مي مّوتن ئرݣزن نست أها أر تعيشنث ݣ ثمارا، ئحضو ئخف نّس زݣ ؤينّا ؤر ئحلين ݣ دّونيت.