ثابراتّ ئي ئعبرانين
1
تبرات ئ مومن ئعبرانين
1 تيزويري، ئسيول ربّي يي لجدود نّخ س-ئلس ن لانبيا، شيݣان ن لمرّات د س-ئبردان خالفنين.
2 والاينّي دغي، ݣ-ؤسّان-اد ئنݣورا، ئسّيولاخ س ممّيس نّا س-ئخلق دّونيت، نتّا أݣان أورّات ن ما ݣان شا،
3 نتّا أيد ئݣان أسيد ن لعزّ ن ربّي أها ئݣ صّورت نّس ئحقّان. دا يوحطّو دّونيت كّول س واوال نسّ ئجهدن. داي لّيݣ ئسزديݣ ميدّن كول زݣ دّنوب نّسن، ئقّيم خف ؤفاسي ن ربّي، أمقران ݣ-ئݣنّا،
أدّور ن مميس ن ربي يوݣر وين لملايكا
4 ياغول وادّور نس ئخاتر ؤݣار ن وادّور ن لملايكا. ئوشاس ربّي ئسم نّا يوݣرن ئسماون نّسن.
5 ئس ئلّا شا ن يون زݣ لمالايكا ئ مي ئنّا ربّي: «شݣ أيد ئݣان ممّي! داي زݣ واسّ-اد، نكّ أيد ئݣان ئبّاش؟» أها ئنّا ألتو: «نكّ أد ݣخ ئبّاس، أها ئݣ نتّا ممّي».
6 والاينّي لّيݣ ديوزن أمنزو نّس غر دّونيت، ئنّا: «ئخصّا أد سجدنت لملايكا ن ربّي كول دات-اس!»
7 ئد لملايكا، ئنّا غيفسنت: «ئݣا ربّي لملايكا نّس أم ؤزوو د-ئخدّامن نّس أم ؤشعّال ن لعافيت».
8 والاينّي ئمشينّا ئنّا لكتاب ن ربّي خف ممّيس: «تاݣلديتّ نّش، أربّي، أت تقّيم دّيما. هاتين س لحقّ أس دا تنباطّ خف تݣلديتّ نّش.
9 دا تّيريت لحقّ، أر تشرهت لباطل، خف ؤياد، ربّي نّش ئختارش لّيݣ ئسلفاش يي ئخف س زّيت ن لفراحيت، أها ئعزلش زݣ ئنݣر ن-ئسمون نّش».
10 ئنّا ألتو: «هاتين شݣّين، أربّي، أيد ئخلقن أشال زݣ تيزويري د-ئݣنوان لخدمت ن-ئفاسّن نّش.
11 أياد كول أد-ئفنو، ئد شݣ أت تقّيمت أبدا، أشال د-ئݣنوان أد رشون كول نّسن أم لشتّان.
12 أت تن تاضييت أم ؤسلهام، أت تن تبدّلت أم ؤعبان. والاينّي شݣ ؤر دا تبدّالت أبدا، لعمر نّش ؤر غورس لحدّ».
13 ئس دجين ئنّا ربّي يي شا ن يون زݣ لملايكا: «قّيم خف ؤفاسي نو أر د رارخ ئعداون نّش دّاو ن-ئضار نّش؟»
14 ئس ؤر-ئد كول نّسن دا خدمن يي ربّي يازنتنيد حما أد عاون وينّا دّانين أد ورتن نّجا.